لا تعقدونهم

أنا وايد كاسرين خاطري اليهّال و الأمهات..اليهّال عشان الدراسه

.

و الأمهات عشان التدريس..طبعا مشكلة غالبية الأمهات اللي عندهم

.

يهال صف ثانيه أبتدائي..سورة العاديات..المشكله أن ماله علاقه

.

بالطفل شاطر و لا كسلان..سورة العاديات مفرداتها صعبة النطق

.

على طفل عمره 8 سنين..فكل سنه لازم نسمع قصة أم مع تحفيظ

.

السوره..آخر وحده سمعتها أمس..قررت صديقتي أن بنتها تسقط ولا

.

تضغط عليها أكثر للحفظ..تقول لي شلون بنتها قامت تبجي من الخوف

.

من كثر ما أهيه عصبت

.

أنا باعرف شي واحد..أحنا الحين المفروض اللي بجيلنا وصلوا مراكز قياديه

.

بوزارات الدوله..ما يشوفون أن أسلوب التحفيظ اللي مورس علينا ما

.

فادنا..بس كرّهنا بمدرسين العربي و الدين..و عقّدونا من هالمادتين..و لا أحد

.

أعرفه دخل يوم الأمتحان أو يوم التسميع حافظ..فليش الأصرار على هالأسلوب

.

المنفّر في التعليم مع أن الحين بأمكانهم أضافة أساليب تحبب اليهّال بالدين و العربي

.

بدال ما يتعقّدون مثل ما تعقّدنا

المعاياة

أعتقد أن أكثر شعب بالدنيا يحب المعاياة هم الكويتيون..ما يمديك تبدي سالفه

.

أو تناقش سالفه..تلاقي واحد و لاّ وحده ناطين يقول أو تقول لأ..هو نطروا..وأصلا

.

ما كنتو معاي لا بالموقف و لا السالفه..بس يموتون على المعاياة من أجل المعاياة..واللي

.

يحر بالموضوع بعد أذا قاعدين نتناقش و يعايونك و يداحرونك و ينشفون ريجك

..

و بالأخير تكتشف أنهم نفس وجهة النظر.

.

في ناس من حبهم حق المعاياة ما يوهلون عشان يسمعونك أهم شي أنهم يدلون بدلوهم

.

و بما ان دخلنا العشر الأواخر..و البطاريات بدت تخنّس..فقررت أني ألتزم الصمت أو

.

ما أدخل في نقاشات أنا في غنى عنها..لأن أنا كبرت و ما قمت أستحمل المعاياة

.

لأني يمكن أحارب

الحمدالله على السلامه

الحمدالله على السلامه..ما بغينا نوصل حق نهاية الأسبوع

.

أصلا فيني فروح لأن بلشنا العطله..من كثر أحداث هالأسبوع

.

المشكله أن من كل صوب..في شي..ما كان أكو مكان الواحد

.

يقدر يصد فيه و يريّح شويه

.

التعب بالموضوع أن من كل النواحي

.

الصعيد الشخصي: أحتكاكي الأول و الأخير مع المقاولين

.

الصعيد الأجتماعي: القرقيعان..و وصلكم القرقيعان و لا لأ

.

دراريع اليهال..استانسوا اليهال لما راحو؟

.

و طبعا فوق هذا محاتاة اليهال على ما يوصلون البيت

.

الصعيد المهني: أنهيار السوق..و محاتاتي لنتيجة هالأنهيار

.

الصعيد المدوني: الصيحه اللي صارت على مذكرات الدكتور

.

و فوق هذا كلّه كانت غبقتي يوم الأثنين

.

يوم أنهيار السوق و يوم بداية لوية المذكرات

.

فكنت يوم الأثنين ما أدري منو أكلم

.

الطباخه و لا الدلاّل و لا الناس اللي مو عاجبها تعليقي

.

فقررت بهاليومين..أريّح مخي

.

و لا أدخل في نقاشات لا عن السوق

.

و لا عن سهمي الصفاة و الصفوه

.

و لا عن المذّكرات

.

عطله سعيده للجميع

مراهقات و مراهقين

أنا ما أدري عيال هالوقت شنو صاير فيهم

.

و لما اقول عيال قصدي المراهقين و المراهقات

.

مو معقولين..فيهم يراعه و قواة باس مو عاديه

.

أحنا مرّينا بهالمرحله و استانسنا فيها بس كان

.

كل شي نسويه في حدود.. وكنّا نحترم الآخرين

.

بحيث مهما كانت وناستنا..كانت توقف عند حدود

.

أزعاج الآخرين..و هذي كانت طريقة تربية أهالينا لنا

.

الحين فنّك تحاجي مراهقه أو مراهق..ما تدري شنو ممكن يكون الرد

.

قبل كم يوم..كانت ايام القرقيعان..رايحه منطقة اليرموك

.

دخلت الفريج اللي يوصلني لي بيت الجماعه اللي رايحتلهم

.

هالشارع ما ياخذ مني 3 دقايق عادة..هالمره 10 دقايق

.

بسبب مسيرات بمناسبة القرقيعان داخل هالشارع الفرعي

.

تهوّلت من اللي شفته

.

سياره جيب فيها 4 مراهقات طالعين لي نصهم من السياره

.

و متلثمين و قاعدين يرشون سياره الشباب بالفوم

.

وانيت ثاني هم فيه وايد بنات مبرقعات و لابسين دراريع فاقعه

.

و قاعدين يصارخون على علو حسهم بالفريج

.

طبعا كلهم فالّين شعورهم..و لا وحده ضافه شعرها

.

سياره ثالثه فيها شباب مو عارفين شنو يبدّون عليه

.

هذا غير مجاميع البنات و الشباب اللي قاعدين يمشون على ريولهم

.

تبون تستانسون

.

تبون تغازلون

.

تبون تغنون

.

تبون تضحكون

.

كيفكم عليكم بالعافيه..بس ليش هالتصرفات الغير حضاريه

.

ليش تزعجون و بوقاحه المستخدم للشارع

.

و الله العظيم مسكين ما يبقى شغّال أو شغّاله و لا سياره ما

.

تسبّحوا ذاك اليوم

.

ليش ما توقفون عند حدود الآخرين؟

.

