Sunday, January 11, 2009

يوم في جامعه

أمس كان أكو شي مثل سوق اليمعه في الجامعه الأمريكيه
.
الطلاب اللي بالجامعه أييبون أشياء و يبيعونها
.
الفكره أتينن..وناسه..الغالبيه يعرضون بضاعتهم
.
بدبّة سياراتهم..عندنا صديقه..عندها محل صغيرونو
.
ماخذه لها ستاند و عارضه بضاعتها..و طلبت منا أن نمر
.
عليها..و فعلا رحنا هناك
.
و شفت الطلبه من الجيل الجديد
.
طبعا أنا قاعده أتكلم عن
.
فارق السن بيني و بين الطلبه يتراوح من ١٤ الى
.
١٨ سنه..و صادفت هناك واحد من أعز أصدقائي
.
بأيام الجامعه..ياي يدعم واحد من أقاربه
.
فقعدنا نتمشى مع بعض و نتطمش..الله يا الوناسه
.
الله يا الطشّه..أصلا ودّي أعرف هالجيل الجديد من
.
شباب و شابات..شالملح اللي نزل عليهم؟!؟؟
.
طبعا أتفقنا أنا ويّاه لو كانت أيامنا بالجامعه مثل الحين
.
جان أكيـــد لي يومك مو متخرجين..أحنا أيام
.
العديليه كنا مستانسين.. لو الحين..جان علوم
.
المهم..شفت بلوزه يازت لي..فسألت البنت
.
اللي تبيعها..هذي حلوه بس شلون تنلبس؟
.
قعدت تفسر لي أنها عندها وحده
.
و تلبسها مع جذي..و تحط عليها جذي..و ما أدري
.
عقب شنو قالت..ردّي عليها ببساطه..أنتي كم عمرج؟
.
قالت لي عمرها..رديت عليها يعني أنا أكبر منّج.....سنه
.
ما أقدر ألبسها مثلج..ما وعيت الا صديقي ينغزني
.
ترا هلّقتي
.
الشعور اللي ياني و أنا بين هالفئه العمريه
.
عليهم بالعافيه..ما يحاتون شي
.
ماكو مسئوليه
.
ماكو قلق
.
حد..حد..حد المحاتاة
.
الصاحبه أو الصاحب
.
و الباجي كلها سهالات
.
والله شوقوني حق هالسن مره ثانيه
.
.
هذي صج
.
يا ريت أقدر أعيدها كما كانت

61 comments:

حسافتج يا كويت said...

أنا مابي أرد أيام الدراسة


خلاص عزلنا

الكتاب الوحيد اللي حلفت ما أقرى غيرة هو القرآن

بس مت مت من الدراسة والكتب

ومن قال ماكو هم غير الصاحبة
أنا ما كان عندي وقت علشان يكون عندي صاحبة

يا نانو يكفي هم الدراسة
عليهم بالعافيا وعلينا بالعافيا وكلمن ياخذ نصيبة

أما إني ارد أدرس


نوووووووووووو واي

يالله صباح خير
آل دراسة آل

why me said...

اي جيل هالوقت يا حليلهم محاتاتهم غير نمونه

!!


سؤال فني انا من اي جيل أعتبر ؟؟


لوول

nanonano said...

حسافتج:

صباح الورد

أنا ايام الجامعه مالي خلق أفتح كتاب

بس أحضر المحاضرات..و الكتاب كان عدوي اللدود

ما أحب الدراسه

بس أستانست..قزّرناها وناسه

و هم تخرجت ثلاث سنين و نص

والله لو أضمن روحي الحين ما أتنحر و أمل

جان سويت
double majour

و بيني و بينك ماقمت أتحمل
دكتور يوبخني

nanonano said...

why me:

أنتي أكيـــــــد

مو من جيلي

توّج صغيره

أنتي أقرب حق الجيل الجديد منّا أحنا

KQ8 said...

هالايام

الجامعات الخاصة فيها حركات الجامعات الامريكيه من تنظيم امور خارجه عن المألوف مثل اللي تفضلتي فيه او يسوون لهم حركات تخلي ايام الجامعه شي حلوو

حنا يالله من فضلك ترى وقتها ماعندنا شي يمكن بس مدرسة خليفه برمضان اذا تذكرين وغيره يا انتخابات الجامعه اللي فيها الهيصه وبس غيره ماكو شي بوتيتا

شوفي ايام الجامعه تونس بس لا اتيي ايام الفاينل والا الميدتيرمات انا هني يحوشني الصمرقع

nanonano said...

