Thursday, October 30, 2008

متفرقات ويكنديه

مع هبّة الشماله ما يحلى العشا الاّ بالعيش
.
أكتشفت أني أموت على العيش بجميع طبخاته
.
صار لي فتره كل يوم عشاي
.
خبزه أيرانيه و زيت زيتون
.
البارحه كافأت نفسي و تعشّيت عيش
.
الله يا المتــــــعه
.
فأوصيكم بما أن أحنا مجبلين على
.
ويكند...و شماله
.
العيش..ثم العيش..ثم العيش
.
**********
.
.
أقترح واحد من الزملاء تحويل
.
مبنى البورصه الى نادي ليلي
.
الصج عاد توزيعة المبنى صح
.
حق نايت كلوب
.
قاعة التداول تصير مكان الرقص
.
Dancing Floor
.
ومكاتب الدلاله يتم توزيعها عن طريق
.
مناقصات رسميه لتقديم الأكل و المشاريب الفاخره
.
و المزانين الأول يصير مكان مثل اللوج
.
حق اللي يبون يسوون روحهم كشخه
.
بس كانت المشكله
.
في نوعية البشر اللي ممكن أيون
.
جان نهوّن عن المشروع
.
هذا اللي ردنا
.
**********
.
.
أخيرا سياسة شد الحزام نفعت معاي
.
هالشهر أول مره ينزل الراتب..و لي الحين
.
عندي رصيد...أحمدك يا رب
.
أخيرا تعالجت
.
**********
.
.
المود هالأسبوع
.
طبعا عبدالله رويشد
.
صدقيني
.
عطله سعيده للجميع

Wednesday, October 29, 2008

Shall We Play?

يوم أن أحنا فاضين
.
و الجو شكله بيكون عواصف
.
خل نتسلى..و نلعب
.
بالوضع الحالي..مجلس الأمه و النواب
.
مذكريني بمسرحية مدرسة المشاغبين و الطلاب
.
طبعا الناظر ما عليه خلاف منو اللي نفسه بالمجلس
.
اللعبه الحين..منو من النواب
.
عادل أمام
.
سعيد صالح
.
يونس شلبي
.
أحمد زكي
.
هادي الجيار
.
؟
يالله خل نسمع ونشوف

Tuesday, October 28, 2008

بو شكري..أنا آسفه


واخزيـــــــــــــــــــــاه
.
هذا الشعور اللي ياني لما قريت خبر
.
استثناء اللجنه المشكله من لجنة الوزراء 
.
لأبراهيم دبدوب لأن مو كويتي
.
.
بو شكري أنا تعلّمت المهنيه و الدقه
.
و الحرص من خلال المؤسسه الماليه 
.
اللي أهوه يديرها
.
.
بوشكري اللي خلا البعير ما ينوّخ
.
في جميع الأزمات الأقتصاديه 
اللي مرت علينا
.
.
بو شكري أكثر أنسان بالكويت برأيي الشخصي
.
عارف حق الأقتصاد الكويتي
.
.
بو شكري أدار المؤسسه الماليه الكويتيه
.
الوحيده اللي اشتغلت أيام الغزو
.
.
بو شكري أنا آسفه لعنصريتنا
.
في وقت أحنا في أمس الحاجه
.
لخبراتك.. و تجاربك..و أدارتك
.