المشكله أن الواحد ما يقدر يشره عليهم

.

يشره على الأهل اللي ما حاولوا يبذلون أي مجهود بالتربيه

البنيان و ما أدراك ما البنيان

أذا تبي تدعي على أحد

.

أدعي عليه يصير عنده بنيان

.

واي يا البنيان

.

مو معقـــــول

.

هذا اللي صج يبيله قلب ما يتعب

.

أنا أول كلّه أقول أشدعوه و متشيحطه بزوجي المعماري

.

يعني اللي يمرون فيه غيري ما أمر انا فيه

.

و يقول الله بقوله

.

كل نوع بهذله في البنيان مرت علي

.

لا فادني لا زوجي المعماري و لا خبرته

.

مو معقولين

.

المقاول يسوي روحه فاهم كل شي..و لما يصير التنفيذ

.

يطلع اللي أهوه فاهمه و متليقف فيه..ما له علاقه باللي أحنا نبيه

.

الصحّي..ما صدّقت أيون ملوت تركيب البورسلان..وين البورسلان؟

.

ما يبناه من المخزن..عيل ليش ياييّن؟؟؟

.

مال المطابخ..يصير عنده أختلاف وجهة نظر مع المقاول

.

و أنا اللي أتعطّل

.

كل هذا صار خلال فترة العشر أيام اللي فاتت لأن زوجي كان مسافر

.

و أنا صرت المسئوله عن البنيان

.

أنا متأكده أن المقاول بيقط وراي سبع حيرات اليوم

.

لأن بيفتك مني و من حنّتي

حشّه على الماشي بالرياييل

في حوار لطيف بين منيره و حمود الطواش بمسلسل الأقدار تقول له

.

منيره: خليفه أيموت على الحريمات..ماله جبد عليهم

.

حمود: هذا مو عيب شرعي

.

بالفعل..عموما الرياييل عندهم عادي أنهم يكونون متزوجين أو مرتبطين و أذا طلعوا

.

سواء بروحهم أو حتى مع زوجاتهم تلاقيهم يخزون من غير ويع قلب..بس خل الزوجه

.

تلتفت..و ساعات المسكينه تسرح..يعني مو قصدها تخز أو أطّالع..ما تدري شنو ممكن

.

أييها من تنزّر و أتهامات أنها قويّة عين..المشكله أن هالطّبع ماله شغل بالخلفيه

.

الأجتماعيه أو الثقافيه أو التعليميه للريّال..شي موجود بجيناتهم..و بعدين كلّه تروالهم أن

.

اللي مو عندهم أحسن من اللي عندهم..و أن زوجاتهم أو صديقاتهم طايحين

.

بجبدهم..يعني أنا ما اذكر آخر مرّه سمعت فيها زوج يتحلّى على زوجته ..او على الأقل

.

يلتزم الصمت لما أحد يمدح زوجته و ما يبتدي يعذرب..و الله الدّاد لنا..يعني لا من خيرهم

.

ولا كفاية شرهم..الصج الرجل شر لابد منه

.

.

.

ملاحظه: الموضوع هذا ماله شغل بحياتي الشخصيه..بس قلت للتغيير عن الحديث الممل عن الوضع السياسي و الأقتصادي للكويت

.

عطلة نهاية أسبوع سعيده.

فيروز

الحين مع الزحمه المروريه الخانقه

.

أي مشوار ما راح ياخذ مني أقل من نص ساعه بالسياره

.

و عشان ما أفقد أعصابي و أحتر من الزحمه

.

أسمع فيروز

.

ماكو أحد مثل فيروز تونسني في مثل هالظروف

.

لأنها تبرّد القلب

.

تسولف معاك

.

أتحلطم

.

أتشرّه

.

أتطنّز

.

أغانيها دمها خفيف ... طبعا بعكس شخصيتها الحقيقيه لأنها ودره و ما تنتحاجى

.

و اذا غنّت عن الحب..تعيش في عالم ثاني

.

عالم مريح

.

براد

.

و لمّا أسمعها أكثر شي يطري على بالي جملة المدوّن القديم

.

الاّ نبيذي

.

فيروز غنّت لحب ينمو بجانب نهر و صنوبره و قرميد و ثلج و شمس

.

فأنصحكم بفيروز هاليومين عشان توسّع صدوركم

.

تحيّاتي

برقيات لنوابنا الشباب الأعزاء...صباح الخير

محمد العبدالجادر: ترا الأمل مال شعاركم شاركونا الأمل ما بقى منّه الاّ أغنية الأمل مالت عوض الدوخي

علي الراشد: وصلنا رمضان..قرّرت أتجمّد و لا ما أتجمّد

مرزوق الغانم: أياك و اليأس من وطنك..ترا اليأس طلع من خشومنا

صالح الملاّ: ما شفنا شي من رؤيتك الجميله.. و لا صار الوطن أجمل

.

.

.

و لا تعطوني عذر الأيد الوحده ما تصّفق..أنتو مو أيد وحده..أذا قرّرتوا أتنعزون خلافاتكم الشخصيه على كتر و تركزون على الكويت…بس عاد..ملّلتونا بصخّتكم

الكبر شين

مظاهر التقدم بالسن

الحديث بصوت عالي...الظاهر مع التقدم بالعمر نبرة الصوت تزيد بعد

الصّمخ الأنتقائي...أذا أشتهوا أسمعوك و أذا ما أشتهوا قالوا لك..هــــــا..خيـــــر

آلام المفاصل

اللقافه...عسى ما أحد تكلّم..يدلون بدلوهم..يعني ما طافهم شي

الشعور الدائم بالبرد...تدخل بيوتهم تقول داخل تنّور

التذّمر الدائم...لو تشب أصابعك شمع ما أيوز لهم كلّه شغلهم مال أول أحسن

المبالغه في تجميل الماضي...و ما شاء الله نسبة الجمال أول وايد أعلى من الحين..كلّه وي ما شفتوها أول

تخشّش الأكياس و البطول الفاضيه

و اللي عنده أضافه يتفضّل...مابي أحد يقول لي هذولا الكبار...هذولا الخير و البركه...ترا أدري...الموضوع كلّه قشمره...للترفيه و الترويح عن النفس

