Thursday, November 27, 2008

متفرقات ويكنديه

أول شي..خوش مقاله للدكتور ناجي الزيد
.
في جريدة القبس اليوم
.
تحت عنوان..هل هي زوبعه في فنجان؟
.
.
**********
.
الجو لما يصير مثل أمس و اليوم..ما أدري شنو يصير
.
فيني..هالجو له تأثير السحر علي..لو الدنيا كلها تنقلب
.
ما تأثر فيني..أصير بس أبي أقعد بالهواء الطلق
.
و الأستمتاع بالجو..و كل شي يصير عسل على قلبي
.
عموما أنا أموت على الشتا..و شتا الكويت له شعور ثاني
.
طعم المعدّس
.
أحساس الشماغ لما ألفه على رقبتي
.
جمال النار لما نشبها
.
.
**********
.
الحمدالله العلاقات ردت أستتبت مع الموظف
.
اللي معاي..و هالأسبوع ماكو و لا هوشه
.
المضحك بالموضوع أن هدّدني أن يسوي مدونه
.
أسمها يومياتي مع مديرتي المينونه
.
و على قولة زوجي..أنا متأكد أن كل يوم
.
راح يصير أكو قصّه يكتبها
.
بس و لا همّني..هددته بتقييم آخر السنه
.
يا جماعه ترا كل اللي أكتبه عن الموظف
.
اللي معاي..من باب
.
من حبّك..لاشاك
.
.
**********
.
ودّي اسوي حفله..حفلة طرب
.
يحييها فرقة التلفزيون و فرقة العميري
.
و سليمان العماري..يعني السالفه كلها سامريات
.
و أصوات .. و الحضور مقصور على الطرّيبه
.
و اللي يعرف يصفق
.
و الزي للرجال دشداشه و تشريمبه
.
و النساء دراريع قطن غير مسموح لأي
.
شكل من اشكال الزري..غير زري الثوب
.
و هم بالنسبه للنساء ممنوع التسريحات
.
يعني بصراحه اللي يبي يتسمّت..لا يجبل علي
.
و بعدين العشاء..ماكو الا قوزي..و مجبوس دجاج
.
و يريش..فقط لا غير..طبعا راح يكون أكو أنواع
.
المعابيج و الأجار و الدقوس
.
و على كتر طاوله عليها مطاطير الشاي و الحليب
.
و بقصم و درابيل و قرص العقيلي
.
و الحلو لقيمات و صب القفشه
.
بس اللي رادني أن الأجواء العامه هاليومين
.
ما تسمح
.
.
.
***********
.
المود هالأسبوع
.
أبو بكر سالم
.
قلبي قنع
.
.
عطله سعيده للجميع

54 comments:

Mok said...

:)
يو تو

ماعندي تعليق
:))

Anonymous said...

اللــــــــــــــــــــة

يا سلام على مزاجك

فعلا يبيله معدس

وسمرة حلوة وجويهة مخدرة

ونطلع بالبرد برة السمرة نشرب بيالة الحليب الحارة مع الجاي

ونسمع السمرة من بعيد ولا خلسنا بيالتنا ردينة



لا لا لا مو صج اللي قاعد يصير قاعد اتخيل الموقف صاير جدامي الحين حسبي الله على ابليسج

عسى امنياتج تصير يا رب وتستانسين بالشتاء الكويتي السنع واللي فعلا يونس


سلام







شوقتيني ابي معدس بقول حق زوجتي باجر يسون لي معدس

beezo said...

اولا اهنيج على بوبكر سالم خوش اختيار وبالتوفيقات
ثانيا اطالبج تسوين استبيان مقارنه بين المعدس والمربين
ثالثا ورابعا واهم شي اني انا مدون مو مدونه


وهابي عطله فور يو

nikon 8 said...

و النساء دراريع قطن غير مسموح لأي
.
شكل من اشكال الزري..غير زري الثوب


عيل مالنا إلا نقلد دراريع مسلسل الداية والدروازة
:)
إذا الأجواء العامة ما تسمح بالسامري ... سوي حفلة مالد عساها تنفرج
:)

enter-q8 said...

انا ما ابي اسمع ابي أكل

عاجـل said...

حياتي من غيرك سوشي

EXzombie said...

فيلجا الاسبوع الياي يوم اليمعة و لا تقولين لا، و انا علي الطباخ

في اعلان بحطه بالبلوغ بعد شوي و النية انه يصير فيه نمونة منه الاسبوع الياي بفيلجا

شوفيه و قولي لي رايج

و ليش محد ياب طاري الرهش؟

Bin3agul said...

ana a6lib eb tham bisht wibar 3ala zay il rijal natharan libroodat il jaw ! w ithbay7 3alay ..