Sunday, October 26, 2008

آن الأوان لمبادره شعبيه

ما أعرف أذا أنا ساذجه أو قاعده أفكر
.
بطريقه طيبه زياده عن اللزوم و أنا متأكده
.
أن الموضوع مو بهالسهوله..بس أظن أن
.
آن الأوان لتحرّك شعبي لأنقاذ الأقتصاد
.
الكويتي..الحكومه لايصه..و الوزراء قدراتهم
.
متواضعه..شنو نسوي..نخليهم و نتشمّت
.
و لا لازم تصير مبادره من الأقتصاديين بالبلد
.
لو أنا شخصيه مسئوله..أنادي
.
جاسم السعدون
.
سالم عبدالعزيز الصباح
.
بدر  المخيزيم
.
أبراهيم دبدوب
.
د.علي سالم العلي
.
د.عبدالعزيز السلطان
.
اقفل عليهم بغرفه و أقول لهم..عطونا تصور
.
لحل الأزمه..على شرط أن يكون هالتصور..غير
.
مرتبط بضخ سيوله
.
ما أدري اذا صح اللي قاعده أفكر
.
فيه و لا عبيط
.
بس هذا اللي ودي يصير الحين
.
و ترا الأسماء اللي ذكرتها
.
هذي اللي طرت علي بالوقت الحالي
.
مع أختلافي لوجهات نظرهم بس اعتقد
.
أن عندهم رؤيه واضحه لأدارة مؤسساتهم

Thursday, October 23, 2008

متفرقات ويكنديه

أحنا بأدارتنا منقسمين قسمين
.
مواليد أوائل السبعينات..و مواليد أوائل الثمانينات
.
فأمس صارت مقارنه لطيفه لوقتنا و وقتهم
.
طلعنا بنتيجه..أن اللي ما لحّق على
.
الكويت 86 و 87...ترا طـــافه
.
**********
.
.
قاعده بمكتبي أتطمّش على شاشة السوق
.
و السوق في حالة أنهيار طبعا
.
و أسمع الشباب برّه..واحد يقول
.
أيّاك و اليأس من وطنك..و الثاني يرد
.
عليه..أياك..أياك..أياك
.
و الثالث يطق بأيده على المكتب
.
و يقول بلد..قعدت افكّر شنو سر
.
شعارات مرزوق..طبعا الشباب يرددونها
.
مو أيمانا بمرزوق..بس شعاراته ترسخ بالمخ
.
شاطــــر..بس هالشطاره يبيلها أتخاذ مواقف
.
واللون الرمادي ما يفيد وايد
.
**********
.
.
كلنا سامعين عن عصير الضاحيه
.
عوار قلب..و أخو عزيز
.
اليوم واحد يسولف لي
.
داخل بالمحل مال العصير و ينطر طلبه
.
دخل واحد و قال حق الريال..أخوي
.
عطني واحد عوار قلب..و زيد لي على الحب شويه
.
وايد يازت لي السالفه
.
**********
.
.
دخلت على أختي الاّ أهيه فكره توديها
.
و فكره تييبها..اشفيج؟
.
ردها كان: شلون أقدر أفهم ياهل أن أحنا
.
نتكلّم باللهجه الكويتيه..و نكتب باللغه العربيه
.
بنتها كاتبه..البحر متروس بالسمك
.
و الجمله الثانيه..الأبراج يم البحر
.
أكيد الأجابه ما راح تكون عندي
.
لأني أكتب بالعاميه
.
**********
.
.
يحليلها قناة الوطن ما لقت الاّ
.
جمال العمر تقابله عشان يدلي بدلوه
.
في الأزمه الأقتصاديه
.
**********
.
.
المود هالأسبوع
.
طبعا عبدالله رويشد
.
أنا باتبع قلبي
.
.
عطله سعيده للجميع