بسنا تحلطم

خارج الموضوع: اليوم ياني تليفون..طبعا عقب ما رجعت للتدوين..هذا أول تليفون تحذيري..قالوا لي يا نانو حطّي بالج لا أتطرقين لنائب معيّن..لأن مريدينه راح ينتفونج...الصج..ما ياز لي الكلام..ترا أنا بقول اللي باقوله..و هم باسوّي اللي بسويه..واللي أيوز له حيّاه الله...و اللي ما أيوز له...هم حيّاه الله..بس أنا بظل على اللي أنا عليه

******************

هم خارج الموضوع: بمذكرات الكتور الخطيب اليوم يقول

لقد شرب حليب السباع

منو يقصد؟

أنا ما فهمت أي من الشيوخ يقصد

******************

أمس بالذات عرفت شعور الدجاجه لمّا ايفوحونها بالجدر حق المجبوس....أمس الرطوبه عقب المغرب ما كانت عاديه...لأ و لازم تفترين و تباركين بالشهر...أنا خذيت كل أحتياطياتي...أنا أصلا مو من الناس اللي يحطون مكياج...فما عندي مشكلة مكياج سايح...ضفّيت شعري..عشان لا أيقفقف مع الرطوبه..و دراعتي قطن مصري...يعني ماكو أبرد..و أنتو بكرامه قندرتي واطيه..عشان الكعب مع الرطوبه أحتمالات الزلقه وارده جدا..وبديت المشوار...وااااااي...موت حر...على ما تنزل من السياره لين توصل ألا شعور الدجاجه المفيوحه...خلصنا... عقب ما شربت 10 فاجين قهوه عربيه...الرقعه وصلت مليون.. تروح حق ناس ما لهم سالفه ألا التحلطم و الذم و الشكوى من الأوضاع...يعني ما يعطونك الا طاقه سلبيه...و أنا أصلا كنت متخذه قرار بيني و بين نفسي بمقاطعة هالنوعيه من البشر...فقلت أنا ليش قاعده أسوي جذي في نفسي..و بالنهايه الشرهان أكثر من الراضي...قرّرت ما أكمّل الزيارات الرمضانيه..وأجابل حلقاتي مع صديقاتي أحسن

د.أحمد الخطيب...أخجلتنا

http://www.aljarida.com/aljarida/Article.aspx?id=75980

إهداء

إلى شابات وشبّان الكويت الذين يعملون على إعادة الكويت إلى دورها الريادي في المنطقة.
إلى أولئك الذين يسعون إلى بناء مجتمع ينعم فيه المواطن بالحرية والمساواة تحت سقف قانون واحد يسري على الجميع، ويكون هدفه إطلاق إبداعات أبنائه وليس تقييدها باسم المحافظة على عادات وتقاليد هي جاهلية في طبيعتها ولا تمتّ بصلة إلى الدين ولا إلى ما جبلت عليه الكويت منذ نشأتها من تعلّق بالمشاركة في السلطة، ثم الالتزام بدستور 62 الذي قنن هذه الطبيعة الكويتية.
إلى الشابات والشبّان الذين يحلمون بمستقبل مشرق للكويت يعيد دورها الرائد في محيطها، كي تنضم إلى عالم العلم والمعرفة الذي أخذ ينطلق بسرعة هائلة لا مكان فيه للمتخلّفين.

إلى هؤلاء جميعاً أهدي هذا الكتاب

و أنا أرد و أقول

شكرا جزيلا دكتور وان شاء الله نكون قد مسئولية الأهداء

نهايه سعيده

أمس كانت الحلقه الأخيره من نور...الحمدالله ما قصّروا الأتراك قزّروا علينا هالصيفيه...فبورصة المسلسل أمس كانت مراهنه على موتة مهند أو نور...ما أدري ليش الكويتيين قاموا يحبون الكدر...نسوا شي أسمه نهايات سعيده... أثناء المسلسل البارحه هاتفني صديق بيستفسر عن شغله...قلت له أنا مشغوله اليوم الحلقه الأخيره...فسألني اشقاعد يصير الحين ؟...قلت له اسكت نور مريضه...و يمكن أهيه اللي تموت...ردة فعله صدمتني...قال لي فكّه...هو ليش ؟!..أشفيك على نور...أنا اللي أعرفه أن الشباب ميتين عليها... و كلهم أمنية حياتهم تييهم مره أتدللهم مثل ما نور مدلله مهند...قال لي نسيتي ال 87 حلقه اللي علّتنا فيها؟ الحين آخر 5 حلقات تسنّعت...خلاص طاح الحطب؟؟ قلت له اشدعوه عليك...شالتحامل...الله يا قلبك الأسود...المهم صارت النجره بيني و بينه جنّه نور و مهند أهلنا أنا وياه...خلّصت منّه...وقعدت أكمل الحلقه الماروثونيه..وحده من صديقاتي اللي قاعده أتابع معانا..أمس كانت أول حلقه تشوفها....يمكن 15 مره سألتنا منو فجر؟
مو قادره تستوعب أن فجر أسم ولد عند الأتراك مو مثلنا

بس أحلى شي بالمسلسل كلّه كانت تسريحة شريفه خانم آخر الحلقه...ما أدري ليش هوّل فيها المخرج باللحظات الأخيره...و شنب مهند

بس اللي حاز في نفسي دعاية زين...قطّوره صارت مطره...راح أفقدها

عموما كل عام و أنتو بخير...أنا من الحين أني راح أتابع بس حلقتين برمضان...بعد الفراق و أسمهان و وحده تاريخيه أبو جعفر المنصوري....فقط لا غير