Diver said...

اذا بين مروسة ترا احنا بالخدمة

الدســتور said...

لا
بالعكس تسمح

اصلا حتى هايف راح يتراجع عن الاستجواب
اذا سويتيها
:)

Ra-1 said...

LOL!
وإلي ما عندها ولا دارعة؟
:p

ترا الجو بالعبدلي حده شتوي
لا يطوفج !
Enjoy your weekend :)

Snow White said...

والله شوقتيني عاد اليوم غداي معدس مفيد وكله بروطينات لول :) أحنا حاطين خيمة في بيتنا وكل اشتا نقعد فيها ونحط الدوه والغواري شاي وقهوه وحليبه ونشوي كستنه وذره ونسوي باربيكيو بالحوش وحاطين شلال وفيه سمج بلطي هواية الوالد الله يحفظه تربية الأسماك والزراعه..أحلى شي الإتجاه نحو الطبيعة وكسر الروتين وتغيير الجو استمتعي بوقتك
:)

بنت الشاميه said...

احلى شيئ بالكويت الشتا اموووت عليه
واموت على البرد واختر من الناس اللى يلبسون هدوم وايد فيه
ليش...؟؟؟ انا شكو.؟؟؟؟؟...مادري
الله على فرقة التلفزيون صج فرقه ترد الروح......فنها فن راقي
والحين نبى اكل نباتي...؟؟؟؟؟
اكو وا لا مااااكو
مااااا عليه نقزرها شاي ودرابيل
لوووووووووووووول
بوست ممتع

xxxxxxxx said...
This comment has been removed by the author.
xxxxxxxx said...

loooooooooool 7addech shetweyyah 3ala hal akel, thakkarteni ebwa7da men erfeeeejati copy paste ehya ;D

honey said...

وييي أنا مو عاجبني الجو امس إمشتية من الصبح ما خلص الدوام إلا و انا إمبوخ من الحر
---
الحفلة أنا أول وحدة برتز
أبيه تسريحة لأ سبب عسارت نصف المجتمع
---
لو أوريج المود هالإسبوع محد ودة يقعد يمي مادري إشيايني

http://www.lyricist.com/kevin_rudolf_lyrics/let_it_rock_lyrics.html

لا تعليق إختي توها شاخلتني و قامت من الصالة من لغنية

nanonano said...

Mok:

أستمتع بالهجو..ترا العمر يخلص و السياسه ما تخلص

nanonano said...

حسافتج يا كويت :

مأكول العافيه..ثوّب لي عاد

nanonano said...

beezo:

خلاص عرفت..ما يحتاج تذكرني

أبوبكر مع لسعة برد يصير شي ثاني

طال عمرك المربين مع دقوس صبار طيب منو يعافه

nanonano said...

nikon 8 :

عليـــــــــــــج نور...وصلتي خير

نفانيف الدايه

ما أواطن التصرصر..و تكّة الكورسيه

المالد لازم نسويه بساحة العلم..جود الله و رحمته

nanonano said...

Enter-Q8 :

عاد كلش مو شكلك بطيني

nanonano said...

عاجــل:

أسمح لي عد سوشي بالبرد ما ينوكل

nanonano said...

EXzombie :

ويييييييييي

نسيت الرهشه..ما أدري شلون نسيتها

لا فيلجا حق الينانوه

nanonano said...

Bin3agul :

أنت تامر و أحنا نطامر

و فروات بعد

مشكور ما تقصّر

أنا أتشرف بوجودك

nanonano said...

Diver:

يا هلا بالمروايس كلها

nanonano said...

abu eldestor:

هاهاهاهاها

تهقى أييب هايف ضيف شرف؟

nanonano said...

Ra-1:

يمدي فصلي

يا زين العبدلي..أنا وقعت بغرامها

nanonano said...

Snow White :

الحين أنتي اللي شوقتيني على قعدتكم..عليكم بالعافيه

nanonano said...

بنت الشاميه:

عيل أنا كلش ما أيوز لج..لأني أموت على الكوت

و بعدين..أسوي لج يريش بالخضره..بيت أبوي يسوونه مسكّت

nanonano said...

x7aiatix :

بذمّتج في أحد يعاف هالأكل

و ذا صارت طبخة العيش خنينيه

بس على قولتهم

ما أيينا الموت

nanonano said...

shahad:

هذا مودج؟؟؟؟؟

مو منج..من التشتي مبجر

اجار الدين كشمش said...

السمره اللي تبينها

سامريات واصوات وبس هذي

انتهت من قاموووس الكويتين

تم استبدال وقت السمرات الي القهاوي شابات وشباب والبعض ادمن الاراجيل ..اخذوها دلع وصارت ادمان ولع

ثانيا الكل صار سياسي وفتح مدونه وقام ينضر بمجرد انه وقف في ساحة الاراده 5 دقايق

اي سمرات اي تبن

رااااااح الزمن الجميييل

فمالله

Gee™ said...

