Sunday, December 12, 2010

و يمكرون و يمكر الله و الله خير الماكرين

.
.
خلاص أجرت مدونتي على والدتي
********
.
.
استثمرت الحكومه حادث محمد الجويهل استثمارا
.
سياسيا و أعلاميا ناجحا, لكن لسوء حظها لم يستمر
.
هذا النجاح
.
بعدما أقدمت القوات الخاصه على ضرب عدد من
.
النواب و المواطنين اثر حضورهم ندوة في ديوانية
.
النائب جمعان الحربش
.
.
هذا الأعتداء قلب الوضع و كان خطأ فادح أضيف
.
الى أخطاء الحكومه المتراكمه و أعطى النواب حجه
.
قويه على سوء أدائها, اذ أدى هذا العنف الغير مسبوق
.
الى تأليب معظم الناس ضدها و الى زيادة التوتر
.
السياسي في البلد حيث أن حالا من سوء العلاقه
.
و فقدان الثقه قائمه بينهما و بين المجلس منذ مده
.
.
هذا السلوك المتهور أدى الى أعلان المعارضه عزمها
.
على استجواب سمو رئيس الوزراء
.
و قد يتطور الأستجواب الى مواجهة سياسيه نحن
.
في غنى عنها, سلوك الحكومه هذا يثير الأستغراب
.
و الأستنكار ما هو الداعي لتأزيم الوضع بهذه الصوره
.
فالحكومه تملك أغلبيه في المجلس تمكنها من تمرير
.
ما تريد
.
.
المراقب لهذه التداعيات يحملها المسئوليه السياسيه
.
عما يحدث و يؤكد أن ما يحكم علاقتها بالمجلس
.
صراع ارادات فهي تريده مجلسا
.
صوريا مستأنسا بصاما
.
تريده مجرد قطعه في ديكور ديمقراطي

Thursday, December 09, 2010

اللبيب بالأشارة يفهم

.
.
صار لي فتره متوقفه عن التدوين
.
لأن ما عندي أي أضافه لزملاء التدوين
.
اليوم..مو أنا اللي كاتبه
.
والدتي أهيه اللي طلبت مني أني انشر مقالتها
.
***********
.
.
نعود ثانيه الى أشكالية عدم رغبة النظام
.
في بلدنا لتحمل أستيعاب أستحقاقات نظام
.
الحكم الديمقراطي الدستوري, لذلك بين آن
.
و آخر يحاول البعض اللجوء للمناوره السياسيه
.
لتعطيل مفاعيل عمل السلطه التشريعيه, و طبعا
.
هذه المحاولات أصبحت مكشوفه, لذلك أعتقد
.
أنه آن الأوان لكي يلعب الجميع على المكشوف
.
فلا داعي للتكتيكات السياسيه التي يمكن أن تؤدي
.
الى هدم النظام الدستوري الذي يجب أن يحكم
.
ممارسات السلطات جميعها, فالشعب الكويتي
.
اصبح على درجة من النضج و الرشد السياسي ما
.
يجعله قارئا جيدا وواعيا لما يجري أمام عينيه
.
فالتصعيد الأعلامي لحادثة محمد الجويهل و البرامج
.
الحواريه في بعض القنوات الفضائيه التي تناولت
.
هذه الحادثه بهذا العنف اللفظي تجاه اللذين أجتمعوا
.
للأنتصار للدستور يحمل رساله بأن المجتمع الكويتي
.
أنقسم الى جماعتين, جماعه تطالب بالنظام الديمقراطي
.
الدستوري الحقيقي و جماعة تعد على أن يكون نظامنا
.
ديموقراطيا بالشكل فقط
.
طبعا هذا الأستقطاب الحاد بين التوجهين و استخدام
.
الهوجه الأعلاميه بكل أشكالها المرئي و المقروء
.
يخلق حالة أضطراب و عدم أستقرار و مناكفات
.
سياسيه مستمره لا تؤدي الى تقدم و تطور و تنميه
.
مستدامه لبلدنا الحبيب الكويت
.
و طبيعة عصرنا هذا لا تحتمل اللعب على هذه
.
المفاهيم, مفاهيم الدوله العصريه التي تحكمها
.
أنظمه ديمقراطيه تتحقق فيها العداله و المساواة
.
و تسود فيها قيم المواطنه الحقه وحكم القانون,
.
التعدديه, تداول السلطه, الرقابه و المحاسبه
.
(هني طقني عمي )
.
و حقوق الأنسان

