Thursday, November 20, 2008

متفرقات ويكنديه

في مقوله كويتيه قديمه..باستعملها بس مع بعض التحوير
.
المقوله الأصليه تقول
.
آمن للحيه و العقرب..و لا تآمن للبدوي لي استعرب
.
تحويري
.
آمن للحيه و العقرب..و لا تآمن للبدوي و السيّد لي أستلحى
.
.
**********
.
أمس الصبح أنتابتني نوبة غضب
.
اللي انفجرت و عفست الدنيا
.
يعني الواحد ما يوصل الدوام الاّ طالعه روحه
.
و تشد أني نايمه منغثه من الوضع السياسي
.
و الأقتصادي بالبلد
.
فواصله نفسي بطرف خشمي
.
و أنا فيني طبع اذا وثقت في أحّد
.
و عطيته مسئوليه.. أتوقع أن هالشخص
.
يقوم بمسئوليته كامله..ليش ما صعدت المكتب
.
و اكتشفت أن هالموظّف..أخفق في أحدى المهام
.
الموكله أليه..مع موديل الأخفاقات اللي ساري في
.
البلد هاليومين
.
و خير اللهم أجعله خير
.
لي الحين ما أذكر شنو قلت
.
اللي حرني أن ردة فعله في منتهى اللامبالاة
.
و عادة لما أعصب جذي على أحّد أتحسف
.
هالمره لي الحين ما تحسّفت
.
.
**********
.
في نوعين من الزوجات
.
الزوجه السعلوه اللي على بالها
.
أذا صارت قويه راح تقدر تسيطر على زوجها
.
و الزوجه الحليوه التي تميل الى السذاجه اللي على
.
بالها أن أن زوجها أحسن رجل في العالم
.
النوع الأول بالنسبه لي تكسر خاطري
.
أكثر من النوع الثاني
.
لأن الثانيه ببساطه..مريحه ملايكتها
.
أما النوع الأول ..فتشتط..و تعابل..و تخطط
.
و بالنهايه هم ما راح تقدر على الريّال الكويتي
.
فنصيحتي للنوع الثاني..لا تضيعون صول شعابكم
.
لأنهم ما ينقضبون
.
لو ننقز
.
.
**********
.
وحده من صديقاتي قاعده تكمّل دراستها
.
في الجامعه الأمريكيه..فزميلاتها بالصف
.
كلّهم أمّهات الطعش سنه..مواليد الغزو
.
و كل يوم لازم تتحفني بقصّه من قصص
.
هاليهّالو..و مغامراتهم
.
المهم البارحه..عقب ما خلصنا العشا..صديقتي
.
هذي أشتهت آيسكريم 31..فأول ردّة فعل مني
.
لا يكون صدّقتي أن عمرج طعش سنه
.
أجسامنا ما قامت تحرق السعرات الحراريه
.
مثل قبل..ردّت علي و أهيه تضحك
.
تصدقين أن اليوم بالذات في الجامعه كانوا يسألون
.
عن نوعية الطعام المفضله عندنا
.
تقول أنا الوحيده اللي طلبت أكل دايت
.
و عموم الصف ما بقى ماكدونالدز..ما يبقى هارديز
.
أي ما يحاتون سكر و لا ضغط و لا كوليسترول مثلنا
.
القلوب بارده..عليهم بالعافيه
.
.
**********
.
.
.
المود هالأسبوع
.
عبدالله رويشد
.
من يدري
.
أحبابي اللي لهم داخل فؤادي محل
.
عطله سعيده للجميع

31 comments:

Eng_Q8 said...

بوستج معفوس مثل عقيسة الديره

والله لا اييب اليوم الي يحطني تحت مسؤوله مثلج :p

. . . ساخر كويتي said...

واحد عصير ليمون وصلحووو

ريلاكس هدي بالك
بما انك عايشة بديره بطيخ
فلازم يحوشك شوية بطيخ ههههههه

اسجل اعجابي بصديقتك اللي قاعدة تكمل دراستها في الأمريكية
عفارم عليها ماشاء الله تبارك الرحمن
وعساهاعلى القوة
وانصحها باكثار الرياضة للمقايش مع عيال التعش ههههههه

تحياتي

Mok said...

نونا


مو جنه حياتج مثل الاسهم او مع المؤشر السوق

امس شحلوح وحاطه بوست بعيد عن التشأؤم

نون النساء said...