مو منّا...من

أنا بس كنت أحب أوضح شي واحد

في موضوعي السابق أنا بس سؤالي الأول كان موجّه للرجل الكويتي

أما بقية الأسئله كانت عن الحريم و الرياييل

الكل ما قام يثبّت

الكل متدوده

الكل ينسى

في حاله من الشدهان ضاربه الجنسين

و أنا ما ألومهم

بهالفتره بالذات

خلصنا الأجازه الصيفيه

رجعنا

و في بعضنا ما سافر فما رجع

تحمل الحروره و الغبار..و آخر الفيلم الرطوبه

دخلنا في لوية ما لها أول من تالي

أيران

السوق نازل

مدارس

رمضان

تصريحات النواب الأمه و البلدي

رطوبه مره ثانيه

زحمه الشوارع

غلاء الأسعار

و الوقت اللي يطير من غير ما نحس

فشي طبيعي الخيار يكون يا كبريت يا تفهّي

لام الله من يلومنا

تساؤلات

ليش الريّال الكويتي لعبته اللف و الدوران ما عنده شي سيده؟

ليش لمّا نقعد في أجتماع محد يسمع الثاني؟

ليش كل واحد يفهم السالفه على كيفه مو مثل ما سمعها؟

ليش الكل صاير يا الله نفسي؟

ليش أذا استخدمنا الأسلوب المهذب بالكلام يستضعفونك؟

ليش الكل صاير ينسى..محد قام يثبّت؟

ليش الكل صاير كبريت...بمن فيهم أنا؟

نجم السهيل

أنا ما أدري ليش...بس دلقة سهيل وايد مهمه حقي...اليوم أول يوم دوام بعد الأجازه...و طبعا أول ما أوصل المكتب أول شي أسويه ..أطالع تقويم العجيري...و أنا قاعده أقلب الأوراق...الاّ اليوم يوم طلوع نجم سهيل...اليوم يدلق سهيل....بالنسبه لي دلقة سهيل دليل على انتهاء فصل الصيف الحار القاسي...طبعا أهوه ما خلّص بس نفسيا أحس أنا غدا الشر...و شي ثاني...ومثل ما هو واضح جدا....دلقة سهيل هالسنه على رطوبه....فهذا معناته أن شتانا ما راح يكون بارد...فما أشتط بالهدوم الشتويه عشان لا اتطيح بجبدي....فأحب أقول كل دلقة سهيل

و أنتو بخير

آسفه من اليوم ما راح يكون عندي يوميات السفره...لأني راح أروح بيروت...و بيروت مثلكم عارف...طشه...يعني ما عندي وقت أحك راسي...يالله خليتكم بعافيه...و نتقابل بعد 10 أيام أن شاء الله...بس...ها...أذا صار اكو شي يسوى...راح أتعنى...و أكتب لكم

مفارقات 2

اليوم الرابع: بدينا يومنا كالعاده مشيه لمدة ساعه و نص...طاح حيلي من المشي..وصلت مرحله ما أحس بريولي...خو اللياقه يالله من فضلك ما يحتاج..المهم...تمشينا بالبلده شويه...الأجانب مستشرحين...تمرعلى عيوز شايب...مره و زوجها وعيالها...بونجور..بونجور مع ابتسامه..قررنا نصعد الجبل عشان نتغدى هناك..خذينا التلفريك..وصلنا مطعم صغير..العايله اهيه اللي تخدمك..المكان جنه بوست كارد..عقب ما دخلنا و داخل المطعم قاعد يحوسون كلبين...واحد أبيض و الثاني أسود كل واحد كبر اليهد...جان تلتفت علي صديقتي..قالت لي شفتي الأبيض..هذا مو كلب...هذا ذيب...طبعا أول شي طرا في بالي..أم عليوي...ذيـــــــــبه...ذيه اللي تمقر لي بطنك..حتى ذيبه تمقر لي بطنك...آسفه عريت...ناس حضاريين...وصلو مرحلة تربية الذئاب..تغدينا و حلينا...و أحنا قاعدين نشرب القهوه...أشوف ملوت المطعم يتصاولون...كل ساعه واحد يطل من الدريشه و يتناقشون...جان يقولون يايتنا عاصفه...و الحين لازم كل اللي بالمطعم ينزلون...لحوه..تيمعنا كل اللي بالمطعم و ركبنا التلفريك..أشوف صاحبتي سرحانه بشي..سألتها أشفيج...ردها كان تشفين ركبهم...قصدها ركب اللي معانا بالتلفريك..لا رياييلهم لو لا حريمهم...كلهم ركبهم جنها زبده..هذي الركب اللي لازم تطلع...مو أحنا المحوحين ملوعين جبدنا فيهم بالمجمعات..والله صاجه...بدلنا التلفريك الجماعي..و خذينا عقب تلفريك حق شخصين...و أحنا والله العظيم...بالضبط متعلقين بين السما و الأرض...جان يوقف فينا..كل المشاعر اختلطت حزتها...أنا أذا وايد خفت أقعد أضحك...صاحبتي أول شي سوته دقت على زوجها و وصته على العيال...طبعا الموضوع ما خذا أكثر من خمس دقايق..بس هالخمس دقايق كانت غريبه..لأن الواحد يفكر شنو ممكن يصير أذا هف التلفريك..و الأصخم قاعدين نسمع صوت الهوا و أهوه يهز الوايرات..أذا متنا مو مشكله خلاص أفتكينا..بس لا نطيح و تنكسر و نتحرول..من له خلقنا عقب...أشوه خلص اليوم بسلام

اليوم الخامس: ماكو شي يذكر...وايد ضباب..أحس أني قاعده بوسط الغيم..و مطر...بس ما شاء الله المطر أهني ما يدوده...و جنه ينطر الناس أتزهب له...و عقب ينزل

مراسلتكم من أحدى الدول الأوربيه

نانونانو

مفارفات السفره

اليوم الأول: ماكو شي يذكر غير أن المكان ياخذ العقل و الهوا نظيف و الناس حلوين...منتخب أحد الدول الخليجيه لفريق كرة القدم عنده مخيم تدريبي بنفس المدينه اللي أنا فيها و الفريق ساكن بنفس الأوتيل...شوف العز اللي أهمه فيه

رحنا فيلم سيكس أند ذا سيتي..طبعا الفيلم...بالنسبه لي غايه و نهايه...خلاجين...و هيله..و مستر بيغ...المهم..و أحنا في قمة متابعتنا حق الفيلم...و في أكثر مقطع رومانسي بالفيلم اسمع تعليق من وراي...حماره..ليش ترد له....ما أصدق...حتى و أنا بجبل بآخر الدنيا بأوربا أسمع تعليقات كويتيه غبيه

