Sunday, January 04, 2009

برد مـــــــــــــوت

.
طبعا من يوم الخميس اللي فات بدت موجة البرد القارس
.
أنا شخصيا ما عندي مشكله مع البرد..بالعكس أحب البرد
.
على الأقل أحلل الكوتات اللي عندي..لأني مدمنة
.
شرا كوتات..اللي يشوف كمية الكوتات اللي عندي يقول من
.
سكان الأسكيمو..و ودّي شهر يناير كله يكمل جذي..مشكلتي
.
البيوت اللي صايره جنها فريزر..يعني مو معقوله الواحد
.
يسيّر..و يقعد متسمت بالكوت..و متلفف بالشال..هذا اللي
.
صار معاي أمس..أمس زوارتنا بيت يدتي..يتنا مسج من
.
أختي الصغيره..ترا بيت يدتي أبرد من برّه..أنا خذيت
.
أحتياطياتي..وايـــــــــــــد لبست..قاط فوق قاط..و رحت
.
النخّاخ اللي نخني عند الباب على ما يفتحون لي الباب
.
خلاّني ريشه بمهب الريح..و بما أن بيت يدّتي من البيوت
.
القديمه نسبيا..ما فيها عازل..قزّرنا القعده كلها..و أحنا
.
كلنا محّد راضي يفصخ قطعه من اللي عليه..الطلعه كانت
.
عذاب بالنسبه لي..أحب البرد..بس لا يكون هوا..وصلنا البيت
.
خلصنا..اليوم الصبح..و أنا رايحه الدوام..والله العظيم خنقتني
.
العبره..لأن أيدي ما كنت حاسه فيها..و طبعا اليهّال مساكين
.
مو قادرين يمشون من كثر ما أمهاتهم ملبسينهم..أدري
.
على هالتحلطم..كله..بس هم حلو..و ودّي شهر يناير كله يتم جذي
.
لمّا التمشّق يطلع من نخاشيشينا

46 comments:

Enter-Q8 said...

مت من الضحك على ولدي الصغير
تقولين كرة فرو
طاح على ظهره مو عارف يقوم
ههههههههههههه

nanonano said...

Enter-Q8:

واااااي

صح تخيل بنت أختي نفس الشكل

بس الشعر كشّه

أمس مت من الضحك عليها مو مبين

قفاها من ويّها

حسافتج يا كويت said...

أيييييييه يا نانو

لاحقة خير

باجر تقولين

ليت يناير يعود يوما
لاخبره بما فعل اغسطس


اتصدقين انا فيني طبع

الله قاردني فية

استمتع بالشي قبل لا ايي
ولا ياني احاتي وما استمتع لاني احاتي متى يخلص

ومثال قبل السفرة استانس اكثر من لا سافرت
لاني بس احاتي إن السفرة بتخلص وبرد لعوار القلب

وفي شهر 10 و11 استانس لان وراي 3 اشهر برد
ولا ياني البرد اعد الايام واقول اخيييية ما بقى شي على الخيسة

وبجذي تكونين عرفتي طبعي الاقشر والمليق

ما اعرف استانس إلا قبل الشي

فستانسي حبيبتي قبل لا اخوض الطين صافيها

nanonano said...

حسافتج يا كويت:

عاد أنا تخروعتي شهر سبعه و ثمانيه

هاهاهاها

طلعت من ربعي؟؟

اللي مقزرينها يحاتون

تصدق ترا هذا عيب شرعي..يا بختهم اللي قلوبهم بارده

Fashionista said...

حرام عليج

:/ بسنا برد

انا باجر بييب معاي دفاية الدوام من زود الصقيع اللي انا فيه

why me said...

بــــــــــــــرد


بموت من البرد

Q8EL5AIR said...

حرام عليج !!

انا احب البرد بعد .. بس موجذي !!


رايحين مطعم الكل قاعد داخل .. مافي قطو بره !! ليش !!


رايحين المخيم طول اليوم قاعدين بالخيمة ويم الدوه !! ليش !!


الواحد ماله خلق يطلع !!


طبعا الحين الي وده يتاجر خل يتاجر بالفازلين و زردو كاكاو !!


سوقها ماشي .. ولا عزاء للمشق !!

طفارتي المشق !!




وتحياتي ..

امنياتي بدفئ ممتع :)


ويسلموااااااااااااااا :)

سيدة التنبيب said...

