Thursday, January 22, 2009

توّه ينفذ صبرك؟

كويت نيوز:  النائب الغانم: صبرنا نفذ
.
و لن نقف مكتوفي الأيدي تجاه تبخّر مدخرات المواطنين
.
و انهيار الأقتصاد
.
.
.
الله يا بو علي..توّه صبرك ينفذ؟
.
عقب شنو؟ عقب ما صار ال
.
Damage is too big to be handeled?
.
بو علي..الأقتصادي جاسم السعدون عيز و أهوه يقول
.
و ينبّه..و قال سنة ٢٠٠٩ راح تكون أسوأ من ٢٠٠٨..و 
.
كانا في بداية السنه..و السنه بيّنت مواريها
.
يا بو علي..أحنا اللي صبرنا نفذ 

53 comments:

Blog 3amty said...

أهو قصدة كاشنا نفذ أتوقع ومتوهقين بدين الصناعات وماكو شراية مو عارف يقط كميات تسوى بالوطني ولا بزين !

Eng_Q8 said...

لو مو متوهق اهو وربعه جان ما صرح

وانا ما ارضى فلوس عيالي الي لي الحين ما انولدوا ولا خذيت اهم ويعتبرون الاجيال القادمه اتروح حق ناس اخسروا

اخسرت شركاتهم شكووو تعطونهم فلوس بلا اقتصاد بلا هم ماادري عاد شنافعينا فيه لا ضرايب ولا بطيخ ولا موظفين الا جم واحد

بلا اقتصاد بلا هم فلوسنا مو لعبه

nanonano said...

Blog 3amty:

هلا بالعمّه والله

بالضبط..أهوه قصده كاشنا نفذ..فتعالي يا الحكومه تدخلي

يا ريت ألاقي تصريح مرزوق الخرافي في قناة ال
CNBC
العربيه اليوم..زبدة كلامه..المال العام هذا وقته

تخيّل؟

nanonano said...

Eng_Q8 :

مهندسنا..بالضبط..أنا مو ملزومه..قعدت أكرف سنين عشان لما أيي أتقاعد يقولون لي فلوسج بـــــــــاح

و مو ذنب أي كويتي..و بعدين القطاع الخاص شنو سوا حق الأقتصاد

أشوفهم كلهم أيام الرواج كانوا يحشون بالكويت و أجرائتها لما يستضيفهم أي منتدى دولي

محد قال كلمه زينه بحق الكويت الحين..لما طاحوا..تعالي دفعي

كلش ..كلش..الحكومه مو ملزومه فيكم
و هم أحنا مو ملزومين بعد

q8ity said...

اول الايام مو راضين
الحين لما طبع بوم الخرافيه بطل حلجه
لا يبا الحين يبون يدفعون الحكومة مديونيتهم

مبيوق said...

نانو

اللي صاير هاليومين بالبنوك نتيجة بيع البنوك اسهم الخرافي لأانة راهن اسهم زين بمبلغ دينار واربع مائة فلس

ويوم شربت مروقها السالفة البنوك بتسلم على فلوسها فقامت تبيع فلوس الرهان

فنزلت أسهمها وياية شكوة من بنت عالمي للمركزي على الخرافي إنة علية مليار ونص ما دفعها

عشان جذي تحرك الريال

انا ماني معاة او ضدة
انا اقوله لا تغلط يا مرزوق ترى مامن الحكومة رجا
لو فيها خير جان حفظت فلوسها

السجين وصلت العظم
وربي يستر

أنا اللي صاير بين السما والارض لا الأراضي راضية تنزل عشان اشتريلي بيت ولا السوق راضي يرتفع علشان اشتري بيت

والمستفيد الوحيد في ظل هذي الأزمة صاحب الشقة اللي انا مأجر عندة

وا حر قلبي حراه
أنقص ظهري

بيطلعلي شعر بعد هالازمة بدال الصلعة

abu eldestor said...

الناس راضيه
بس المهم يشوفون لهم حل
وضع الشركات مزري

100 fils said...

مساء الخير

اتصدقين اول ما وصلني المسج ضحكت من القهر..وقلت بيني و بين نفسي عقب شنو
:"(

chandal/danchal!! said...