KQ8:

صـــــــاج

كان حدنا

مدرسة خليفه

لا و أول سنتين بس

عقب صارت أي كلام

تذكر أيام الأنتخابات

صج وناسه

وااي

ذكرتني بامتحانات الفاينل

ماكو أقمت

و لا الكورس الأول

لأن الأمتحانات تصير بالشتا

و تظلم الدنيا مبجّر

مش انا said...

ماقالوها من زمان
يا ريت الشباب يعود يوما :)

بس بالنهاية الشباب شباب القلب
مو العمر

توني طالع من مؤتمر يخطب فيه الشيخ أحمد بزيع الياسين

وقد اتى من العمر عتيا
ويسندونه شخصين

ولكن ماشاء الله تبارك الرحمن
شباب بروحه المرحه وشصيته الفريدة من نوعها

المهم انك استمتعتي بالرحلة وبلغينا اذا اكو رحلات من هالطقة خالنستانس احنا بعد :)

المجهووول

عاجـل said...

كأني حاس

لفيتي فينا خوش لفة بعدها طقيت الرصيف ووصلت عند

ودي حق ذاك العمر


كأني ديمن

حسافتج يا كويت said...

نانو؟؟


أنا هالجيل بكبرة مو عاجبني

إذا جيلي مو عاجبني اساسا

مابي ارد كلش
ابو اكبر وذنوبي تقل وأدش الجنة

وأعيش مع الحور

وأنتوا كيفكم ردوا يهال إن بغيتوا وكملوا المشوار

انا ودي اصير يد وعندي احفادي وعيالي واستانس واصرف ما ايمع

وربي راضي عني واموت على سيادتي وادش الجنة
وتبخرني ذيج الحورية وتقولي


أين أنت من زمان

nanonano said...

المجهوول :

عاد بو مجبل يمتاز بخفافة الدم و سرعة البديهه..الله يعطيه الصحه و العافيه

راح أبلغك اذا دريت مبجّر

لأن أنا شغلي كله حدّه قدّه

nanonano said...

عاجــل:

لا والله لما شفتهم شوقوني بس

و ذكروني بالذي مضى

chandal/danchal!! said...

تصدقين... طاح من لسانهم وصلة وهمه يعزموني عن طريق ال فيس\بوك... شقال مولتن كيك و شقال بازار و ارتزان... وانا مديها طنـــــــــــاش... عشان ما يضيق خلقي على زماني... اهو صج ما ناخذ زمانا وزمان غيرنا... بس يا ربي نفسي تهف عليهم... بروحي صايرة مراهقة... خليني صادة ابرك... احنا زمانا مركز سلطان البحر "تشي تشيز" و طبق الخير بالترفيهية لــــــــــــول... من السبت اساحل امي مساحل عشان اروح الأربعاء الترفيهية حق طبق الخير... واللي ما يطل في منتجاتهم!!! هاهاهاههاهاها طير وانا طير حق قبة الفضاء وااااااااااااييييي ابو الجراما!!! والله كنا صج "جرايم" بس ما اظن هالجيل حاشهم وناساتنا!!! والا الشاليهات والتلفلف بالشماغات والفروة ما ابين فينا شي مع البرد هاههاهاهاهاهاهاه... و صحارى سيتي بالربيع... نخلص من عرس هلتون النيل و دبجة حق سميراميس نلحق عل العرس الثاني!!!! واي يا نانو عورتي قلبي من الصبح!!! بس ايام الجامعة ما اذكرها بالخير... احنا اهل الخالدية قمات... طرق الآلة الحاسبة بالمخبة... يا زين الثانوي... يبيلها 10 سنين نطحس فيها

nanonano said...

