Wednesday, December 31, 2008

hApPy NeW yEaR


عام ٢٠٠٩ على الأبواب
.
حبّيت أني أقول لكم
ترا الحياة قصيره
.
وسعوا الصدر
.
سامحوا بسرعه
.
حبّوا من قلبكم
.
ضحكوا
.
و لا التحسفون على  شي رسم البسمه على وجوهكم
.
و طبعا
.
عسى ٢٠٠٩ تصير كلها
.
خير و صحه
.
و شوية فلوس..ما يضر
.
و متروســــه حـــــب
.
.
.
**********
.
.
و بمناسبة راس السنه
.
أهدائي لجميع أخواني و أخواتي من المدونين و المدونات
.
محمد عبده
.
على البـــــــــــــــال

 

Tuesday, December 30, 2008

مسكين

أنا فيني طبع
.
لما أداوم من الصبح..لازم أصبّح و أسلّم على الكل
.
من الحراس اللي واقفين بالمواقف..لين أوصل مكتبي
.
أشوفها مو حلوه أني ما أصبّح
.
عاد ساعات يصادف أن معاي بالأصنصير ناس
.
هم أصبّح عليهم..أنا و حظي
.
شي يرد بابتسامه..و شي يرد منفّس..و بعضهم يحقر
.
كل هذا و أنا ما عندي مشكله
.
وين يت مشكلتي؟
.
قبل فتره يابوا حارس يديد بالمواقف
.
و طبعا كالعاده بلّشت أصبّح عليه
.
المسكين أستانس
.
فبدا ياخذ و يعطي معاي
.
أول مره كانت بأجازة العيد
.
و أنا طالعه..ياني و سألني
.
أنت وين يروه في أجازه؟؟؟
.
طالعته..و قلت له مايروه..أنا يقعد
.
طوّفت السالفه
.
ذاك اليوم من الصبح..هم ياني و قال لي
.
جم فلوس حق سياره مال أنتي؟
.
الحين أنحرجت..اي شي باقوله بيصير وايد
.
جان استعبط
.
قلت له مو أنا يشتري..هذا زوجي يشتري
.
أنا ما يدري
.
عقبها استاحشت منّه
.
و قررت بيني و بين نفسي أني اشيّن النفس عليه
.
عقب..قلت..مسكين ليش أظلمه؟
.
بالنهايه أهوه أنسان..ليش أبدّي سوء النيه؟
.
يمكن مسكين أستانس أن في أحد أحترم أنسانيته
.
و سلّم عليه..عشان جذي..مسكين قرر أن يسولف شويه
.
تعوّذت من أبليس..و رديت أصبّح عليه

Monday, December 29, 2008

من حيلي لي قبيري

قبل جم يوم دار نقاش بيني و بين البنات صديقاتي
.
أنا طرحت سؤال
.
شنو تفضلون..هل تفضلين موضوع الخراف
.
و لا تستمرضين بس عقلج معاج؟
.
أنا وجهة نظري..كانت أني أبي أخرف
.
مابي أحس باللي قاعد يصير دار مداري
.
بس البنات كلهم خالفوني الراي
.
و بمعنى أصح أستهجنوا الفكره
.
أول وحده قالت..ما تبي تخرف.. تخاف أن جناينها
.
يضحكون و يتطنزون عليها
.
الثانيه.. و أهيه مو متزوجه..ما تبي..تخاف
.
الخدم يلعبون بحسبتها
.
الثالثه..خافت..زوجها يتزوج عليها
.
و تييها شريجه..تحسر فيها
.
تقريبا كلهم أجمعوا على موضوع من حيلي لي قبيري
.
و أنا الصج كنت أفضل أني أخرف..لأن تروالي أريح
.
و خل زوجي و بنات خواتي يعابلون فيني
.
بس لما سمعت أسبابهم..الصج اقتنعت بوجهة نظرهم
.
فانضميت للشله
كلنا أتفقنا على أن نشتري لنا عماره بالجبل
.
بلبنان ..حق البراد..و عقب كلنا نسكن مع بعض
.
و ممرضاتنا معانا
.
و العيال متى ما أشتهوا يمرون علينا
.
أحنا موجودين قاعدين بالبلكونه
.
اللي دربها يمها..و اللي جهازها التنفسي وراها
. 
و النيرسات اللي تدز هذي بالكرسي
.
و اللي تساعد الثانيه على صعدة الدرج
.
و لأن بلبنان ما راح نخلي..نييب الحلاقين لنا بالشقه
.
يعابلون  و ينفشون بقايا شعورنا..و تضيع الصقله
.
المهم أن نكون كلنا مع بعض نونس بعض
.
 وما ناكل قلب عيالنا علينا..مريتوا و لا ما مريتوا
.
و أذا وحده زاد عليها المرض..كلنا راح نكون
.
موجودين حواليها..عشان نفتي
و كل وحده تييب من راسها صوت
.
فاللي يبي ينضم لنا من المدونات
.
بادروا من الحين بحجز أماكنكم معانا
.
لأن الأماكن محدوده

