Friday, January 30, 2009

أحمدك يا رب

طق يا مطر طق
.
بيتنا يديد
.
مرزامنا حديد

Wednesday, January 28, 2009

الزوجه مالها رب

أبي أفهم...ليش بهالديره كل شي بأيد الزوج
.
تجديد جواز الزوجه..الزوج لازم يجدد
.
تجديد أقامة السايق...الزوج لازم يجدد
.
ألغاء أقامة الشغاله...الزوج لازم يلغي
.
واللي زوجها 24 ساعه مسافر
.
تنشل حياتها؟؟؟؟
.

Monday, January 26, 2009

خلال بطبق


.
.
.
وايــــــــــــــــــــد لـــويه
.
من كل مكان تصريح
.
بكل مكان صيحه
.
أنا ما راح أقول شي
.
بس أبيكم تتطمشون معاي
.
على تصريحات ال24 ساعه اللي فاتت
.
ما أدري شلون ما تفتر مخوخنا
.
.
بورميه: حمله أعلاميه ساخنه لتسخين الشارع في قضية القروض
.
الله يعافيك لا تسخّن و لا شي
.
الشارع شاب ضو من غيرك
.
.
المطير: الأقتصاد الكويتي دخل مرحلة المرض
.
توّه دخل؟؟!!؟ أشوه
.
.
العبدالجادر: تم جمع تواقيع 15 نائبا لجلسه خاصه
.
ما شاء الله..ياييب اليهده
.
.
العوضي: يؤكد تعاون السلطتين لمعالجة الأزمه الأقتصاديه و تردي الأوضاع
.
التعاون موجود..بدليل طلعة النائب مرزوق أمس من اللجنه حمقان
.
.
الخرافي: ينتقد بطء الحكومه في معالجة الأوضاع
.
ما أدري ليش بوعبدالمحسن على باله الحكومه روود رنر
.
.
الغانم: أنسحابي من الماليه كان لعدم تقديم الحكومه أي تصور للأزمه
.
الأقتصاديه
.
بو علي عيل ليش يايين و مقابلينكم أذا ما عندهم شي
.
.
الدويله: كفى تفريط في الوقت فما يحدث سحق للأقتصاد الكويتي
.
مو عادتك تصرح عاد
.
.
.
بس قلبي قام يعورني
.
و يتني رقعه من تصريحاتهم
.
و لي الحين محنا عارفين وين الله حاطنا
.
و لا راح نعرف
.
بالضبط صايرين
.
خلال بطبق
.

Thursday, January 22, 2009

توّه ينفذ صبرك؟

كويت نيوز:  النائب الغانم: صبرنا نفذ
.
و لن نقف مكتوفي الأيدي تجاه تبخّر مدخرات المواطنين
.
و انهيار الأقتصاد
.
.
.
الله يا بو علي..توّه صبرك ينفذ؟
.
عقب شنو؟ عقب ما صار ال
.
Damage is too big to be handeled?
.
بو علي..الأقتصادي جاسم السعدون عيز و أهوه يقول
.
و ينبّه..و قال سنة ٢٠٠٩ راح تكون أسوأ من ٢٠٠٨..و 
.
كانا في بداية السنه..و السنه بيّنت مواريها
.
يا بو علي..أحنا اللي صبرنا نفذ 

Wednesday, January 21, 2009

هذا بعد شنو يسمّونه؟

.
.
مساكين الكويتيين واصلين حاله من الملل و الزهقان مو عاديه
.
اللي قاموا يقطون خيط و خيط
.
.
الله يسلمكم..أييني تليفون من واحد أقرع
.
المتصل:...أبي أسوّي تريتمنت حق شعري..وين؟
.
أنا: هــــو ينّيـــــت؟!؟ ما عندك شعر
.
المتصل: أنزين في أمان الله
.
أنا: في أمان الكريم
.
.
تهقون شنو الوضع النفسي اللي واصل له هذا الشخص
.
اللي يبي يسوي اي شي..بس عشان يغيّر مزاجه