ليش ضيقت الخلق عل ويك اند!!! مش عوايدك يا نانو!!! وين متفرقاتج من غير شر!! ضيقتي خلقي انت و مبيوق

هونت ماني طالعة الليلة... بصلي التراويح وادعك رجليه بالحجر ونام

المــــــود اليـــــــوم لسيد درويش

شدالحزام على وسطك غيره مايفيدك
لابد عن يوم برضه و يعدلها سيدك

وهم قال
صباح الصباح فتحي يا عين والجيب ما فيهشي ولا مليم بس المزاج رايق و كريم باب الأمل بابك يا رحيم.. ده الصبر طيب عــــال و يغير الأحوال يللي معاك المـــــال برضه الفقير له رب كريم

آخرتي بصير مطربة في قهوة نجيب محفوظ اللي بالحسين ... اصطر يم راعي القانون والدف

nanonano said...

q8ity:

أول الأيام خــــــــــــاموش..بالضبط

و الحين لما السكّين وصل للعظم بالنسبه لهم

صار مدخرات الناس

ما الناس المساكين من زمان طارت مدخراتهم

و الحين صاروا متفرجين بس

خذوا خسارتهم و أسكتوا

nanonano said...

حسافتج:

منو أوعز للبنوك أنها ما تبيع الأسهم المرهونه؟؟؟؟؟

محافظ البنك المركزي

أنزين لما البنوك ما باعت في بداية الأزمه معتقده أن المحافظ عنده خطة أنقاذ

و أييك المحافظ قبل أسبوعين و يقول أنا جهه أستشاريه مو تشريعيه
ماكو بأيدي شي

و خلال هالفتره كلها

كبار التجار
و النواب

خـــــــــــــاموش

ما يبون يدقلون الحكومه عشان يتم تقديم المساعده لشركاتهم

أنزين يا مرزوق وينك ذيج الأيام لما كانو وزير التجاره باقر و وزير الماليه الشمالي يتحفونا بتصريحاتهم..و يتهدرق السوق

توّه ينفذ صبرك

و الله صبور يا بوعلي
=======


بالنسبه لوضعك..أنطر شويه..على شهر ثلاثه..راح تبين في أسعار العقار

خبراء العقار..يدرون أن الأسعار نازله الحين..بس لي الحين ماكو صفقه حقيقيه تمت..عقب ما تخلص البنوك من الأسهم ..راح ترجع و تبلش في بيع العقار

nanonano said...

abu eldestor :

يشوفون لهم حل بعيد عن أحتياطي الأجيال

يسنون تشريعات

يجبرون شركات على التفليسه

أبو الدستور ماكو أزمه من غير ضحايا

و الكويتي ما لازم يكون فوق الأزمات

أنت أتخذت قرارك أنت تتحمل مسئولياتك كامله

مبيوق said...

نانو

أنا ما قول إلا هنيأ للإقتصاد الكويتي

nanonano said...

chandal/danchal!!:

والله يا طويلة العمر عقب هالأسبوع و تداول هالأسبوع

صكّت فيني الدنيا

أنا من الناس اللي ما أحب أني ما أعرف
what's coming next
و مثلج شايف..محد عارف لي وين راح نوصل

و الصج أنا قلقه..لأني أشتغل بشركة استثمار

فوضعي المهني..ممكن عن قريب راح يرقل

و راح أيي معاج..نبسّط في الحسين

بس مشكلتي أني أخاف من القطاوه

و أكيـــــــــــــــد أنا راح أقزرها أتعايى مع المصريين

nanonano said...

100 fils:

آسفه..آسفه..آسفه مو قصدي أخطرك

مساء الورد عزيزي

تصدق أنا بعد ضحكت أول شي..بس بعدين بديت أستوعب..قمت أطبخ و احتريت

nanonano said...

حسافتج:


هنيئا لنا كلنا.... بكل فطاحل الدوله

كويــتي لايــعه كبــده said...

مهاوشهم على مناقصات البلد و"السماح" لهم بالنهش فيه ووتضارب المصالح بوجود القرار التجاري بيد اللي يملك مصلحة تجارية هو سبب تجهيز التربة الكويتية للحالة الاقتصادية العالمية والآن لا نملك مؤهلات اصلاحها.

عدم تطبيق القوانين من قبل البنوك وكبار التجار والشركات الورقية الوهمية وضعف القانون امامهم ووو من أين جاء؟ من الملاك؟ جاء أحدهم ليحل المشاكل التي هم سببها!؟

فعلا لك الله يا كويت

اذا هذول اللي بيحمونك
عاش جاسم الخرافي الجديد

Fashionista said...

لن نقف مكتوفي الأيدي تجاه تبخّر مدخرات المواطنين
و انهيار الأقتصاد


ما فهمت

شنو ناوي يسوي؟

ZooZ "3grbgr" said...

شنو صار على فلوس التأمينات

ليش اني بعرف دام اني بالاستثمار

لي كشونا بيعطونا فلوس تقاعد

ولا بيكشونا من هناك بعد بحجة فلّسنا

:/

nikon 8 said...

الشكوى لله عيل الفقير شيقول
؟؟؟؟

100 fils said...

