Tuesday, May 31, 2005

أذا لــــم تســــــــتح فافــــــعل ما شــــــــــــــــــــئت

Monday, May 30, 2005

شرطي المرور

أول أمس و أنا في دوار فهد السالم لفت نظري شرطي المرور اللي قاعد ينظم السير....مسكين أبهالحر الموت واقف و الشمس حنانيه فوق راسه...و لابس هالزي اللي يطبخ...أنزين يوم أن و ظيفته تنظيم السير...ليش ملبسينه شذي..قماش زيهم الرسمي كلش ما يصلح حق جونا هذا..لو أنا من وزارة الداخليه...الشرطه اللي مهمتهم تنظيم السير البسهم بوبلين أقصد قطن الخفيف بدال هالقماش الجبر اللي ملبسينهم أياه..و بعدين حطولهم كشك مبرّد..عشان يوقف فيه..و داخل الكشك فيه ثلاجه صغيره فيها شئ بارد عشان يبل ريقه مسكين بدال لا يكون واقف...مقنقن...ميت من الحر

Sunday, May 29, 2005

يالله الثبات

الحريم الكبار بالسن...العيايز...كلّه نسمع منهم كلمة...يالله الثبات...و أول ما كنت أفهم شنو تعني...بس الحين...وايد فهمتها...يالله أتثبتنا على عقلنا....لأن أهمه صاجين...المرأه و الرجل يوصلون سن معين...و ما تدري شنو أييهم...يعني الحين وايد رياييل تشوفهم تخلّوا عن وقارهم و بدوا يتصرفون كأنهم مراهقين...و اذا سألت أشفيهم يقولون لك
Mid Age Crises
و الحريم اللهم يا كافي....طيري و طير...على بو أن رياييلهم لاهين...و لا يعانون من مراهقة متأخره...داخلين في مسابقات مع عمليات التجميل و الشد...وفي حالة تنافس مع عارضات الأزياء و الفنانات
الحين فهمت ليش يقولون ياللـــــــــــــــــه الثـــــــــــــبات
الله يثبتني بعقلي و ما أستخف مثل الجيل اللي قبلي

Tuesday, May 24, 2005

With
Friends Like YOU
Who
Needs Enemies???!!!

أهداء الى زليخه....و صديقتي صاحبة أجمل ابتسامه في الكويت

Sunday, May 22, 2005

يا جمــــــــــــــاعه وايـــــــــــــــــــــــــــــــد فاقــــــــــــــــده بــــــو جيـــــــــــــــــج
أمس من الأيام البايخه..اللي قعدت من النوم مو مقرره شنو ألبس و قعدت مدّه على ما قررت و النتيجه كانت و صولي للدوام متأخره 6 دقايق...معناته خصم من الراتب..الله يقطعهم...و بعدين دخلت بكذا نقاش مع كذا صديق و صديقه ...تعسّرت عقبها...و بعدين مديرنا اجتمع فينا أنا و زملائي و وبّخنا...و أنا مالي شغل بس حاشني طشّار....و كان مفروض أني بروح السنما مع البنات فيلم زكي شان...فعلى ما رجعت البيت و ريّحت اشويه...بدت التليفونات أترانع....طلعتي؟
يلاّ...وين وصلتي؟
وين ننطرك؟
مساكين أهمه البنات من زود الحرص...بس تدودهت....و صلنا الفيلم...و صدقوني الفيلم كان يسوى العنوه...ساعتين من القهقه المتواصله..أحنا رحنا ثلاثه...أنا و أم صفنه و زليخه...أنا و أم صفنه نستمتع بروح الفكاهه المصريه زليخه...ما تلقط شئ...فأول خمس دقايق أنا و أم صفنه كنّا غشيانين من الضحك و زليخه راحت تصلي فلمّا أقبلت علينا قلنا ويه...هذي الحين شلون راح تفهم...و من قوّة الفيلم أهيه قامت تقهقه...يا جماعه لا يطوفكم و أشوه أني رحت و غسلت كبدي عقب يومي البايخ....و ختمناها الشلّه كلها في ماكي...يالـــــــــــــــــــــــــــــــــــــــــــــــــــــذّه