Tuesday, January 20, 2009

I WANT MY MONEY BACK

.
.
عندي صديق..من الناس اللي أغترّوا بأحد الشركات الأستثماريه
.
و حط تحويشة العمر عندهم..مؤخرا قاعدين نسمع وايد كلام عن
.
أحتمال تعثّر هذي الشركه..و أنا ألبح عليه من بديت أسمع الكلام
.
روح لهم و شوف شاللي لك عندهم..أخيرا..راح..عاد أمس كان
.
قاعد يقول لي شنو صار معاه
.
.
صديقي: رحت لهم و قعدت مع مسئولة محفظتي و قلت لها
.
أنا أبي أعرف شنو قاعد يصير بمحفظتي عندكم؟ ليش جذي
.
قاعد تتناقص قيمتها بصوره سريعه و مخيفه..يقول قالت
.
وايد أشياء..و يمكن أهيه أستغلت أن خبرتي بمجال
.
وايد ضعيفه..حسّيت أنها قنعتني..بس الشي الغريب
.
بالموضوع كلّه..أنها و أهيه قاعده تبررلي سبب أنخفاض
.
المحفظه..ما يابت طاري حق الأزمه الأقتصاديه..كلش..جان أقول
.
لها..كلامج كلّه معقول..بس وين الأزمه الأقتصاديه العالميه
.
بالسالفه كلّها؟
.
.
تدرون شنو ردّت عليه الموظفه..اللي المفروض عندها خبره في مجال
.
الأستثمار؟؟؟
.
قالت له أوباما راح يتسلّم الحكم 20 يناير
.
طبعا أنا ما نطرت صديقي يكمّل كلامه..صرخت..أوبــــــــاما؟
.
ومت من الضحك..لها الدرجه..يبون يستغفلون الناس؟
.
صديقي: كان قاعد يضحك معاي..و قال نطري..ما كمّلت
.
قالت له..أي أوباما لما يستلم راح تستقر الأوضاع..و يرتفع
.
النفط..و أذا أرتفع النفط راح تتحسن الأسواق..(الأخت بسّطت
.
و سطّحت الأزمه كلها) بس أنت ليش وايد مستعيل على الفلوس؟
.
محتاج لها الحين؟ يقول على بالها باستحي..رد عليها..لأ أنا
.
مو محتاج لها الحين..بس أبي فلوسي..أبي أحطها تحت الكاشيه
.
في بيتنا..أنا غلطان أني وثقت فيكم..و على بالي أنكم راح تديرون
.
أموالي أحسن مني..بس للأسف ما كنتو على مستوى الثقه..السوق
.
أرتفع و ما بعتوا لي..و الحين السوق قاعد ينزل..و هم ما بعتوا
.
لي...متى بتيبيعون لي؟؟
.
I WANT MY MONEY BACK
.
.
طبعا في مثل صديقي آلاف من المواطنين اللي فضّلوا أنهم
.
يحطون تحويشة عمرهم لأنهم ما يقدرون
.
و لا يعرفون شلون يستثمرون أموالهم
.
و حطوها في صناديق و محافظ عند شركات
.
أستثمار..المفروض من هالشركات أنها تكون
.
أمينه على أموال الناس..لأن أدارتها المفروض من
.
الناس المشهود لهم بالكفائه
.
.
و للأسف خانوا ثقة الناس فيهم

Thursday, January 15, 2009

متفرقات ويكنديه

.
.
متفرقاتي اليوم..أستياء
.
.
.
النواب الأفاضل
.
بس عاد...لوّعتوا جبدنا..بهالمستوى اللي أنتو فيه
.
عيل المفروض ما نستغرب أن الشعب كل ماله
.
و ينحدر مستواه..أذا نوابه هذي طريقة حوارهم
.
وعّــــــــــــــــوه عليكم
.
.
.
**********
.
.
قناة سكوب..سواء نتفق أو نختلف مع طرحها
.
بس ودّي..من صجّي أعرف..لي أي درجه
.
تقبّل الناس لها؟
.
يعني أنا أعرف وايد ناس يتابعونها عشان يضحكون
.
و في ناس يتابعونها عشان يرتفع ضغطهم
.
و في ناس يتابعونها لأنها تبرّد قلبهم
.
و في ناس ما يقبلون على نفسهم أنهم يطالعونها أصلا
.
بس الفاصل السخيف اللي سوّوه
.
أمس..عيـــــــــب
.
ليش قاعدين يطلعون أسوأ ما فينا على الفضائيات؟
.
و الألفاظ..و المعاير..و الردحه حق بعض
.
بــــــــــس عــــــــــاد
.
.
.