Wednesday, October 22, 2008

تشلسي xروما

واحد من أعز..أعز..أعز أصدقائنا
.
واللي أنا أعتبره أخوي..روحه و حياته
.
فريق روما..و بما أن فريق روما
.
السنه هذي مو مترقع مثل بورصتنا
.
فصديقنا هذا وين ما يطقها عويه
.
و صاحب سكّر..فأحنا كلنا كنا
.
خايفين عليه من اللعبه..فسوينا حمله
.
شعارها..أرحموا عزيز قوم ذل
.
و هدف الحمله..أن محّد يضايقه و لا
.
يكلمه مهما كانت النتيجه..و أجرينا 
.
أتصالاتنا..و طرشنا مسجاتنا..لأنجاح
.
هذه الحمله..آخر أتصال كان بيني و 
.
بينه الساعه ٩.١٥..بس عشان أتطمن 
.
أن خذا أبرة السكر..كلماته  الأخيره حقي
.
كانت..أنا كبرت
.
ما قمت استحمل
.
لا السوق مساعدني
.
و لا روما مساعدتني
.
أنا قاعد أسبح ضد التيار
.
و هذا كان خبري فيه..الحين أنطقوا
.
روما..و كلنا بنموت أن نسمع تعليقه 
.
بس ما نبي نزعجه
.
الحين خلصنا
.
و بدا موضوع الدحره
.
محد منا..عنده الجرأه أن يدق عليه
.
عشان يتطمن عليه بس
.
الله يستر

حملة مناهضة التعسف الرقابي


Monday, October 20, 2008

التنفيع خضر و لا حمر

التحديث الأخير
Case closed
+++++
.
آخر الفيلم طلع الخمال من
.
البورصه
.
فأول شي طرى في بالي بعد
.
قرائتي لبيان مجموعة الخرافي
.
بجميع الصحف المحليه اليوم
.
باباي لندن..لما أنتصار الشراح
.
قالت..مسكيـــــنه..ظلمناها
تحديث
++++++
وصلني مسج من كويت نيوز الساعه ٧.٢٧ مساء
.
يقول المسج
.
د.البراك ينفي تخفيض مجموعة الخرافي نسبتها
.
في زين عبر شركة الخير
.
انتهى المسج
.
شلون يعني؟..خو أنا شايفتها بأم
.
عيني كانت نسبتهم ١٢ و كسور
.
والحين نزلت الى ٩ و كسور
.
يعني منو اللي باع..بيت جيرانا؟
.
و بعدين يبون يخفضون أو يبيعون
.
كيفهم..محد له شغل فيهم..فلوسهم و كيفهم
.
الشرهه على اللي وصل لهم هذا السعر عشان
.
يبيعون
.
و بعدين يا دكتور سعد..ماله سالفه موديل
.
اللي على راسه بطحه..صج أنت وايد ذكي
.
بس ترا تصريحك أقبح من بيعتهم
.
++++++++++++++++


أنزين حشمونا مو جذي اشكره
.
يعني يوم 08 أكتوبر زين سعرها كان 1.060
.
و تيي هيئة الأستثمار و تضخ كاش حق الصناديق
.
و بقدرة قادر سهم زين يرتفع الى 1.500
.
و بنفس اليوم تقل نسبة شركة الخير من 12% الى 9% مثل
.
ما هو مكتوب بجريدة الجريده بعدد اليوم
ز
.
ليش؟

Sunday, October 19, 2008

ليش عم بيصير هيك؟؟!!؟

لما كنت في بيرت بالصيف..طلعت على
.
العشا مع جماعه لبنانيه..هالجماعه كنت
.
أول مره أتعرف عليهم..يعني أعرف وحده 
.
منهم..و أهيه كانت تبي تعرفني على صديقاتها
.
و أصدقائها..و كانو وايد حليوين..المهم..وصل
.
واحد من شلتهم..و قعدنا نسولف أنا وياه..فلما 
.
عرف أني من الكويت..أول سؤال سألني أياه
.
.
دخلك...شو صاير عنكم (يعني عندكم)؟
.
.
ابتسمت ابتسامه صفره..و قلت له
.
.
شنو صاير؟
.
.
اللبناني: ليش عم بيصير هيك بالكويت؟
.
الكويت كانت من أكتر الدول تقدم بالخليج
.
و هلّأ الأمارات و قطر..كتير سبئوكم
.
طبعا أنا قطو طقيتيه بمصير
.
أشويه ما ياز لي..فكانت نبرتي شويه حاده..الصج نفت عليه
.
.
أنا: من أي ناحيه؟
.
.
جان يجاوب مسكين
.
.
كنّا بنبعت كل أنواع الكتب للكويت..و هلأ ما فينا نبعت شي
.
.
طلع صاحب وحده من أقدم دور النشر في لبنان
.
ما عرفت شلون أجاوبه..شاقول؟
.
الجماعات الدينيه و القبليه اللي سيطرت على الوضع
.
ولا
.
الحكومه اللي مستسلمه استسلام كامل لهم
.
و لا
.
الشعب اللي ما قام يفرق معاه شي
.
قررت مابي أجاوبه
.
ما أحب أنشر غسيلنا