حسافتج:

و من قال لك عاجبني أصلا

بس الأحساس أن ماكو مسئوليه

أهيه اللي غابطتهم عليها

تبي تصير شايب و يد

حق المحاتاة

ترا كل ما نكبر تزيد محاتاتنا

أنا قاعده أتكلم عن مثلا يدّتي

أول يدّتي تحاتي عيالها بس

و عقب قامت تحاتينا اللي أحنا أحفادها

و مسكينه الحين تحاتي أحفاد عيالها

يعني ماكو راحه

أنا أبي السن اللي ما فيه شي تحاتيه

بس ما يحصل

nanonano said...

chandal/danchal!! :

هاهاهاهاها

هاهاهاهاها

هاهاهاهاها

لا..كل اللي قلتيه مو عادي

والله العظيم أني اعرفج

من برنامج الربيع..خابرته واااااايد زين...واااااي..يا زين ذيج اللأيام

اصلا أنتي اللي عورتي قلبي الحين

والله صاجه..يا حلاة الكويت 86 و 87 أيام الشاليهات و عطلة الربيع

بس ترا أمس طافج
;))))

حسافتج يا كويت said...

نانو وجندل


بيكم يوم أتحسرون على هالايام
وبتقولون والله يا زين ايام حجاب وب تفخة


يا خوفي واللة انتحسر على هالايام

Unknown said...

my dear we still have it ....walla nmashalla people from our genaration are very hot

remeber my post about that subject ...

الدســتور said...

أنا أكبر منّج.....سنه

خلج واثقة وقوليلنا العمر
:))

تبين الصج خلج جذي وايد أحسن

ولا ترجعين للايام السابقة و نخسرج

nanonano said...

حسافتج:

ما را أيي هاليوم

لأن أحنا حجاب بو ما أدري شنو

ما يعني لنا شي

أحنا قاعدين نتذكر أيام حلوه..تعني لنا أشياء حلوه

chandal/danchal!! said...

الله يهداك مبيوق شفيــــــــــك كله تفوكر بالحور!!! خلها لكل حادث حديث... البنية قاعدة تتكلم عن ال carboot
على قولتهم... و فناتق هالبربس... وانت طرق السيادة والحور!! شكلك وايد مستانس على سيادتك!!... اكيد صوغة من محل المتحف اللي بمركز مكة لول

ارد حقج يا نانو... تصدقين اني مشبهه عليج!!

وانا هالجيل وايد عاجبني و مطير بوهتي... ودي اليوم قبل باجر اصير منه شكلا و مضمونا

nanonano said...

mosan mosan:

أدري ان نسبيا أشكالنا زينه

بس أنا قاعده قصدي

راحة البال اللي أهمه فيها

nanonano said...

abu eldestor:

و أحسن لي بعد

هاهاهاها

تخيّل

أرجع بروحي

لأ...أنا أبي جيلي كله يرجع بأمكانيات الحين

nanonano said...

chandal/danchal!!:

شفتي شلون!!!!!؟

حسافتج

حاط دوبه دوب السياده و حور العين

ماله سالفه الا حور العين

حسافتج

لاحق على حور العين

اللي يسمع يقول عمره مليون

أراهنج أصغر منّا


تصدقين أنا مو عاجبني

بس حدّه مطيّر بوهتي

واللي مطيّر بوهتي أكثر

أنتي

لأني ماني قادره اصيد منو أنتي

مع أن كل كلماتنا مشتركه

100 fils said...

مساء الخير

فعلا كانت ايام جميله..الله يهنيهم و يوفقهم..لان الزمن كل ماله و يصعب والحياة و مطالبها قاعده تتعقد..الشي الوحيد الي كنت ما احبه بأيام الدراسه اني اقعد احوس و ادور على مصفط السياره

;)

enter-q8 said...

يا ريت أقدر أعيدها كما كانت

إياك و اليأس

chandal/danchal!! said...

صاجة شكله اصغر.. ما رده بزر عقله مثل ما زر عقلي الحين... نطري عليه جم سنة بس

وانشاءالله ما اطير بوهتج ههاهاهاهاههاهاها خلينا جذي عايشين ال
(suspence)

اراكا لا تراني هاهاهاهاهاههاهاها ... انا سيارتي يوكن مقتمه هاهاهاهاهاهاها ترى قاعدة اخورة

nanonano said...

100 fils :

مساء الياسمين

ذكّرتني بحوسة المواقف

و طقّة الرصيف

و الجيران المنحس اللي يفششون التواير

nanonano said...