***********
.
.
.
المود هالأسبوع
.
شادي الخليج
.
لي خليلٍ حسينْ
.
.
عطله بعيده عن المنغصّات للجميع

Wednesday, January 14, 2009

أنا ربّيت و لغيري صفيت

معظمنا كبر مع الأفلام المصريه
.
وفي الثقافه المصريه..الحماة اللي أهيه أم الزوجه
.
تلعب دور قوي..و كلّه أهيه المتسلطه و الشريره
.
بس الوضع عندنا بالكويت غير
.
لأن المثل السائد عندنا
.
أنا ربّيت و لغيري صفيت
.
اللي يعطي كل الأمتيازات لأم الزوج و كأن الزوجه
.
قامت بسرقة الأبن
.
طبعا أنا قاعده أتكلم عن شعور الخالات اللي أهمه
.
أمهات الأزواج بالغبن
.
و اللي في حالات كثيره مو صحيح هالشعور
.
لأن و من واللي من خلال خبرتي هناك قلّه قليله
.
من الخالات اللي يحتوون التشّنه..و يعاملونها كأنها بنتهم
.
بس العموم ما شاء الله عليهم
.
ينحطون على الجرح يورم
.
يحطون دوبهم دوب تشناينهم..و في أنواع من هالخالات
.
في خاله مالها سالفه الا تربط العصاعص بين التشناين
.
وفي خاله تغار من تشنتها
.
وفي خاله تدخل بناتها في منافسه مستمره مع التشنّه
.
عاد و المسكينه اللي تصير خالتها حنّانه و عوبه
.
طبعا أنتو يا الرياييل ما راح تفهمون وجهة نظري
.
لأن كلّه عندكم أمهاتكم غير
.
و لأن الخالات عمرهم ما يبينون حقيقة شعورهم تجاه التشنه
.
جدام أولادهم..كل شغلهم من تحت لي تحت
.
المسكينه الزوجه اذا يت تكلّم زوجها..يبتهر..و يبق عيونه
.
و يقول لها..أمّي؟؟؟ و لا خواتي؟؟؟ و لا ممكن
.
المشكله أن الزوج كلّه على باله أن الزوجه
.
تبي تفتح جبهات..و ما لها سالفه الاّ الدحره
.
و هذا كلش مو صحيح..لأنهم بالنهايه أهل الزوج
.
و مالها غنات عنهم
.
فنصيحتي للزوجات..اللي يعانون من خالاتهم.
.
لا تعورين قلبج..و راس زوجك..و تشتكين له
.
لأن ما راح يبرد قلبج..و يمكت تضيقين خلقه
.
لأن راح يكون عاجز أن يسوي شي
.
لأنهم بالنهايه أمه و خواته
.
و أتبعي سياسة...أسحن و أداوي
.
و كسري حمرتج..و نفشي شوشتج..و روحي سيري عليها
.
متأبطه ذراع زوجك

Tuesday, January 13, 2009

موديل يديد

صاير فيني طبع يديد..ما أعبّر على الهذره
.
أول كنت أقدر أجامل..و أسوي روحي مهتمه
.
بالسالفه..الحين من أحس أن اللي قاعده أو قاعد
.
يمّي عندهم ميول هذرويه..أغير مكاني..صارت
.
الهذره التعبني..و خل أسأل سؤال..من أحس أن
.
الأجابه فيه مشروع هذره..أمشي أو أقوم..ما اسمع الرد
.
لأن بالنسبه..فقدت الأهتمام بالأجابه..كلّه أبي
.
الزبده..مالي خلق ربربه
.
tolernce
.
صاير
.
ZEERO

