Sunday, August 30, 2009

الحين صار أهوه اللي مو زيــــــــــــــــن؟!؟

.
.


.
.
أنجيلينا تُهدِّد براد بطرده من المنزل إذا لم يكف عن التعاطي
.
الخبر من جريدة الجريده اليوم
=======
الله الحين صار براد مو زين؟
.
و تهدّدينه بطرده من البيت هالمسكين
.
عقب ما كوّدتي اليهال عليه
.
و صار بيتكم جنّه أغنية مايكل جاكسون
.
We are the World
.
و أنتي تهايلين من ديره لي ديره
.
و يوم أن مل و ما رضى أن يصير مربيه
.
حق هالحضانه اللي ميمعتها
.
أتهمتيه بالتعاطي؟؟؟!!؟
.
يمّه منج..تسلّطتي عليه
.
و خليتيه يهد جينيفر أنستون
.
و هذيج الفقيره لي الحين تهوبي
.
مو لاقيه لها واحد تحبه
.
و علاقتها مع أم براد (خالتها) من أبدع ما يمكن
.
قعدتي لهم قعده لين خربتي كل شي
.
يمّه منّج يا أنجلينا


Friday, August 28, 2009

كذب أشكره

.
..
.
.
بما أن أجازتي الصيفيه كانت قائمه على الأبتعاد عن الكمبيوتر
.
لأن حسيت أني بديت أدخل في مرحلة الأدمان الكمبيوتري
.
قررت أن أذا عندي وقت فاضي شويه..أشوف التلفزيون
.
طلع خبري عتيق بالتلفزيون و القنوات..و طبعا الدعايات
.
من الدعايات اللي لفتت نظري ..و شويه أستفزتني
.
لأن خبركم أنا ما أُسْتفزْ بسرعه
.
دعاية صابون كاماي
.
الدعايه ..كأنهم مقابلين ريّال قاعد يسولف
.
 كان قاعد يستعد أن يسافر مع ربعه..لاحظوا ربعه
.
و لما يه بيسلم على زوجته
.
و شم ريحتها صابون كاماي
.
قرر أن ما يقدر يسافر و يخليها
.
بذمّتكم...منو بيقصون عليه
.
في ريال يعاف ربعه و سفره معاهم 
.
عشان ريحة زوجته صابون كاماي؟؟؟!!!؟
.
ليش يعطون فكره خطأ حق المساكين الحريم
.
و البنات الصغار اللي ممكن يصدقون هالدعايات
.
لما شفت الدعايه...ومن قرادتهم أني ثبتها
.
لأنها أنعادت وايد..كان ودي أحط أعلان ثاني
.
و أقول
.
يا بنات و يا زوجات...لحّد يقص عليكم
.
لأن في ميزان الزوجيه
.
كفة الربع..كله تكون الأثقل
.
و كفة الزوجات كما الريشه

.
.
.
و أنتو يا كاماي...عن الكذب


Tuesday, August 25, 2009

ليش تصومون؟

ودّي أعرف شي واحد
.
هاللي صايمين و على بالهم أنهم 
.
متفضلين على العالم بصيامهم
.
منو طقكم على أيدكم و قال لكم صوموا؟؟!!؟
.
أذا إنتوا جبناء و قررتوا أنكم تصومون عشان
.
الناس..مو لأن الصام فريضه..أقول لكم
.
راجعوا حساباتكم
.
لأن مفهموم الصيام فاهمينه غلط
.
الصيام مو بس ما تاكل و لا تشرب
.
اللهم يا كافي..الواحد أذا طلع بالسياره
.
لازم يتشهّد..لأن في ناس على بو أنهم صايمين
.
يفلخون من العصبيه..و يتصرفون تصرفات
.
بالطريج..تدل على جنون
.
وحده أعرفها..أندعمت بالشارع
.
و اللي داعمها..نزل و قام يطق عليها الجامه
.
و يصارخ لو ما أولاد الحلال تدخلوا
.
و وقفوه عند حده..مسكينه البنت زاغ قلبها من الخرعه
.
وحده ثانيه..بالطريق السريع
.
واحد قرر أن طافته اللفه
.
قرر يرجع عكس السير
.
و بالطقاق بالسيارات اللي يايه بويهه
.
و أذا حاجيتهم
.
قالوا لك صيّام
.
أذا أنت من هالموديل..أقعد في بيتك..و فكنا


Thursday, August 20, 2009

استعدادات رمضان

.
.
.
.
.
بعد سفره طويله و راحه و استجمام
.
رجعت الكويت..و كان أول شي لازم أسويه أروح الجمعيه
.
و خير اللهم أجعله خير
.
مرّتين أروح الجمعيه و ما ألاقي عربانات
.
و أتنحر و أرجع البيت
.
المرّه الثالثه
.
قررت أني راح أنجز مشوار الجمعيه تحت أي ظرف من الظروف
.
ليش كل سنه الوضع بالجمعيات قبل رمضان
.
كأنه بيوتنا ما فيها قطعة خبز؟
.
العربانات بتمشي من الأغراض
.
و هالمرّه لاحظت شي يديد
.
الزوج يدز عربانه متروسه..و هم الزوجه عربانتها متروسه
.
طبعا المداعم بالعربانات ماله تالي
.
خلّصت..لقّطت أغراضي..و رحت باحاسب
.
الاّ الكاشيريه..مو كلّهم فاتحين
.
أبسط قواعد أدارة الجمعيات مو موجوده
.
يعني بوقت مثل هذا..لازم أدارة الجمعيه تصير 
.
بوضع تأهّب قصوى
.
بس منو تحاجي
.
أدارة الجمعيات حالها حال أي أداره ثانيه بالبلد
.
عموما تعوّذت من أبليس..لأن ياني شعور أقط العربانه و أمشي
.
لما وصل دوري و خلّصت..حسّيت بالراحه أخيرا
.
خلّصت أصعب مهمه
.
روحة الجمعيه قبل رمضان
.
.
.
و مبارك عليكم الشهر
.

 
template by Purplecious