Thursday, October 16, 2008

طنبور طين

أنا عندي مشكله أساسيه..وايد أستاحش من الناس
.
اللي ما أعرفهم..يعني شخصيتي الحقيقيه..ما تطلع
.
الا مع أهلي و صديقاتي و أصدقائي المقربين ..و اللي يشتغلون 
.
معاي..بس خل يصير أكو شخص واحد غريب أصير
.
طنبور طين..و لا كلمه و لا نص..بس أبي بعيوني
. 
أحاول أبذل مجهود و أصير حليوه..أبتدي أخوره بالكلام
.
أتأتئ..أقول جمل مو مفهومه..يعني التخنبق ماله والي
.
عشان جذي قررت أني أنصمت و أفتك..أمس رايحه 
.
معرض فنون تشكيليه..للرسام السوري..أحمد 
.
المعلاّ..أنا وايد تعجبني لوحاته..عشان جذي 
.
حرصت أحضر الأفتتاح..و لا جان لو تذبحوني
.
ما أروح مكان فيه هالكثر ناس..و لازم أسلّم..دخلنا أنا 
.
و زوجي..طبعا زوجي النقيض ..لعبته
.
الناس..و يعرف شلون يسولف و يفتح مواضيع
.
أنا شفت اللوحات جان أنثول..فقررت إني أبي
.
أصفن بروحي..المعرض متروس..والناس كلمن
.
يسولف مع كلمن..جان أتسلّط علي وحده أمريكيه
.
و تبيني أسولف معاها..ويييييي
.
الحين باذكر الأنجليزي..مو راضي مخي
.
يساعدني..نسيت حتى كلمة جرين..يعني أخضر
.
أشوه ما طولت وايد بالتنشّد..و افتكيت
.
بس يتسلطون علي..و أنحط بموقف
.
.
طنبور الطين

32 comments:

enter-q8 said...

ترى وايد جذي و خصوصا بمواجهة الجمهور
و يمكن لو تشوفين رايهم كتابتاً تنبهرين
بس لا تسمعينهم و اهم يتكلمون او يحتكون مع الجمهور
السبب بسيط
اهو انك تحاتين ردة الفعل او الصورة الاخرى و تبين توصلينها بالشكل الصحيح للي امامك

الحل تركي هالسبب و كوني على سجيتك و مو لازم تحاولين توصلينها فهي قامعه فيك و خليها فقط تخرج بدون قيود

kuwaitawy said...

الوضع عادي وطبيعي



انا عندي صديق


بالدوانية ولا المخيم ما كو احلا من سوالفه وغشمرته



لكن من يقعد واحد ما يعرفه

صج صج

يصير طنبور طين

EXzombie said...

انا قبل كنت انعزالي ربعي كتب و خجول، و لو الواحد ياخذ مني شي استحي اقوله رده لي، و المستحى شقني شق

لا اعرف اكلم ناس و لا اعرف اتواصل، اثنين غيروا فيني هالشغلة، الغزو و احمد اخوي الي اصغر مني بسنة، احمد ماشاء الله عليه يعرف الكل و الكل يعرفه حتى راعي البرد بحديقة قرطبة يسألني عنه و يسلم عليه و نقطة التحول اذا ما كنت غلطان كانت بركن المتحدثين بالهايد بارك كل يوم احد الكويتيين يصفون حول عبدالزهرة، و انا معاهم نسمع و نضحك و نتدرب على الضغاط ما ادري شطرى علي بنية وقفت يمي و لا شي المهم قمت انادي عبدالزهرة: عبدالزهرة... عبدالزهرة فد سؤال... عبدالزهرة فد سؤال... المهم حنيت عليه دهر لين التفت و قال شنو، جان اسئله: هسه صدام لما قال دا يحرر فلسطين ليش اجا الكويت؟ جاي ترانزيت! قلتها و الناس فطست من الضحك و تشجعت و صار كل مرة نجابل عبدالزهرة و نطيح فيه ضغاط، اذكر طول هالفترة كنت اتمنى اني اوقف و اتكلم هناك بس ما كنت متشجع و سويتها بال2000 بالشتا، ماكو كويتيين و لا عرب و كان معاي احمد، و حنجت الا اتكلم و الموضوع راح تضحكون عليه حزتها كانت ميولي عارة على الدين فكنت اتكلم عن المعجزات و لو اهي بوقتنا هذا جان الكل ملحد و الي كانو مجابليني واحد كان يتكلم عن البيبسي، و واحد يتكلم عن الكرة و واحد يتطنز على اي شي امريكي و يحط مقارنة بينه و بينهم، فقاموا يسئلوني عن المعجزات الي عندنا بالاسلام و حولنا الموضوع على الاسرى و غزو الكويت و رايي بالعرب عموما

بس كانت تجربة ممتازة انه في احد يوقف و يسمع شنو عندي اقوله و يهتم و يناقش

الي يستحي بهالدنيا ما يعيش، و للأسف صار الادب في هالزمن قلة حياء و تخاذل

عيشي حياتج مثل ما انتي تبين مو مثل ما يبون الناس، و ضربيهم بالحيط اذا مو عاجبهم

تحياتي

EXzombie said...

عندي سؤال

انا حضرت معارض وايدة و تعلمت الرسم من ايد فنانة علمتني استخدم كل الانواع من رسم او نحت

بس الدقة انه كل ما اروح معرض فنان كويتي او من برة، و افتر اشوف اللوحات احس انه يا انا السخيف الي ياي و اشوف خرابيط او انه الي مسوي المعرض مصدق روحه
و بعدين اشوف الارقام، او اسعار اللوحات و احس انه بدا النصب، شنو رسمه و شخابيط بست الاف دينار، و غيره، ابي اعرف شلون الواحد يشوف الفن في هالرسمات؟

Fahad Al Askr said...