Thursday, August 05, 2010

أيهو أحسن؟

.
.
.
.
أي نوع من النساء أحسن
.
المرأه..هبّت الريح..المعتمده على روحها أعتماد كلي
.
اللي تصرّف أمور البيت كلها من غير الرجوع 
.
الى رجل البيت
.
و لا اللي معتمده أعتماد كلي على الرجل
.
اللي حتى أغراض الجمعيه لازم يروح
.
يشتريها معاها
.
.
كل وضع له مميزاته
.
بس اللي تبي تشتري دماغها
.
شنو تسوي؟؟؟؟
.
لحّد يقول لي 
.
خير الأمور الوسط
.
لأن الرياييل عندنا
.
يا يخلون القرعه ترعى
.
يا ياكلون القلب

Sunday, August 01, 2010

الله لا يعيد الشر

.
.
في مقوله شائعه
.
إن اللي يشرب من ميّة النيل لازم يرجع لها
.
و أنا أقول اللي يشرب من ماي الكويت يدمن عليها
.
نتذمر..نتأفف..نشتكي..نتحلطم..نسافر
.
بس لي وصلنا الكويت..قلنا الحمدالله رجعنا
.
و تطلع من القلب..شعور راحه
.
و هالشعور مو بس عند الكويتيين..عندي أصدقاء عرب
.
كانوا عايشين في الكويت و أضطرتهم ظروفهم
.
للمغادره لدول أخرى..أو للعوده لبلدهم
.
ما يقدرون..يحاولون بكل طريقه يرجعون
.
هالبلد فيها سر عجيب
.
فيها أحساس بالأمان
.
أحساس بالراحه
.
أنا قاعده أكتب عن هالموضوع
.
 لأن باجر ذكرى الغزو العراقي
.
و اللي كان صغير أو ما لحق
.
ما يعرف شنو الشعور
.
اللي مرينا فيه كلنا ككويتيين
.
كانت تجربه مزعجه
.
و لي الحين بعد مرور ٢٠ سنه من هالتجربه
.
مو قادرين نتغلب على شعور القلق اللي انزرع
.
فينا بسببها
.
.
الله لا يعيد الشر
.
و الحمدالله أن وطن النهار
.
 رجع لنا و رجعنا له
.

Thursday, July 29, 2010

OVER RATED

.
.
.
.
عندي مجموعة من الصديقات اللبنانيات متوسط 
.
أعمارهم ٥٠ سنه..أحرص لما أروح بيروت أني 
.
أطلع معاهم..طبعا كل وحده منهم عندها البزنس
.
الخاص فيها.. و كل وحده محققه نجاح في شغلها
.
عشان جذي أستمتع بسوالفهم و خبراتهم
.
بروحتي الأخيره..كان موضوع النقاش
.
شنو الشي ال 
.
OVER RATED
.
بالنسبه حق كل وحده فينا
.
وحده قالت الحياة..على أساس أن كله نتوقع
.
أن الحياة راح تصير زينه و ماكو منغصات
.
و كل الأمور سهاله..بس الحقيقه مو جذي
.
.
في راي ثاني كان..الزواج
.
و خاصة في مجتمعاتنا الشرقيه..أذا البنت
.
ما تزوجت أو تطلقت..أيْ مو متزوجه..تكسر 
.
خاطر الكل..و العموم يتحسر عليها
.
مع أن في وايد حالات ممكن تكون حياتها
.
في بيت أهلها..أحسن الف مره من حياتها
.
في بيت الزوجيه
.
.
الراي الأخير..كان العيال..أو الأولاد
.
مو بالضروره العيال يكونون مصدر السعاده
.
لأي زوجين..في وايد حالات..يكونون مصدر
.
شقاء و تعب..غير أن ساعات..يضطرون
.
بعض الأزواج أنهم يعيشون مع بعض و أهمه
.
مو مواطنين بعض عشان اليهال
.
.
أنا رأيي واحد من الآراء الثلاثه السابقه
.
شنو ممكن بعد في أشياء
.
OVER RATED


Monday, July 12, 2010

حمدالله على السلامه بوسند

.
.



و كلنـــــــــــا خالد الفــــــضاله

.


Saturday, July 03, 2010

الى النائبه الدكتوره رولا دشتي

.
.
.
.
أقول دكتوره رولا..في شغلتين حبيت أقول لج أياهم
.
الأولي..أسمحي لي..أذا هذا رأيج
.
فغميضه على الشهادات اللي خذيتيهم
.
نصيحه..بلّيهم و شربي مايهم
.
.
ثانيا..في حديث شريف
.
من كان يؤمن بالله و اليوم الآخر
.
فليقل خيرا أو ليصمت
.
.
فرجاء بلعي ريجج قبل لا تتحفينا بمثل هالتصريحات


Friday, July 02, 2010

الى وكيل ديوان رئيس الوزراء

.
الكويتيين ما ينقال لهم هالحجي
.
.
تبي تعرف شنو الكويتيين
.
.
هذولا أهمه
.



