Monday, August 21, 2006

صباح الخير...أنا لما حطّيت الموضوعين ملوت أمس و أول أمس...اللي أهمه كانوا العنوان الرئيسي لجريدة القبس...مو عشان أوجّه أصابع الأتهام لأي جهة....أنا كنت أبيكم تشوفون لأي درجه أحنا وصلنا...وزارة التربيه غلطانه صح....بس الغلط الكبير و الفادح و اللوم كلّه يوجّه حق الأم و الأب الكويتي...في حالة من التسيب و اللامبالات بالأسره الكويتيه...و مبدأ.. أسم الله عليك لا يغشى عليك... أهوه اللي سائد....يعني بافهم ولد أو بنت في سن المراهقه...عندهم موبايلات...و سوّاق تحت سبال أيدينهم...شلون ما يلهون بالمغازل...وهذا طالعني و هذي طالعتني...بذمتكم...رحتوا الجمعيات التعاونيه الضحي أيام المدارس...كلّه تغوش مصبنه مالت الثانويات...هذولا المصبنه ما يخافون يصادفون أهلهم بالجمعيه و يكتشفون أنهم مزرقين...طبعا لأ...ما يخافون...و تلاقي الأم أذا تكبرت المقعد و قالت ولدي أو بنتي مسكتين و شطار أسم الله عليهم...و أهيه تدري بقرارة نفسها أنهم بلوه و مو عارفه شلون تربيهم...ها...وفي مشكله...عشان أبو العيال أو أبونا ما يعصب...و يضيق خلقه و يقول أنتي ما تعرفين تربين لأنج هايته...ما تقول له لما تعرف عن أخطاء عيالها...و يستمر الشاب أو الشابه بالخطأ...مستغلين خوف الأم من الأب...و هلمّه جرّه...لما صارت الأسره الكويتيه آخر سبهللا...هذي وجهة نظري


11 comments:

Diver said...

كلامج صحيح و اغلب المشاكل اللي تواجها المجتمعات تكون ناشئة او نتاج لما يدور بالبيت
من الجانب الثاني الدولة ممثلة بالحكومة و هيئات و جمعيات النفع العام لها دور في توعية المجتمع بالظواهر و خاصة ان الدولة اول من يعرف عن الظواهر لكن عمك اصمخ
ماكو احد قاعد يؤدي دورة بشكل صحيح لا الدولة و الشعب
و الله المستعان

Alia said...

صج فيه لوم كبير على الأهل
بس المسئولية شراكة بين الأم والأب مو بس الام .. والام لما تيي تقول ما ابي اقول حق ابو العيال عشان ما يزعل ويزفني .. هني انا الوم الريال اللي غاسل ايده من كل شي .. بس فالح ييب يهال ويقطهم على الام
لو الام والاب اثنينهم يحطون بالهم على اليهال وتكون المسئولية مشتركة بينهم كل واحد يسوي شي .. شان انحلت وايد مشاكل

nanonano said...

Alia:
يمكن أنا ما وضّحت صح...اللوم يقع على الأم و الأب...وما كان لي خلق أسهب في دور الأب الكويتي المفقود..لأن اذا بدينا بموضوع الأب صدقيني ما راح نخلص...أهيه مسئوليه مشتركه من الأبوين

Unknown said...

when it comes to mobiles this we cant avoid because we live in a new and new times..

Drivers and cars was always around us. the diffrince is we had intersts when we were young.
we were all nuaghty at school butwe did our home work and respect for our teachers.

LiL ALiEN said...