اليوم الثاني: بدينا يومنا بمشيه قويه كنوع من الرياضه...ما أقدر أوصف مدى استمتاعي برياضة المشي...و عقبها كملنا يومنا عادي..وايد مريح كل واحد يسوي اللي يبي يريحه من غير أي ضغوط من أحد...لا أكو ريل يخز...و لا يهال يحنون

تعشينا خلصنا...صعدنا كل وحده على غرفتها...دخلت الغرفه ما وعيت الا تليفون الغرفه يرن جاوبت

أنا: نعم

المتصل: مرحبه

أنا: مرحبتين

المتحدث: ممكن أكلمنج

وااااااااااااي...من متى خبري بهالحركه....من القاهره 87..بطلوا عن استخدام هالأسلوب من المغازل..طلع الي داق..كابتن المنتخب الخليجي اللي معانا بالأوتيل...الحبيب يبي يتعرف...فراغه...من له خلق يتعرف بهالعمر...احنا خل نعابل باللي عندنا...عطيته من عطايا الرحمن...مو عن شي بس اللي لي الحين يسوي هالحركات...لازم يتم التعامل معاه جذي...و خلص اليوم الثاني

اليوم الثالث: رحنا حق مشيتنا المعتاده...و أحنا بنص نزلتنا الجبل..الا تليفوني مو معاي...طاح مني...ويع ويع...من له خلق الحين يعابل...لأ المشكله لازم نرد نصعد الجبل و أنا ضايق خلقي...يعني تعب و ضيقة خلق...و التسلط ذاك اليوم الشمس حنانيه...المهم وصلت الفندق...ووقفت التليفون

أنا طلعت ما أيوز: كنا قاعدين مع مجموعة أجانب ..و فيه مجموعه منهم كانوا يشتغلون بالخليج...فواحد منهم.قام يمدح بالأمارات و قطر..ما عبرت على نفسي...قلت له هذولا توهم مبلشين..أنت ما تقدر تقارن الكويت معاهم أصلا...وقعدت أشرح..عقب اكتشفت لي الحين ما أرضى على الكويت...يعورني قلبي

مراسلتكم م أحدى الدول الأوربيه

نانو نانو

i can't help it....i like what he writes

www.aljasem.org

اليوم آخر يوم دوام...أجازه لمدة أسبوعين

Voulez-Vous

People everywhere

A sense of expectation hanging in the air

Giving out a spark

Across the room your eyes are glowing in the dark

And here we go again,

we know the start,

we know the end

Masters of the scene

Weve done it all before and now were back to get some more

You know what I mean

Voulez-vous (ah-ha)

Take it now or leave it (ah-ha)

Now is all we get (ah-ha)

Nothing promised,

no regrets

Voulez-vous (ah-ha)

Aint no big decision (ah-ha)

You know what to do (ah-ha)

La question cest

Voulez-vous

Voulez-vous...

this is my mood for my two weeks trip

TAKE CARE

احنا كنّا ثلاثه أيام الجامعه

....ما راح أقول من جم سنه

...درسنا

...اشتغلنا مع بعض بالوسط

...حبينا

...كرهنا

...تناجرنا

...تصاحبنا

....تخرجنا

...اشتغلنا

...تزوجنا

...لهينه عن بعض

...غريب شلون السنين ممكن تفرّق

...و الأغرب أن من واحد منّا يحس بشوية تعب

...الأثنين الثانين تلاقيهم على طول يمه

...و أحلى شي لما يكون اللقاء

...و نضحك

...و نستعيد الذكريات

...و نتطنّز

...و نحش

...و بعدين نتنفّض

...و نرجع حق حياتنا الروتينيه

...و ينختم اللقاء

...ب تامرين على شي

...كلمه مو مجامله

...تدري أنها طالعه من القلب

فوائد مسلسل نور

في البدايه رفضت أني أكون من المتابعين لمسلسل نور...بس على ما صار شهر يوليو (أمقت هذا الشهر أهوه و أغسطس) رضخت و بديت أتابعه...المشكله الحين صرت مدمنه حق المسلسل..مو عن شي بس صار المسلسل الشي الوحيد اللي أتطلع له في نهاية يومي...فقعدت بيني و بين نفسي أفكر شنو فوائد متابعة مسلسل نور..اللي طلع معاي الآتي

* يخليك تصد عن ترّاهات نوابنا الأفاضل

* موضوع جيد للنقاش بين المتبقين من الصديقات و زملاء العمل اللي لي الحين صامدين بالصيف

* معاملتهم حق بعض (نور و مهند) حيثيه وايد مهمه للمعاير بين الأزواج

* بطء المسلسل يقزّر عليك بطء مرور شهر سبعه و ثمانيه

* تقوية مفرادتنا باللهجه السوريه

مثل ما قلت من قبل...هذا اللي طلع معاي...اللي عنده شي يبي يضيفه...حياه الله

حلم...يبا حلم

قبل جم يوم حلمت بالمرحوم الدكتور أحمد الربعي...حلمت قاعد يناديني..و يقول لي تعالي سولفي لي شنو أخبار الكويت...و أنا بالحلم اخترعت و فشلت..أبّيه شنو أقول له...أقول له عن النواب اللي مالهم سالفه الاّ الفساد الأخلاقي اللي في كبّر..و هادين الفساد الأداري المتفشي في غالبية الجهات الحكوميه بالكويت هني مو بجزيره محّد يروح لها الا بالويكند...و لا أقول له عن سوق النخاسه و ثورة الجياع البنغال...و لا أقول له عن قصّتنا مع الفيفا...و محاولات كويتيين وضيعين لتشويه سمعة الكويت في سبيل مصالح شخصيه...ما قدرت أتكلّم بالحلم..وانربط لساني...و قعدت من النوم...قلت دكتور أحمد هذا وضعنا

سأعيدها كما كانت

صار لي فتره متردده...أرجع و لاّ ما أرجع...الصج كنت خايفه...و خاصة عقب ما كبر جمهور المدونين...بس اليوم عزّمت و قرّرت أني أبي أرجع...ولهت على مدونتي...و لهت على خرابيطي...و خاصة الحين صار في وايد اشاياء أبي اعلّق و أتكلّم عنها...طبعا دوّرت عنوان حق رجعتي...ما لقيت أحسن من شعار النائب مرزوق الغانم...لأنه مرتبط عندي بذكريات وايده من ذيج المرحله لي الحين