Sunday, January 11, 2009

يوم في جامعه

أمس كان أكو شي مثل سوق اليمعه في الجامعه الأمريكيه
.
الطلاب اللي بالجامعه أييبون أشياء و يبيعونها
.
الفكره أتينن..وناسه..الغالبيه يعرضون بضاعتهم
.
بدبّة سياراتهم..عندنا صديقه..عندها محل صغيرونو
.
ماخذه لها ستاند و عارضه بضاعتها..و طلبت منا أن نمر
.
عليها..و فعلا رحنا هناك
.
و شفت الطلبه من الجيل الجديد
.
طبعا أنا قاعده أتكلم عن
.
فارق السن بيني و بين الطلبه يتراوح من ١٤ الى
.
١٨ سنه..و صادفت هناك واحد من أعز أصدقائي
.
بأيام الجامعه..ياي يدعم واحد من أقاربه
.
فقعدنا نتمشى مع بعض و نتطمش..الله يا الوناسه
.
الله يا الطشّه..أصلا ودّي أعرف هالجيل الجديد من
.
شباب و شابات..شالملح اللي نزل عليهم؟!؟؟
.
طبعا أتفقنا أنا ويّاه لو كانت أيامنا بالجامعه مثل الحين
.
جان أكيـــد لي يومك مو متخرجين..أحنا أيام
.
العديليه كنا مستانسين.. لو الحين..جان علوم
.
المهم..شفت بلوزه يازت لي..فسألت البنت
.
اللي تبيعها..هذي حلوه بس شلون تنلبس؟
.
قعدت تفسر لي أنها عندها وحده
.
و تلبسها مع جذي..و تحط عليها جذي..و ما أدري
.
عقب شنو قالت..ردّي عليها ببساطه..أنتي كم عمرج؟
.
قالت لي عمرها..رديت عليها يعني أنا أكبر منّج.....سنه
.
ما أقدر ألبسها مثلج..ما وعيت الا صديقي ينغزني
.
ترا هلّقتي
.
الشعور اللي ياني و أنا بين هالفئه العمريه
.
عليهم بالعافيه..ما يحاتون شي
.
ماكو مسئوليه
.
ماكو قلق
.
حد..حد..حد المحاتاة
.
الصاحبه أو الصاحب
.
و الباجي كلها سهالات
.
والله شوقوني حق هالسن مره ثانيه
.
.
هذي صج
.
يا ريت أقدر أعيدها كما كانت

Thursday, January 08, 2009

متفرقات ويكنديه



.

.

.

**********

.

.

بعد فرحتنا البارحه بفوز المنتخب

.

مع تحفظي على لعبهم أمس مقارنة بلعبهم مع عمان

.

الكل كان مستانس..و الكل كان يبي يعبر عن فرحته

.

بطريقته الخاصه..و من مظاهر الفرحه البارحه..كانت

.

الخروج في مسيرات

.

فدار حوار بيني و بين أحد الأصدقاء..ولده كان

.

رايح مسيره..و كان مستاء من موضوع المسيرات..بالنسبه

.

له أن ما صار شي لي الحين اللي يستاهل هالخبّه..فذكرته

.

أن مساكين هالجيل الجديد..ما لحقوا على أيام العز الصجيه

.

فخلّوهم يستانسون..ما صدّقنا تطلع الأبتسامه من قلبنا
.
.
.
**********
.
.
اليوم مسكينه يدّتي بغيت أوقف قلبها
.
داقه علي..و قاعدين نسولف..جان تسألني منو غلب أمس
.
أنا..و لأني كنت سرحانه..و أهيه قاعده تسألني..جان أرد 
.
البحرين
.
مسكينه...شهقت شهقه...اللي قعدت أفكر بسرعه
.
شنو كان السؤال..و شنو كانت الأجابه..اللي خلتها تشهق جذي
.
 أستدركت...قلت لها..لا لا..الكويت..مسكينه..جان ترد تقول أشوه
.
خرعتيني..بغا يوقف قلب يدتي..و بسبب..قل تركيزي
.
.
.
**********
.
.
أول مره أحتر ..أني بنت..ودّي أروح المباراة
.
يوم السبت..و أشجع بالملعب..لأن ظروف اللعبه هذي بالذات
.
راح تكون غير..عمري ما تحمست حق روحة الملعب..كثر مباراة
.
يوم السبت..الكويت و العراق
.
بس شاسوي..الله كريم..أكتفيت بيمعه بالبيت عندي
.
و عليكم بالعافيه ياللي بتروحون المباراة
.
و الله يستر من السبت
.
.
.
**********
.
المود هالأسبوع
.
صوت من سليمان العمّاري
.
مر بي و احترش
.
.
عطله سعيده للجميع

