Wednesday, January 14, 2009

أنا ربّيت و لغيري صفيت

معظمنا كبر مع الأفلام المصريه
.
وفي الثقافه المصريه..الحماة اللي أهيه أم الزوجه
.
تلعب دور قوي..و كلّه أهيه المتسلطه و الشريره
.
بس الوضع عندنا بالكويت غير
.
لأن المثل السائد عندنا
.
أنا ربّيت و لغيري صفيت
.
اللي يعطي كل الأمتيازات لأم الزوج و كأن الزوجه
.
قامت بسرقة الأبن
.
طبعا أنا قاعده أتكلم عن شعور الخالات اللي أهمه
.
أمهات الأزواج بالغبن
.
و اللي في حالات كثيره مو صحيح هالشعور
.
لأن و من واللي من خلال خبرتي هناك قلّه قليله
.
من الخالات اللي يحتوون التشّنه..و يعاملونها كأنها بنتهم
.
بس العموم ما شاء الله عليهم
.
ينحطون على الجرح يورم
.
يحطون دوبهم دوب تشناينهم..و في أنواع من هالخالات
.
في خاله مالها سالفه الا تربط العصاعص بين التشناين
.
وفي خاله تغار من تشنتها
.
وفي خاله تدخل بناتها في منافسه مستمره مع التشنّه
.
عاد و المسكينه اللي تصير خالتها حنّانه و عوبه
.
طبعا أنتو يا الرياييل ما راح تفهمون وجهة نظري
.
لأن كلّه عندكم أمهاتكم غير
.
و لأن الخالات عمرهم ما يبينون حقيقة شعورهم تجاه التشنه
.
جدام أولادهم..كل شغلهم من تحت لي تحت
.
المسكينه الزوجه اذا يت تكلّم زوجها..يبتهر..و يبق عيونه
.
و يقول لها..أمّي؟؟؟ و لا خواتي؟؟؟ و لا ممكن
.
المشكله أن الزوج كلّه على باله أن الزوجه
.
تبي تفتح جبهات..و ما لها سالفه الاّ الدحره
.
و هذا كلش مو صحيح..لأنهم بالنهايه أهل الزوج
.
و مالها غنات عنهم
.
فنصيحتي للزوجات..اللي يعانون من خالاتهم.
.
لا تعورين قلبج..و راس زوجك..و تشتكين له
.
لأن ما راح يبرد قلبج..و يمكت تضيقين خلقه
.
لأن راح يكون عاجز أن يسوي شي
.
لأنهم بالنهايه أمه و خواته
.
و أتبعي سياسة...أسحن و أداوي
.
و كسري حمرتج..و نفشي شوشتج..و روحي سيري عليها
.
متأبطه ذراع زوجك

45 comments:

Q80-ChillGirl said...
This comment has been removed by the author.
Q80-ChillGirl said...

بعيدا عن هاللوية اللي انا سعيدة اني بعيده عنها و مستمتعه بالعزوبية :)

جيكي هالبوست! اتوقع بتطلعين من الدوام لي ايكيااااا
http://confashions.blogspot.com/2009/01/audrey-at-home.html

nanonano said...

Q80-Chill Girl :

عندي اياه

ما قصّر زيدون تنقّص لي اياه

بس هم أنتي مشكوره وايد

أنج فكرتي فيني

KQ8 said...

رجاء يمين يسار ماكو على الام بغض النظر عن تصرفات الخاله مهما صار ومهما جرى الزوجه ماتقدر تحل محل الام مثل ما الزوج مايقدر يحل محل ام الزوجه او ابوها

احسن شي والافضل انه الزوجه ماتطري سيرة الخاله لا بخير ولا بشر وكذلك الزوج مايطري سيرة اهل زوجته لا بخير ولا بشر

في بعض الحريم ماعندها سالفه الا امك سوت وامك تركت هذول المفروض ينقصعون واششش

وصح فيه بعض الخالات نجريات بس السنعات منهم يعرفون الاصول ويعرفون متى يتحجون ومتى يسكتون..وكذلك بعض العمات ( امهات الزوجات ) نفس الموضوع

رقيه ...الوضع دقيه يا حمرا يا قرعه

nanonano said...

KQ8:

أي هذا اللي قاعده أقول له

لا تحطين زوجك في موقع أن يختار بينج و بين أمه..لأن الأم أهيه اللي تفوز

بس هم..من حقها أنها تنفس شويه..عشان ما تنفجر

أبو جيج يدور نعاله said...

