Sunday, August 31, 2008

نهايه سعيده

أمس كانت الحلقه الأخيره من نور...الحمدالله ما قصّروا الأتراك قزّروا علينا هالصيفيه...فبورصة المسلسل أمس كانت مراهنه على موتة مهند أو نور...ما أدري ليش الكويتيين قاموا يحبون الكدر...نسوا شي أسمه نهايات سعيده... أثناء المسلسل البارحه هاتفني صديق بيستفسر عن شغله...قلت له أنا مشغوله اليوم الحلقه الأخيره...فسألني اشقاعد يصير الحين ؟...قلت له اسكت نور مريضه...و يمكن أهيه اللي تموت...ردة فعله صدمتني...قال لي فكّه...هو ليش ؟!..أشفيك على نور...أنا اللي أعرفه أن الشباب ميتين عليها... و كلهم أمنية حياتهم تييهم مره أتدللهم مثل ما نور مدلله مهند...قال لي نسيتي ال 87 حلقه اللي علّتنا فيها؟ الحين آخر 5 حلقات تسنّعت...خلاص طاح الحطب؟؟ قلت له اشدعوه عليك...شالتحامل...الله يا قلبك الأسود...المهم صارت النجره بيني و بينه جنّه نور و مهند أهلنا أنا وياه...خلّصت منّه...وقعدت أكمل الحلقه الماروثونيه..وحده من صديقاتي اللي قاعده أتابع معانا..أمس كانت أول حلقه تشوفها....يمكن 15 مره سألتنا منو فجر؟
مو قادره تستوعب أن فجر أسم ولد عند الأتراك مو مثلنا

بس أحلى شي بالمسلسل كلّه كانت تسريحة شريفه خانم آخر الحلقه...ما أدري ليش هوّل فيها المخرج باللحظات الأخيره...و شنب مهند

بس اللي حاز في نفسي دعاية زين...قطّوره صارت مطره...راح أفقدها

عموما كل عام و أنتو بخير...أنا من الحين أني راح أتابع بس حلقتين برمضان...بعد الفراق و أسمهان و وحده تاريخيه أبو جعفر المنصوري....فقط لا غير

26 comments:

nEo said...

كل عام و انت بخير :)

nanonano said...

العزيز جدا نيو:

و أنت بصحه و سلامه...عاد هالله هالله بالقرقيعان الزين

bora bora said...

نانو

النهاية سعيدة زيادة عن اللزوم
إحنا متعودين واحدة مثل هبة على نهاية المسلسل إييها شلل نصفي مو قاعدة على النهر و مكتئبة

بس اللي صج صدمني إن فجر يرجع مرته
ما هقيتها منه كلش

Bo Jaij said...

مبارك عليج الشهر



لله الحمد المسلسل تركى و ليس عربى....بس علشان لا يشوفون العرب حالهم

nanonano said...

bora bora:
خو المسلسل كلّه مالق..فنهايته لازم تكون جذي

nanonano said...

Bo Jaij:
الله يصبرنا على المسلسلات الكويتيه

و أنت بخير عزيزي

Broke said...

موتيني من الضحك على فجر ..لأني نفس صديقتج .. مو مستوعبة

:P


::

على فكرة قريت الفقرة الأخيرة كذا مرة .. عقدتيني
شلون بتابعين " بس حلقتين " و انتي كاتبة أسامي 3 مسلسلات
:D

nanonano said...

Broke:
مسلسلين عاديين..و واحد أسلامي

Broke said...

ألحين فهمت

العتب على بطء الإستيعاب

mosan mosan said...

MBC + is showing noor 24/7 ... u cant miss anything

I'm gonna watch House of Saddam

Mubarak 3alaikum el shahar

nanonano said...

mosan mosan:
my dear i missssss u

lawyer said...

مبااااااااااارك عليج الشهر


واااااااااااااااااااي شفتاي حلقه امس


ساعتين و نص ما حاجيت احد


بس انسى شنو كان و السبه الدعايات

ياااااااازين دعايه قطوره




الله يساااااامحه عااااجل قص علينا في نص الحلقات و قالنا بموتون !!


خرب علينا


اهم شي دانه فجأه صارت اشمتنها و انفشت الشعر

راااااااااااح اوووووووله على مهند واااااااااااايد

بس المخرج خاره وايد ويا شريفه تتزوج و عمرها صصصصصك ال 90

مدري شنو قصده بقوووووول
نيفر تو ليت مثلا !!

EXzombie said...

شلون يعني.... محد مات......!!!؟

و مبارك عليج الشهر

انا ماراح اشوف شي بالتلفزيون كالعادة

بس ناوي اشوف حلقات ساوث بارك و فولتي تاورز و سبيتنغ اميج و مونتي بايثون كاملين

تحياتي

├ƓɧαɗσσƦ┤™ said...

لووووووووووول
شوفي انا ماشوف نور بس امس شفت معاهم الحلقه الاخيره
شدعوه على بو مرت 13 سنه بس غيرو قصات شعورهم

وكله بصوب ولما قالت شكرا لك ايها الزمن بصووب ثاني لووول


كل عام وانتي بخير ومبارك عليج الشهر

جبهة التهييس الشعبية said...

اولا كل سنة وانت طيبة
ثانيا
الحقيقة انا شفت تعليقك عند بلوق عمتي ولقيته تعليق ذكي جدا ومختلف عن الباقيين فدخلت البلوج لقيته فعلا بلوج مميز مش دايما باشوف حد بالمستوى ده

وبعدين طلعتي برج الميزان زيي
:))

تحياتي ليكي

nanonano said...

lawyer:
علينا و عليج

شفتي شلون دانه تبيزعت عقب 13 سنه...شاللي ياها؟

و بالنسبه لشريفه خانم....هاهاهاهاها

never too late
صاجه

nanonano said...

EXzombie:

علينا و عليك

أتصدق ما أقدر أشوف شي مو عربي برمضان..نفسيا ما أتقبلو ما أستوعب

nanonano said...

├ƓɧαɗσσƦ┤™:

هاهاهاها...أنا شكرا لك أيها الزمن...قتلتني

علينا و عليج

nanonano said...

جبهة التهييس الشعبية :

أهلا و سهلا بأهل أم الدنيا

كل سنه و أنتو طيبين

شكرا جزيلا..برج الميزان كمان..يوم الهنا

حمودي said...

مبارك عليكم الشهر
:)

kuwaitawy said...

مبارك عليج الشهر

Diver said...

كل عام و انتي بخير و مباركك عليج الشهر

nanonano said...

حمودي
kuwaitawy
Diver :
علينا و عليكم شباب...عساكم تعودونه بكل صحه و سلامه و حب

mosan mosan said...

Dear nanonano

I miss u 2 glad to have you back in style as always

3ashga::O::Mfalsa said...

مبارك عليج الشهر
بصراحة مدونتج مشوقه
ومواضيعها حلوة :)

nanonano said...

3ashga::O::Mfalsa :
أهلا و سهلا...شكرا جزيلا..أنا وايد يايز لي لقبك..عاشقه و مفلسه..أتهقين شنو الحل لوضعج؟

 
template by Purplecious