البرد لا إاله إلا الله مو طبيعي
حتى حق الجمعية مابي أروح

Purgatory said...

بس قاعد أطالع أودري ويه الحجاب

!!!

شـقـــــران said...

الغالية نانونانو

مساءك زمهريري
وأعوامك كلها فرح وسرور لكم ولاحبابكم

البرد هالسنة شي موطبيعي ..اليوم صورت درجة الحرارة بالسيارة وكانت تحت الصفر وبنزلها في المدونة بعد اشوي للذكرى
:)



مع وافر الاماني الطيبة

Gee said...

اييييييييي
فديت بردنا الي يدش بالعظم
صج اني وديت اختي المدرسه بالجامه اليوم لان ما قدرت ابدل
بس هم ياحلو البرد

بس انشالله يطق مطر بعد
ستغفرالله هالسنه ناشفه
يالله بعد عشان نبي فقع
فقع بدون مطر ما يجي كلام

ZooZ "3grbgr" said...

حياتي

آمين رب العالمين

ربي يستجيب منج يارب

أموت بالبرررررررد

الكل متعذب

وآنا اقول ياربي ديمها نعمه

تذكروا الحر بشهر ثمانية

ربي ديمها يارب

تدرين اني ما عندي الا كوت واحد

كل ما اشتري اخليه بالتاق بالكبت

لين تاخذه وحده من خواتي رحمةً فيه

لوووووووول

:*

KQ8 said...

ذبحتنا السناسين...اليهال كل من فوق خشمه كتل فوق كتله من هالسناسين اللي لاصقه تقول بتكس

فنايل داخليه جم طويل + اهدومهم العاديه ملوت المدرسه+ كوتات+قبعات صوف ودسوس هذا اول الصبح

يايني البيت طرق قمصان المدرسة والاكوات وباجي العده بالجنطه

افا

=====
برد البيوت شقاقي اللعن من برد بره...بس هم مع هذا احب الشتا خله يصير سحتني هم زين

Q80-Chill Girl said...

لا الجو اليوم مو طبيعي اللي انا بشرتي دهنية خدودي مشقت! انهارت اعصابي اليوم بالدوام ادور كريم اللي عمري ما احتجت كريم بالعكس انا اعابل بتنشيف بشرتي و تنظيفها من الدهن!؟ و وعليا على ولد اخوي ما شفت منه الا عيونه اليو و لوما انه بنفس البيت جان شكيت انه ما يصير لي

البرد حلو بس مو جذيه ناشف و ماكو مطر

بس هم اهون من الخيسة

كل عام و انتي بخير ما باركت لج بالسنة الجديدة
:*

Broke said...

أكره شي بهالبرد طبقات الهدوم و المشق و السبوح

الواحد يراجع نفسه 100 مرة قبل لا يدش الحمام عزك الله


مأساة

و الفازلين اللي محد يدري عنه طول السنة صار مخامط عليه أمس بعد ما رجعوا أهلي من العبدلي

nanonano said...

Fashionista:

أنتي اللي حرام عليج..لاحقين على الحر الموت..خل نستمتع

ويــــــــــــــــي

أنا من صيد أمس الدفايه بالمكتب

nanonano said...

why me :

نصيحه مني..ما تنفع الا مطاره الماي الحاي..زاختها معاي بكل مكان بالشغل..تقولين زاخه ياهل

nanonano said...

Q8EL5AIR :

أنا هالمخيمات اللي ما أدري شنو تحبون فيها

برد مـــــــوت قعدوا في بيوتكم

و أمنياتي لك بدفئ أمتع و أنت ساكب بالفروه

الوزير الإصلاحى الشاب الدكتور أبو جـيـج said...

راح اصدمج

المكيف ليلحين شغال عندى


شسوى ...جاموس إستوائى و دايما أحس بالحر





البرد هذا ما يفيد معاه إلا حلوى عمانية أو بحرينية


أنا تارس مخباتى حلوى...كل شوى أخمط كتلة و أبلعها

Eng_Q8 said...

ماكو على كوت مرعوب

والله يخلي البشت

ترى في بشت حق الحريم

وانشالله تنزل الحراره اكثر من جذي :)

100 fils said...

مساء الخير

بهذه المناسبه اهديك اغنيه وائل كفوري "ليل ورعد و برد و ريح"الديره" دني برا مجنونه ثلج امكوم ما بزيح.."..عاد فصلت خوش دشاديش شتويه جذي احس اني حللتهم بالبرد

:)

abu eldestor said...