Saturday, May 21, 2005

عقب العرس

أنا أعتقد أن أسوأ شئ ممكن يصيرحق المرأه لما ترجع من أي عرس...أنها تلاقي زوجها قاعد ينطرها...لأي متأكده أنها ما تبي زوجها يشوفها بهالمنظر...أول شئ جايه تعري من الكعب...و بعدين على ما تغير هدومها و تفصخ الكورسيه..آسفه..الاّ بطنها متروس غازات...و عقب تيي تشيل هالماشات المتروسه في راسها...الشعر يصير يخرع...عقب هالماشات و السبريهات...و آخر شئ اللي ختامها مسك...غسل الوجه من المكياج...ولي ساح الكحل...تصير المرأه ضيــــــــــم...و مسكينه تروح بسكات تبي تندعس بالفراش قبل لا تنّزر من الزوج...تلاقي يلتفت عليها عقب هذا كلّه و يقول...تو النــــــــــاس

Wednesday, May 18, 2005

يا جماعه لازم أشوف لي صرفه مع خوفي من القطاوه...مو معقول..وأهمه القطاوه قاعدين لي قعده..وين ما ألتفت تطلع لي وحده...بمـــــــــــوت....أوّل أمس و أنا ويا صديقتي النسره تذكرونها و زليخه طالعين من البيت...و أنا غشيانه من الضحك لأن النسره كانت قاعده توصف لي دبغتها...و زليخه كانت وراي...و أنا توني فاتحه باب السكّه..الاّ قطاوه يتعافرون...وحياتكم أنا اللي أذكره أن زليخه داخل البيت و النسره بالسكه طايحين بالأرض من الضحك على تعابير وجهي و شلون ركضت و دخلت......و قفلت الباب..صديقتي النسره...تقول لي أنزين ليش تقفلين الباب ...يعني القطوه بتفتح الباب؟
مالـــــــت عليــــــــك
أمس أنا مسويه روحي مستعجله و بروح البيت...و قلت حق البنات أووووه أنا ما راح أنطركم..خذيت جنطتي..و تمشيت عالبراد...توني فاتحه باب السور....شان ألشح قطوه جايه تركض...اكتشفت روحي عقبها بالدور الثاني عند البنات...أول ما شافوني...قطوه؟
ما أدري شنو أسوي
مـــــــــــــــــــــــــــــن غيــــــــــــــــــــــــــر ليـــــــــــــــــــــــــــه
هذا مزاجي اليوم

Tuesday, May 17, 2005

اليوم قعدت الصبح...وفي بالي سؤال

تهقون

Matthew Mcconaughy

أذا شافني ممكن يعجب فيني...ويهد صاحبته عشاني

حطيت لكم لنك عشان تشوفونه

http://images.google.com/images?q=matthew+mcconaughey&hl=en&lr=&start=0&sa=N

مبروك للمرأه الكويتيه حصولها على حقوقها...بس الصج ينقال أنا ما فرحت ألاّ حق أبوي...بعد عمري...أحنا أربع بنات فبيتنا كلّش ما كان له ثقل بالمنطقه...الحين المفروض المرشحين يطالعون وجه أبوي مطالع...مو أنه أبوي ممكن يأثر علينا و لاّ يقولنا منو نصوت له ...بس أحنا وايد نحترمه و نقدر رأيه


Monday, May 16, 2005

قريت هالجمله.....ومــــــت فيها
رجـــــــلا فــي حالــة بــوح هـــو منتــــــــهى الفـــــــــــــروسيــــــــه
بعد أذنك

يا شمّــــــــــــــــــــــــــــــــــه

هاليومين كل ما حطيت الراديو على 88.8 اللي اهيه
Marina FM
أسمع أغنية يا شمّه...واللي يغنيها واحد ينقاله طارق خميس..أول مرّه أسمع فيه
المهم الأغنية أي شئ....و حصريا على المرينا
فقاعدة أقول حق صديقتي اللي يخليك سمعيها الكلمات خرابيط بمعنى الكلمه بس أحلى ما فيها أنها ترقص
و صادف أن صديقتي على طول عقب هالكلام ركبت سيارتها و سمعت الأغنيه
دقت علي و قالت لي شالخرابيــــــــــــــــــــــــــــــــــــط
و ضحكنا و سكرنا الموضوع
أمس عرفت منو اللي كاتب هالأغنيه
شان أدق عليها و أقول لها قولي منو كاتبها و أنا بموت من الحماس و الضحك
ضحكت أهيه شان تقول دعيج الخليفه؟؟؟
صــــــــــــــــــــــــــــــــــــــــــــــــــــــح
أنا أحب أقولكم أن دعيج تفوق على نفسه
LooooooooooooOOOOOOOoooL

