Monday, December 26, 2005

كل عام و أنتو بخير

كل عام و أنتو بخير يا جماعه...و ان شاء الله تكون 2006 أحسن من 2005 حق الجميع...أدري بتقولون ليش مستعيله...بس لأني الأيام الأربعه الجايه ما راح يكون بامكاني اني أكتب شي...ف
HaPpY NeW YeAr
أمس قعدت مع نفسي و ياليتني ما قعدت معاها...لأني اكتشفت أني ما قدرت أحقق و لا هدف من الأهداف اللي حاطتها حق روحي حق سنة 2005
بل بالعكس سنة 2005 ما كانت سنه وايد زينه بالنسبه لي....بدت نوعا ما زينه بس تيّست مع مرور السنه
و بعدين ما أدري شلون مرّت السنه...شك ..بم...الا احنا في نهايتها
فان شاء الله سنة 2006 تكون سنة خير على الجميع

Sunday, December 25, 2005

وصلني مسج من صديقه قديمه لفت أنتباهها تعليق السيد
على موضوع ستار أكاديمي تقول لي
مافي أنسان جاد بالمطلق
أو تافه بالمطلق
كلنا فينا خليط من الأثنين
بس
بنسب متفاوته
مثل الخير و الشر
بصراحه عجبني تعليقها

شكرا بو مريوم خـــــــــــــوش نقصه



Saturday, December 24, 2005

صباح الخير....شاخباركم مع ستار أكاديمي البارحه....شفتوا هاني المصري؟ يا زينه أمس الكل أجمع عليه...بالنسبه لي أول شي كونه مصري هذي أول ايجابيه بالنسبه لي...... و بعدين ملح الدنيا... و مؤدب ...و خنة حيلي يتيم....و يغني بالعربي و الأنجليزي و الفرنسي بطلاقه...و رسّام...تقريبا...تقريبا كامل و الكامل الله....بس خوفي من شي واحد بس لا يصير ثقيل طينه...لأن من استثقل طينته هاللمميزات اللي قلتها كلها بتطير واقلب ضدّه...فان شاء الله يصير دمه خفيف و حليو....مو زغل


Life Is Too Short To Hold a Grudge

Wednesday, December 21, 2005

اليوم الأربعاء

منو يقول لي هالمقطع من الأغنيه من أي مسرحيه
جمالش و دلالك...حيّرني أي حيرني
و رمشك الأكحل كشمشني
و
أنا قلبي تعذّب و ذبحه الهم يكفيني...أشوفش..أشوفش
و أشمك شم
have a nice weekend

Tuesday, December 20, 2005

لحقوا يا الأيواد....بو راكان راح يوقّف

ولو أني قايله أني ما راح أييب طاري بوراكان....لأني أخاف منّه...بس الفقره الأخيره في مقاله اليوم ضيقة خلقي...اللي تقول
لحظة.. قانون المطبوعات القديم او الذي هلل له السيد وزير الاعلام والسيدة القاطي مسلط علي.. لذا فسوف اتوقف.. مجبرا.. كما يتوقف ربع مليون شيعي كويتي.. وفوقهم ربما بضعة آلاف ليبرالي كويتي ايضا عن الكتابة.

Monday, December 19, 2005

عندي صديق يمتاز بخفافة الطينه....دمّه شربات....صار لي كم يوم ما أدري عنّه....اليوم دقيت عليه عشان أتطمن عليه...قلت ها يابو فلان وينك عسى ما شر.....شان يقول لي أي ما شر أنتي ما تشوفين السوق؟

السوق نازل

ضغطي نازل

سكري نازل

أنا بس أبيك تروحين الساعه 12.30 و توقفين سيارتك عند بنك الخليج و قهوة سكوند كب و شوفي وجه الرياييل لمّا يطلعون من البورصه....كل واحد وجهه اشطوله كأنه مطّاعه و طايره بوهتهم....متخدين و قاعدين...خليها على الله....الله كريم


Sunday, December 18, 2005

بمناسبة كسر السوق حاجز 11,200 نقطه

لاحظوا مقطع زغروطه يا أم صلاح...هذا اللي ودّي أسويه الحين

http://song5.6arab.com/tamer-7osny_kol-marra2.ram

Wednesday, December 14, 2005

have a nice weekend

خل نتسلى نهاية هالأسبوع و نشوف منو يقدر يعطينا أحسن ترجمه حق هالأغنيه
غزاله بزاله
تحقرص تمقرص
ضب ضباب الليله
بلاغه بلغت در

