Thursday, November 13, 2008

متفرقات ويكنديه

أسبوع ما يعلمش فيه الاّ ربنا
.
كملت لما يقرر قاضي محكمه أداريه
.
بأيقاف السوق...شكو؟؟؟!!!؟
.
لو ياي الأيقاف من لجنة الأنقاذ أو من
.
اللجنه الفنيه في البورصه..نفهم..ناس
.
مختصين و شافوا من مصلحة السوق
.
أن يتم أيقافه
.
بس الحين..اي أحد ممكن يرفع
.
قضيه يمكن يكسب؟
.
هذي سابقه خطيره
.
ميخالف أنت يا سوق و يا وزير التجاره
.
ما تدرون أن أكو محكمه اليوم
.
و ممكن هالمحكمه تحكم بأيقاف السوق
.
مو مسوين خطّه لهالأحتمال؟
.
بس خلاص
.
كيفهم..ديرتهم و أهم أبخص فيها
.
قلبي قام يعورني منهم
.
.
**********
.
وصلني هالمسج توّه
.
النائب مرزوق الغانم موجها حديثه
.
لوزيرة الأسكان
.
أنا ما أقدر اشكرج يا وزيرة الأسكان
.
الاّ للون الغلاف لبرنامج عمل الحكومه
.
و أنج أكبر منفذة قص و لزق برتبة
.
وزيره
.
تدرون ليش قال لها هالكلام
.
لأن وزارة الأسكان قدمت عرض
.
مدينة الحرير المقترح من
.
شركة التمدين العقاريه..كخطه
.
خمسيه للحكومه..يعني..الحبايب
.
خذوا عرض شركه عقاريه مقدم للحكومه
.
و سووا شوية تعديلات عليه
.
و قدموه على أساس أنه الخطه الخمسيه
.
والله عيب
.
.
**********
.
اليوم و أنا يايه الدوام و قمة العساره
.
بالزحمه بالطريق السريع و طبعا السير واقف
.
جدامي سياره فيها ولد عمره 4 سنين رايح المدرسه
.
الولد ويهه شيطان..بس فيه ملح مو عادي
.
و كل ساعه طال من الدريشه..كانه قاعد يشيّك على الزحمه
.
ألتفت علي و عطاني أبتسامه..و أشر بأيده باي باي
.
ما تتخيلون شلون تغير مزاجي..لما شفت أبتسامته البريئه
.
و سعادته لما رديت أشرت له..الله يحفظه لأهله
.
.
**********
.
هالأسبوع البايخ..ماكو شي قزّره علي
.
غير سي دي نوال..السي دي مينون
.
وايد يطلعك من مزاج طريقك مسدود
.
اللي سائد هاليومين
.
أنصحكم فيه..مع حبتين بندول
.
ما يصير الأحد..الاّ ما فيكم الاّ العافيه
.
.
**********
.
.
.
بما أني ناويه نيه قشره هالويكند
.
فالمود هالأسبوع
.
عبدالله رويشد
.
أش غايظ الناس
.
عطله سعيده للجميع

43 comments:

Zaydoun said...

اش غايظ الناس غير سهمي وسهمك

why me said...

heheheh

يما نيه قشره على الويك اند

;pp


اي سي دي نوال عجيييييييب

سمعته

والياهل حلاته والله .. يا حلو الكتاكيت



have a nice week end sweety

:)

nanonano said...

Zaydoun :

ما ظل بيها لا سهمي و لا سهمك

nanonano said...

why me :

أفا عليج..قشره واللي تبينه

مع شوية مطر..الله..أنا باشوف زوجي شلون بيقظبني

هاهاهاها

same to u dear
;)

ولاّدة سابقاً ... رانيا السعد ...رانية المنيفي حسب الأوراق الرسمية said...

في شيء في القانون اسمه استشكال على ذمة أهل الاختصاص..فكان المفروض مستر تيزاب يكون لديه خطة بديلة للاستشكال وإيقاف حكم المحكمة

لا يكون القاضي عنده أسهم والبنك يدق عليه كل شوي
:)

مدراء المحافظ شيسوون إلى يوم الأثنين...يبيعون قحافي وسبال مملح؟

نوال!!! فكرة
أحسن لي من سليمة مراد: الناس لو تسألني عنك شأرد اجاوبهم شأقول


أما عن مزاج إش غايظ الناس فعندك إياهم
وإذا شبعتي من رويشد ...حطي كايدة العزال أنا من يومي

وبالتوفيق

أبو جيج يدور نعاله said...

صايرة مليقة بس معلش


الله يسامح بو عمر عفس الديرة

Unknown said...

بلا بورصة
بلا مرزوق
بلا موضي

خلج على نوال

لانها تعدل المزاج
وبس
مالت عليهم

وهم والله العظيم توارد خواطر كاتب الموضوع قبل لا اشوف مدونتج :(

ونزلوا الرهش يا جماعة بس قام يصير برد بالليل

لالالالالالالاعت جبدي من السوق واشوة اني مجرد متفرج
وبالدوام متعامل غير مبااااشر
يعني الوضع حده وناسة

وسمعي ليه ساكت

forzaq8 said...