معلش بس مقالك تحريضى محظ


تبين الزوج يصير ضد أمه علشان مرته...ظالمة أو مظلومة؟؟؟

ما يجوز


الأمهات هن من جيل آخر...جيل العمالقة ما راح توصله أى زوجة حالية ما إتعرف تكسر بيضة أو تخيط قحفية

للأسف زوجات اليوم حاطين روحهم بمنزلة أكبر من حجمهم الإجتماعى الفعلى

يعنى قدرات زوجية محدودة جدا و مواهب منزلية مفقودة و تحلطم لا ينتهى أبدا حتى لو نفخ بالصور

ما أبى أكون قاسى بكلامى بس الزوجات هن عليهن الإنحناء للأمهات أو الخالات و السير على ركبهن إحتراما و تقديرا

أنا طبعا أتكلم عن الغالبية مو الكل...فى زوجات صالحات وايد و متحملين مسؤولياتهن


و اليوم يوم الخالدى

nanonano said...

الوزير الإصلاحى الشاب الدكتور أبو جـيـج:

صاحب المعالي...كلش مو تحريضي

حدّه تطخيخي

قاعده أنصحهم..لا أتدخلون نفسكم في مفاضله مع الأمهات

لأنكم أنتو الخسرانين

أقصد الزوجات طبعا

Unknown said...

its a catch 22 situation for the husband

he is always confronted in position where he has to take sides...
-------------------

so my dear friend:what a husband to do ?

nanonano said...

mosan mosan:

ما يسوي شي..اسواة الله أبرك

المطلوب من الزوجه أنها ما تغث زوجها بهالسوالف..و خل تحاول تحل أشكالياتها بروحها

يعني حق الزوجات..لا التحلطمون على روس أزواجكم..لأنهم ما يقدرون يسوون شي

Sn3a said...

لووول ضحكتيني
والله عاد البنت الشاطره لما ايوون يخطبونها ماتجيك على عريس الغفله قبل امه

شوفي الام
ان كانت تخرع ردي ولدها منتي بعازة عوار راس

وبما اني احب الريال يهتم بجوتيه وانتو بكرامه
فارفعي شعار شوفي امه قبل جوتيه

100 fils said...

مساء الخير

بما اني لي حدالان ما الله كتبلي نصيب بس صدقيني راح اطبعها و احتفظ فيها للمستقبل ..و بسأل ربعي المقربين عن هل موضوع و اردلك ال
feed-back ;)

فريج سعود said...

فتحي نقابة او جمعية حقوق التشناين

وصيري رئيستهم

سـهـيـر زكــي said...

يادي الوكسة يا نونو, هو انتي كمان حماتك منغصة عليكي عيشتك؟

ياختي قطعوا الحموات واللي بيعملوه فينا
طب تصدقي بالله, انا حماتي كانت منغصة عليّ عيشتي ومورياني الويل, بس أنا مسكتلهاش, قعدت اشتغل لها بالأزرق لحد ما طهقتها وخليتها تمشي تكلم روحها

لا وكلّه كوم ويوم ماجت زارتني بعد ما خلفت الواد هشام كوم

دي قعدت تطلّع فيّ العيوب قدام صوحاباتي, بس أنا عرفت أتصرف معاها

لو عاوزة نصايح قولي لي وأنا مستعدة اساعدك, وهو كلّه بثوابه

فتّك بخير يا دلعادي, اصلي سايبة حلة المحشي على النار وخايفة تتحرق

nanonano said...

Sn3a:

مو أول شي كله ما يبيّن..عقب تطلع الصجيّه..و يكون الموضوع

toooooo late

nanonano said...

100 fils:

مــــــــا يصير

الشباب ما راح يعرفون

لازم تسال بنات

حسافتج يا كويت said...

أنا ما افهم في هالسوالف

تشنة وخالة وخوات

هذا بالنسبة لي حجي ماخوذ خيرة

انا افهم شي واحد

انا

انا حلقة الوصل بين زوجتي واختي وامي وامها
واللي يحبني ويبي سعادتي مالازم يداحد حتى لو كان طرف بغى على الطرف الاخر
لازم المظلوم يراعي شعورع وعيشتي ويبلعها ويسكت
مثل ما حنا نبلع سوالف وايدو ونسكن

ولجل عين يا نانو تكرم ألف عين

بس مع حبي وتقديري واحترامي لزوجتي ما اقدر ازف امي وإن غلطت
وفي نفس الوقت انا ما خذيت بنت الاوادم علشان اختي ولا امي يدوسون ابطنها
هم ما ارضى
بالنهاية هي اللي بتبقالي وكلمن بروح وبيلها بحياتة

وهي راس المال

الوضع معقد عشان جذي لازم الريال يصير ماسك العصاه من النص
وقول لكل غالية فيهم إنتي الأغلى

وصدقيني الريال ماكل تبن اكثر من المرأه في هذا الموضوع
ليش إن الزوجة لا تخانقت مع أختة او امها فلن تخسر شي
والام نفس الشي
لكن الزوج المسكين إذا كان مخسبق بخسر الجهات كلها

nanonano said...