وابتدى المشوار

Two EXCELLENT posts

mozartation.blogspot.com

&

kuwaitjunior.blogspot.com

شنو يعني؟...على أي أساس؟...شكو...شكو

اليوم و أنا يايه الدوام...قريت خبر طلّعني من طوري...الخبر مذكور بجريدة القبس...شنو يقول هالخبر إعلان فريق لحماية الأخلاق أعلن أمين عام تجمع ثوابت الأمة محمد هايف المطيري عن تشكيل فريق عمل تطوعي لحماية الأخلاق في البلاد مكون من أهل العلم والدعاة، وسيغطي جميع مناطق الكويت. وقال المطيري ان التجمع سيعقد مؤتمرا صحفيا بعد العيد مباشرة للفريق وأعضائه المؤسسين لشرح الأهداف والوسائل التي سيتبعها. مابي شي أنا....بس أبيكم تعلموني...لي وين بنوصل

يا جماعه...اللي ما شاف المباراة البارحه طافه نص عمره...أنا ما أقصد مباراة الكويت و البرازيل...أنا أقصد مباراة النواب و الوزراء...البارحه توني راده البيت عقب ما كنا متيمعين نشوف مباراة البرازيل و الكويت...و كنت حدّي عيزانه و فيني النوم...دق علي صديق...و قال لي الله يخليّج حطّي القناة الرياضيه...لا اتطوفج المباراة... وأنا معاه على الخط دقت صديقتي وقالت لي حطّي المباراة...أنا حطّيت...مت من الضحك...لأن حمدالله و الشكر... أثاري الغتره و الدشداشه وايد ساتره على الوزرا و النواب...الله يا منظرهم عرّه و أهمه بالشورتات.. و الأصلع.. أصلع...واللي سيقانه عوي...و الكرش...الله..حدّث و لا حرج...أنزين الحين ييت أشوف اللعب...واحد من الوزرا السابقين ياي بيشوت الكره جان أيبوّش و يهف على وجهه بالبطئ...الثاني يعادل الجول ويشوتها بكورنر الملعب..يعني مو فوق الجول...لأ...الظاهر فيه استجماتيزم...الصج البارحه ما قصّروا...كان خمسه فرفشه...بس لو أنا منهم أطلب السنه اليايه أنها ما تنبث...لأن فشله

ماذا لو؟

ذاك اليوم قاعده أفكّر...شلون ممكن يكون وضعنا أحنا كدوله و كشعب و كخليج ككل...لو أن السيارات تمشي على ماي...ما تحتاج بنزين...بأسلوب ثاني سؤالي...ماذا لو كان المصدر الرئيسي للطاقه في العالم هو الماء بدلا من النفط....شلون راح يكون موديلنا...بيني و بينكم...لما تخيّلت المنظر كلش ما ياز لي...لأن جان صرنا من أفقر الدول...و دّي لو أسمع خيالكم في هذا الموضوع....بس قبل لا تبتدون...الحمدالله و الشكرلله ألف مره على نعمة النفط...

مبارك عليكم الشهر جميعا....طبعا بدا رمضان و بدت الزحمه الخياليه اللي صارت معْلم من المعالم المصاحبه لهذا الشهر....و الكل يشتكي من المرور و الأختناقات المروريه....بس أنا أعتقد أن جزء من هالمشكله يرجع لسوء أخلاق السواق...صايرين مو معقولين...كل واحد على باله أن الشارع ملكه...الحين الشارع زحمه والعموم قاعدين يسوقون هدا هدا عشان يتفادون أي اصطدام...أييك واحد طاير تقول وراه تجربة الذره...و يترّك و يبتون يخلي باقي السيارت اتدوده...أي ليش؟ أشواراكم؟ و راك دوام تعال على روحك شويه و قوم قبل موعدك بربع ساعه...صدقوني هالربع ساعه تفرق...ليش كل شي برمضان خصوصا تخلونه وقت الحزه و اللزه...أي تعلموا تدرسون أوقاتكم...مثلا الحين ماكو و لا مشوار ياخذ أقل من ثلث ساعه بالطريق...حسبوا حساب أن بياخذ خمسه و عشرين دقيقه...تيي طاير...و تدوده الأوادم عشان حضرتك متأخر على موعد...مشكلتنا أن أحنا شعب فوضوي...كل شي نبي نمشيه بطريقتنا...ماكو أي التزام تجاه أي شي

اشاعة حب

قبل كم سنه رحنا أنا و صاحبتي بيروت...و هناك كان أخوها...و أهوه من الناس اللي يتمتعون بموهبة العلاقات العامه....و له علاقات وايد في لبنان...المهم واحد من الشخصيات اللبنانيه الجذّابه جدا...جدا...جدا...حب أن يعزمنا على الغدا أنا و صديقتي و أخوانها الأثنين....و رحنا... و سكبنا...و أحنا قاعدين بالمطعم...يانا صاحب المطعم اللي يعرف هالشخص اللبناني و من باب الميانه طلب صاحب المطعم من اللي عازمنا أنه يغني بالفرنسي...لأنهم لبنانيين و راقين جدا...ثقافتهم فرنسي...صاحبنا من كثر ما أهوه مؤدب ما حب أن يفشل الريّال...جان يبتدي أغني بالفرنسي...و أحنا قاعدين مبتسمين وايد معجبين في صوته و أدائه...لين وصل حق مقطع يقول فيه...ماما....أحنا و لأن ثقافتنا أغلبها مستقاة من الأفلام المصريه...أهوه قال ماما...أحنا ثلاثتنا أنا و صديقتي و أخوها تطالعنا...لأن شنو طرا علينا...فيلم أشاعة حب...لما ولد خالة سعاد حسني يغني حق يوسف وهبي هالأغنيه و يقول له ماما...و هذاك يرد عليه يا روح أمّك....ما أقدر أوصف لكم شنو صار فينا ثلاثتنا...صديقتي محظوظه لأن تلفونها رن قامت من الطاوله و خلّتنا بنموت...أنا ويهي أحتقن...لأني كنت بموت من الضحك...و ما أقدر أطلع الضحكه...و أخو صديقتي يخزني عشان أسيطر على روحي...و الريّال مشتط يغني و رايح و أنا تاكني العرق من الفشله...و ما أقدر أضيع الصقله بالأكل و لاّ الشرب لأني راح أشرق راح أشرق...كانت من أصعب لحظات حياتي بالسيطره على روحي...لأن جان برستيج الريّال اللي عازمنا بلا حلا صار بالأرض...و أهوه تبون الصج ما يستاهل يصير جذي فيه...بس الشرهه مو على الريال الشرهه علينا اللي أحنا اللي الريال حاشمنا و أحنا ما ردنا الا فيلم أشاعة حب