الحكومة ما تفوز بالمحكمة
هذي شغلة خالصين منها من زمان

من بركات الفتوي و التشريع

بعدين المفروض يفكون سهم الخليج خل يتدهور الي 100 فلس

ولا يطلع لي الغانم و يقول السعر العادل 950 و سهمة لو مو موقف كان وصل 10 فلوس

KQ8 said...

قلعتكم يا المضاربين هههههااايييي

اكلوها اتوقع بعد فتره كل موظفين وموظفات شركات الاستثمار بيتوزعون على وزاراة الشؤون او المواصلات...او الاسكان ومافيه برستيج لوووول

chatterbox said...

والله قوي الغانم لووووول

والبوم نوال حده لايق مع الجو هالايام

nanonano said...

ولاّدة :

شكرا على معلومة الأستشكال..نورتينا

يا ريت أحد يتبرع و ينور حكومتنا الرشيده
=======

مدراء المحافظ..بيصبغون بيض..و يحاولون يقررون شنو يبيعون قبل يوم الثلاثاء
=======

نوال ثم نوال ثم نوال..صدقيني
=======

هاهاهاهاها

الله يوفق الجميع عزيزتي

nanonano said...

bo jaij:

استحمل ملاقتي هاليومين الله يخليك
عشان الأيام الخوالي

بو عمر اللي عفس الديره؟؟؟؟!!؟

nanonano said...

mishari :

أنا تامه على نوال هالويكند

ترا حتى أنا ما عندي شي بالسوق بس اللي قاعد يصير بالسوق قاعد يحوشني الجاثح ماله

القلوب شواهد

ليه ساكت مسكته

nanonano said...

forzaq8 :

الفوضى اللي أحنا فيها ما لها أول ولا تالي

nanonano said...

krakatoa :

أشوه أني ضحكتك

بس على فكره ما عندي و لا فلس بالسوق

بس أنا مستائه من الأستهتار الحكومي اللي قاعد يصير
==========

و فالك ما قبلناه
========

موضوع البرستيج..شي مو مهم
========

على فكره وضعنا وايد أسوأ من الشماته

nanonano said...

chatterbox :

الصج..مرزوق طلع فيها

أخيرا تكلم عن شي غير الرياضه

honey said...

أنا المغنيين امعسريني البوماتهم هالستة فشل مو طبيعي الا مجيد نجح

حرام عليج على نوال

KQ8 said...

بضحك لأني مليت من التقلدم يمكن ورى هالضحك تنحل مشاكل الديره او على الاقل اشوفها بمنظور ثاني

جربي صدقيني راح يختلف عندج الوضع

ZooZ "3grbgr" said...

كل هذا عشان خذيت يوم اوف؟؟
وي عيل لما آخذ إجازه شيبي يصير

امس اقول حق امي شلون التموين
تقولي ماكو يديد
قلتلها لي خذيتوا وانتوا طالعين
سووا هوسه
الله يخلي باقر الله يطول عمره
لوووووووووول

طبعاً هوسه تعلمناها ايام الغزو كل اللي يطلعون بالتلفزيون العراقي ينطون ويغنون واهم رافعين ايدهم



واذا يوم بالاشاره شفتي وحده تدور يهال بالسيارات تسلم عليهم ترى هذي انا لوووووول





يالله هابي ويكند حياتي

الدســتور said...

مثل ماقلتي سي دي نوال
هون علينا
:)

بس على فكرة قانونا يجيز للمحكمة
النظر في وقف السوق في حال
تم الانهيار الغير طبيبعي
وتاصيره على البلد
حسب قانون المرافعات

enter-q8 said...

نانو
هذي بركات شعبوله على البورصه و الله تعويذه طلع و انا ما ادري عنه
***

الصراحة لما ياني المسج مال مرزوق استغربت لن مرزوق مو عادته هالطرح
بس اللحين اوضحت السالفه

بس شفتي علي الراشد امس
طلق التحالف
و يبي يلق الانتخابات بعد
اشفيه بو فيصل

Mok said...

