Tuesday, August 12, 2008

مفارفات السفره

اليوم الأول: ماكو شي يذكر غير أن المكان ياخذ العقل و الهوا نظيف و الناس حلوين...منتخب أحد الدول الخليجيه لفريق كرة القدم عنده مخيم تدريبي بنفس المدينه اللي أنا فيها و الفريق ساكن بنفس الأوتيل...شوف العز اللي أهمه فيه
رحنا فيلم سيكس أند ذا سيتي..طبعا الفيلم...بالنسبه لي غايه و نهايه...خلاجين...و هيله..و مستر بيغ...المهم..و أحنا في قمة متابعتنا حق الفيلم...و في أكثر مقطع رومانسي بالفيلم اسمع تعليق من وراي...حماره..ليش ترد له....ما أصدق...حتى و أنا بجبل بآخر الدنيا بأوربا أسمع تعليقات كويتيه غبيه
اليوم الثاني: بدينا يومنا بمشيه قويه كنوع من الرياضه...ما أقدر أوصف مدى استمتاعي برياضة المشي...و عقبها كملنا يومنا عادي..وايد مريح كل واحد يسوي اللي يبي يريحه من غير أي ضغوط من أحد...لا أكو ريل يخز...و لا يهال يحنون
تعشينا خلصنا...صعدنا كل وحده على غرفتها...دخلت الغرفه ما وعيت الا تليفون الغرفه يرن جاوبت
أنا: نعم
المتصل: مرحبه
أنا: مرحبتين
المتحدث: ممكن أكلمنج
وااااااااااااي...من متى خبري بهالحركه....من القاهره 87..بطلوا عن استخدام هالأسلوب من المغازل..طلع الي داق..كابتن المنتخب الخليجي اللي معانا بالأوتيل...الحبيب يبي يتعرف...فراغه...من له خلق يتعرف بهالعمر...احنا خل نعابل باللي عندنا...عطيته من عطايا الرحمن...مو عن شي بس اللي لي الحين يسوي هالحركات...لازم يتم التعامل معاه جذي...و خلص اليوم الثاني
اليوم الثالث: رحنا حق مشيتنا المعتاده...و أحنا بنص نزلتنا الجبل..الا تليفوني مو معاي...طاح مني...ويع ويع...من له خلق الحين يعابل...لأ المشكله لازم نرد نصعد الجبل و أنا ضايق خلقي...يعني تعب و ضيقة خلق...و التسلط ذاك اليوم الشمس حنانيه...المهم وصلت الفندق...ووقفت التليفون
أنا طلعت ما أيوز: كنا قاعدين مع مجموعة أجانب ..و فيه مجموعه منهم كانوا يشتغلون بالخليج...فواحد منهم.قام يمدح بالأمارات و قطر..ما عبرت على نفسي...قلت له هذولا توهم مبلشين..أنت ما تقدر تقارن الكويت معاهم أصلا...وقعدت أشرح..عقب اكتشفت لي الحين ما أرضى على الكويت...يعورني قلبي
مراسلتكم م أحدى الدول الأوربيه
نانو نانو

24 comments:

حمّود راعي السيكل said...

زين والكابتن ما دق بعدها مرة ثانية؟

آفا ,,, يأس من أول محاولة؟

زين جان ناديتي عاملة التنظيف وخليتيها تحجي وتسولف معاه على مود انتي, وتواعده انها تقابلة باللوبي بشرط يكون حاط وردة حمرة بعروة الجاكيتة

وتشوفين تعبير ويههة لما ينصدم

:P

nEo said...

من القاهره 87



LOOOOOOOOOOOOL

دروازة said...

مساك الله بالخير أخيتي

اسمحي لي أن أزور مدونتك واكتب فيها اول نعليق

أولا ... الله يهنيك على المكان والجو الهني اللي انتي فيه.. عوافي


أما اليهال ... فأنا مستغرب ليش كل الناس لما يتكلمون عن السفر دايما يقولون انهم افتكوا من حنة اليهال !!

سؤال: احنا ما كنا يهال؟ ما لوعنا جبود أهلنا؟؟ أشوفهم ما تيذروا منا وقطونا وسافروا؟؟ ليش احنا اليوم نقطهم ونهج؟؟

حرام ترى اهم ملح الدنيا.. والنظرة بعيونهم الشاردة تسوى الدنيا وما فيها..

ترى تعليقي هذا بسبب اني ما شفت الديرة ولا عيالي من شهرين تقريبا... بس مو سفرة وناسة .... مجبور.. شغل... علشان جذيه الــHoem sick أهو اللي قاعد يطبع الحروف ذني :)

أما النحني اللي تحرش فيج وقال نكلمنج... فردي عليه بلجته مرة ثانية: تشيه! كيف تكلمنني بنص الليل وانا راقدة! ما تستحي انت ؟؟ اترك رقادي واكلمنك !! تشيه!!