رساله من الأخ حاكي عقالي الى المدونين

يؤسفني أن المدون حاكي عقالي قرّر أن يتوقف مؤقتا
.
مع أني مو عاجبني توقفه..و حسافه عليه..بس طلب مني
.
نشر الرساله التاليه..لأن ما يبي الفرصه
.
تروح على زملائنا و زميلتنا بالتدوين
.
هذا نص الرساله
.

عزيزي المدوّن،
تحية طيبة وبعد،

بما أن مدونتكم من المدونات النشطة التي تحظى بنسبة مشاركة طيبة، فقد وقع الاختيار عليها، ضمن عدد من المدونات العربية، لتكون واحدة ضمن قائمة التواصل مع المدونين العرب المؤثرين في واقع أمتهم ومجتمعاتهم. ونهدف من خلال هذا التواصل إلى التعريف بالأهداف السامية لمؤسسة محمد بن راشد آل مكتوم، وببرامجها التي نأمل أن تنعكس بالخير على مستقبل الأمة.

وإذ نقدر لكم تعاونكم معنا في نشر رسالة المؤسسة وإتاحة الفرصة لأكبر عدد ممكن من الشباب العربي للاطلاع على الفرص التي توفرها لهم، فإننا نرسل إليكم الإعلان الآتي آملين في تعميمه على من ترغبون، وإن أمكن نشره في مدونتكم المحترمة.

هل ترغب في الحصول على منحة دراسات عليا من مؤسسة محمد بن راشد آل مكتوم ؟
يقوم ممثلو مؤسسة محمد بن راشد آل مكتوم خلال شهري نوفمبر وديسمبر 2008 بجولة على عدد من المدن في أنحاء الوطن العربي لعرض فرص ابتعاث الشباب العرب على نفقة المؤسسة للحصول على درجة الماجستير في إدارة الأعمال، والإدارة العامة، والسياسة العامة، والمالية من أرقى الجامعات العربية والعالمية. ينبع هذا البرنامج من إيمان مؤسسة محمد بن راشد آل مكتوم بأهمية تطوير القدرات المعرفية للشباب العربي كي يسهم بفاعلية في مواجهة تحديات التنمية الاقتصادية والاجتماعية للوطن العربي.
لمزيد من المعلومات، وللاطلاع على الجدول الكامل لجولة الفريق في الوطن العربي، يرجى زيارة الموقع الإلكتروني:
www.mbrfoundation.ae

يمنى يمين، مؤسسة محمد بن راشد آل مكتوم

Thursday, October 16, 2008

متفرّقات ويكنديه

ودّي أحد يجاوب سؤالي
.
بكم مسعرين برميل نفطنا
.
في ميزانية الدوله الأخيره
.
***********
.
أمس و أحنا قاعدين نتفرّج
.
على نشرة أخبار قناة العربيه
.
أعلنت المذيعه عن هبوط مؤشر
.
داو جونز أكثر من 700 نقطه
.
فتبرّعت وحده من الموجودين
.
أنها تهاتف داو و توبخه و تقول
.
له..لو على حياة أبوك جونز
.
جان ما نزل المؤشر لها المستوى
.
على بالها راح يفيد
.
***********
.
ضاق خلقي على طلاق مادونا
.
مسكينه ما تستاهل ينكسر واهسها
.
***********
.
يا ريت أحد يقول حق مذيعين
.
مارينا أف أم..و بالخصوص نوف
.
أن كلمة لقيمات تنطق باللام..مو قيمات
.
و يقول حق دغيشم أن سينما بالنون
.
مو سيلما باللام
.
***********
.
ليش المغنيه نوال على بالها
.
أنها في قمة الرومانسيه لما تقول
.
ألم كنار سدرتنا و أصرّه
.
عشان جذي تبرّا حبيّبها منها
.
منو قص عليها؟
.
***********
.
المود هالأسبوع عبدالله رويشد
.
دع الوشاة
.
.
عطله سعيده للجميع