تبين الصج الله يعين اليهال
احنا يا الله نستحمل شلون أهم

nanonano said...

سيدة التنبيب:

أي والله..محمد رسول الله

الجمعيه تهون..أنا الدوام ودّي بالبيجامه

nanonano said...

Purgatory :

بس أودري ترا بالحجاب

nanonano said...
This comment has been removed by the author.
Kaadi said...

وييييييع !! استغفر الله !!


جذي جو .. ؟؟؟كئيييب :( ماقدر !! يكسر !!

ياحلو الصيف يا خفه !! طرق النعل و الصنادل !! واي واي ماحب الصقيع اللي احنا فيييه :(


انشالله كلها مربعانية و تخلص نفتك

nanonano said...

شـقـــــران:

مسائك سحتني

المعلم شقران..شكرا جزيلا..و عسى أيامنا جميعا كلها فرح و سرور لنا و لأحبابنا

البرد أينن..صح..أنا أحساسي فيه هالسنه غير

بس هم ما ودّي يخلص..و لو أن ناشف شوي و يدخل بالعظم..وهم ما عندي مانع

nanonano said...

Gee :

والله أنج تفهمين

أي والله يا حلو هالبرد

ما عليه يدش بالعظم

نستحمل..بس خل تشتر ويوهنا شويه

nanonano said...

ZooZ "3grbgr":

هاهاهاهاهاها

عليهم بالعافيه خواتج

أنا ودي كل الناس تستمتع بالبرد مثلنا

الحمدالله ألف مره على هالنعمه

صج أن بلاعيمي بدت أتقززني شويه بس ما عليه

nanonano said...

KQ8:

اسكت لا تييب طاري السناسين

أمس واخزياه ما وعيت الا سنسوني طاب..ما حسيت من البرد..والله العظيم ماني قادره أسيطر عليه من أمس لي اليوم تقول نل و فتحته..بس الله يبرد علينا بعد..كافي الحرات اللي قاعدين ناخذها من كل مكان

nanonano said...

Q80-Chill Girl :

و أنتي بألف سلامه و عافيه و حب

البرد حلو بكل أشكاله

هاهاهاها

بس ضحكتيني على ولد أخوج اللي بغيتي ما تعرفينه

nanonano said...

Broke:

استغفر الله أنا ودي أتيمم بدال لا أتيدد..كله بسبب الحمام البارد

و التدهن ماله والي..سكتي

nanonano said...

الوزير الإصلاحى الشاب الدكتور أبو جـيـج:

صاحب المعالي أبا الجيجاء

حرام عليك

ترا أنت الحين صرت شخصيه عامه

و ما يصير تستهر بصحتك

لأنك ملك الشعب الحين

nanonano said...

Eng_Q8:

ويــــــــــي

لا توصي حريص

عندي فروتين

من بؤك لي باب السما

ان شاء الله تنزل بعد

nanonano said...

100 fils:

مساء الكستنه و الدوه

عليك بالعافيه

عاد أنا أحلى شي عندي الريال الكويتي بالمقطع الشتوي

الدشاديش الشتويه غير

سكبه

و شكرا على الأهداء
:))

nanonano said...

abu eldestor :

هذي صاج فيها

مساكين اليهال بالطابور الصبح

nanonano said...

Kaadi :

حــــــــــــــــــرام عليج

لاحقه على الصندل و الخيسه و الرطوبه

الظاهر أنج نسيتي الصيفيه اللي فاتت

متنا من الرطوبه و الغبار..لين تغيرت أشباهنا..كل الكويتيين قلبوا بريعصيه

chandal/danchal!! said...

في أحد مسلطج علي؟ اكو احد يحب السمام!!! احنا مو مال جذي! مو اشابيهنا!! اليوم ما رحت حق امي والسبة البرد!! متقرفظة و قاعدة على عمري جني ربيانة!! صكني راسي من الدفايات اللي تطحن بكل ربعة! ما سوت علينا! انا ما اشوف اي جانب ايجابي في البرد! اليوم الصبح مو قادرة امسك السكان من كثر ما ايدي متيمدة!! خشمي لو تسوينله جك يطيح من كثر ماهو يامد!!اطرافي شقصت! وبعدين انا استحي احط مطارة جدام ريلي!! اخاف يقول عني عيوز! خليني مندقرة و ساكتة على عمري!! و بيوتنا الله خير صايرتلج بحر قزوين!! شي ما طحن!! 24 ساعة متلفلفين و متكمكمين ونغني "ها هنا بين كاظمة والجبال ورى"!!!
ما اقول الا يا زين الحر والرطوبة بس بدون غبرات!! و يا شين شي ما شابه اهله!! و يا زين المنخفض السوداني و يا شين المرتفع السيبيري!!
بذمتج يا حانو ايهو اونس شهر 6 و 7 و 8 و الا الحين! انا احب ما علي المغرب يصير جريب ال 7 و اكره حزة الحين--- ما احب النهار القصير!! اييبلي الماحي بالقلب!!
قولي الصج ولا تخافين!! ايهو اونس!! عسى حليب ام بومهدي عليه سمسم اذا ما قلتي الصج!