Saturday, December 27, 2008

ملوك الزغاله



محمود المليجي و توفيق الدقن
.
يمثلون ملوك الزغاله بالنسبه لي
.
و اللي أحبه فيهم..الزغاله الذكيه
.
يعني أذا تبي تصير زغل
.
لازم تشوف أفلام هالنجمين
.
عشان تتعلم
.
أما أنك تكون زغل و غبي
.
صدقني ما راح تعرف منو طقاقك

Thursday, December 25, 2008

متفرقات ويكنديه

أذكر و أحنا صغار أنا و خواتي
.
أمي أتضوط فينا كل مكان من غير مربيه
.
و لي فتره مو وايد بعيده ما كانت هالظاهره
.
وايد منتشره..الحين وين ما أروح..لازم المربيه
.
مع الأم و الأبو واليهال..يعني أنتي يا الأم
.
و الأبو لها الدرجه ما تبون تهينون حالكم..و تجابلون
.
عيالكم؟..مثلا ذاك اليوم شفت أزواج و الظاهر عندهم
.
توأم..مو يايبين معاهم مربيه و حده..و لا ثنتين
.
ثلاث مربيات..ليش؟؟ كل وحده شايله جنطه من
.
جناط اليهال..و الثالثه تدز العربانه..يوم أنكم عيازى
.
لها الدرجه..ليش مطلعينهم؟..و لا الموضوع
.
شحاطه و بس
.
.
.
**********
.
.
فيني طبع..و ما أقدر أسيطر عليه
.
أذا سمعت شي يضحكني..أضحك..وياما مرات
.
في حلجي شي..و اطشر اللي بحلجي..الأمور
.
سهالات عندي..المهم ما أشرق..فالبنات عارفين
.
هالموديل..أذا صار شي يضحك..و أحنا قاعدين
.
ناكل أو نشرب..العموم يغطي ويهه..ذاك اليوم
.
مديرنا الله يهداه ما تدري متى بيخوّن فيك..فعطانا
.
كسره جذي بواحد من الموظفين..الحين كلنا عارفين
.
السالفه الصجيه..و وجه الموظف..لما سمع المدير
.
ما عبّرت على روحي..سبّحتهم..لأني كنت قاعده
.
اشرب ماي..طبعا السكبه طارت راحت
.
لا و تعالي برّري للمدير ليش ضحكت
.
.
.
**********
.
.
عندنا مقوله دارجه بشلتنا مالت البنات
.
بو مهدي ينّيت؟؟!!؟
.
و اللي قالت هالجمله كانت تتعامل مع جماعه
.
و كبير هالجماعه قال جمله وايد غبيه..جان
.
تطلع منها..بو مهدي ينيت؟؟!؟
.
المهم أحنا الحين كل ما صار شي غريب
.
و سخيف..وغبي..نستعمل هالجمله
.
فأول أمس أول ما شفت المقاله المشوره في جريدة
.
الدار و قريت الخرابيط اللي فيها..هذي كانت
.
ردة فعلي..بو مهدي ينّيت؟!؟
.
.
.
**********
.
.
المود هالأسبوع
.
عبدالله رويشد
.
لي حسّيت
.
.
عطله سعيده للجميع

Monday, December 22, 2008

ما لنا الاّ بو فهد

أنا آسفه..بس أجد نفسي مضطره بالمطالبه
.
بعودة بوفهد للوزاره..و كوزير للماليه بالذات
.
لأن بعد مجهوداته الخارقه في موضوع رفع
.
حظر الفيفا..أجد لزاما علينا المطالبه بتحويل
.
مجهوداته الخارقه هذي..بأتجاه الأقتصاد الكويتي
.
أنا متأكده أن محد بأيده حل معضلة المحفظه الملياريه
.
الاّ بوفهد..و بعدين تشود الله و رحمته..لما يصير
.
بو فهد بالوزاره نفتك من اللعب اللي تحت الطاوله
.
و يصير كل شي فوق الطاوله..و تحت المجهر
.
و نرتاح

