Thursday, November 06, 2008

متفرقات ويكنديه

على موضوع سحب الجناسي
.
أعتقد من باب أولى
.
سحب جناسي اللي عندهم
.
جواز أمريكي
.
أو جواز بريطاني
.
أو تابعيه سعوديه
.
هذي فيها مخالفه حقيقيه للقانون
.
و لا حتى موضوع سحب الجناسي
.
فيها ناس و ناس
.
.
**********
.
البارحه وايد أنصدمت في النائب
.
مرزوق الغانم في مقابلته على سكوب
.
كلّش ما كان متمكن..ما أدري بس توقعته
.
راح يقدر يسيطر على الحوار أحسن من جذي
.
يمكن لأن أنا أول مره أشوف له مقابله
.
أو أنه مو متعود على محاورين من نوعية
.
محاورين سكوب
.
يمكن متعود على أن كل شي
.
يكون بالقلم و المسطره
.
.
**********
.
الحلم الأمريكي تحقق
.
باراك أوباما
.
صار رئيس الولايات المتحده
.
قعدت أفكر أحنا ككويتيين شنو حلمنا؟
.
ما قدرت أعرف ولا أخمن
.
.
**********
.
الجو من حلاته قام يستفزني
.
من 3 ايام و كل يوم يحلو الجو
.
و انا قاعده بالدوام محرومه حتى من هواء نقي
.
لما سألت واحد من الشباب بالدوام
.
تهقى ليش مو مخلين الدرايش أتبطل عندنا بالدوام؟
.
أجابته كانت..نظرا لطبيعة عملنا
.
خافوا علينا لا أنبطل الدرايش و نطب
.
.
**********
.
ياني قبل يومين زميل لي بالعمل
.
ميت من الضحك..يقول لي لا أيطوفج
.
و يوريني ورقه..كان مكتوب عليها
.
اسمح لي على جرئتي بس بصراحه
.
عجبتني و أتمنى أسمع صوتك
.
ورقم تليفونها
.
البنات قاموا يرقمون؟؟؟!!!؟؟
.
هذي أول ردة فعل عندي
.
طلعت الأخت شايفته عند الفرع و عاجبها
.
جان ترقمه..أهم شي..أسمح لي؟
.
خو أنتي حطيتي الورقه ما نطرتي
.
و بعدين من متى صار عادي البنات يرقمون؟
.
أحنا على وقتنا حدنا..حدنا..نتخازز
.
هاهاها..آخر الفيلم..طلعت جني محتره من
.
يراعتهم..و قواة عينهم..بس
.
والله مو هذا قصدى
.
لأي درجه صار كلشي عادي؟
.
.
**********
.
.
.
المود هالأسبوع
.
ورده
.
لأن في أجماع أن جو حب
.
العيون السود
.
عطله سعيده للجميع

30 comments:

nanonano said...

Diver:

شكرا على التعليق..بس بيني و بينك أبو بكر يبيله..شويه أبرد الجو..و دوّه..وشاي فحم

nEo said...

LOOOOOOOOOOOOOOOOOL

Diver said...

الظاهر الزميل مزيون

الله يهنيه

بس قوليله الي ترقمق انحش عنها ترى ما يندره يمكن ليدي بوي و لا شي ثاني ترى هليام في اجناس احنا ما لحقنا عليها

Fahad Al Askr said...

لو يت على الترقم هينة، وبعدين شنو هالهلاقة، الحين الناس بلوتوث

والسر عندج بالأمان، ترى بنات هاليومين يخرعون، مينني وعليهم يراعة تخرع، سأليني ياما تلجمت منهم، وصار عادي الواحد تعزمه وحدة على قعدة بشقتها

وين تصير بالعالم بنات عندهم شقق، والشباب قاضبين دور بالإسكان ناطرين بيوت، وين قاعدين إحنا

وماني زايد بالحجي علشان لا أخوره

وبعدين ليش تقطون روحكم، خير وين قاعدين باليابان، خو إحنا أطول برج عندنا برج التحرير، شنو نقلتي المواصلات، إلا تدوامين بالأبراج؟

أنا ما أحب ورده مزاجي ترقص حافية القدمين

ولاّدة سابقاً ... رانيا السعد ...رانية المنيفي حسب الأوراق الرسمية said...

نانو لا تنسين الجواز الكندي


....................

إياكِ واليأس من مرزوق
يعني لازم تحرجين الرجّال وتخلينه يقول لك إن كل خطاباته العرمرمية مكتوبة ومتدرب عليها مئة مرة

...................

الحلم الكويتي غنته سعاد عبدالله في اوبريت مداعبات قبل الزواج

أبي فيلا على طلبي
قسم غربي وقسم عربي
وأبي سيارة ويا صبي
وابي أتعلمني كم باليوم ربحك كاش

:)

......................

