Monday, November 10, 2008

الدقره

أبيخ شعور بالدنيا الدقره
.
يكون الواحد أو الوحده مشتطين
.
و على بالهم يايبين اليهده
.
و بعدين يندقر
.
المشكله أن أحنا في مجتمع لعبته التّدقر
.
سواء على الصعيد العائلي أو الأجتماعي أو المهني
.
من النادر تسمع كلمه حلوه في
.
مقابل أي عمل الواحد يسويه
.
و بالنهايه مع كثر التّدقر صرنا كلنا
.
مثل سعد في مسلسل درب الزلق عقب
.
ما طاح فيه الخال تدقر
.
الويه أشطوله..و الشعر يعد
.
.
شعب مدقور

55 comments:

Shurouq said...

اي والله.. آنا البارحة اندقرت، وعلى مراحل

Diver said...

صح كلامج
و هذا التدقر صاير مثل الجدار العازل الصهيوني حق الابداع

وشفي اذا احد كاتب شي و لا راسم و لا مصور العايلة و الربع و المدرسة كلهم يدقرونة و هالتصرفات تحط حدود للابداع و تقتل تطور المجتمع

100 fils said...

صباح الخير

صارلي اربعه اشهر و انا مندقر بس دقره التداول بسوق الكويت للاوراق الماليه خلتني اتربع على "عرش التدقر" بجداره

:)

ملاحـظـة said...

الواحد صار طبانه من كثر التدقر
و الويهه صار عريض
:)

enter-q8 said...

قتل الطموح اهو التدقر
لكن ليش ما نخليه دافع
كل ما تندقر
عاند و اثبت انك تخليه دافع لك
علشان تكمل هدفك اللي تم تحطيمه
ما ادري ليش التدقر
باي شي
و على اي شي
بالعكس
لا يمكن يكون الشي اللي قام فيه احد او اجتهد فيه مو زين حتى لو كان كذلك اكيد واكيد مره ثانية
انه فيه شي ايجابي او زين
أنميه و اوجهه
و فوق هذا صحيح شغلة التدقر موجوده و خصوصا عند المبدعين اللي بمجتمعنا
و لهالجيل بالذات

ولاّدة سابقاً ... رانيا السعد ...رانية المنيفي حسب الأوراق الرسمية said...

نانو من الفراغة بحثت عن أصل كلمة دقر في اللغة العربية

دقر الدَقاريرُ: الدَواهي، الواحدة دِقْرارَةٌ. يقال: فلان يفتري الدَقاريرَ، أي الأَكاذيبَ والفُحْشَ.
ورجل دِقْرارَةٌ، أي نمّامٌ. والدِقْرارُ والدِقْرارَةُ: التُبَّانُ.


سلامتك من التدقر وعساه فال عدواني أقصد عدوانك

mtfa2el said...

المشكلة مجتمعنا صار صعب عليه الكلمة الحلوة

nanonano said...

Shurouq :

هاهاهاها

JOIN THE GROUP DEAR

الدســتور said...

مو شي يديد علينا
وشكلج اليوم مندقرة عدل

:)

بعدين تعالي ليش قاطعة لايكون زعلانه
ترى مادقرتج

nanonano said...

Diver :

عاد هالديره لا يحسون فيك موهبه
مالك أمل ينمونها
يطقونك على راسك لما يزهدونك

nanonano said...

100 fils :

كل شي كوم و دقرة السوق كوم ثاني

أصلا يبي لنا جلسات نفسيه عشان نقدر نتخلص من دقرة السوق

nanonano said...

ملاحـظـة :

أنا ويهي صار أشطوله من التدقر

nanonano said...

Enter-Q8:

لأن بالنهايه تعتمد على كل واحد وقدرته على التحمل و قدرته على الصمود

وايد ناس يخرّون و يخضعون

nanonano said...

ولاّدة :

الله يسلمج..عدويني و عدوينج..كاهم ما صار لهم شي..قاعدين يتنبزون على أبهاماتهم

nanonano said...

mtfa2el :

المشكله محّد يبدّي الكلمه الحلوه

لأ و أذا مدحو..بوسط الجمله قالوا لك
بـــــس

nanonano said...

abu eldestor :

لا والله الجلد تمسح من كثر التدقر

مو قاطعه
عاد كل شي و لا أنت

كويــتي لايــعه كبــده said...

يمدينا تعودنا

والعنيد ياخذ التدقر زيادة حافز

وأخوك أبو العناد

:)

what does not kill you only makes you stronger

nanonano said...

كويــتي لايــعه كبــده :

كثر الدق يفج اللحام

Unknown said...

nano
المشكله إنه إحنا إنتضايق لما أحد يدقرنا أعقبها إحنا إلي إندقر الأوادم !!

أبو جيج يدور نعاله said...

باجر عيد

و بالعيد إنغنى نشيد

الدقره هى من مميزات الحياة بالكويت


إللى ما يندقر كل يوم ...تسقط جنسيته بشكل تلقائى و قبل لا يطالب المليفى


إندقرنا بأعضاء مجلس الأمة إللى صوتنا لهم

إندقرنا بفيلم جيمس بوند اليديد

إندقرنا كلبونا علشان ما إنعزمنا لحفلة هالوين...بمزرعة دويلة



أنا إندقرت شخصيا من مسألة وقف الديريفتفز...الحين ما أدرى شلون أقضى وقت فراغى بين ممارسة اليوغا باليخت...و تفتيت البخور الكمبودى بهاون ذهب

الدقره هى قرصة من الحياة...قرصة إتصحينا من أحلامنا الوردية و التفاؤل لحد الثمالة

nanonano said...

احمد سالم :

صح..لأن سلوك مكتسب

nanonano said...