الظاهر الرجل الكويتي
رجل زئبقي بحت

ولا جان ما صار هذا حال الديرة
وحال الحريم

:P

beezo said...

nano
شالدثره شالعفسه :)ودي اعلق ودي اقول شي بس خصبقتيني مادري من وين ادش على هاللويه اللي مسسويتها

المهم هابي عطله فور يالحلوه :)

beezo said...

وعلى طاري ابناء الطعش لاحظت فيهم شغله
:(مو لأننا اكبر منهم بس صج صج صج صج مو عن شي بس فيهم ملاقه زايده عن اللزوم

100 fils said...

المسؤليه شي جميل والي يعرف قدرها
اكيد يدري انها تعز من شأنه و تكبر معاه...انا عن نفسي (واعوذ بالله من كلمه انا) وايد دقيق وحريص بشغلي و ما ارضى الا ان الشغل يكون %150.. “always aim high”
وهذا متعبني بحياتي لان غالبيه الي حوالي
careless sloppy

بس مراح اصير مثلهم لاني ببساطه مااقدر و ادري ان هذه الاراده تتعب الي حوالي من الفوضويين
فلا تتحسفين ابدا


P.S now I feel guilty I had casper & gambini for dinner last night ;p

xxxxxxxx said...
This comment has been removed by the author.
xxxxxxxx said...

بارت 1- ما فهمت شي

بارت 2- ما تنلامييييييين عندج اياه لان أكره شي بالدنيا اللامبالاه و خصوصا بالشغل

بارت3- و الله يعجبني تفكيرج 10على 10.. أستانس على تفكيرج عشان جذي أحب أقرأ مواضيعج صج اني ما عللقت و لا مره بس أستانس على مواضيعيج.. بالضبط انا معاج بهالنقطه نصيحتي حق المتزوجات طنشي و خللج كوووووول صدقيني انتي ابترتاحين

بارت4- لووووووووووووول الكبر شين يا أختي

بارت5- لا انا هالاسبوع راح يكون نوال ....عطله سعيده

nanonano said...

Eng_Q8 :

والله العظيم أني بالضبط مثل حالة بوستي..معفوسه حدّي
ماني قادره أركز و متدودهه
====

أصلا..أصلا ما يحصل لك مسئوله مثلي
;))))

nanonano said...

. . . ساخر كويتي:

المشكله أني عندي حساسيه من البطيخ..عشان جذي معتفسه
=======

والله كلنا معجبين بأرادتها..و قاعدين نشجعها

بس لو تسوي رياضه من الحين لي باجر منو يعبر على حيوية عيال التعش بذمتك

أيــــــــــــــام
=======

و تحياتي لك

nanonano said...

Mok :

أنا مو متشائمه كلش
أنا متدودهه حدي

و بعدين لا تنسى مزاجية الميزان تلعب دور

nanonano said...

نون النساء:

حدّه زئبقي..و مينونه اللي تحط دوبها و دوب زوجها

nanonano said...

beezo:

صح كلامج..أنا في قمة العفسه
ماني عارفه أركز

same to u dear :)

nanonano said...

beezo :

هاهاهاهاهاهاها

أنا خفت أقول أنهم مالقين..خفت أتهم بالغيره

حدهم مالقـيــــــــــن

و لا أذا بققوا عيونهم و طالعوج و قالوا لج
أمبيـــــــــــــــــه

nanonano said...

100 fils :

تصدق أنا عندي مشكله مع الجيل الجديد..الشعور بالمسئوليه منعدم عندهم

و عموما الرجل الكويتي يفتقر الى الشعور بالمسئوليه

و عشان أوضح لك وجهة نظري هذي يبي لي بوست كامل
راح أخشها حق وقت ثاني
======
و بالنسبه لعشاك البارحه
أخذ راحتك لي سن ٣٥ يعني عندك ٣ سنين بعد..وعقبها لازم تبتدي تنتبه..نصيحه

nanonano said...

xx7aiatixx :

بارت 1-مو مهم..لا أتعبين روحج

بارت 2- ويـــه لا توصين حريص..مع أني أكره أسلوب التوبيخ هذا..بس في ناس..يضطرونج لاستخدامه

بارت3- شكرا جزيلا..أصلا أنا اللي أتشرف بمرورج علي
أنا شخصيا هذا أسلوبي..التطنيش..الشي أذا ياز لي بلغته استحساني..و اللي ما يوز لي..جني ما شفت و لا سمعت شي..و لا أعور راسي..لأن ماكو ريال راح يعترف أن غلطان

بارت4- يا ريت يت على الكبر بس..التبلتع اللي في الجيل الجديد و أحنا فينا دثوريه مقارنة فيهم..هذا اللي يضيق الخلق

بارت5- نوال أستهلكتها طول الأسبوع..الويكند مزاج رويشد
و عطله سعيده و فرصه سعيده

beezo said...