Enter-Q8:

ليت الشباب يعود يوما يا ابا الوليد

nanonano said...

chandal/danchal!!:

تشوفين شلون..على كبر..زرت عقولنا

MID AGE CIRSSES

ترا انا مستانسه على ال
suspence

وايد أونس

ولاّدة سابقاً ... رانيا السعد ...رانية المنيفي حسب الأوراق الرسمية said...

إلا ليت الشباب يعود يوماً
لأخبره بما فعل ال؟؟؟؟


المشيبُ تو الناس بس فيه أمور أخرى ...حطي الكلمة اللي تناسبك...عن نفسي حطيت أربع خمس كلمات وضبطت
:)

نهارك سعيد

mantovani said...

نانو مرحبا

اروع مرحلة في حياتي مرحلة الجامعه
و الوسط و العديلية

و الهيصة

و الله ما كنت ادرس و لا احضر
على الله و على نوتات الاصدقاء
و نوتات زميلتي , اللي من كثر
ما عجبتني نوتاتها

جان اتزوجها لووول


مانتوفاني

Love Moments said...

وانا اقرا الكومنتس حسيتكم وايد كبار!!!

بس احلى ايام ايام الجامعه اللي انا الحين فيها مابي اقول حررره اخاف تحقدون علي بس ترا موكلشي فيها حلوو

اكره شي فيها الدراسه :p
ولايحووشكم حش هالايام والتاليفات اللي مالها والي

صدقوني ما انصحكم تردونها هالايام لانها دوخت راس !!

عجبتني بوستاتج =)

Kaadi said...

لا تقلبين المواااااااااجع و عيد ميلادي سووووووووون لوووول !!


اي والله يا بختهم مشالله !! اوكي انا مو كبيرة بس صج ايامي الجامعة قمتة !! و كليت الكتب حسبالي صج !! ماسوت علي

lawyer said...

الله ياااااااااااااااااااني اكرهم
امهات التعش هذولااااااااااااا


احتر احتر منهم
يبطووووووون جبدي


و الا اذا ترزوووووزلج
ذلفاااااااااو بيوتكم درسوا شمقعدكم بالقهاوي

تصكون روسنااااا و تحطون كتبكم و تخزون يعني سكتوواا


انا ايااااااام الجامعه ظيم
بحولي الحقوووووووووق


مدارس عتييييجه
و دريه سنعه و دريه مكسووووووره و ندبق

واي تذكرييييييين ايام قبل
الكرسي كلااااا يسلت الجمووووم و الهدوم


واذا صار في الشتا موووووووت سحتني تصفقنا الدرايش






عاد الحين ايام امتحانات


يالله من فضلك الجامعات الخاصه الحييييييييين

حتى الجامعه ستاااااااااايل مو بس الناس الي فيهاااااااا

xxxxxxxx said...

انا وحده ما استمتعت بأيام الجامعه كنت من المحاضره لي البيت على طووووووول اللهم اول سنه بس اللي صعت فيها اشوي رفيجات و طلعات ووناسه

لاني تزوجت ثاني سنه جامعه ادري مينوووونه بس يالله الحمدالله على كل حال و يبت عيالي الاثنين بالجامعه عسى الله يخلليهم لي و يعطيهم طولت العمر ان شــــــــاءالله والحمد الله الحلو بالموضوع اني كنت مستقره نفسيا حزتها و قدرت اركز و اشد حيلي و أتخرج بأربع سنين و نص حالي حال العزابيات لا و يمكن احسن.. بس لو يرد فيني الزمن جان ........ ولا اقوووول ماني قايله .. أرد و اقول الحمدالله على كل حال

:)

@alhaidar said...

الا ليت الشباب يعود يوما ..

حسسيتنا عمرج 70 أخيتي .. شدعوة :)


عموما العمر كله انشالله وما بصير ناخذ جيلنا وجيل غيرنا ..

:)

Dahem said...
This comment has been removed by the author.
Dahem said...

انا عندي قناعه ان الجيل الحالي افضل من الجيل اللي قبله

ادري ان الفكره الشائعه تقول العكس بس بالمقارنه المنصفه والمجرده نلقى الجيل القديم ضعيف حيل جدام الجيل الحالي

مهم جدا نتجرد من مشاعرنا ومن اي حكم مسبق لما نحاول نقيم اي مرحلة


الموضوع لطيف بس احلى ما فيه عطلة نص السنه ومخيمات 1986

شي مو معقول البر كان ذاك الوقت

cozy said...