اتمنى لك عودة حميدة من السفرة ... حميدة يعني حلوة... مو اسم وحدة من طهران ... بس لا يصير اليوم اللي فيه ردتك غبار ... ترى ينسيك سفرتك كلها :)

PALFORCE said...

LOL,

You are too funny.

First time to your blog.

Nanonano? 3ad now I know how old are you, 3an sah zakarteeny bellee madaa.

Thank you,

Bu 3omar

kuwaitforus said...

تصدقين اني رايح القاهرة سنة 87

Sara said...

loooooooooool '9a7kteeny 3ala salfat el m'3azal looooooooooool :>

hehe 9ij gadeem hathaaa hehehe el 3ada ygolon "momken net3araf" >> hathy chenhaa agdaam ;p

safraa sa3eeda sis wel 7emdela 3al salama :>

nanonano said...

حمّود راعي السيكل:
خل يستريح...من له خلق...مع احترامي الشديد للشباب الخليجي..بشكل عام..بس ما ينعطون ويه...تبي أقولك شي طلع يايب على الكويت 3 أجوال مؤخرا

:P
فكرهته زياده

nanonano said...

neo:
والله العظيم من 87..هاهاهاهاها

;)

nanonano said...

دروازة:

أول شي حياك الله...اتبارك مدونتي فيك

ثاني شي..أنا أتفق معاك..لو كانو عيالك...بس أنا ما عندي...و تبي الصج ما لي خلق أتحمل...عيال غيري

ثالث شي...أحنا ما كنا بنزاقة يهال هالوقت..أول أذكر من تخزني أمي أصير أزقيد...هاهاها...لي الحين من تخزني أصير أزقيد
حياك الله

nanonano said...

PALFORCE:
أهلا و سهلا فيك

بذمتك مو ليت الشباب يعود يوما؟

nanonano said...

kuwaitforus:
لا يكون أنت اللي داق
هاهاهاهاها
:)

nanonano said...

Sara:
لأ ممكن نتعرف مالت الكويتيين...أخوانا الخليجيين غير

تعرفين كل واحد و لهجته

الله يسلمج عزيزتي

Bin3agul said...

abya5 shay tethye3 il mobile w nomat itheher bl sefar .. both of them e3asron .. :P

EXzombie said...

و الله ما ادري عن مغازلكم بس احنا كنا مؤدبين و ما نتحرش بخلق الله، كنا من كثر ما احنا فاصلين الوحدة اهي الي اتلزق

و المغازل الكويتي غير عن الباجين

و لا تحاتين انا محد يسولف معاي بالسياسة لأنهم يدرون اني راح احامي للكويت و اهي احسن ديرة بكل شي

nanonano said...

Bin3agul:
صـــــــــــــــــــــاج
نومة الظهر بالسفر

اليوم صارت لي
قمت عباره عن كلب بوليسي

nanonano said...

EXzombie:
من ناحية أخف طينة مغازل...فهو الكويتي بلا شك...أول مو الحين...الحين حتى مغازلهم صار بايخ و فيه جرأه
على غير دبره

عثماني said...

يحليل سوالفج

:)

ترى اسلوبج مشوق فعلا

ناطر المزيد من السوالف

حافظج الرحمن

ولاّدة said...

سكس إن ذا سيتي
أحلى شي في 2008 لحد الآن... شفته مبيوق:)
واكتشفت
1
احنا تزوجنا مبكر وااااايد
اشحلوها سارة عروس عمرها 40 تهبل
احنا على ما نصير 40 إلا كل وحدة متزوجة 15 وإلا 16 سنة

ليش مستعجلين ما أدري

2
الصديقات أهم شي في الدنيا
شفتي فزعتهم لبعض

3
اللي يعيش بالكويت لازم ما يروح النار
المفروض كلنا (انتنحر) عند باب جهنم وما نرضي ندخل أبد...لما نرجع نعيش في نيويورك بظروف هالشلة وبعدين مو مشكلة جهنم


استستمعي عنك وعن اللي في الكويت

يعقووبوو said...

تعليقات الكويتين مشكلة
-
انا اروح تايلند بمكان محد يدله غيرهم واغرب وقت عشان ماشوف عرب
اشوف تايلندي يقولي

سالام ئليكووم

ليش ليش؟ )":

حركة التلفون اشوفها بالافلام المصرية اسود وابيض

nanonano said...

عثماني:
شكرا جزيلا...أخجلتني بتعليقك

nanonano said...

ولاده: لما أرجع أقولج منو اللي علقت....هاهاهاهاهاهاهاهاهاها

ما أدري ليش السالفه تيي لي عندي

ولاده...الخلاجيــــــــــن ذبحتني...بس أشوه الشي الوحيد اللي طخخني..عندي جنطتين من نجناط كاري

nanonano said...

يعقووبوو:
والله أنا زهدت السينما بالكويت من تعليقات الجمهور

دوار الجوازات said...
This comment has been removed by the author.
دوار الجوازات said...

كنت بعلق بس إلي بقوله قالوا غيري!!

خوش مدونه باي ذا ويه،،


:)

1:10 AM

 
template by Purplecious