Tuesday, January 06, 2009

حسافتج يا كويت..إنباق

زملائي المدونون و المدونات
.
تعرّض اليوم زميلنا بالتدوين
.
حسافتج يا كويت
.
لحادث مؤسف
.
مدونته أنباقت منّه
.
الموضوع وصل لي بوق المدونات
.
فكل واحد يحط باله على مدونته
.
عموما
.
اللي صار حق حسافتج يا كويت
.
عطانا تنبيه
.
و مدونة حسافتج يا كويت
.
صارت الحين
.
مبيـوق
.
و عنوان المدونه اليديد
.
mbyoog.blogspot.com
.
و تصبحون على خير
.
بس الله يخليكم
.
كل واحد يحط مدونته
.
بالتجوري ماله..و يقفل عليها



Monday, January 05, 2009

دورة كاس الخليج..غير

لا تقولون لي..دورة كاس الخليج لها نكهه غير
.
أدري بتقولون أني كنت ضد رفع الحظر عن
.
منتخبنا..و أصلا تناجرت مع مع نيو و السبب
.
حماسه حق المنتخب..بس أمس..لما صارت
.
الصجيه..تغيّرت الحسبه..أنا شخصيا ضحّيت
.
بنومة الظهر..اللي لو شنو ما أضحي فيها
.
و قعدت أتابع
.
الظهر كنت قاعده أكلّم زوجي بالتليفون.. و سالته
.
بتشوف المباراة؟..كان ردّه..من صجّج!!..ما نزلت
.
المغرب تحت الا و أهوه حاط عليها.. و شويه محتر
.
يعني مندمج بس باسكات..سألته عن 2 من أصدقائنا
.
وينهم؟..قالي متيمعين بالديوانيه يطالعون المباراة..جان
.
يقول لي ترا فلان و مرته راح أيونا عقب المباراة
.
لأنهم الحين قاعدين يشوفون المباراة مع عيالهم
.
اليوم الشباب بالدوام يسولفون أن أمس وقت المباراة كان
.
هدوء نسبي بالشوارع
.
صج الكويتيين يعني لهم فريق الأزرق الشئ الكثير
.
و أنا عقب ما شفت اللعب أمس..أعتقد أن عندنا أمل
.
بس عندي طلب صغير من بو فهد
.
الله يخليك قط هالعصى
.
ترا شكلها كلش مو حضاري..و يفشّل

Sunday, January 04, 2009

برد مـــــــــــــوت

.
طبعا من يوم الخميس اللي فات بدت موجة البرد القارس
.
أنا شخصيا ما عندي مشكله مع البرد..بالعكس أحب البرد
.
على الأقل أحلل الكوتات اللي عندي..لأني مدمنة
.
شرا كوتات..اللي يشوف كمية الكوتات اللي عندي يقول من
.
سكان الأسكيمو..و ودّي شهر يناير كله يكمل جذي..مشكلتي
.
البيوت اللي صايره جنها فريزر..يعني مو معقوله الواحد
.
يسيّر..و يقعد متسمت بالكوت..و متلفف بالشال..هذا اللي
.
صار معاي أمس..أمس زوارتنا بيت يدتي..يتنا مسج من
.
أختي الصغيره..ترا بيت يدتي أبرد من برّه..أنا خذيت
.
أحتياطياتي..وايـــــــــــــد لبست..قاط فوق قاط..و رحت
.
النخّاخ اللي نخني عند الباب على ما يفتحون لي الباب
.
خلاّني ريشه بمهب الريح..و بما أن بيت يدّتي من البيوت
.
القديمه نسبيا..ما فيها عازل..قزّرنا القعده كلها..و أحنا
.
كلنا محّد راضي يفصخ قطعه من اللي عليه..الطلعه كانت
.
عذاب بالنسبه لي..أحب البرد..بس لا يكون هوا..وصلنا البيت
.
خلصنا..اليوم الصبح..و أنا رايحه الدوام..والله العظيم خنقتني
.
العبره..لأن أيدي ما كنت حاسه فيها..و طبعا اليهّال مساكين
.
مو قادرين يمشون من كثر ما أمهاتهم ملبسينهم..أدري
.
على هالتحلطم..كله..بس هم حلو..و ودّي شهر يناير كله يتم جذي
.
لمّا التمشّق يطلع من نخاشيشينا
 
template by Purplecious