Sunday, May 15, 2005

حمارة القايله

دخلنا بنقاش ذاك اليوم أنا ويا البنات...طبعا كلهم عندهم مشاكل مع عيالهم...اليهّال وايد تبلتعوا...ردودهم وايد صارت قويه..و صريحه..فمثلا قاعدين نقول شلون أول أهلنا لين صارت القايله...خو ما كان في قنوات فضائيه مثل الحين...و قايلة أول كانت قايله...صخّه..و أهالينا يرجعون من الشغل يبون يرتاحون شويه...فكانوا يخرعونا بحمارة القايله...عشان ما نطلع بالحوش و نزعجهم..المهم كنا نخاف و مصدقين أن أكو حمارة قايله...منتهى السذاجه...الحين لو أقول حق بنت أختي أم أربع سنين عن حمارة القايله..يمكن ترد علي
what's that????!!!
يعني
Beast
راح تغشي من الضحك...و تعطيني نظرتها...عن الخرابيط...
منو فيكم يعرف ياهل الحين ممكن تخرعه بحارة القايلة و ما يرد عليك بجواب ممكن يحرجك؟

Monday, May 09, 2005

بمناسبة هبوط السوق أكثر من 260 نقطه...أحب أقولكم
الأحمر يعبّر

Sunday, May 08, 2005

SAHARA

أمس رحت فيلم
SAHARA
بطل الفيلم
Matthew McConaughe
و البطله
Penelope Cruz
الفيلم وايــــــــــــــد حلو...أنا شخصيا وايد عجبني...بس اللي مسكّت ماثيو...أنتو شباب الكويت ليش أجسامكم مو شذي...ال
six pack
ما حلت الاّعليه...أنتو الكويتيين اللهم ياكافي..يا واحد عصل منونوي..يا مكرش على باله هيبه..يا تافخ جسمه على قل سنع...لأ و الألوان..تناسق الألوان البشره مع لون الشعر مع لون العيون..و بعدين يا ليت لو شبابنا يتعلمّون ال
Dirty look
منّه...و بعدين البطله بينلوبي ما حلا الحجاب الاّ عليها...حتى التفت على صديقتي و نسيت أنها متحجبه..قلت لها..الحين اذا أحنا تحجبنا شذي يطلع علينا الحجاب؟؟؟
شان ترد شوفيني و عرفي الرد....طبعا الرد كان ...............في عينّا
بس أنصحكم بالفيلم...يونّس
عرفتـــــــــــــــــــــــــــــــــــــــــــــــــــــــــه
الفارس العـــــــــــــــــــــربي

Saturday, May 07, 2005

أغنيتي الجديده اللي أعتقد أنها راح تصير أغنية السنه حقي
يا عديم الشوق
لعبدالمجيد عبدالله

بــــــــــــــــــــــــــــــــــــــــــــــس

بــــــــــــــــــــــــــــــــــــــــــس مليت....الناس صايرين وايد كذابين...كل واحد عنده
hidden agenda
و المشكله أن الناس اللي بديت ما أعرفهم من أقرب الناس حقّي
و بعدين على فكره
ضربتين بالراس توجع
و كل مرّه أقول حق نفسي..ترفّعي عن هالسخافات
بس من كثر ما أنا قاعده أتجاهل هالسخافات بدوا يستعبطوني
وايــــــــــــــــــــد محتـــــــــــــــــــــــــــــــره

Tuesday, May 03, 2005

تذكرون سالفة صديقي اللي عرض علي أشتري حوت؟
اليوم شفته...سألته أنت وين غاطس؟؟
شان يقول لي: سكتي غاطس بمعمه لأن الحوت مات
قويّـــــــــــــــــه
بس ترا عندي....نفط...تبين؟
و هذا أنا ما قلت لكم عن السفينه اللي عرضها علينا..أعتقد أن أهوه ملك غسيل الأموال في الكويت

Monday, May 02, 2005

دي جيت

السوق اليوم ضعيف...و نتيجة النزول مال أمس و أول أمس..نفسية الشباب مو زود...فقررت أصير
D.J.
فالله يسلمكم لي الحين حطيت لهم
البوسطه-فيروز
قبل لا تروح-خالد الشيخ
ما علينا-أبو بكر سالم
أنا بتبع قلبي-عبدالله رويشد
ما بتفرحشي-شرين أحمد
وترا أرحب بمقترحاتكم...لأني قاعده للساعه أربع
Thank U Broken
لأنك ذكرتيني بأغنيه عيناك خالد الشيخ.... عيـــــــناك....وايـــــــــــــد أحبها و أحب ذكرياتها ومن أجمل ما لحّن خالد...و كلماتها...ما اقدر أوصف شعوري لمّا أسمعها
شكــــــــــرا
U made my day ;-)
 
template by Purplecious