صبحج الله بالخير اييي والله ايام الجامعه كان شي ثاني طبعا أنا من الجيل الذهبي الداثر ههههه (العديليه) نان الدوام متعه وتطمش و لويت إتخابات و هذي منو و هذا منو ههههه و كل يوم سالفه يديده بس كان في براءه شحلوونه ههه وكان لهل متعه (لعيدليه) الكل إعرف بعض بس هم درست في أمريكا وهم كاني الدراسه لها متعتها جو غير جدول يريت ترد ذيج لايام على فكره لازلنا نطريها و نسأل عن من تزوج ووين إشتغلات ووين وصل فلان وفلانه بس إلاغلب وصلو مراكز ورفعو روسنا يازييينا من جيل بس ههه

nanonano said...

ولاّدة:

أهلا و سهلا

خو أنتي اصغر مني

كل كلمه راح تمشي معاج

;)

nanonano said...

mantovani:

هاهاهاهاها

خوش قصه حق عيالكم

تصدق..أنا نفس الشي كنت أسوي حق صديقتي..أعطيها نوتات..بس أهيه كانت لاهيه بالنوم..و لي الحين تقول حق عيالها لو ما نانونانو جان ما تخرجت و لا تزوجت أبوكم لي الحين

nanonano said...

violeta:

يا حليــــلج

تشوقين

لا...لا تضيقين خلقج على ولا شي بالدراسه

مردّج بالتخرجين

الحين أستانسي
أستانسي
أستانسي

لا تكررين غلطتي

تخرجت بثلاث سنين و نص يعني زين

بس الحين تحسفت ليش خذيت الأمور جديات بوقتنا

nanonano said...

Kaadi:

تصدقين لو بس أحد مفطنّه

و قايل لنا أستمتعوا

لأن هالأيام ما راح تتعوض

nanonano said...

lawyer:

أعتقد لو جامعاتنا قبل فيها نفس ال
facilities
اللي الحين موجوده بالخاصه

جان هذا ويهي نتخرج

ما أدري اذا لحقتي على كيفان و لا لأ

ضيـــــــم

أيينا قمّات منها

Unknown said...

يعني انا اذكر لما كنت بالجامعة
في اختلاط وكل شى ماشى حالها
بس ما كنا نوقف مع كل وحدة ونسولف اللهم اللى ويانا بشغل او انتخابات
الحين يبه صار الوضع وناسة
كل يوم مسج من التعش ايج والا منو دازلك مسج يقول الحبيب زميلتي بالكلاس

هذى الزمالة
اخيييه على الكراسي الصفر بالعديلية راحت الايام ولن تعوووووووووووووووووووووود

nanonano said...

x7aiatix:

أهوه الحمدالله على كل حـــــال

ما عليه

أنا أقولها عنّج

جان ما تزوّجت الا عقب الجامعه

و الصج هذا اللي أنا سويته

مو عشان شي

بس أعتقد أن البنت لما التخرج

تكون كبرت و احتكت..و تصير قرارتها أحكم

بس ما شاء الله عليج

شكلج كنت حكيمه و أنتي صغيره

nanonano said...

أحمد الحيدر:

صح كلامك

ما يصير ناخذ زمانا و زمان غيرنا

بس مشكله

لما يكون زمان غيرنا أونس من زمانا

يشوقني..أني أرد

nanonano said...

داهم القحطاني:

أنا قايله في موضوع سابق

أن اللي ما لحق على الكويت بال86

طـــــــافه

nanonano said...

cozy:

صج..صج كانت وناسه العديليه

و صح كلامك

وايد من جيلنا وصلوا مراكز

و في ناس ما كنت تتوقع أنهم يبدعون هالأبداع في حياتهم المهنيه من كثر ما كانوا فاشلين بالدراسه..هاهاهاها..مو قصدي أحد معين

أحلى شي بذاك الوقت أن كلنا نعرف بعض..ماكو شعور الغربه اللي أحنا فيه الحين

nanonano said...