درايش مع وضع السوق يعني تحريض على الانتحار...أكيد عدم وجود درايش شرط وضعته شركة التأمين لتقبل التأمين عليكم

.........................

وردة
الله
أنت عارف ما انت عارف أد أيه كتيرة وجميلة العيون السود في بلدنا

سؤال ويكندي: أحد من النواب عيونه حلوة؟!

nanonano said...

neo :

هاهاهاهاهاها

أنت شاهد
و عارف الفريج

nanonano said...

diver :

لا والله عادي..بس الظاهر فيه شي يجذب

ويـــــــه على بالك نطرني؟؟؟
حاجاها

nanonano said...

fahad al askr :

أنا آسفه ما أعرف آخر وسائل المغازل
أنا الحين يالله ولبي أحاتي اللي ممكن يسموني خالتي

بس قلت لك راحت علينا

شنو الطيحه من الدور التاسع ما تموّت؟
لازم من دور مليون عشان نموت؟
و بعدين ليش تبي تساعد في طبتنا؟
قاعد تسوي مؤامره علي؟
قاعد تحاول تنسق لاغتيالي؟

nanonano said...
This comment has been removed by the author.
الدســتور said...

اييييه البوست اليوم كبير ويبيله رد كبير بعد
شوفي
بالنسبة لمرزوق الغانم
فأنا بالعكس اشوفه ابدع وجاوب بكل منطقية ومهنية ولم يكابر وعطانا الزبدة بأن اندية التكتل اكبر من حكومة ومجلس ومشروع تعديل القوانين بالطريق ولا مفر عنه

ثانيا المحاورين الفضلي وسئ الذكر بداح حاصلين على شهادة الايزو بالبذاءة وعدم الاحترام للضيوف
ف مرزوق احترم نفسه وحاول ان يمسك نفسه
وعلى العموم في الكثير من الخبايا حاول المحاورين ان يخرجوها من مرزوق لكنه فضل ان تخرج عبر لجنة التحقيق التي ستشكل انشاءالله
:)

nanonano said...

ولادة:


عمر قوقه غير..بند خدمات جليله..لو ياخذ ٥ جوازات ثانيه ما راح تنسحب منه الجنسيه..خربطوا أو تقلفطو على بالهم جلوبل أهيه الكويت..جان يقررون أن الأعمال الجليله اللي سواها حق جلوبل تعتبر أعمال جليله حق الكويت
+++++++++

ما بي أحرجه..بس يا ريت ينتبه لها النقطه أذا صج طموحه أن يوصل للرئاسه
+++++++++

شكرا لخصتي الحلم الكويتي
فلوس
بيوت
سيارات
عماله منزليه

هو أحنا عندنا كل هذا من زمان
عيل أحنا متحقق حلمنا
صج ما عندي سالفه
و قعدت أفكر بعد
كله أنسى أن أحنا دوله عظمى
++++++++

سكتي مع وضع السوق زين ما نقط روحنا على السيارات
++++++++

العيون السود تذكرني بالعديليه
و دخلت الشتا
++++++++

أرد على سؤالج بسؤال
أشمعنى؟

nanonano said...

abu eldestor :

كلامك كله صح..بس أنا توقعته أحسن من جذي

Mok said...

طبعا على ورقه وقلم توج تردبن؟

nanonano said...

mok :

اشدراني عنه؟!!؟..ما بديت آخذه جديّات الا
lately

Fankooshy said...

يعني ماتدرون انه البنات هالايام اجرئ من الشباب ...مستغرب ليش مستغربة :)
يعطيج العافيه
http://fankooshy.blogspot.com/

nanonano said...

fankooshy :

الصج أنا متضايقه أن الحياه نقطه و راحت

enter-q8 said...

انسانيا ما يجوز
****

اياك و الياس من مرزوق

****

انا احلم ان اخذ بيت حكومة خلال مدة قصيرة لا تتجاوز العشر سنين

****

اخذي اجازة

اما الترقيم عادي
بس الصراحة الاسلوب وايد صعب

kuwaitawy said...

البنات!!؟




شنو ما يسوونه بهالوقت ؟؟


كل شي يسوون عادي


باجر تلقين واحد يمشي واكو قروب بنات يلحقونه بيرقمونه ويتحرشون فيه

عادي


ابتسمي فانتي بالكويت

لووووووول

ولاّدة سابقاً ... رانيا السعد ...رانية المنيفي حسب الأوراق الرسمية said...