Bo Jaij :

و المفتاح عند الحداد

و الحداد يبي فلوس

و الفلوس عند العروس


بوجيج..قرصه قرصتين ثلاث..بس قزّرناها قرصات..و أي حياة تفاؤل أحنا عايشين فيها؟!!؟ طراق ورا طراق..لما صرنا بالنهايه ما ندري من طقّاقنا

Yang said...

انا اؤيد كلام اخوي Enter-Q8

ل للتدقر
لا
لا
لا وشكرا

أبو جيج يدور نعاله said...

و العروس تبى بخور

و البخور عند الوزير

و الوزير يبى مايباخ

و المايباخ بإيد الله

لا يلاه إلا الله


و دميثير توه إستقال

من المجلس

nanonano said...

Yang:

أهلا و سهلا

أتفق و أنا بعد أتفق مع زميلنا
Enter-Q8

النقطه لي متى تقدر تستحمل؟؟

أنا أمس كان آخر يوم
اليوم رفعت الرايه البيضاء للتدقر

nanonano said...

Bo Jaij :

هاهاهاهاها
هاهاهاهاها
هاهاهاهاها

جمّد الأستقاله

عاجـل said...

عرفت معناها ايام المراهقة

nanonano said...

عاجــل :

هاهاهاها
بما أنك شاب كويتي..فأكيد راح تعرف معناها بأيام المراهقه

honey said...

واي ايــــــــــــه صاجة صاجة

وصلت مرحلة لا تقولونلي شكرا بس لا تدقروني

Hamad Alderbas said...

تيكت ايزي

تصير باحسن العايلات

خليج رياضية :)

Fahad Al Askr said...

أنا من كثر ما ندقرت تعودت، وإذا ما اندقرت أتعسر

Funny Q8i said...

مو احنا شعب ماخذ دكتوراه بالتدقر

فعادي الواحد يمارس التدقر

بما انه صار شي طبيعي

انا ليلحين ما خذيت الدكتوراه

بس يبيلي دقرتين واخذها

Tوتحيّا

بنت الشاميه said...

من كثر التدقر فينا
صارت عندنا حصانه تدقريه
اصلا قمت ما انفعل من كثرة التقر
صرت اعتبره نجاح و مدح
انصج لا تنفعلين لما يدقرونج
عااااااادي

NewQ8 Bride said...

وييييييه شكثر اندقرت

بس الصراحة انا استاهل لأني اشتطاط على غير سنع

بعدين تعودت

why me said...

حتى اذا عندنا طموح دقرونا

:(




==

بلوقج عجيييييييب
:)

Anonymous said...

وأعظم دقرة لمن ديرتج تدقرج !!!

nanonano said...

shahad:

أنا أقول لج شكرا

بس الله لا أيحيجنا لهم

nanonano said...

حـمد :

أنا مو قاعده أتكلم عن نفسي..أنا أتكلم عن وضع عام

لو علي أنا خلاص تمسحت

nanonano said...

fahad al askr :

هاهاهاهاها

كلنا قمنا نستنكر و نستاحش أذا أحد قالنا شكرا

و ترا هذا شي مزعج

nanonano said...

funny q8i :

عقبال ما تصير برفيسور أن شاء الله

nanonano said...

بنت الشاميه:

مابي يصير عادي

حقي و بسني أعتقد أقدر أتخطى موضوع الدقره

بس ما ودّي الجيل الجديد يندقر

nanonano said...

new bride :

الزين بالموضوع أنج اكتشفتي أن عندج مشكله

بس صدقيني أن حتى لما تطخين راح يدورون شي يدقرونج فيه

nanonano said...

why me :

أنا مو مدح في نفسي..الشي الوحيد اللي ما قدروا يدقروني فيه..أهوه مجال العمل

وايد حاولو يكسرون مياديفي

بس الحمدالله عدّيت

بس بالأشياء الثانيه

على كيف كيفج التدقر



شكرا جزيلا عزيزتي

nanonano said...

حسافتج يا كويت:

لا أنألّب المواجع الله يخليك

الدقره اللي تعوّر

ZooZ "3grbgr" said...

انا فيني دقرة
بدقر احد
هل من مندقر يريد الاندقار

قوليها عشر مرات ما تفهمين شي بعدها
ههههههه

Mok said...

ما عاااش اللي يدقرج


اندقرت شكثر بس الحين اللي بيدقرني يتحمل توابعها
:P

nanonano said...

ZooZ "3grbgr" :

فيج دقره؟... طلعيها
لا أيردج الا لسانج

nanonano said...

Mok :

لأ عاش

و أنا مو موديلي أني أرد

خلاص تنرفع الجامه و كأن مو موجود

التجاهـــل

chatterbox said...

احلى شي لما تندقرين من صباح الله خير

نقعدين تدقرين بالعالم علبو تطلعين حرتج

جنه لعبة تلفون خربان كل واحد يندقر يدقر اللي يمه :)

nanonano said...

chatterbox :

هاهاهاهاهاها
هاهاهاهاهاها

صــــــح

Fankooshy said...

ياكثرهم اللي يدقرون ويحبطون عندنااا
احنا شطار بشيين التدقر والشماته:)

why me said...

cool


تعجبني شخصيتج

انا اسجل اعجابي فيج

ومنكم نستفيد

:)

nanonano said...

fankooshy :

وااااااااي يا الشماته

لا تغلط...ما تدري منو طقّاقك

nanonano said...

why me :

شكـــــــــــرا جزيــــــــــلا

أخجلتم تواضعي
:$

Bin3agul said...

matshoofin il sha3b kila g9aar .. mo minhum tara men il tgeer !!! :P

 
template by Purplecious