nanonano said...

chandal/danchal!!:

هاهاهاهاهاهاهاها

هاهاهاهاهاهاهاها

هاهاهاهاهاهاهاها

والله عسل

أول شي..أنا أموت على البرد

صج أني قاعده أكتب تعليقي هذا و أنا لابسه تريننج كاشمير و لابسه جواريب صوف و المداس و أنتي بكرامه داخله فروه..و فوقهم لابسه فروتي..بس أحب البرد..أصلا اليوم الصبح..لما وصلت الدوام أستاحشت من أيدي من كثر ما زورقت..و خشمي ما ينشاف الحين من لمعته من الفازلين..خو خبرج الخشم الحين تقولين نل و فاتحته..من غير شعور يسرب..و بعدين الصج أنا أحب الصيف..بس صيفيتنا اللي فاتت متنا من الغبار..تنكت صدورنا..و لي خف شويه..يتنا رطوبه مقّطت و يوهنا..خلت كل وحده فينا اللهم يا كافي..تقولين ويها مطاعه..نبي هالبرد يشتر ويوهنا شويه

chandal/danchal!! said...

ماكو فايدة! كويتيين000 ما نكسر عز قريش!!نحن عل البرد وندعيليج هولة من كثرما نجبع بهالهدوم!! مير الريال شكله صار انعم من المرة--- بقى شي ما درعناه!!!و "وازلين" بعد!!! على قولة امي ما تقول فازلين "وازلين"!!! انا قمت اتشهوة اشياء غريبة و دخيلة على مجتمعنا!! عان علي سحلب!!! اي نعم سحلب ولا عنه! حتى المصري يقوللي يا ساتر دا بس تلائيه في الحواديت هاهاهاهاهاهاها وين القى سحلب حليو و بدون ماي زهر!!!

nanonano said...

chandal/danchal!!:

السحلب الزين كانو يسوونه قهوة مجمع زهره تحت..و أذا تبين تسوينه بالبيت أشتريه من مطحنه العالميه في الصالحيه

بس اللي أحسن من السحلب..محلبيه حاره..شي مو عادي

esTeKaNa said...

صباح الخير
والورد والبرد والجو اليوم غير
:)
مو جنه اليوم أدفى؟
انا احب البرد
البرد له حل
ويا زين هدوم الشتا واناقتها
الحجي اذا صار حر وفر قلبج شنو الحل؟
ماكو حل
:)
اللي مضحكني من الصبح ان ايدي معفسه
امسك القلم ..تاخذ شكل القلم
ارعص شي تنرعص
هاو حسافه على ايدي صارت قابله للتشكل مع هالبرد
:Pp~
وصاجة البيت ابرد من بره
طبعا احنا ببيتنا حفله تنكريه
وكبتات تمشي
ويالله نلحق
:)

nanonano said...

esTeKaNa:

لا يغرّج الجو اليوم الصبح

عيسى رمضان قال الليله

راح يرد يبرد الجو

هاهاهاها

صاجه أذا أحتر الجو شويه

سرسوف قلبج يذوب من الحر

و لا بالسياره

Zaydoun said...

عسى البيت الجديد دافي؟؟

اذا استبردتوا حطوا الشواية بوسط الصالة، ترى تصلح فايربليس

nanonano said...

Zaydoun:

بوالزيد لا العازل مسوي شغل أشوه

بس أحنا من قلنا بنسوي باربيكيو

و الجو مو وهلنا

Funny Q8i said...

طيحيله ككاو

يدفي

ومادري منو قال لي بعد العصيدة :p

وماراح تمتنين على ضمانتي

بس هالله هالله بفيتامين سي ;)

Tوتحيّا

 
template by Purplecious