فريج سعود:

ما أحب الأضـــــــواء

خلني هني أطحس بالمدونات

nanonano said...

سـهـيـر زكــي:

ما نتحرمش

بس ما أحتاج

أحنا سمنه على عسل

nanonano said...

حسافتج:

عيزت منك..خل يسوون أستنساخ منك..أنت مو راضي

هذي ثالث مره أطلب منك هالطلب..أنت مو راضي

كلامك مضبووووط
بالميه ألف..عشان جذي..أقول حق الحريم

لا تضايقين ريلج بهالأشياء عشان لا يصير بين نارين

enter-q8 said...

أمي حلوة اللبن هذي
تبين نظرية الرجال
بدال الزوجة الف
اما الام فلا يمكن
لكن خلنا نكون واقعيين شوي
يعني الام فعلا لو شنو ما حد يقدر يرد لها جميلها و هم الزوجة لها حق يا نانو
لكن و الله اعرف الكثير من الزملاء
عيشتهم قشرة
و اهو يعلم مرات ان امه غلطانه و مرات العمر له دور لكن شنو يسوي فتلاقينه دايم متكدر و ضايق خلقه

انزين بحالتي انا شنو اسوي امي صافه و يا ام العيال على الصح و الغلط
فالحل الوحيد اني اطالعهم بنص عين و اقول لهم حريم و اهد البيت و اروح الديوانية و من ورى الديوانية نتعشى بمطعم و يالمحظوظين بالارض اللي اهم العزاب
و ارد البيت متأخر و اطالع المره و اقولها خلها تفيدك ام خالد
و ادش تحت الفراش مع ولي العهد و نعفس الفراش و نطيح المخدات و مو مشكله اذا رحنا الصالة و حطينا ام بي سي 3 و علينا على الصوت
ماكو مشاكل
الحياة حلوة

ZooZ "3grbgr" said...

البوست كلش مو صوبي

بس خوش نصيحه بالاخير

عاد شكو الحمره

كويــتي لايــعه كبــده said...

يا زين الزوجه السنعه اللي اذا انحطت بهالمواقف تحتوي السالفه ولا تبين عيوب الأم ولا تضيق خلق الزوج وتسويها بطريقة هي بنفسها ما تتعب نفسيتها

الأم لها كل خير لكن الثنتين أمهات
أمي وأم عيالي

والموقف اللي أمي الحين فيه باجر أم عيالي فيه بمجرد مرور الزمن

الأمهات -كل الأمهات- يعجز اللسان عن شكرهم

بالمناسبة أم زوجتي (عمتي) تسوى وزنها ذهب وخلك من الأفلام المصرية

honey said...

لوووووووووووووووووووول بوست مقهور هذا!!

وعليه الريل ما يدري شسوي ينحط بين خواته ويا امه و بين مرته

مو عشان جذي قلنا صيروا رسميين ويا حمولتكو و لا دشون عليهم إلا متعلقين بذراع ريلكم

عاد اكو خالات الله إكافينة شرهم

nanonano said...

Enter-Q8 :

بو وليد أول شي..الوالده من الخالات الحليوين..و ما شاء الله زوجتك محظوظه

ثاني شي..تبي الصج..أصلا مو بس أم وليد لازم تصف مع أم خالد..في حالتك..حريم الفريج كلّهم لازم يصفون مع بعض..لأنك جبريت..طال عمرك..ما تنتحاجى

nanonano said...

ZooZ "3grbgr":

لأني ما أحط حمره..كلش

و لا أحبها

nanonano said...

كويــتي لايــعه كبــده:

الله يهنيك بزوجتك و بوالدتك و بعمّتك

أن هذا اللي أبيه..أبي الزوج ما يتعكنن من سوالف حريم..لأن محّد مستفيد..عشان جذي أنصح الزوجات أنهم يكبرون عقلهم شويه..و ما يخربون علاقاتهم مع أزواجهم و أهلهم..على شي ممكن يكون جدا عادي..و موجود في كل بيت

nanonano said...

shahad:

تصدقين لأ..بوست نصيحه..لأن ما تتخيلين شلون هالأشياء السخيفه ممكن تأثر على نفسية الزوجه..فودّي أني أقول حق الزوجات..طولوا بالكم..و عن العكننه اللي مالها سالفه مع الزوج..لأن ما راح يفيد

100 fils said...