Sunday, December 21, 2008

شالله حادكم؟!؟

يوم الجمعه اللي فات رحنا أنا و صديقاتي
.
مجمع الأفنيوز نتغدى هناك..و رحنا مبجّر
.
مالنا خلق الزحمه و الأشكال البايخه اللي
.
تضيق الخلق..المهم في ظاهره بالكويت
.
المفروض أنها أيجابيه
.
خروج الأزواج مع زوجاتهم و أطفالهم
.
للتمشي..قلنا أنا و البنات خل نلاحظ مدى
.
أستمتاع الزوج و الزوجه بالطلعه
.
..مو معقول
.
كمية التبوّز اللي بالموضوع..ليش؟!؟
.
شالله حادكم؟
.
..يعني حتى مو باذلين مجهود أنهم
.
يكلمون بعض
.
و علامات العبوس.. و ضيقة الخلق
.
كلها على ويهم
.
اللي كسروا خاطري بالموضوع
.
اليهال
.
مساكين طالعين و فيهم وناسه..و فيهم حماس
.
بس أكيد أندقروا
.
لما شافوا علامات الوجوم على أهلهم
.
تلاقي الأبو قاعد يحاتي يمعة ربعه بالمخيم
.
والأم متشاغبه على يمعة بيت أهلها..خايفه تطوفها السوالف
.
و أكيد متناجرين بالسياره
.
كان ودي اقوم من مكاني و اقول لهم
.
ترا ربعك ما راح يفيدونك..و أنتي أهلج مو طايرين
.
بس الأستمتاع بوناسة عيالكم معاكم
.
أهيه اللي ما تنتطوف

Thursday, December 18, 2008

متفرقات ويكنديه

ما عندي شي أكتبه
.
.
.
.
**********
.
المود هالأسبوع
.

أبو بكر سالم
.
سلام يا أحباب قلبي
.
.
عطله سعيده للجميع
.
بنكهة الكستنه

Wednesday, December 17, 2008

ليش لأ؟!؟

تصدقون لو أنا من أصحاب القرار بالديره
.
جان قلت حق مستشاريني
.
في جماعه عندهم من عمرهم شطّه
.
و على بالهم يعرفون و يفهمون بأمور البلد أكثر منّا
.
ينقال لهم المدونين أو البلوغرز
.
ييبوهم خل نشوف شنو يطلع معاهم
.
خل نشوف شلون ممكن يسوون حكومه متجانسه
.
أصلاحيه ذات رؤيه
.
مو عشان شي
.
بس من باب التغيير على الأقل
.
و لأن أحنا أقصد المدونين معظمنا نعتبر شباب ناضج
.
و لحد ما عندنا رؤيه في أمور معينه
.
.
يعني بكل الأحوال راح نكون أحسن من
.
اللي راح يتم أختيارهم
.
و أهمه أي اصحاب القرار
.
راح يفتكّون منا و من لبحتنا عليهم
.
لأن أحنا راح نكون لاهين في مهام الوزاره

Monday, December 15, 2008

محّد دق


من أعلنوا عن قبول أستقالة الحكومه
.
و أنا ناطره
.
لي الحين محّد دق علي

<
.
هل يُعْقلْ؟!!؟

Thursday, December 04, 2008

كل سنه و أنتو طيبين

.
.
طول عمري ما أحب عيد الأضحى..لأن عيد الحجاج
.
ما أواطن منظر الذبايح..و تصير ريحة الهواء..دم
.
و حمسة كبود..فصار عندنا تقليد أنا و زوجي..كل
.
عيد أضحى نسافر..و عادة ما نروح مكان صاد..كل
.
واحد و كتابه و هدوء..و مع أني أحتاج هالسفره السنه
.
هذي وايد..الا أني راح أضحي..و أصير حالي حال
.
خرفان العيد..وراح أنتقل الى بيتي..شعور وايد غريب
.
لأول مرّه من تزوجنا..راح نعيش في بيتنا..و لازم أتحمل
.
مسئولياتي كامله كربّة منزل..و اللي يعرفني و يعرف
.
موديلي راح يدري أن مالي شغل بهالأشياء ولا عندي
.
مقاقه..شنو الغدا؟..شنو العشا؟..مشاكل الشغالين
.
و لويتهم..و الماجله..الصج شعوري
.
حدّي متدودهه
.
.
عموما عيدكم مبارك..و تقبل الله طاعتكم
.
و أرجو السموحه..لأني راح أحتجب فترة العيد
.
لأني ما أعرف شلون راح يكون برنامجي مع
.
لوية البيت اليديد..بس هذا مو معناته..أني ما راح
.
أسيّر على مدوناتكم و ألقّط عياديي
.
.
.
مود العيد
.
عبدالله رويشد..لمني بشوق
.
.