قصدج صح كلامك مو كلامج


:(

Anonymous said...

أجسامكم مافيها إلا العافية

بس تحركوا امشوا

ولا اقولج المحاتات تحرق

حاتوا حاتونا لا طلعنا
وحاتونا لا ردينا

وحاتونا لا تأخرنا

المحاتات تضعف




بوستج عسل

100 fils said...

مشكووره على النصيحه وراح احتفظ
فيها ان شاء الله

وبانتظار البوست القادم لأني للامانه ادمنت عليهم

Wishing you a great weekend and to all my fellow readers.

:)

الدســتور said...

مو منج
من الحرة اللي فيج
:)

اقول سمعي نوال احسن

honey said...

أنا دوامي متأخر فأمزج بالطريج و الحياة حلوة

كوني له أما يكون ك عبدا

مو كوني نسرة و كل ما حاول اصلح الوضع اتكسرة


المود ملخبط بالأغاني
فجأة نوال انت و الا الموت

وفجأة حبك نار عبدالحليم
" ببعتلك بعنية جواب مش لوم يا حبيبي و لا عتاب مش اكتر من كلمة أه يا حبيبي بحبك"

عاد رياييل لكويت بالضبط هذي طريقة كلامهم

nanonano said...

beezo :

هاهاهاهاهاهاها

عشان تعرف شلون مفتره خرايط راسي

لأني أدري أنك مدوّن

و بعدين اللي لاحظته أن بس أنتو يا الرياييل اللي تحلطمتوا على عفيسة موضوع اليوم
لأنكم كلش مو
multi tasking
التدوده عندكم على طريف

nanonano said...

حسافتج يا كويت:

شكرا جزيلا على الفكره ..بس لي الحين ما ينّيت عشان أحاتيكم..لأن محاتاتكم ما تييب الا الشقا و الضغط و السكر

خلنا نعابل بنفسنا بطرقنا الخاصه

nanonano said...

100 fils :

حاضرين..و أي مشكله تواجهك..أنا موجوده

هاهاهاهاهاها

وعد مني أوديك ورا الشمس أذا خذيت بنصايحي
====

بس عموما شكرا جزيلا على الأطراء
و قاعد تعطيني أكبر من حجمي

nanonano said...

abu eldestor :

أي والله من الحره
و هالأسبوع صارت لي سالفه خاصه بعد فوق البيعه
من كثر ما حاولت أني أمتصها و ما تأثر علي
أنفجرت

الله كريم
=====

وييييييييييييييي
اليوم مو بس سمعت نوال
حتى رقص رقصنا عليها

خبرك قاعده أتليّق حق الحل
======

سؤال شنو أكثر أغنيه أعجبتك في نوال؟

nanonano said...

shahad :

لا أما و لا أبا
كل واحد يكون شخصيته الحقيقيه
من غير موديلات

هاهاهاهاهاها
وايد يازت لي الريال الكويتي و شلون طريقة كلامهم

السؤال أهمه يتحشون أصلا؟؟
بس يخزّون

Gee™ said...

صح لسانج على هالتحوير

ومحد يلومج على هالاعصاب والنفسيه والله
شي اييب الغلقه :\


خلينا على رويشد بس
;p

nanonano said...

Ghadoor :

أبشرج النفسيه تغيرت..ترا الرقص يغير المزاج و هذا اللي سويته البارحه أنا و يا البنات..منها تغيير نفسيه و منها حرق السعرات الحراريه عقب العشا

ما عليه بو خالد
يطرب

ولاّدة سابقاً ... رانيا السعد ...رانية المنيفي حسب الأوراق الرسمية said...

تحدثني صديقة إن لخا صديقة سورية تقول
أستغرب حين أرى الكويتيات ينتفضن إذا اتصل الزوج على الموبايل ويتعثرن بخطواتهن في طريق العودة للمنزل لأن الزوج وصل

حسب كلامها..الكويتي سهل...ما شفتوا السوري


والله اعلم

nanonano said...

ولاّدة:

لأنها ما تدري أن الكويتي حليو لأي أنثى الاّ زوجته

 
template by Purplecious