خارج الموضوع: اليوم ياني تليفون..طبعا عقب ما رجعت للتدوين..هذا أول تليفون تحذيري..قالوا لي يا نانو حطّي بالج لا أتطرقين لنائب معيّن..لأن مريدينه راح ينتفونج...الصج..ما ياز لي الكلام..ترا أنا بقول اللي باقوله..و هم باسوّي اللي بسويه..واللي أيوز له حيّاه الله...و اللي ما أيوز له...هم حيّاه الله..بس أنا بظل على اللي أنا عليه
******************
هم خارج الموضوع: بمذكرات الكتور الخطيب اليوم يقول
لقد شرب حليب السباع
منو يقصد؟
أنا ما فهمت أي من الشيوخ يقصد
******************
أمس بالذات عرفت شعور الدجاجه لمّا ايفوحونها بالجدر حق المجبوس....أمس الرطوبه عقب المغرب ما كانت عاديه...لأ و لازم تفترين و تباركين بالشهر...أنا خذيت كل أحتياطياتي...أنا أصلا مو من الناس اللي يحطون مكياج...فما عندي مشكلة مكياج سايح...ضفّيت شعري..عشان لا أيقفقف مع الرطوبه..و دراعتي قطن مصري...يعني ماكو أبرد..و أنتو بكرامه قندرتي واطيه..عشان الكعب مع الرطوبه أحتمالات الزلقه وارده جدا..وبديت المشوار...وااااااي...موت حر...على ما تنزل من السياره لين توصل ألا شعور الدجاجه المفيوحه...خلصنا... عقب ما شربت 10 فاجين قهوه عربيه...الرقعه وصلت مليون.. تروح حق ناس ما لهم سالفه ألا التحلطم و الذم و الشكوى من الأوضاع...يعني ما يعطونك الا طاقه سلبيه...و أنا أصلا كنت متخذه قرار بيني و بين نفسي بمقاطعة هالنوعيه من البشر...فقلت أنا ليش قاعده أسوي جذي في نفسي..و بالنهايه الشرهان أكثر من الراضي...قرّرت ما أكمّل الزيارات الرمضانيه..وأجابل حلقاتي مع صديقاتي أحسن
38 comments:
المشكلة اغلب التهديدات فشوش و من ناس مقربين لنا يضخمون الوضع بحجة انهم يخافون علينا
المشكلة الناس للحين مو فاهمة معنى الكتابة و التعبير عن الافكار و الخواطر
على بالهم سوالف تعنطز
و الله يعينكم
انتو على الاقل عندكم تكييف، انا كل شوي لازم انزل تحت الدش و اوقف جدام البنكة علشان اقدر اخذ نسم
EXzombie:
أنا اللي مضيّق خلقي أن ما صار في أحترام لاختلاف وجهات النظر...هذ رايك و هذا رايي...مو ضروري نتفّق بس ماله داعي التجريح..و أنا لما انتقد أحد..مو قصدي أني باسئ له و لا أبي أخرب صورته..لما أنتقده قصدي أوصل له وجهة نظري بطريقه حضاريه
بس
و بعدين..حتى بالأردن رطوبه؟؟؟!!!؟ ليش؟ واشحقه؟
الله يساعدك
انا ليش محد هددنى عشان احس انى مهم؟؟
تخيلت مشهد من فلم مصرى..
توفيق الدقن حاط منديل على سماعة التليفون و يكلمك
امس كان مو شي
أبا مريوم إذا ما راح إتوقف مقالاتك بالقبس ...راح أتسلل لمطبخك و أبدل جدر التشريب بجدر خثرة خثاق ناشف....كل يوم
الزفرة راح تسويلك مظاهرة عتاوية برة بيتك
هذا تهديد على السريع
و نانو الرطوبة ما إتفيد معاها إلا نساف بيبى بودر....يفرغونه على الآدمى و هو منسدح على الرصيف و بعدين يتقلب فيه مثل بعير عنده إكزيما بسنامه
بومريوم :
و أنا هند رستم؟
nEo:
كلّش..جدر كبير
واللي بالجدر يطلعه الملاّس
Bo Jaij :
بوجيج..انا عصله..ما احتاج البيبي بودر
بوجيج
انتوا المخمليين تاكلون خثرة مثلنا؟:)
نانونانو
لا زينات صدقى
مناي خابر ربع عبد الله راعي الفحما صاروا شرسين
بمذكرات الخطيب
قصده الشيخ سعد العبدالله
الله يرحمه
التهديد حلو بس الكتابة احلى
والتحلطم امس بالدوام ماله والي.. لي درجة صكرت لابتوبي وانحشت
ورديت بيتنا
امس الساعه 8 كنت بالممشى
اول مرة احس اني متسبح
اول مره احس بشهور المتان واهما يركضون d;