Wednesday, December 03, 2008

الخزّه

أنا أيي من جيل الخـــزّه كان لها دور كبير
.
في حياتنا
.
و استعمالات الخـــزّه كانت لغرضين
.
.
الغرض الأول: غرض تنبيهي أو توبيخي
.
فكانت الخـــزّه تيينا من أمهاتنا
.
في حالتين اذا حمقت الأم من تصرّف
.
سويناه جدّام الناس..أو لقافه و بطّينا برمة
.
سالفه ما المفروض نتكلّم فيها
.
فكانت تيينا ذيج الخـــزّه اللي أتطيرنا
.
من المقعد
.
المشكله أن كبرنا و لي الحين من تيينا
.
هالخـــزّه..نتدوده
.
.
الغرض الثاني: غرض المغازل
.
على وقتنا..أيام المراهقه..ما كان
.
أكو موبايلات و الوسائل الحديثه مالت
.
المغازل..فكان الشباب حدهم يخـــزون
.
كوسيله للتعبير عن شعورهم..عاد أهمه وحظهم
.
كنا نطلع من الثانويه..نلاقي الشباب اللطيف
.
كلهم قالبين عتاويه من كثر ما يخـــزون
.
.
.
و بعدين لما كبرنا و بدينا نستوعب أمور الحياة
.
أكتشفت غرض ثالث للخـــز
.
كنّا نستشف مدى رضى السلطه على السياسيين
.
كانت وسيله جيده لتوصيل رسائل معينه
.
و كنا نقدر نخمّن شنو ممكن يصير
.
الفرق الحين
.
أن غالبية السياسيين و القياديين الموجودين
.
على الساحه الحين ويوهم وايد عريضه
.
لو ينخـــزون من اليوم لي باجر
.
هم ما توصلهم الرساله

Tuesday, December 02, 2008

ماذا لو؟


لو المرحوم عايش لي الحين
.
و كويتي الجنسيه
.
و صار رئيس مجلسنا
.
جان شنو صار الوضع؟


Monday, December 01, 2008

ما أقدر أقول الاّ شي واحد


لي طبع محملك...دوس على ترّيجه

Thursday, November 27, 2008

متفرقات ويكنديه

أول شي..خوش مقاله للدكتور ناجي الزيد
.
في جريدة القبس اليوم
.
تحت عنوان..هل هي زوبعه في فنجان؟
.
.
**********
.
الجو لما يصير مثل أمس و اليوم..ما أدري شنو يصير
.
فيني..هالجو له تأثير السحر علي..لو الدنيا كلها تنقلب
.
ما تأثر فيني..أصير بس أبي أقعد بالهواء الطلق
.
و الأستمتاع بالجو..و كل شي يصير عسل على قلبي
.
عموما أنا أموت على الشتا..و شتا الكويت له شعور ثاني
.
طعم المعدّس
.
أحساس الشماغ لما ألفه على رقبتي
.
جمال النار لما نشبها
.
.
**********
.
الحمدالله العلاقات ردت أستتبت مع الموظف
.
اللي معاي..و هالأسبوع ماكو و لا هوشه
.
المضحك بالموضوع أن هدّدني أن يسوي مدونه
.
أسمها يومياتي مع مديرتي المينونه
.
و على قولة زوجي..أنا متأكد أن كل يوم
.
راح يصير أكو قصّه يكتبها
.
بس و لا همّني..هددته بتقييم آخر السنه
.
يا جماعه ترا كل اللي أكتبه عن الموظف
.
اللي معاي..من باب
.
من حبّك..لاشاك
.
.
**********
.
ودّي اسوي حفله..حفلة طرب
.
يحييها فرقة التلفزيون و فرقة العميري
.
و سليمان العماري..يعني السالفه كلها سامريات
.
و أصوات .. و الحضور مقصور على الطرّيبه
.
و اللي يعرف يصفق
.
و الزي للرجال دشداشه و تشريمبه
.
و النساء دراريع قطن غير مسموح لأي
.
شكل من اشكال الزري..غير زري الثوب
.
و هم بالنسبه للنساء ممنوع التسريحات
.
يعني بصراحه اللي يبي يتسمّت..لا يجبل علي
.
و بعدين العشاء..ماكو الا قوزي..و مجبوس دجاج
.
و يريش..فقط لا غير..طبعا راح يكون أكو أنواع
.
المعابيج و الأجار و الدقوس
.
و على كتر طاوله عليها مطاطير الشاي و الحليب
.
و بقصم و درابيل و قرص العقيلي
.
و الحلو لقيمات و صب القفشه
.
بس اللي رادني أن الأجواء العامه هاليومين
.
ما تسمح
.
.
.
***********
.
المود هالأسبوع
.
أبو بكر سالم
.
قلبي قنع
.
.
عطله سعيده للجميع