عندي مشكله....مشكلتي الله يسلمكم...لا أشوف أو أسمع عن أحد طاح...من أشوف أو أسمع عن طيحة آدمي...أغشي من الضحك....ما أقدر أتحكّم بردّة فعلي....و الحين بموت من الخوف من الحوبه...و الله عيزت و أنا أحاول أسيطر على روحي...ماني قادره...ساعات الموقف ما يستحمل أن أحد يضحك عليه... و وايد مرات يكسرون خاطري و ودّي أني أساعد...بس اللي أقدر عليه...أني أقوم من المكان عشان ما أخبّص أكثر من التخبيص اللي أسويه بضحكي....ذاك اليوم واحد من أعز أصدقائي...فقدته...كم يوم...دقيت عليه أتشرّه...مسكين متبلتع و مسوي روحه أسكت...و رايح يلعب رياضه...و أهوه على المشايه...هف و طاح...و مسكين تعوّر...و أهوه قاعد يعد لي السالفه...أبي أسكت ماني قادره...و أهوه يعد علي شلون قام من الأرض بسرعه عن الفشله...أنا كنت بموت...ما وعيت...الاّ صارخ فيني...يا........ما تقولين سلامات...مو تضحكين...تأسّفت منه...و قلت له خو أنت تدري أني ما أقاوم هالمنظر....بس عقب زفّته...من صجي قمت أحاتي الحوبه....لأن الشماته وايد...وايد...وايد

كل سنه و أنتو طيبين

اليوم باسبق المدوّن العزيز شرقاوي buirwah.blogspot.com و بأهنئكم... بدلقة سهيل سهيل' يطلع اليوم والمطر على الأبواب صرح مرصد العجيري بإدارة علوم الفلك بالنادي العلمي الكويتي بأن اليوم (الاربعاء 23 اغسطس 2006) يصادف طلوع نجم سهيل بشبه الجزيرة العربية، ويتعذر رؤيته في الكويت وذلك لشروقه بعد طلوع الفجر مما تصعب معه الرؤية. سهيل من النجوم المهمة في شبه الجزيرة العربية، حيث انه يدل على اقتراب موسم الامطار، كما في المثل المشهور 'اذا دلق سهيل لا تأمن السيل'، ومنه تبدأ حسابات موسم الوسم، وهو موسم المطر بعد 52 يوما من مشاهدة نجم سهيل وبعد الوسم 52 يوما اخرى، تدخل مربعانية الشتاء، وهكذا كان اهل الجزيرة العربية (البادية والحضر) يحسبون بمجرد مشاهدة نجم سهيل ظاهرا. سهيل نجم لامع لونه احمر وهو النجم الثاني في الترتيب بين النجوم (حيث اللمعان بعد نجم الشعري اليمانية، وهو من مجموعة السفينة من المجموعات النجمية الجنوبية). ومن الممكن مشاهدة نجم سهيل في الصباح الباكر قبل طلوع الشمس بقليل بواسطة منظار (دربيل) أو تلسكوب صغير، وذلك يكون يوم الثلاثاء الموافق ،2006/9/5 من جهة الجنوب الشرقي ويمكن مشاهدته بالعين المجردة بعد ثلاثة ايام بوضوح في الاتجاه نفسه قبل طلوع الشمس اي في الصباح الباكر، وكما قال الشاعر اذا سهيل مغرب الشمس طلع فاني اللبون الحق الحق جذع وقد قصد بهذا التعبير القول بانه توقيت اللقاح، فنجم سهيل هو احد البشائر التي يستبشر بها عرب الجزيرة وذلك لقسوة المناخ الصيفي فهو يخفف من قسوة الرياح التي من خلال ظهوره تنتهي رياح السموم، ويبدأ الجو يبرد خاصة في الفترة المسائية ثم تظهر علامات الوسم شيئا فشيئا و غير هذا كلّه أنا دلقة سهيل مؤشر لي أن غدا الشر...و خلص الصيف http://www.alqabas.com.kw/Final/NewspaperWebsite/NewspaperPublic/ArticlePage.aspx?ArticleID=196563

صباح الخير...أنا لما حطّيت الموضوعين ملوت أمس و أول أمس...اللي أهمه كانوا العنوان الرئيسي لجريدة القبس...مو عشان أوجّه أصابع الأتهام لأي جهة....أنا كنت أبيكم تشوفون لأي درجه أحنا وصلنا...وزارة التربيه غلطانه صح....بس الغلط الكبير و الفادح و اللوم كلّه يوجّه حق الأم و الأب الكويتي...في حالة من التسيب و اللامبالات بالأسره الكويتيه...و مبدأ.. أسم الله عليك لا يغشى عليك... أهوه اللي سائد....يعني بافهم ولد أو بنت في سن المراهقه...عندهم موبايلات...و سوّاق تحت سبال أيدينهم...شلون ما يلهون بالمغازل...وهذا طالعني و هذي طالعتني...بذمتكم...رحتوا الجمعيات التعاونيه الضحي أيام المدارس...كلّه تغوش مصبنه مالت الثانويات...هذولا المصبنه ما يخافون يصادفون أهلهم بالجمعيه و يكتشفون أنهم مزرقين...طبعا لأ...ما يخافون...و تلاقي الأم أذا تكبرت المقعد و قالت ولدي أو بنتي مسكتين و شطار أسم الله عليهم...و أهيه تدري بقرارة نفسها أنهم بلوه و مو عارفه شلون تربيهم...ها...وفي مشكله...عشان أبو العيال أو أبونا ما يعصب...و يضيق خلقه و يقول أنتي ما تعرفين تربين لأنج هايته...ما تقول له لما تعرف عن أخطاء عيالها...و يستمر الشاب أو الشابه بالخطأ...مستغلين خوف الأم من الأب...و هلمّه جرّه...لما صارت الأسره الكويتيه آخر سبهللا...هذي وجهة نظري