شهادتج و شهاده الموجودين من الخوات كفايه لاني اخاف اسأل احد و انطق

heheheh :)

الدســتور said...

اووووله شكلج شايله
:))

chandal/danchal!! said...

يا شـــــــــين الريال اللي يحب سوالف الحريم و يعطي وي حق سوالف مرته (عويبان) انا ما اسميه الا "عوادوه" نسبة الى عواد مرافق المطربة الشابة عودة... كل يطحس بين الحريم... و يا شــــــــــــين المرة اللي كل سالفة و تالفة تصير لها.. قطتها بأذن ريلها... الفاضي
يعمل قاضي

حلاة الريال حمشششششش و يجعم مرته من اول شي!!! الام والخوات خط احمررررر ممنوع الاقتراب او التصوير!!!

حلاة المرة تكون سعيدة وبعيدة

nanonano said...

100 fils :

هاهاهاهاهاهاها

أحسن لك..لأن محد بيقول لك الصج

و خاصة أن موضوع حساس..لا تنسى الموضوع فيه صداع بين سيديتين

يعني أشكره..أستعراض قوه

و بعدين تو الناس عليك

لا تحاتي من الحين

nanonano said...

abu eldestor:

;)

لا والله

بس مالي خلق أتكلّم عن الأزرق أخاف أقبّس

و لا خلق الحكومه

و لا لي خلق نجرة النواب..لأنهم ملوعين جبدي

قلت ماكو الا الخالات

nanonano said...

chandal/danchal!! :

صــــــاجه

ما أواطن الريال اللي يحب سوالف الحريم

يلوع جبدي

لأني أحس مخه صغير و سخيف

و يا كره المره المليقه..اللي بمنتهى الغباء تعد كل شي على الريل..على بالها زين

ما تدري أنها جذي..قاعده تبين غبائها جدام ريلها..و تعطي فرصه يتدخل في أشياء مــــــــــــــــــــــــــــو شغله أن يتدخل فيها أصلا

bo shnan said...

انا توني متزوج و هذ السالفة اهي حديث الساعة عندي

اطلب بالمساواة و ان تعطين نصايح حق الرياييل نفس ما عطيتي حق الحريم

موقف الريال هو الاصعب بهل حالات

nanonano said...

bo shnan :

نصيحتي..شيل أيدك من السالفه نهائيا

لا تدخل روحك بسوالف الحريم

لأنك لو شنو ما راح تقدر ترضي أي طرف

فسو روحك مو فاهم و لا شي

و حاول أنك أتطخخ مرتك من غير لا تستفزها

بس لا يكون تروح حق الوالده و تقول لها شي

أكبر غلط..لأنك جذي راح تخسر وايد

mantovani said...

الله يعطيج العافية اللي هذا تفكيرج



مانتوفاني

الزين said...

ما شفت خالة مثل امي تموت على تشناينها

وتداري مشاعرهم

Unknown said...
This comment has been removed by the author.
Unknown said...

nano
قلبج متروووووس

nanonano said...

mantovani:

ما فهمت

قاعد تنتقدني؟

و لا من صجّك؟

nanonano said...

الزين:

ما شاء الله

الله يهني تشناينكم عيل

عسى أهمه يستاهلون خاله مثل الوالده؟

nanonano said...

احمد سالم:

لا والله حشا

لازم نفرّق ترا مو كل شي أكتبه بناء على تجربه شخصيه حقي..في وايد أشياء أكتب عنها من خلال ملاحظاتي

mellow said...

آنا شايفة إن ألحين إن العلاقة بين الخالة و الجنة أحسن من الاول لأن الخالات المودرن كل وحدة بحالها ، من صالون لين صالون و من يمعة لين يمعة ...بعد الربى تبي راحتها


لكن إلي أشوفه من تعليقات الشباب إن ماااااااااااااااكو فايدة
في نظر الرجال المرأة هي الغلطانة إلى يتغمدها رب العالمين بواسع رحمته فمن غيره هو الرؤوف الرحيم

nanonano said...

mellow:

وايــــــد أحسن

بس الغيره سبايب

صارت الحين العلاقه منافسه بين الخاله و التشنّه

هاهاهاهاها

Unknown said...

مع اني مافهمت الا القليل لاكنت الموضوع شخصي ومايحتاج التعميم

 
template by Purplecious