المشكله بالدلع الزايد من الديره

وين ايام اول المدرس الفلسطيني .. ليمن يكسر المسطره الخشب على ايدنا ليمن تصير زرقه من الطق؟ .. غصب طييب كنا نتعلم .. وكنا نخاف من الطق اذا مو حالين الواجب .. والحين في امه خير اي مدرس يرفع ايده على طالب .. باجر فاصلينه .. ليش الوزاره ماتعطي دعم للمدرس؟


بالاول نروح المدرسه يفتشون على اظافرنا وشعرنا بالطابور .. والحين شعر طويل لي الكتف .. واظافر .. والشعر مصبوغ خصل .. وين التربيه عن هالتساهلات؟


بالاول كنا نطلع من البيت نلحق بنات ونغازل .. ليمن يمسكونا الشرطه .. طراقات فينا على الباصات وتقريع الشعر .. اللي ثاني يوم الكل يظحك علينا .. والحين وين هالنوع من المراقبه؟


خليها على الله .. الكل صار متساهل .. والمساكين كل اللوم على الام والاب بروحهم .. وين يلحقون؟؟


اذكر وانا برابعه ثانوي خط التيلفون النقال 120 دينار .. والكاشف 100 دينار .. والتيلفون 150 دينار وعليج الحسبه .. لدرجه ان اذا واحد بالصف عنه تيلفون هذا ولد فلوس .. والحين الخطووط على افا من يشيل تبين الاب او الام يقولون حق وزارة المواصلات خربتوا عيالنا؟


يبا .. من الآخر الديره مو محتاجه عيالكم .. لأن مايطلعون فلوس ومامنهم فايده ولا يبون يشتغلون .. وآخرتها بتصيرون مثل الدول اللي حوالينا .. يحوطون حق الكويتي بارات وديسكوات خل يشرب ويسكر ويقعد في بيتهم .. وخل الهندي وغيره يعمره الديره


والسلام عليكم ورحمة الله وبركاته

Fuzzy said...

اذكر لما دخلت مدرسة الغزالي كان معاي ابوي وكلم الناظر - كان اسمه استاذ تيسير- قاله هذا ولدي لك اللحم ولنا العظم ! جان أقعد أبجي من الخرعة .. المهم بالموضوع مو ان المدارس اول حكومية أو خاصة كانوا المدرسون يستخدمون الضرب كنظام تأديبي .. المهم ان الاسرة كانت تكمّل دور المدرسة في التعليم.. مو مثل الحين يتوقعون المعجزات في المدرسة ولا يبون يشاركون في شي في البيت .. أشوف الحين الاباء والامهات تركيزهم على شراء زي مدرسي على آخر موضة ! و شنطة على آخر فيلم رسوم متحركة أو على هيلو كيتي للبنات هبة هالسنه زين وبعدين . وين دوركم يا آباء و أمهات ؟ اذكر كان ويانا طلبة من الجنسية الفلسطينية .. كانوا بالصيف يدرسون منهج السنة القادمة .. احنا من يصير الصيف نفكر وين بنسافر و ديزني لاند لليهال هاهاها ... انا ودي ان وزارة التربية تتخذ قرار شجاع اللا وهو .. ان المدارس الحكومية تكون ادارتها من قبل القطاع الخاص .. بس الادارة .. راح نشوف فرق كبير .. ولا شرايكم ؟

Unknown said...

احنا جيل الطلائع يا بابا

nanonano said...

LiL Alien & Fuzzy:
أنا لي الحين ما أنسى خزّة ناظرتنا بالأبتدائي من الجنسيه الفلسطينيه...أبله فوزيه الخرمه...تخرّع...أنا أعتقد أن التعليم بالكويت أنحدر من بعد الغزو...لما أستعانوا بجنسيات الكويت بالنسبه لهم محطة تجميع فلوس...و بعدين أنا أتفق معاكم أن العقاب الصارم بالمدارس كان له دور في أنضباط الطالب...ولو أني ما مريت بأي عقاب...لأني حيّة قلب و كنت من المتفوقين

:P

Fuzzy said...

هاهاها اكيد كانت الابلة تقولج انا بطلع شوي وانتي سجلي اسامي البنات الشياطين بورقة على ما ارد

Mohammad Al-Yousifi said...

the thing is, i see my young relatives now each have 4 private teachers

i wasnt that smart at school but i managed to graduate with no teachers! i mean private ones!

quality is down the drain , ill put it on MOE

Zaydoun said...

ما يداومون بالمدارس وبعدين نتحلطم ليش ما يداومون بوظايفهم

 
template by Purplecious