طنبور طين

أنا عندي مشكله أساسيه..وايد أستاحش من الناس
.
اللي ما أعرفهم..يعني شخصيتي الحقيقيه..ما تطلع
.
الا مع أهلي و صديقاتي و أصدقائي المقربين ..و اللي يشتغلون 
.
معاي..بس خل يصير أكو شخص واحد غريب أصير
.
طنبور طين..و لا كلمه و لا نص..بس أبي بعيوني
. 
أحاول أبذل مجهود و أصير حليوه..أبتدي أخوره بالكلام
.
أتأتئ..أقول جمل مو مفهومه..يعني التخنبق ماله والي
.
عشان جذي قررت أني أنصمت و أفتك..أمس رايحه 
.
معرض فنون تشكيليه..للرسام السوري..أحمد 
.
المعلاّ..أنا وايد تعجبني لوحاته..عشان جذي 
.
حرصت أحضر الأفتتاح..و لا جان لو تذبحوني
.
ما أروح مكان فيه هالكثر ناس..و لازم أسلّم..دخلنا أنا 
.
و زوجي..طبعا زوجي النقيض ..لعبته
.
الناس..و يعرف شلون يسولف و يفتح مواضيع
.
أنا شفت اللوحات جان أنثول..فقررت إني أبي
.
أصفن بروحي..المعرض متروس..والناس كلمن
.
يسولف مع كلمن..جان أتسلّط علي وحده أمريكيه
.
و تبيني أسولف معاها..ويييييي
.
الحين باذكر الأنجليزي..مو راضي مخي
.
يساعدني..نسيت حتى كلمة جرين..يعني أخضر
.
أشوه ما طولت وايد بالتنشّد..و افتكيت
.
بس يتسلطون علي..و أنحط بموقف
.
.
طنبور الطين

Tuesday, October 14, 2008

العوايه

اليوم دار بيني و بين صديق حوار..تنقصته لكم
.
الصديق داق علي متعسّر من السوق
.
و أنا اليوم خلئه متعسره
.
i woke up on the wrong side of the bed
.
المهم..هذا نص الحوار
.
الصديق : ما تقولين لي ليش
.
سوقنا عوي؟؟!!؟
.
أسواق و مؤشرات العالم كلها خضره
.
و أحنا الوحيدين اللي مؤشرنا أحمر
.
أنا : بما أن غالبية العاملين في قطاع
.
الأستثمار رجال
.
و بما أن غالبية مدراء المحافظ رجال
.
و هم
.
بما أن غالبية متخذين القرار من جنس الرجال
.
و سمة الرجل الكويتي العوايه
.
شي طبيعي يكون سوقك عوي
.
.
الريّال أعتقد لي الحين طايره بوهته بتحليلي

Sunday, October 12, 2008

كاميرات السرعه

أمس وصلني مسج تحذيري..بخصوص كاميرات الشوارع
.
ترا الكاميرات قلبوهم..و مثل ما هو معروف..الكاميرات كانت
.
تصور من جدام..اللي صار الحين قامت تصوّر من ورا السياره
.
سوّيت فوروورد حق صديقاتي للتنبيه
.
أملح رد وصلني كان
.
.
ماكو الّا أحنا نسوق قري بعد..عشان ندوده الحكومه أكثر من ما أهيه متدوده
.
وايد يازت لي الفكره
 
template by Purplecious