Monday, September 18, 2006

اشاعة حب

قبل كم سنه رحنا أنا و صاحبتي بيروت...و هناك كان أخوها...و أهوه من الناس اللي يتمتعون بموهبة العلاقات العامه....و له علاقات وايد في لبنان...المهم واحد من الشخصيات اللبنانيه الجذّابه جدا...جدا...جدا...حب أن يعزمنا على الغدا أنا و صديقتي و أخوانها الأثنين....و رحنا... و سكبنا...و أحنا قاعدين بالمطعم...يانا صاحب المطعم اللي يعرف هالشخص اللبناني و من باب الميانه طلب صاحب المطعم من اللي عازمنا أنه يغني بالفرنسي...لأنهم لبنانيين و راقين جدا...ثقافتهم فرنسي...صاحبنا من كثر ما أهوه مؤدب ما حب أن يفشل الريّال...جان يبتدي أغني بالفرنسي...و أحنا قاعدين مبتسمين وايد معجبين في صوته و أدائه...لين وصل حق مقطع يقول فيه...ماما....أحنا و لأن ثقافتنا أغلبها مستقاة من الأفلام المصريه...أهوه قال ماما...أحنا ثلاثتنا أنا و صديقتي و أخوها تطالعنا...لأن شنو طرا علينا...فيلم أشاعة حب...لما ولد خالة سعاد حسني يغني حق يوسف وهبي هالأغنيه و يقول له ماما...و هذاك يرد عليه يا روح أمّك....ما أقدر أوصف لكم شنو صار فينا ثلاثتنا...صديقتي محظوظه لأن تلفونها رن قامت من الطاوله و خلّتنا بنموت...أنا ويهي أحتقن...لأني كنت بموت من الضحك...و ما أقدر أطلع الضحكه...و أخو صديقتي يخزني عشان أسيطر على روحي...و الريّال مشتط يغني و رايح و أنا تاكني العرق من الفشله...و ما أقدر أضيع الصقله بالأكل و لاّ الشرب لأني راح أشرق راح أشرق...كانت من أصعب لحظات حياتي بالسيطره على روحي...لأن جان برستيج الريّال اللي عازمنا بلا حلا صار بالأرض...و أهوه تبون الصج ما يستاهل يصير جذي فيه...بس الشرهه مو على الريال الشرهه علينا اللي أحنا اللي الريال حاشمنا و أحنا ما ردنا الا فيلم أشاعة حب

17 comments:

Zaydoun said...

من أحلى الأفلام العربية... بس منو الطفل المعجزة اللي قام يغني؟؟

Fuzzy said...

هاهاها موقف عجيب .. انا جذي اي شي يضحك اموت من الضحك لين اوصل الدرجة الهستيريه .. ايام المدرسه اول كل يوم انطرد من الصف بسبة هالسوالف .. ونفس حالتج بالموضوع السابق اذا في مكان عام احد زلق اغشي من الضحك فشله ادري ومشكلة

هاهاها

Diver said...

شوفي كل يوم و انا اتاكد غن العرج لكويتي ضارب فيج حتى النخاع
الشماته و التطنز زاهبين
الله يعينا الناس عليج

Shurouq said...

الفيلم روعة ولازق بالذاكرة.. ما تنلامون

يوسف بك وهبي بدع

nanonano said...

Zaydoun:
بوالزيد هذا بيني و بينك أقولك منو أهوه

nanonano said...

Fuzzy:
أبا بعد عندي موديل الجاثح....مساكين اللي جدّمي كله ضحيه لأن أي شي بحلجي أطلعه...لأني أخاف أني أشرق و أنا أضحك

nanonano said...

Diver:
وشفيه العرج الكويتي...يالله من فضلك...حليوين و أنينّن

nanonano said...

Shurouq:
شوشو أنا يوسف وهبي أمــــــوت عليه....يتمتع بخفافة دم أليطه...ما أدري أذا فاهمتني

Diver said...

ما قلت شي عن العرج ما كنت انتقد
بس لان في شك في الواحد اذا كان كويتي و مايحب الشماته و التطنز

و الي قلته كان مدح مو نقد و كان ياكد على ارتباطج في هاذي الارض و التمسك بالعادات و التقاليد المتوارثه من الاباء الاجداد و المحافظة عليها بغرض توريثها للاجيال القادمة

nanonano said...

Diver:
يا حافظ أدري...بس قلت أتحرش شويه فيك
;)

hathra said...

عقب البةست بيوم بس شفت الفلم صدفة وربي... قلت الا اشوف اللقطة عشانج

وقعدت اضحك على موضوعج اكثر من الفلم نفسه.....

ويوم قال لولد خالتها: انتوا سبب النكسة.....

bo_sale7 said...

انا ما امسك نفسي ... بس ابرر واشرح حق اللي جدامي ليش صار جذيه
لحظة الضحك ما تتعوض

تحياتي

Diver said...

مبارك عليكم الشهر
و كل عام و انتم بخير
و ان شاء الله تعودونه بالصحة و الخير و العافية

Alia said...

عجبتني خفافة دم أليطة
بس صاجة .. اهوه دمه خفيف بس شيك خالص

والفيلم تحفة
ما أدري شلون اختاروا سوف وهبي حق هالدور ولا عمر الشريف .. كلش مو لايق عليه واحد لخمة

kila ma6goog said...

ما كنت مولود ايام هالفلم و مو شايفه

مبارك عليك الشهر

Drunk'n'Gorgeous said...

Mubarak 3alaykum ill shahar ^^

medocroz said...

مشكوووووووووووووووور على هالمقطع لانه كتير كتير حلو

 
template by Purplecious