ياريت اذا عزمتي على الحفله تعزميني
وراح التزم بكل القوانين والله
;p

Fankooshy said...

اي والله يبيله جلسه اصوات....نبي العماري وخليفه ورويشد :)

7amee elDyar said...

فعلا مقالة مميزة

شكرا

Fahad Al Askr said...

قوزي على مجبوس دياي ويريش، ونلحفهم بشاي وحليب ونقمس بقصم ودرابيل ونلف قرص عقيلي، وتالي لقيمات وصب القفشه

أتوقع من الأنسب تسوين السمرة في بيت ديفا، علشان الأميري يكون كروس ذا ستريت

عثماني said...

حناحينو

المود عالي ما شاء الله

:)

سبحان الله .. امس قاعد اتشهى هالسوالف

طقطقة و مموش

مزاج

Miznah said...

أنا ما هزني إلا موضوع الطق

حق الشتا..
دراعه بازه
ثوب تور
شعر مفلول والفرق العدل


ethnic enough?

nanonano said...

اجار الدين كشمش:

في أمان الكريم

بس على فكره ما راح الزمان الجميل الا لما أحنا تقاعسنا عن أداء أدوارنا

و بعدين تراوالك..أن راح الزمان الجميل..لأن أحنا راح نرد هالزمان..لما نحط مخوخنا في روسنا..و نركز و نبذل مجهود..و ماكو شي يخلينا نتراجع عن اللي نبي نسويه..شوية أراده و مثابره

nanonano said...

Ghadoor :

أفا عليج يا غدّور من أول الناس أن شاء الله
و بعدين أنتي ما راح تحتاجين عزيمه
المكان مكانج عزيزتي

nanonano said...

Fankooshy :

رويشد..يا ريــــــــــــــــــت

بس الصج أذا أحياها رويشد أنا متأكده أنا عن نفسي ما راح أقدر أسيطر على روحي و بارقص..عقب شنو يفكنا من لجنة الظواهر و جريدة الراي..هاهاهاها
يحطون صور حفلتنا..و يصير استجواب..و ترد تتأزم الأمور..كل هذا عشان رويشد..تهقى يسوى الموضوع؟

nanonano said...

7amee elDyar :

أنا من المعجبات بالدكتور ناجي الزيد

أحس كتاباته مكتوبه من الأنسان الكويتي الحقيقي

أنت اللي شكرا على مرورك

nanonano said...

Fahad Al Askr:

أنا خابرتك أنسان ذوّيق..أشفيك أنشفحت..كل هذا بتاكله..غلط ..الناس الطبيعيين ياكلون وجبه رذيسيه و بعدين يحلون و اللي مو وايد يوعان يقدر يمارس هواية التغميس..بس مو ياكل هالدنيا كلها..ناوي على تلبّك؟

nanonano said...

عثماني:

أتشرّف أن نكون نفس المود

nanonano said...

Miznah :

more than enough dear

me like

Unknown said...

مدام تسمعين العماري عيل مزاجج صح

واشوة ما صار بحياتي الوظيفية فوقي اي مديرة الا وحدة وشقردية الله يذكرها بالخير وكانت AGM
اليوم انا لاعب بيدي وريولي لاني مدير :P
بس خوش مدير ما اطفر موظفيني

`~MnO YeNSa! ~` said...

الله على المود

خيالي

ما طرشتيلي بطاقة
راح البس دراعة بس
mY STYLE
لو اسلف
DO IT
:pP

nEo said...

قبستي على الجو طال عمرك ؟

Mr-Mohd said...

الجو عجيب وبارد
والوحيد اليوم انا مشتي في الدوام ..
مادري الناس شناطره ؟
الظاهر فلسوا ما عندهم فلوس يفصلون


تحياتي

nanonano said...

Mishari :

ترا أنا خوش مديره..بس لا أعصب

nanonano said...

`~MnO YeNSa! ~` :

خل تسانع الظروف حق الحفله و شوفي شلون ما توصل لج الدعوه
و لبسي اللي يريحج..المهم تكونين مرتاحه

nanonano said...

nEo:

اليوم متصاحبين..بلّشنا؟

nanonano said...

q8cool :

هاهاهاها

لا والله من الكسل..اليوم الشباب اللي معاي بالدوام توهم يتفرغون بيروحون يفصلون دشاديش

Hamad Alderbas said...

تمام

بس هم بعد لازم بالصيف وماكو مكيف بس بنكة ومهفات :)

 
template by Purplecious