اسفه على شنو..كلك خير و بركه يانانو والله ان شاء الله يسهل الامور و يفرجها على الجميع

enjoy your weekend dear ;)

الوزير الإصلاحى الشاب الدكتور أبو جـيـج said...

كل واحد وطول صبره

بو على صبره طويل ...فيه ناس صبرهم قصير

فى ناس طول صبرهم وسط...مقبول

أنا و حتى كتابة هذه اللحظة ما نفذ صبرى


قولوا ماشالله عااااااااد

mtfa2el said...

نوابنا مشغولين بالفالي و تسفيره
و الدواوين يرخصون لها ولا ما يرخصون
و منو أحسن حماس و لا فتح
و محمود عباس يدخل الكويت ولا ما يدخل
و معبر رفح زين ولا مو زين
و البورصة طابة رواسي صار لها جم شهر

و الحبيب سلم قلبه توه يصحى من النوم يقول صبرنا نفذ !!
و الله احنا اللي صبرنا نفذ منك !!

nanonano said...

كويــتي لايــعه كبــده:

دار حوار بيني و بين واحد من ١٢ سنه تقريبا و قال لي

هالديره ما راح ينصلح حالها..أذا أستمروا سياسينها بتتفضيل مصلحتهم الشخصيه على مصلحة البلد

و لي الحين حتى مع الجيل الجديد من النواب

فيهم نفس العيب الشرعي

nanonano said...

Fashionista:

هاهاهاهاهاهاها

يمكن يقلب غرندايزر

nanonano said...

ZooZ "3grbgr":


والله أنا شخصيا باقي لي ٣ سنين على التقاعد

و هم خايفه..أن أيي اليوم عقب هالكرف كله

يقولون لنا التأمينات..ماكو فلوس

بو علي تصرف فيها

nanonano said...

nikon 8 :

الفقير أصلا ما له حق أن يتكلم..بس يطالع بعيونه

و يتحسر

nanonano said...

100 fils:

شكرا جزيلا

و عطله سعيده لك و لأحبابك

nanonano said...

الوزير الإصلاحى الشاب الدكتور أبو جـيـج:

صاحب المعالي أسمح لي أني أقول لك

أنت بالذات ما حلاته ينفذ صبرك

لأن من ينفذ أتطنقر

nanonano said...

mtfa2el :

لا مو توّه يصحى من النوم

توّه السكّين توصل لي العظم عندهم

أحنا اللي واصلتنا صار لنا شهرين عادي

أهمه الحين لما وصلت لهم

صار نفذ صبري

ودّي أقول له

بو علي..ترا لي الحين ما شفت شي

أنطر شويه و راح تعرف شنو شعور الطفره اللي أحنا حاسين فيها صار لنا شهرين

بوتشخيص said...

أحلى شي المنتف والله .. لا يحاتي اسهم ولا عقار ولا اشلون البورصة اليوم و شخبار المحفظة المليارية و من هالكلام بربيييع لوول منتف اشخسران :)

---

قلبي يتقطع على ربعي و اهلي في القطاع الخاص و القلق اللي انتابهم من ان مستقبلهم ومستقبل عيالهم ممكن يتعرض للخطر الله يبعده عنا جميعا ويعدي هالأزمة على خير ..

Fahad Al Askr said...

وايد يازت لي موريها

ولاّدة said...

هذا طوفااااان نوح كما وصفه أحد كبار المتداولين

ينفذ صبرك ما ينفذ صبرك الكل غرقان يا بوعلي

شد الحزام حالك حال غيرك وخل خوالك يواجهون سوء إدارتهم للإئتمان بشجاعة ومسؤلية

Enter-Q8 said...

بو علي ريح بالك
انا ما عندي مدخرات يعني لا تحاتي
ثلاث ارباع ربعي نفس الحالة
يعني بنفزع لك ضد نانو

الا اذا انت المتضرر
فالله يعينك علينا

nanonano said...

بوتشخيص:

ترا أحنا تنتفنا و خلصنا..و قاعدين نتعامل مع الواقع..بس اللي ما نبيه

أن حتى أموال الأجيال القادمه أتنتّف بعد

و عقب نقعد حوطه..لا من تحويشة عمرنا اللي ضاعت و لا من تقاعدنا اللي خاشينه حق المستقبل
=====

و موظفين القطاع الخاص هذي قصه ثانيه بعد..لي الحين ما بينت صجيتها

nanonano said...

Fahad Al Askr:

أشوه في شي ياز لك عندي

nanonano said...

ولاّدة:

تهقين شدة الحزام تنطبق عليه مثلنا؟؟؟

أمس مرزوق الخرافي بال سي أن بي سي العربيه يقول لازم المال العام يتدخل الحين

أي مو المال العام خاشينه عشانكم

شي يحر الرهات اللي يتكلمون فيها

كأن الكويت ما فيها الا أهمه و لازم تتسخر كل موارد الدوله عشان ما يتكدرون

nanonano said...

