Wednesday, March 25, 2009

والله..ماكو وقت

.
.
ليش اليوم بالكويت ٢٤ ساعه؟
.
بين الشغل و المناسبات العائليه و الأجتماعيه
.
و الحين السياسيه..ما تكفي ال ٢٤ ساعه
.
والله ما عندي وقت أروح أشتري أغراض البيت
.
عشان جذي ودّي اليوم يكون ٢٨ ساعه
.
.
******
.
و شكرا جزيلا للمدونه العزيزه
.
Purplecious
.
على التصميم اليديد للمدونه
.
مسكينه ما قصّرت تحملت غبائي


Thursday, March 19, 2009

دشيّت القوري

.


.
.
آسفه..بس عندي أسبابي الشخصيه
.
مخليتني أدش القوري
.
حق اللي ما يعرف معنى مصطلح
.
أدش القوري
.
متعسره
.
و مو بس متعسره
.
وايـــــــد متعسره و مالي خلق
.
.
فأستميحكم عذرا
.
المشكله ما راح أقدر أتكلم عن السبب
.
لأن وايـــــــــــد سخيف
.
بس مأثر فيني
.
عشان جذي..راح أكتفي بالتعليق عندكم

Wednesday, March 18, 2009

Monday, March 16, 2009

عذر أقبح من ذنب

.
.
أمس كان فيه هالتصريح
.
.
الركيبي: لا شيكات من ديوان الرئيس لنواب
.
هناك طلبات مساعده بواسطة نواب لأسر متعففه
.
.
عندي كذا نقطه على هالتصريح
.
أول شي: في أعتراف أن في شيكات
.
ثاني شي: شكو النواب يايين حق الديوان..ليش ما 
.
راحوا بيت الزكاة؟
.
ثالث شي: يوم أن في أسر..ليش الشيكات ما طلعت 
بأسم الأسر..ليش بأسماء النواب؟؟
.
.
رجاء يا أخ نايف..بس عاد
.
حاولوا تتعبون شويه..على تصريحاتكم
.
لأن الشعب الكويتي..مل من طريقة التذاكي مالتكم

Sunday, March 15, 2009

سياسه جديده

.
.
قررت أتبنى سياسه جديده في حياتي
.
ما راح أسكت
.
أذا شفت شي ما ياز لي..راح أُبدي
.
أمتعاضي و أستهجاني من التصرف
.
لأن التمادي صار مو عادي
.
محّد يحترم و لا أحد يحشم!!!؟
.
أدري أني باقزّرها متناجره مع خلق الله
.
و يمكن ما راح أقدر أغير شي
.
بس على الأقل راح أبرّد قلبي
.
.
أمس أنا بالشارع الخلفي..اللي ورا
.
مركز سلطان السالميه..أهوه شارع رايح راد
.
الاّ الشارع واقف..ليش؟
.
واحد بوانيت..موقّف سيارته يم وحده
.
يغازلها..هذا الساعه  ١٢ الظهر
.
من له خلق؟؟؟!!!؟..حر.. موت
.
المهم..و أحنا كلنا واقفين..ننطر..المسعده
.
تتعطّف عليه و تعطيه الرقم
.
التفت على السياره اللي يمّي
.
الاّ شاب كويتي..يأشر لي بأيده
.
يعني شنو أسوّي
.
مــــــــاشي..ما تقدر تسوي شي
.
أنا أسوي..لأن خلاص..ملّيت
.
صايرين في ديرة..كل من حارة أيده أله
.
جان أسوقهم ذاك الهرن
.
اللي أنا أنزعجت منّه
.
على بالكم..أستحوا..أبدا..حقرونا
.
عقب ٣ دقايق تقريبا
.
قرر الأخ..أن يمشي..و يفتح لنا الطريج
.
الحين أنا مشيت..جان أمر يم سيارة البنت
.
التفت عليها..لما شفت شكلها..استفزتني
.
زياده..الا الأخت سادحه الكرسي..يدوبك يبيّن راسها
.
و كاسره الحمره..جنها عاضّه ياهل
.
يعني غصب الله يخليكم..تعالوا غازلوني
.
نزّلت جامة السياره
.
جان أقول لها عيب اللي قاعدين تسوونه
.
طبعا..ما حاولت أنطر أشوف ردّة فعلها
.
لأني الصج خفت..و كمّلت..لحقت صاحب
.
الوانيت..و هم نزّلت الجامه..و وبّخته
.
المشكله..شيفه قيفه..و شعره موقفه جنّه ينّي
.
و أبتسامته عبيطه
.
و اللون محوحي..أكثر من وانيته الأسود
.
مال قل تسبّح
.
عقب ما وبّخت الولد
.
برد قلبي..فقرّرت..من أشوف شي..ما أيوز لي
.
راح أوبّخ..أدري..أن ردود الفعل ما راح تكون زينه
.
بس ما راح أخليهم 
.
يعيثون بالأرض فسادا
.
و أحنا قاعدين متكترين