Mishari:

هاهاهاهاها
هاهاهاهاها

صح زميلتي بالــــكلاس

حتى المسميات أختلفت

أحنا كنا نقول محاضره

و القويه القويه اللي توقف بالممر و تسولف مع شاب..مع أن كنا مختلط

ما ضرنا الأختلاط..بالعكس علمنا نحترم بعض أكثر

كويــتي لايــعه كبــده said...

الفكره هذه قريبة من "اليارد سيل" مال الامريكان وبيع اغراضهم القديمة بأي سعر بدال ما يقطونها

شلون ترهم مع الاغلبية الكويتية (اللي عنده واللي ما عنده) اللي كلما زاد سعر الشيء صار عندهم احلى الى درجة ان التجار فاهمينها ونفس المنتج ينباع بسعرين وتخلص كمية الغالي قبل الرخيص

اليارد سيل عرفناه (وسويناه :) ) بمكانه الأصلي

Sn3a said...

واللي انولدت ب 86 طافها مو

تدرين
انا الحين ان شاءالله اسمي خريجه
ماحس اني وايد استانست بالجامعه

بالعكس ودي اعيشها مره ثانيه
وودي اوسع اهتماماتي بشي غير الدراسه
لكن عقب مافات الفوت ماينفع الصوت


انا احب نشاطات الجامعات الخاصه
لكن ماحب اشوف النشاطات لان معظمهم قروب عباله اهو باورنج كاونتي وهلاقته ستايل

Hamad said...

الله لا يرد ايام الجامعة تغربلنا وتاذينا:)

فريج سعود said...

الله يرحم ايامنا

الوحدة كانت تاخذ لها كورس كورسين علما تحش حواجبها وتكشخ

هالايام البنية ياية جاهزة هيفا مقعدة

خلف الله علينا

nanonano said...

كويــتي لايــعه كبــده:

لا..هذا مو يارد سيل

مو بيع أشياء مستعمله

كذا واحد كانو عارضين كتب مستعمله..و اشياء جذي..بس البقيه كانوا أغلبهم يبيعون اشياء من ابتكاراتهم

يعني في شباب كانوا يبيعون تي شيرتات يرسمون عليها..على حسب الطلب

في بنات مسوين أنواع من الحلو..والله برافو عليهم..كل شغلهم لذيذ

يعني تشجيع مواهب شابه

nanonano said...

Sn3a:

آسفه عزيزتي العصر الذهبي طافج

بس ترا يمدي..ليش ما تكملين؟

لو أنا منج..جان أكمل

nanonano said...

Hamad:

الله يرد ذيج الأيام من غير دراسه

ودّك؟

nanonano said...

فريج سعود:

صح كلامك..ترا بالنسبه للبنات..صار الفرق واضح عن أول و الحين

Unknown said...

أيام الجامعة وناسة !! لا يبه لا يحوشج .. الدراسة بالخالدية مو مثل العديلية .. ياتنا أيام كنا ننام بالمختبر .. حلو .. صح ؟؟

الإنتخابات .. أملق .. أهلق .. أحلق << مالها شغل الأخيرة .. أذكر مرة -1995- حنّوا علّي الشباب -جذّاب آنا مشيشهم- نروح إنتخابات كيفان -جريب المغرب- يوم أعلنوا النتايج .. سقطت قائمة ما أتذكر أي وحده .. المهم .. صاحبنا طق الباترول ماله و حد الدوسة وطاف الإشارة وتوهّق باللي طلع بويهه وحك الرصيف ودش الشبّه .. بذمتي قواطي

لا بس أحلى شي .. يوم كنا نكشخ بـ باجة -المستقلة- على منظرة السيارة .. لووول

nanonano said...

ketchub:

ما يصير تقارن أصلا..لأن أنتو عيال الخالديه..مساكين..كنتو تكرفون كرف اليهد..فأكيد مو وناسه

ZooZ "3grbgr" said...

ههههههههه
ضحكتيني على انه نبهج انج هلقتي

لا والله اخذيها سهالات
عادي

المهم شريتيها ولا لأ؟

nanonano said...

ZooZ "3grbgr":

أيـــــــي

و لّبقت معاها شي بعد

بس رجع لنا البرد

ما قدرت أسكب فيها

 
template by Purplecious