يا جماعه دعائكم

يا رب ترد السيدات الكويتيات المحجوزات
.
في الهند بالسلامه..و تبلّغ أهلهم بشوفتهم

Wednesday, November 26, 2008

كوني سيده

اليوم لفت نظري تقرير بجريدة القبس
.
عنوانه كوني سيده
.
قريت التقرير..و قيّمت نفسي
.
بناء على النقاط اللي ذاكرينها
.
أبقي صوتك منخفضا: ما يدور..ما اواطن المساسر
.
تعلّمي السير: ما أعرف أمشي ببطء و هدوء
.
كلّه مشيتي بسرعة الهروله
.
مراقبة سلوك السيدات اللواتي يشهد لهن بالأنوثه: ما اعبّر..ينرفزوني
.
الأنخراط في صفوف خاصه بدروس اللياقه: ما عندي وقت
.
ابتعدي عن التعري المفتعل و المبتذل: أشــــــــــــوه
.
أخيرا طلع أكو شي أسويه
.
وايد أرتحت لما عرفت أن فيني شي واحد
.
من طرق
.
كوني سيده

Tuesday, November 25, 2008

Monday, November 24, 2008

التجاهل

من العادات اللي أكتسبتها من زوجي
.
عادة التجاهل..أنا أول و نتيجه لتربيتنا
.
و أعتقد أن كلنا مرينا بهالمرحله و أحنا صغار
.
كنا لما أحد يغلط علينا أو يطقنا بالروضه
.
كان الرد من الأهل عادة وحده من شايتين
.
يا اللي.. يطقّك.. طقّه
.
أو اللي يطقّك..قول له الله يسامحك
.
و أمش عنه..و أحنا تربيتنا كانت من
.
المدرسه الثانيه..ومع الوقت.. وعقب ما كبرت
.
صار موضوع الله يسامحك..يتعبني..و أقعد
.
آكل في روحي..مع الوقت..زوجي بدا يفطني
.
الأنسان اللي يزعجك..و يتعمد أيذائك..أنتي مو
.
محتاجه له..فتجاهلي وجوده..لأن هالنوعيه من
.
الناس ما راح يضيفون لج شي..بل بالعكس..راح
.
يحاولون يقللون من اي شي تسوينه
.
و بالنهايه محّد راح يتعب الاّ أنتي
.
و فعلا..لما بديت أتبع هالأسلوب..و ألغي
.
من حياتي هالناس ارتحت..و أهمه اللي بدوا
.
يتضايقون من هالأسلوب..و أنا اللي أفتكيت منهم

Sunday, November 23, 2008

المدونه العزيزه...ملاحظه..ليش؟

المدونه العزيزه ملاحظه
.
mola7atha.blogspot.com
.
تفاجأت اليوم الضحى
.
عقب ما حطّت موضوعها..هذي خطوطي الحمراء
.
أن تمت أزالة مدونتها
.
حسافه عليج..ردّي..ترا هذا خط أحمر
.