الرطوبة امرها سهل .. عصري ليمونتين على الجسم .. وبطل خل على الراس .. مع رشتين فلفل اسود بالعين .. ركبي اي سياره كشف وسوي حركة تايتانك وانتي واقفه .. واذا عطشتي .. شربي زيت زيتون من البطل دايركت
هذا دواج وعلى الله شفاج
اما سالفة التهديد فهذي يمكن البدايه .. لأن الخطوه التاليه لازم يكون احد المدونيين كبش فداء
يقصد الشيخ سعد اتوقع
المذكرات راح تولعها هالرمضان
قرائته متعة :)
a7laa shay il dyaya il mafyoo7a !! :P
ليش ما تكتبين رومانسيات ؟؟
علشان تخف العين عليج
يعني , خايف عليج
مانتوفاني
أحب أهنيج على قرارج الجيد والمفيد.. أنا إتخذت هذا القرار بدون الرجوع لأي أحد من أفراد العائله.. أكتفيت بالسلامات والتبريكات عبر الموبايل (مو المسجات - المكالمات الهاتفيه الحيه - لأني أرفض المسجات التبريكيه إلي على أفا الأييد) والحين أقضي وقتي بالدوام والبيت ومجابله المسلسلات والفرندز المقربين جدا..وبلا عوار راس
:)
تهديد ؟
يلا خوش خل يصير اكشن شوي الاوضاع راكده
;p
بومريوم:
يا ريت فيني ربع ملح و خفافة دم زينات صدقي
شكرا
Fahad Al Askr:
و الله حتى أنا مو خابرتهم كلّش
mtfa2el:
شكرا للتوضيح
يعقووبوو :
من ياب طاري التهديد...أقولكم أنتو تفهمون على كيفكم..محد مصدقني...تنبيه فقط
nanonano:
والله آنا أقول اللّي ما أيوز له... يطق راسه بالطّوفه!
أما بالنسبة للتهديد، فيا جبل ما يهزّك ريح
;)
LiL ALiEN:
راح أجرب دواك ان شاء الله
منو ياب طاري التهديد...أقولكم الرياييل الكويتيين..يبيبلكم قلب ما يتعب
As YoU LiKE:
الظاهر كلامك صح..بس أنا مع الصيام مو قاعده أستوعب صح
وايــــــــد ممتع
Bin3agul:
قبل لا يقطونها بجدر المجبوس لو سمحت
mantovani:
لا تخاف علي
عقب هالعمر من له خلق رومانسيات
3abeer :
و نعم القرار..أنا مسلسلاتي سوريه و مصريه
حمودي:
ذبحتوووووني من ياب طاري التهديد...حمّودي...تنبيــــــه...ما يضر
مــعـــارض:
شكــــــــــرا جزيـــلا
أخيرا أحد فهمني
احسنلج
انا طلعت مع ام لعيال السوق احس انه بوزليغة يمشي وراي يقول يلا متى اييلك
Diver:
رايح السوق مع مرتك بالرطوبه...أنت الرجل المثالي
ما عليج منهم يهدودن بعد !! شخباااااري
الرطوبه يايبتلي صداااااع الصقوعه كلها براسي
و بلاعيمي شابه من اتفطر ادووووووووخ
بس مو لازم اطق كرت كل بيوووووووت العايله على نفس السالفه و الضحك ان جنا مسيره نمشي !! كلنا نفس الوييه من بيت لي بيت
الحين استقبالات رمضان والتبريكات مو عشان رمضان ترا
لا عشان يتشاوفون عقب السفر و يسولفون وين راحوووو و يستعرضووون اللبس
lawyer:
عزيزتي...والله العظيم مو تهديد..صديقي العزيز كان يبي ينبهني بس
لأ أنا كل بيت موديل...و كل بيت نغمه من التشاؤم..لين مليت
ما عاش اللي ينفتك ..احنا وين رحنا..والنائب هذا بالذات بأحطه برأسي
:)
الحلقات -حتى البايخة- أبرك من سلامات رمضان
ولاّدة:
هاهاهاها...لا تحطينه براسج.. أهوه ماله شغل
قوه نانو و كل عام و الجميع بخير
ّالا شخبار ابا الحكم بن هشام ؟
لا يكون هدّدوه على قولتج و ترك التدوين؟
صج خسارة قلمها خساره للتدوين
و بخصوص حرية التعبير قولي للي موعاجبه فارج و طس او سد اذونك, حتى بالنت ما راح نخلص من همجيتهم و تخلفهم
اما عن الرطوبه فالظاهر كل يوم بتزيد طلعي برّا الحين و شوفي
عجبتني سالفة الديايه المفيوحه :)
احلى تحيه للجميع
ارض رمال الغربان:
أهلا بمدوّن من زمن الماضي الجميل
Post a Comment