Monday, April 12, 2010

Friday, April 02, 2010

شلــــــــــــــــــون؟

.
.
.
هاليومين وايد قاعدين ندخل في نقاشات
.
أنا و صديقاتي
.
شلون بهالوقت الواحد يقدر يربي عياله؟
.
هل نستعمل نفس طرق أهالينا القديمه
.
بتربيتنا..اللي نقدر نسميها تربيه صارمه
.
قريبه من الدكتاتوريه
.
بما فيها من أستعمال أي شي ممكن
.
توصل له يد الأم أو الأب في لحظة حمق
.
و تصويبه في اتجاهنا
.
سواء كان نعال أو علاق أو عقال
.
و مع هالأسلوب القديم القمعي كله
.
ما ضرنا..كبرنا ما عندنا مشاكل 
.
تذكر و لا عقد و لا بطيخ
.
و لا الأسلوب الحديث اللي يعتمد 
.
على الحوار و قد يتطور الى سحب
.
التليفون أو الكمبيوتر
.
بس مع استعمال هالأسلوب الحديث
.
اللامبالة قاعده تزيد
.
و عدم الأحساس بالمسئوليه قاعد يزيد
.
.
الزبده
.
أذا صرت أم أو أبو أقوياء تعتبر شرير
.
و أذا صرت أم و أبو حليوين و حضاريين
.
اليهال يطلعون مو كفو هالتربيه
.
و يفشلونك

Wednesday, March 31, 2010

غلطـــــــانه

.
.
.
.
.
.
غلطانه د. معصومه
.
لو مطلعه لسانج أحسن

Monday, March 29, 2010

لها الدرجـــــــــه؟؟!!؟

.
.
.
تحديث
.
.
الصحه: أستئناف العمل بأجراء
.
عمليات التصلب العصبي
.
من الأحد المقبل
.
.
.
شكرا جزيلا
.
و الله يعطيكم العافيه
.
*******.
.
تحديث
.
.
.
noura said...
.

العملية جدا بسيطة واذا ما فادت فمراح تضرالعملية
.
عبارة عن قسطرة ببنج موضعي يتم من خلالها فتح
.
انسداد في شريان مهم في الرقبة يوصل الدم الى المخ
.
وتركيب دعامة حتى يتوسع وما يتسكر حاله حال
.
عمليات قسطرة القلبلوحظ انه هذا الشريان منسد عند
.
جميع المصابين بالتصلب يرجى البحث عن مكتشف هذا
.
العرض اسمه دكتور باولو زامبوني
.
يوجد له فيديو في يوتيوب
.
*******
اليوم وصلتني رساله من أحدي الصديقات
.
كان نصها
.
.
غدا في قناة سكوب
.
من الساعه ٣ الى الساعه ٥ مساء
.
مقابله مع السيده أميره المشهود
.
نائبة جمعية التصلب المنشر
.
و ذلك لتوقف العمليات العلاجيه من
.
قبل بعض الأطباء
.
نبي فزعتكم يا أهل الكويت
.
.
.
دقيت على صديقتي اللي أدري أنها
.
تعاني من مرض ال أم أس
.
اللي أهوه بالعربي التصلب العصبي
.
و أهيه نفسها اللي دزت لي الرساله
.
أسألها..لأني ما فهمت أو مابي أفهم
.
أن دكاتره عندنا بالكويت
.
لها الدرجه انعدمت منهم الأنسانيه
.
و قاعدين يحاربون الطريقه العلاجيه
.
الجديده..اللي ردت الأمل حق كل مريض
.
يعاني من هالمرض
.
سألتها شنو الموضوع؟
.
فردت و أهيه كلها حرقه
.
تخيّلي..دكاترة الأعصاب عندنا بالكويت
.
هني حاربوا هالعمليه..عشان يستفيدون
.
تقول لي..هالعمليه اللي مسويه
.
ضجه و ثوره بالعالم هني بالكويت
.
منعوها أول أمس
.
لغرض في نفس يعقوب
.
اللي أهمه دكاترة الأعصاب
.
صديقتي هذي سوت العمليه
.
و أهيه تقول التحسن في حالتها
.
قاعد يصير بشكل يومي
.
و كانوا ٣ دكاتره شباب كويتيين
.
أهمه اللي قاعدين يسوونها في
.
مستشفى مبارك..ياهم أمر بأيقاف هالعمليه
.
من غير أي سبب
.
اللي أقدر أقول له
.
حرام عليكم اللي قاعدين تسوونه
.

Monday, March 08, 2010

وينها؟؟؟؟

.

.
.
.
ليش كلمة..عيـــب
.
أختفت من القاموس الكويتي؟؟؟
.
.

Wednesday, March 03, 2010

تساؤلين..بس

.
.
.
.
.
ليش الرجل الكويتي ما يخلي الطرف الآخر
.
 يكمّل جملته؟؟!؟
.
.
و ليش المرأه الكويتيه تقفز الى النتائج..و يطلع
.
 أستنتاجها خطأ؟؟!؟


 
template by Purplecious