Enter-Q8:

هاهاهاهاهاهاها

هو حتى أنا ما عندي مدخرات

أطالع الله و أطالع راتبي حالي حالكم

بس مابي فلوس تقاعدي تطير بعد

بو وليد..بو علي ما عنده مدّخرات؟؟؟؟

أذا بو علي ما عنده مدخرات..ما أدري منو عنده...أمي؟

KQ8 said...

جاسم السعدون اذكره من التسعينيات وهو يلبح ويحن ويقل الوضع مستقبلا راح يتهور ومحد ملقيه ويه

الحين صحو؟؟

nanonano said...

KQ8 :

بو عبدالله رايته بيضه..أصلا مسكين طاح من لسانه وصله و أهوه يتكلم و ينبه

الحين بو علي..صبره نفذ
====

المهم..طلعت فلوسك؟

KQ8 said...

in the process :)

بركة said...

يقولك هذي الازمة يمكن تاخذ لها جيل كامل من الوقت

واعتقد انك يا مرزوق
توك صغير..


خيرها بغيرها يا مرزوق

وتكبر وتنسى

و الا تكبر وتاخذ غيرها


بركة

بركة said...

الله يسامحنى لاني تشمت فيك
يامرزوق


بركة

ولاّدة said...

نانو

خل نتراهن
هل سيتدخل المال العام لإنقاذ الخرافي أم لا؟


نتسلى ونوسع صدرنا

شخصياً أعتقد لأ
والسبب ما أقدر أقوله دام قاموا يجرجرون المدونيين...بس أساسرك إذا تبين

lawyer said...

اشيبي في الكاش ؟؟
ليكون بيشتري ليفربول اهو بعد؟؟

fr7ty said...

السلام عليكم

موقع أكثر من رائع شكرا لكم

موضوع جميل جدا يستحق القراءه

يوتيوب فيديو فرحتي

http://www.fr7ty.com

منتديات نسائيه

http://www.fr7ty.com/vb

فريج سعود said...

اذا صبرك نفذ

الناس مخابيها نفذت يا بوعلي

وما قام الموظف الجامعي يقدر يشتري

316i

من حفيزكم يا بو علي

خلها على الله

وان شاء الله صفة ليفربول مالت الوالدة والخوال تتم وتطلعون لكم جم بيزة منها

Gee said...

الله يستر من الي ياي
والله يهدي الجميع انشالله ويصلح حال هالديره الي مو مترقعه
;\

mosan mosan said...
This comment has been removed by the author.
mosan mosan said...

The thing is you don’t know how genuine is he?

bo bader said...

تذكرت مثلين يوم قريت تصريحه :
١- الذيب ما يهرول عبث
٢- ثلثين الولد على خاله !!

واحد صوت حق الخرافي برئاسة المجلس ما نتريا من وراه خير ...


لا والحين مسج يديد توه وصلني من كويت نيوز :

بعد انسحابه من اجتماع المالية البرلمانية مع الحكومة،النائب الغانم: الحكومة لم تقدم أي تصور لحل الأزمة الاقتصادية.
=====

المعنى : الحكومة لم تقدم لنا فلوس لحل الأزمة الاقتصادية .

وعلى طاري السكين والعظم ، عفية لحمة متينة عليهم ، توها توصل عظمهم بعد ٥ شهور !!

لك الله يا راعي المعاش !!

bo_sale7 said...

السؤال الذهبي هو :

هل راح ترجع الشركات وتستثمر فلوسها بالكويت بعد دعمها من الحكومة ؟؟؟

فاصل ونواصل

شـقـــــران said...

الغالية نانونانو

صباحكِ سُــكّـر..يلفه كل شيء جميل مس هذه الارض

----------

غاليتنا..بوعلى يتكلم كما يقول المثل

من حر مايونس


فنيران الأزمة مسّته وأمواله

فبدأ يؤنس حرارة النار،،،فعلا حديثه بالكلام الحاد...والذي سيلحقه بالصراخ الشديد في المستقبل القريب!؟



أتمنى أن نتجاوز هذه الازمة الاقتصادية بعيدا عن صرخات المصالح


مع تأكيدي بأن إنقاذ المواطن الكويتي العامل في القطاع الخاص هي أهم بكثير من انقاذ ابراطوريات مالية بدأت تتهاوى على وقع مساوئ الادارات الفاشلة...والمقامرة



لك وللعائلة الكريمة من زوجك الكريم الى أصغر ابنائكم أجمل الأماني والتمنيات الطيبة


ربي يحفظكم

 
template by Purplecious