نانو

لاعت جبودنا من الوضع لدرجة مالي خلق اكتب شيء

الله يعينج عزيزتي وما الومج

nanonano said...

shahad :

عبدالمجيد حلو..بس مع الوقت صار طحنه

و أنا الحين أبي شي مينون يطلعني من الكدر اللي أنا فيه

موليه مالت مشعل العروج..أغنيه مينونه..بس لا تسمعين كلماتها..أي شي

و مع الأوضاع الأي شي اللي أحنا فيها

ماشيه

nanonano said...

krakatoa:

خذيت بنصيحتك الليله..و تيمعنا شلة الجامعه دفعة ٢٠٠٤...هاهاهاها..الضحك اللي ضحكناه مو عادي..كله خرابيط و تخمبق..بس صج الصده زينه

nanonano said...

zooz "3grbgr":

أنا تهويستي شي ثاني..بس ما أقدر أكتبها حفاظا على مشاعر المدونين

أبشرج بلشت موضوع الهابي ويكند من الليله

يا زين ذكريات الجامعه

nanonano said...

abu eldestor:

أدري آن يجيز..بس تخيل لو ياي هالقرار من جهه مسئوله مثل اللجنه الفنيه..جان عطت ثقل حق القرار و تعطي ثقه لجميع المتداولين بلسوق من الصغار و الكبار..بس الفوضى اللي صارت اليوم أهيه اللي زاعجتني

nanonano said...

enter-q8:

علي الراشد أمس كسر خاطري..أنا شفت الأعاده اليوم..الريال لايعه جبده أشكره..حتى مو قادر يحسن صورة زملائه النواب من كثر ما أهمه ملوعين جبده

الله كريم

nanonano said...

mok :

أنا في قمة الأحباط

و من الحين باعلن أذا صار حل لمجلس الأمه
ما راح يهمني و لا أحد

لأن النواب صايرين ولا ابيزه
و خل يفججون شغلهم بروحهم

ديره جذي؟؟؟ ما فيها ريال يوقف و يقول بصريح العباره..أنتو غلط..كلهم عندهم أجندات خايفين عليها

والله عقب اللي صار أمس و الروح المعنويه الهابطه عند الكويتيين ما راح يهمهم أي شي يصير في مجلس الأمه..يصطفلوا..هذي سياستي الجديدة

أن شاء الله كلها ٣ سنين و أتقاعد..و أروح أشتري لي شقه ببيروت و أقعد هناك

و صلت مرحلة...بالطقّــــــــــاق بكل شي

. . . ساخر كويتي said...

ماقالوا ديرة بطيــــــخ
بس المشكلة اني احب البطيخ خخخ بس مو بطيخهم البطيخ الصجي
====
بس مسج مرزوق الغانم قوي
واشد على يده لأنه كشف تلاعبهم
====
البراءة دايما تغير الموود صح ؟ :)

====
تحياتي

nanonano said...

ساخر كويتي :

أهلا و سهلا

لا مو كفو يصيرون ديرة بطيخ

البطيخ وايد ألذ و يبرد على القلب

هذولا مغثه و يلوعون الجبد

Fankooshy said...

صح اهو المفروض قرار فني بدون نقاش
بس هم زين سووا خل نفتك من حنة بو 5الاف دينار....قطهم وقاعدي يبجي عليهم
اذانا وياه

الطفل البريئ المستانس
اكيد يداوم بمدرسة خاصه مو حكومية لول

شكرا على التميز

كويــتي لايــعه كبــده said...

هيك مجلس يطلع منه هيك تفاهة

---

الخطة الخمسية... صامت صامت وفطرت على بصله

الله يستر من اصرار الحكومة الفعلية على اختيار حكومات تنفيذية بهذا المستوى الهابط

---

have a good weekend
at least try
:)

Anonymous said...

32 تعليق
:)
تعليقي ماراح يكون مهم
بس مدونه حلوه
:)

100 fils said...

ما ادري ليش بس صارلي فتره تقريبا اسبوعين ترن اغنيه نانسي عجرم "شخبط شخابيط" في اذوني

أعتقد وضعي صار صعب لازم اروح الدكتووور

:)

nanonano said...

fankooshy :

أيـــــــــــــــــــــــــــام

مدارس الحكومه

غميضه عليها

nanonano said...

كويــتي لايــعه كبــده :

هاهاهاهاهاها

غيرت الصوره؟؟...هاهاها
لها الدرجه لايعه جبدك اللي حطيت برييه؟

أقول لك شي..ترا وضعنا الحالي حتى بيرييه ما يفيد يبيلنا حلتيت

nanonano said...

lonly kuwaiti :

حتى لو التعليق ال ١٠٠
راح يصير مهم عندي

حياك الله

nanonano said...

100 fils:

وايد صعب لأن خلصنا مرحلة لخبط لخابيط
و دخلنا في مرحلة
وريقه..ريقه..يا ريقه

فريج سعود said...

رحت الطب النفسي ما لقيت السي دي

nanonano said...

فريج سعود :

جربت دوار العظام؟

اقصوصه said...

ههههههههههههههه

عيبتني طريقك مسدود هاي

اليهال نعمه من الله

وايد يغيرون المزاج

ينسون الواحد همه

حلوه سالفة القص واللصق هاي

عنبو حتى الوزرا قاموا يسوونها

ما ينلامون عيل اعضاء المنتديات

خخخخخخخخخخخخ

JiBLa CiTY said...

مالج الا القز بالبر

:)

ولاّدة سابقاً ... رانيا السعد ...رانية المنيفي حسب الأوراق الرسمية said...

خلّص الويك أند


والإرسال لا يزال منقطع

 
template by Purplecious