From a3sab

This Is My Life, Rated
Life: 6.1
Mind: 5.7
Body: 5.2
Spirit: 6
Friends/Family: 6.6
Love: 5.5
Finance: 5.5
Take the Rate My Life Quiz

Tuesday, December 13, 2005

يا جماعه أنتو مو ملاحظين حالة التسيب و اللامبالاة بين الشباب الصغار...أنا أقصد اللي تتراوح أعمارهم بين 14 و 18 سنه...أول أمس كنت قاعده مع أخوي المراهق...اللي ينتمي حق نفس الفئه السنيه هذي...ما تتخيلون شلون طارت بوهتي....مو معقولين المصبنه...و مساكين مدرسينهم...مع الأخذ بالاعتبار أن أخوي عنده نوع من الخوف حق أمي و أبوي....هذا و اهو يخاف جذي!...أنا اقترح الغاء النظام الثانوي للبنين و تحويلها جميعا الى مدارس عسكريه...عشان على الأقل يتعلمون الأنضباط و الجديه في الحياة...مو مثل الحين

هوي هوي يا ناقتي

Monday, December 12, 2005

زود بالنعمه.... ما راح أقدر أروح ندوة د.الخطيب و لازم أروح العشاء

Sunday, December 11, 2005

الجينز

الله يسامح اللي اكتشف الجينز...واللي رد مودة الجينز....حدي معصبه على روحي....دقت علي قريبة أمي تطلب مني حضور عشاء في بيتها على شرف عروسهم الجديده..... و طبعا لأن أمي و خالتي ما يقدرون يحضرون لظروف خاصة...صارت الصكّه فيني...ما أقدر أعبر عن مدى كرهي للمناسبات الاجتماعيه....ما أحبها...بس هالمره أنا مضطره أني أروح...قعدت أفكر شنو راح ألبس....اكتشفت أني ما شريت شي هالسنه يصلح حق شي رسمي مثل جذي...كل هدومي يا حق دوام أو جينزات...يعني ببساطه شديده ما عندي شي مرتب...واليوم لازم أروح السوق شود الله يوفقني و ألاقي شي يناسب العشاء.....وااااي مالي خلق

أكره شي بالدنيا....لما الواحد يبتدي يكتشف ان أعراض العمر بدت تطلع عليه...أبوي معطيني روايه قبل 3 أيام...واشتطيت لأني قاعده أدور شي حلو ينقرا....المهم....فتحت الروايه...حاولت أقرا....و بديت أندمج...بس في شي مو مخليني وايد أندمج...شالسالفه؟....ماني قادره أقرا الأحرف عدل...لازم وايد أركز....وليّن...الحين أنا ألبس نظاره لأني ما أشوف من بعيد...بس مابي أضطر أني ألبس نظاره ثانيه حق القراءه...و أصير حالي حال العيايز اللي يبدلون نظاراتهم حسب الغرض...و لا تقولون لي ليزك هو الحل...لأني أخاف ألعب في عيوني....يا كره هالشعور

Monday, December 05, 2005

لتغيير الأجواء

ما ينداس له على طرف

وخزياه...وخزياه..وخزياه...الله يا الفشله...ما توقعت بوراكان بيرد علي...قلت كلش...كلش بيعلق على مدونتي...بس أن يغسلني شذي جدام الله و خلقه...هذا اللي ما حسبت حسابه...لا يحوشك...ما ينداس له على طرف
;-)

Saturday, December 03, 2005

a movie i would love to watch

بو راكان....أبيض

عادة لما أقوم من الصبح أول شي أسويه أشرب شاي حليبي و أقرا القبس....و يوم الخميس بالذات...الشي الوحيد اللي أقراه مقالة عبداللطيف دعيج...المهم أول أمس فتحت الجريده...و دورت المقاله...الاّ بوراكان كاتب...ألا أني أكلت يوم أكل الثور الأسود..هاااااو..شان آخذ التليفون و أكلم أبوي..صبحت على أبوي و سألته يبا ألا أني أكلت يوم أكل الثور الأبيض و لا الأسود..قال لي لا يبا الأبيض...تشكرت منه و سديته...دقيت على صديق خبير بقصص التراث العربي...سألته قلت له ألا أني أكلت يوم أكل الثور الأ....شان يضحك ضحكته الجهوريه...و قال لي عبد اللطيف دعيج...لأ أبيض...أبيض...أنا مو قصدي أني أصلح حق بو راكان...بس حبيت أعرف أذا كان يقصد شي ثاني
 
template by Purplecious