Friday, November 21, 2008

أنا متفائله

اللي لاحظته الفتره اللي فاتت
.
و اليوم استوعبته..أن صار في 
.
وعي ملحوظ في الشأن العام 
.
بالكويت..اللي قاعده أشوفه و أسمعه
.
ناس كان آخر همهم الوضع السياسي 
.
و أهمية الدستور و مجلس الأمه
.
و كانت ردّة فعلهم غالبا لما يصير
.
نقاش عن الوضع السياسي..ويه من صجكم
.
و لا من له خلق..و لا فراغه..و لا ببساطه مو مهم
.
تغيّر هالتوجه الحين..قمت أسمعهم
.
و الصج أستمتع بالنقاش معاهم..بغض 
.
النظر شنو موقفهم من المجلس أو الحل سواء 
.
كان دستوري أو غير دستوري..بس صار
.
في أهتمام بوضع البلد
.
و الظاهر مثل ما كتب 
.
المدوّن العزيز بوجيج في مدونته
.
بتاريخ ٨-١٠-٢٠٠٨ سقوط البورصه
.
نعمه طال أنتظارها
.
فقدان جيل كامل من الشياب و الشباب
.
اللي تركوا أغلب مسئولياتهم الوطنيه و تفاعلهم
.
مع قضايا بلدهم من أجل اللعب بكازينو البورصه
.
كلامه صحيح و الظاهر هذا اللي قاعد
.
يصير..لما حسّوا أن السكين و صلت العظم
.
حسّوا بخطورة الوضع..و بدوا يتفاعلون
.
و هذا سبب كافي بالنسبه لي
.
يدعوني للتفاؤل
آه..وشي زياده مني
.
أهداء لكل المنادين 
.
بالحل الغير دستوري
.
أغنية عبد المجيد عبدالله
.
تحلمـــــون

Thursday, November 20, 2008

متفرقات ويكنديه

في مقوله كويتيه قديمه..باستعملها بس مع بعض التحوير
.
المقوله الأصليه تقول
.
آمن للحيه و العقرب..و لا تآمن للبدوي لي استعرب
.
تحويري
.
آمن للحيه و العقرب..و لا تآمن للبدوي و السيّد لي أستلحى
.
.
**********
.
أمس الصبح أنتابتني نوبة غضب
.
اللي انفجرت و عفست الدنيا
.
يعني الواحد ما يوصل الدوام الاّ طالعه روحه
.
و تشد أني نايمه منغثه من الوضع السياسي
.
و الأقتصادي بالبلد
.
فواصله نفسي بطرف خشمي
.
و أنا فيني طبع اذا وثقت في أحّد
.
و عطيته مسئوليه.. أتوقع أن هالشخص
.
يقوم بمسئوليته كامله..ليش ما صعدت المكتب
.
و اكتشفت أن هالموظّف..أخفق في أحدى المهام
.
الموكله أليه..مع موديل الأخفاقات اللي ساري في
.
البلد هاليومين
.
و خير اللهم أجعله خير
.
لي الحين ما أذكر شنو قلت
.
اللي حرني أن ردة فعله في منتهى اللامبالاة
.
و عادة لما أعصب جذي على أحّد أتحسف
.
هالمره لي الحين ما تحسّفت
.
.
**********
.
في نوعين من الزوجات
.
الزوجه السعلوه اللي على بالها
.
أذا صارت قويه راح تقدر تسيطر على زوجها
.
و الزوجه الحليوه التي تميل الى السذاجه اللي على
.
بالها أن أن زوجها أحسن رجل في العالم
.
النوع الأول بالنسبه لي تكسر خاطري
.
أكثر من النوع الثاني
.
لأن الثانيه ببساطه..مريحه ملايكتها
.
أما النوع الأول ..فتشتط..و تعابل..و تخطط
.
و بالنهايه هم ما راح تقدر على الريّال الكويتي
.
فنصيحتي للنوع الثاني..لا تضيعون صول شعابكم
.
لأنهم ما ينقضبون
.
لو ننقز
.
.
**********
.
وحده من صديقاتي قاعده تكمّل دراستها
.
في الجامعه الأمريكيه..فزميلاتها بالصف
.
كلّهم أمّهات الطعش سنه..مواليد الغزو
.
و كل يوم لازم تتحفني بقصّه من قصص
.
هاليهّالو..و مغامراتهم
.
المهم البارحه..عقب ما خلصنا العشا..صديقتي
.
هذي أشتهت آيسكريم 31..فأول ردّة فعل مني
.
لا يكون صدّقتي أن عمرج طعش سنه
.
أجسامنا ما قامت تحرق السعرات الحراريه
.
مثل قبل..ردّت علي و أهيه تضحك
.
تصدقين أن اليوم بالذات في الجامعه كانوا يسألون
.
عن نوعية الطعام المفضله عندنا
.
تقول أنا الوحيده اللي طلبت أكل دايت
.
و عموم الصف ما بقى ماكدونالدز..ما يبقى هارديز
.
أي ما يحاتون سكر و لا ضغط و لا كوليسترول مثلنا
.
القلوب بارده..عليهم بالعافيه
.
.
**********
.
.
.
المود هالأسبوع
.
عبدالله رويشد
.
من يدري
.
أحبابي اللي لهم داخل فؤادي محل
.
عطله سعيده للجميع
 
template by Purplecious