هاهاهاهاهاهاهاهاهاها

تحديث رغم أن الكويت أكثر الدول إنفاقا على التعليم الطالب الكويتي الأقل دواما في العالم كتب فهد التركي: كشفت دراسة علمية، حول الانفاق على التعليم في العالم وساعات الدراسة، ان الكويت تعتبر الاقل عالميا من حيث الاسابيع الدراسية رغم انها الاعلى انفاقا على التعليم.وحسب الدراسة، بلغت مخصصات الانفاق على التعليم العام والجامعي اكثر من مليار دينار خلال العام الحالي.كما كشفت ان الطالب الكويتي يحصل على اقل عدد من الساعات الدراسية، التي تبلغ في المدارس الحكومية الابتدائية 576 ساعة سنويا مقابل 815 ساعة في اوروبا واميركا، ويتلقى الطالب الكويتي في المرحلة الثانوية 565 ساعة دراسية بمعدل اقل بكثير مما يحظى به نظيره الاميركي والاوروبي الذي يدرس 718 ساعة.واضافت: 'ان العام الدراسي في الكويت هو الاقصر عالميا، حيث لا يتجاوز 32 اسبوعا مقارنة ب39 اسبوعا في اميركا ودول اوروبا.

طلبة ثانويات الكويت الأكثر رسوبا في العالم كتب فهد التركي:طلبة الثانوية العامة في الكويت هم الاكثر رسوبا في العالم! هذا ما خلصت اليه دراسة اجرتها وزارة التربية حول نسبة الرسوب في الثانوية العامة ومقارنتها بنسبة الرسوب في دول العالم.وجاء في الدراسة التي حصلت «القبس» على بعض تفاصيلها وسبق ان عرضت على مجلس الامة، حيث طالب نواب الوزارة برصد اسباب هذا «الرسوب التعليمي»، فنسبة الرسوب في الكويت في المرحلة الثانوية بلغت 16.7% للطلاب و11.7% للطالبات، وتبين ان افريقيا حلت في المرتبة الثانية بعد الكويت من حيث نسبة الرسوب وبلغت نسبة الطالبات الراسبات 15.7% مقابل 15.5% للطلاب. اما نسبة الرسوب في الدول العربية فكانت 11% للطلاب و5.9% للطالبات. وبدا لافتا ان نسبة الرسوب في آسيا الوسطى لم تتعد 5.5%!وعلى صعيد الطلبة الكويتيين اكدت التربية ان نسبة رسوبهم في المرحلة الثانوية مرتفعة جدا محليا، اذ بلغت 21.3% للطلاب و15.6% للطالبات في حين بلغت نسبة رسوب غير الكويتيين 12% للطلاب و7.1% للطالبات.وبينت الدراسة استنادا الى معدلات الرسوب في المدارس الحكومية والخاصة ان 53% من اجمالي الطلاب الكويتيين و80% من الطالبات الكويتيات لديهم القدرة على مواصلة مشوار الثانوية العامة بنجاح بعد اخفاقات الرسوب في المراحل السابقة، فيما توقعت الدراسة ان 30% من الطلاب و50% من الطالبات سيكملون الثانوية العامة او المقررات من دون رسوب.واكدت مصادر مطلعة لـ«القبس» ان وزير التربية ووزير التعليم العالي د. عادل الطبطبائي طلب من قطاع التعليم العام والتخطيط شرح اسباب ارتفاع نسبة الرسوب في الثانوية العامة.واضافت المصادر ان التربية - وللأسف الشديد - ادركت ابعاد هذه المشكلة الخطيرة في وقت متأخر، ولم تتعامل بجدية مع مشكلة المستوى السيئ لمخرجات التعليم في التعليم العام.

أمس رحنا الشاليه....طبعا ما أقدر أوصف لكم جمال البحر أمس...و الجو ياخذ العقل....اللي ما تحتاج بس تبلل روحك و تقعد على اليال...و بعدين الشباب و الشابات ملوت الكورسات الصيفيه...خلصوا...و سافروا....فما نقعد نحاتي تخطرفهم علينا بالجت سكي و اللنجات...المهم....وأحنا كنا أشكثرنا...يانا واحد من الأصدقاء...جان يقول منو يبي يسحب سكي؟....منو تبلتع و قال أنا؟...طبعا أنا...على بالي لي الحين عمري بالعشرينات....و أنا أصلا خبري بالسكي من سنين....و خير اللهم أجعله خير....لبست العدّه...و باجرّب حظي...أطلع و لا ما أطلع....المهم....طلعت....طبعا شعور رائع....و البحر أينّن...أنا الحين مو طلعت...شوي...عيزت....الحين قمت أحاتي...مالي خلق أطيح...أول شي...مالي خلق أتعوّر...و ثاني شي مالي خلق الفشله...خو الشمّاته اشكثرهم....شوي..شوي..شوي...لا فجّيت رسمي...جان أطيح روحي....و رجعت الشاليه و كل شي مشى زين....اليوم قمت من النوم...ما فيني عضى يسقي عضى...واي بموت من الألم...خو ظهري ما أحس فيه...وعضلات ريلي متشبنين...وكل ما فيني يعورني...ما أقدر أقول الاّ...ليت الشباب يعود يوما

طبعا من بدت الحرب الأسرائيليه على لبنان...و الكل ماله سالفه الاّ التلفزيون و متابعة الأخبار....بس تبون الصج...الأحداث كلها بصوب....و ريما مكتبي بصوب....يا جماعه البنت ما شاء الله عليها....الشباب كلهم زايغه قلوبهم عليها....و أنا ما ألومهم...الوجه و اهوه محتقن من الحر هالوجنه..تسقي هالوجنه....والكشه ما أتحالونها الاّ عليها...و طلاقة اللسان...تشوّق...مسكينه البارحه خفت عليها من كثر ما نزّت من الضرب في صور...تصدقون خفت لا تقلب تصير مثل سعد بمسلسل درب الزلق لمّا طاح فيه الخال تخرّع...يعطيها و يعطي جميع المراسلين ألف عافيه