جوابي على سؤالك: ما عندي سالفة
:)

وعلى ذكر أيام العديلية في الشتا ما املك إلا أن أردد

جادك الغيث إذا الغيث هما

nanonano said...

enter-q8:

شنو اللي آنسانيا ما يجوز؟
واحد مخالف عن سبق أصرار و ترصد القانون بحمله لجنسيتين..أذا مو عاجبه جنسيته الكويتيه و مخلي الجنسيه الثانيه لأيلم العوزه..خل تصير لديه الشجاعه الكامله و يتنازل..أو الحكومه تسحبها..يوم أن أهيه بدت في عملية سحب جناسي
+++++++

أنا أحلم أن يصير عندي بيت و أنا عايشه
++++++++

ما أقدر من الحين لي آخر السنه و لا يوم
+++++++++

متى صار عادي..البنت ترقم الولد؟
و ليش صار عادي؟
هل لأن زاد عدد البنات فخايفين يصيرون بايرات؟
أو عزوف الشباب عن الزواج؟

nanonano said...

ولاّدة:

يعني شنو؟؟
ولاده توني قاعده من النوم و راسي صاكني
شرحي لو سمحتي
مخي ما قاعد يستوعب

Blog 3amty said...

وأشيبي ياي يفتر بالورقة !

عادي كل يوم تصير معاي أكثر من مره عمري ما قلت :P

nanonano said...

blog 3amty :

الحين هابين بورنا الورقه

فردي حقك...ورنا ورقه من الورقات

و بعدين الريال مستانس..خله يعبر عن شعوره

أنا لو أحد مرقمني..جان بروزتها

Dionysus said...

حياج مواقف جامعه الكويت الساعه 12 بين كل سياره و سياره , سياره عليها ورقه


و هذي الكويت صل على النبي

enter-q8 said...

نانو
تعرفين اخيك ما يقط الكلمة عبط

مدام انه ما يجوز واحد يكون عنده ازدواج بالجنسية او جنسيته معروفه
و خاشها
و يبي الجنسية الكويتية و يطيحون عليها
و يسحبون منه الجنسية
فما يصير نقول اللحين عنه انسانية
فهمتي وجهة نظري

nanonano said...

5ayrhaa s:

شكرا جزيلا...بس ..الله يزيد النعمه

و بعدين أنا وين و هالحركات وين...السن له أحكام

nanonano said...

enter-q8 :

أول شي أنا بوخر موضوع الأنسانيه من النقاش..لأنك طالما سويت هالأجراء فمعناته أن الأنسانيه مو بالحسبه..و أذا تجردت من موضوع الأنسانيه..خلاص عيل لازم تعامل الجميع سواسيه..هذا أذا تبي تحسس الناس أنك جاد بموضوع الهويه الكويتيه

اللي مخالف قانون التجنيس تنسحب منه..لأن أهوه عارف و عن سبق أصرار و ترصد مو مقتنع بالهويه الكويتيه

enter-q8 said...

نانو انتي اللي طرحت انا ما طرحت
ثانيا ناسيةيوم الحكومة فعلت هالقانون و بعض الجرايد صورت الادارة العامة للجنسية و الجوازات حق اللي عندهم ازدواج الجنسية بعد ما جت الكشوف من دول الخليج
اي و اذكرك باخر شي بعد حادثة قطر مع قبيلة المري
ليش
الحسبة ناقصة عندكم
قلتم قانون قلنا كاهو
قلتم انسانية قلنالكم انسانية
قلتم قانون
نانو
في امور و انا اخوك مفعله و قاعده تتم
ولكن التسليط الاعلامي عليها مو متابع و مو مفعل الا عندما تكون حادثه معينة فقط يصير تسليط الضوء عليها و بكثافة
نفس بعض الاخوة اللي هاجموا المليفي و صارت قضية الانسانية عندهم حيل
و قاموا يستشهدون براي الاخت ملاحظة
على انه هجوم على المليفي
و لكن اللي يقرى تعليقها الاخير يعرف شنو تقول


بدوخ راسك على نهاية الويك اند
اللي يقرى وانا اخوج يقرى الملف كامل
هدك من البورجباندا اللي قاعده تصير

ترى بعض المدونيين لو تبطلين ارشيف مدوناتهم ما تخيرينهم عن هتلر
و اخرتها يتكلمون باسم الانسانية

nanonano said...

enter-q8 :

هالموضوع يبيله نقاش وجها لوجه...لأنك مو قادر تفهمني و لا أنا قادره أعبر صح عن وجهة نظري

فما راح نوصل لنتيجه

و بعدين الحين وراي شويخ الصناعيه..فهالمشوار بروحه ممكن يطلع سنافيري

أرحمني اليوم..الله يخليك

enter-q8 said...

روحي يا شيخة و القلب داعيلك
كافي دشة شارع كندادراي

 
template by Purplecious