Tuesday, March 10, 2009

خشمي...مشكله

.
.
.
مع أن نتفه..ولا بالعين شي
.
بس خشمي..مسبب لي مشاكل
.
مثلا..اليوم
.
من الصبح..توّه الجو بادي يعتفس
.
قمت أعاطس..قلت حق اللي معاي
.
بالدوام..كا..الغبار ياينا..لين صارت
.
الدنيا حمره..وصلت مرحلة..اللي ودّي
.
أنتّف خشمي..و أقطّه
.
عقب شوي..طخّت الدنيا
.
شمّيت ريحة مطر
.
جان أقول حق الشباب..أشم ريحة مطر
.
أسمع واحد منهم يقول..شاتقول؟؟!!؟
.
و لا الثاني..يرد عليه..عقب ما طل من 
.
الدريشه..أي..والله مطر
.
ألتفتوا علي..و قالوا لي 
.
أنتي شلون شمّيتيها؟؟!؟
.
.
قلت لهم مشكلتي خشمي
.
كلشي أشمّه

Sunday, March 08, 2009

الزين عندنا...و الشين حوالينا

.
.
ما راح أعلّق
.
بس من يزيد؟؟؟؟؟؟؟؟
.
الساعه ٦:٥٠كويت نيوز:  النائب الصرعاوي
.
حضور الحكومه حفل أفتتاح مبنى المجلس 
.
الأولمبي علي الرغم من أحالته للتحقيق من قبل 
.
مجلس الوزراء دعوه صريحه من أحمد الفهد
.
لاستجواب رئيس الوزراء
.
.
الأستجواب الرابع
.
.
.
الساعه ٦:٥٩وصلني مسج للأعلان عن
.
مقابله تلفزيونيه على قناة الراي
.
مع النائب مرزوق الغانم الساعه ٩.٣٠..و المسج
.
تقول المقابله تحمل مفاجآت
.
.
الأستجواب الخامس
.
.
.
الله يخليكم نبيهم درزن

برافو هايف


.
.
والله برافو هايف
.
رئيس الحكومه ما خذا معاك..غلوه
.
عرفت تلعبها مضبوط معاه
.
و اللي واضح من تصريحات رئيس الحكومه
.
أنك خذيت اللي تبيه
.
برافو..صدت كلمة السر
.
طبعا كان في نواب غيرك صايدينها
.
بس مشكلتهم أن مطالباتهم ما كانت 
.
بوقاحة مطالبتك

Wednesday, March 04, 2009

أحشوا


أنا ودّي أعرف..لي متى هالموديل
.
مع كل أزمه مع كل توتّر
.
نسمع فلان قال..و لا علنتان اللي عروقه بالماي سوا
.
ماشي..ماكو أحد بالكويت ما يدري أن أحنا في وضع محرج
.
ليش مخلينا جذي؟؟؟
.
قولوا لنا شنو في بالكم
.
الحكومه و غاسلين أيدنا منها
.
الحين النواب..وينكم؟؟
.
طلعوا..قولوا
.
صالح عاشور..يقول في حل
.
ناصر الدويله..يقول ما أقدر أصرح بمصادري
.
نسمع أن بو عبدالمحسن راح قصر بيان
.
عقب هم نسمع أن بو عبدالمحسن قعد مع النواب
.
لي متى؟؟؟
.
في شي...طلعوا وقولوا لنا
.
من حقنا كشعب أنتخبكم أن نعرف
.
بس جذي!!!!!!! حتى بهالمرحله قاعدين تحسبونها؟
.
حتى بالهالمرحله خايفين على مصالحكم؟
.
والله عيب عليكم
.
أحنا اللي أنتخبناكم ما نستاهل منكم جذي
.
.
مو حل المجلس
.
من صجّي نبي حل حق هالسالفه

Sunday, March 01, 2009

مو راضي يركب الصنقل


.
.
بعد الأجازه القصيره
.
و خاصة أني صديّت هالمره..صدّه مضبوطه
.
لي الحين مو قادره أركّبْ الصنقل
.
.
يمكن من كثر ما الوضع سئ..مالي خلق
.
يمكن الناس اللي احتكيت فيهم بسفرتي
.
ورّتني الناس وين.. و أحنا وين
.
أنا مو قاعده أتكلم عن وضع بلد
.
قاعده أتكلم عن نوعية بشر 
.
أسبوع كامل..ما سمعت كلمه زعلتني
.
أسبوع كامل..ما سمعت جمله أزعجتني
.
يمكن لأني في وضع سائحه
.
بس قعدت مع وايد ناس من أهل البلد
.
نوعية المفردات اللي يختارونها غير
.
ماكو كلمه تكدّر
.
ببساطه
.
ناس واضحين و مرتاحين مع نفسهم
.
.
فوضعي لي الحين في مرحلة الرواء
..
.
بس قاعده أتزهب حق اللويه
.
اللي يايتنا
 
template by Purplecious