ما تنلامين لا نسيتي إن الأخضر يعني جرين

السوق ماخذ قلوب العالم

Diver said...
This comment has been removed by the author.
Diver said...

حياويه يعني

مثل مايقولون الحياة زينة المرأة

شتبين بعد نمدحج و انتي تذمين الرياييل

nanonano said...

Enter-Q8:

المشكله مو جمهور ناس عاديين..أستحي..ما أحاتي كثر مالي خلق أبذل أي مجهود أضافي..أنا أعتقد أنا مع التقدم بالسن زايده العساره

nanonano said...

kuwaitawy:

أنا بالضبط نفس شخصية صديقك..على شوية عصبيه و عساره

nanonano said...

EXzombie

عيشي حياتج مثل ما انتي تبين مو مثل ما يبون الناس، و ضربيهم بالحيط اذا مو عاجبهم
******

أنا ودي بس اللي مبتلش الحين زوجي..لأني واصله حق مرحله..اسال أذا فيه ناس غرب..أذا أي ما أروح
******

و بعدين ترا حتى أنا ما أعرف حق اللوحات..و أبتهر باللي يقعد يخز بالساعات..بس أنا لوحات أحمد المعلاّ تأسرني...فيها شي غير بالنسبه لي

nanonano said...

Fahad Al Askr:

لا والله من التدوده مو من السوق

و على فكره أكره اللون الأخضر أهوه و البنفسجي

nanonano said...

Diver:

من حبّك لاشاك

يعني من المعزّه الواحد يتحرّش

;)

terkwaz said...

حالتج مؤقته لين تاخذين على اللي جدامج


انا مرات حتى اللي اعرفهم بس ما امون عليهم اصفن جبالهم
شوفي امي ومعاناتها وياي اذا تبيني اسلم على احد لول ماعرف اروح بروحي اقول انا فلانه تشوفيني اجلب بمكاني
والنظرات تقطعني ليش ما تيي تسلم
:))

الدســتور said...

:)
ديق على اي احد رنه
عشان يدقون عليج

عاجـل said...

واصلا ليش الهذرة مع الغرباء؟؟؟
خل نعطي الوضع فرصة
والطنبرة احسن من البهدلة

nanonano said...

terkwaz:

أي مؤقته..أنا لي الحين عمري لك
يعني ألف
ما اروح أستقبال و لا عزا بروحي
هذا من سابع المستحيلات

nanonano said...

abu eldestor :

خوش فكّيره

شكرا

nanonano said...

عاجــل:

واااااااي
شكرا
أخيرا أحد فهمني

أن اللغوه الزايده في حالتي تضر ما تنفع

على قولة واحد من أصدقائي
فيج توحّد؟؟!!؟

Eng_Q8 said...

مو لازم اتسولفين مع احد ما اتعرفينه

As YoU LiKE said...

من قال ان الاخضر جرين
الأخضر رد
Red

ترا مافي احلى من طنبور الطين مع الناس .. مافيها شي :)

مو لازم اسولف مع ناس مااعرفهم

nanonano said...

Eng_Q8:

مو أهمه يعيلون..و لا أنا ما اتبرع أروح

nanonano said...

As YoU LiKE:

لا تدودهني..قعدت افكر بعد انا

كلش مو لازم

Mok said...

جسب ما قالي صديق العزيز كان بالتسويق سابقا
:P

الفرق 10 او 8 دولارات عن سعر النفط الالامريكي

يعني لو النفط 100 يباع الكويتي 90 او 92

nanonano said...

Mok:

عزيزي سعر نفطنا اقب من برنت اب8 أو 9 دولارات
بس
سؤالي بجم مسعرته حكومتنا في الميزانيه

Diver said...

شدعوة عاد تكتبين المثل و تشرحينه لي شقالولج ما عرف كويتي
ترى من اهل بطنها على قولتهم

و لا نزكي على الله احد

nanonano said...

Diver:

هاهاهاها
مــي ســوري

ما أدري
:)

Funny Q8i said...
This comment has been removed by the author.
Funny Q8i said...

نفسچ

طلعنا بالهوا سوا

بس يمعودة اذا اكتشفتي حل دليني علييييه

حبوب، ابر، علاج طبيعي مو مشكله

بس أنطق

!!كله ساكت

انا قلت البلوق يمكن يحل مشكلتي

!!وانتي جم سنه صارلچ وليلحين

الله يعيني عيل

Tوتحيّا

nanonano said...

funny q8i :

أهلا و سهلا

أبشرك عالم التدوين ما نفع معاي

ماكو الا نسوي نادي المستاحشين

Funny Q8i said...

هههههههههههه

انا عاد حدي مستاحش

يبيلنا نادي صوتي او صوت وصورة

او كورس تمثيل :P

Zaydoun said...

خو انا تعرفين شكثر أحب الهذرة والسوالف، لكن مرات في ناس ما عندي ولا شي أقوله لهم... أصير أطرم جدامهم

وليلحين ماني عارف ليش وشلون أقدر أميزهم علشان أتحاشاهم

nanonano said...

Zaydoun:

أدري فيك أسم الله عليك

يا كره شعور الطرم اللي مخك مو راضي يسعفك بحرف

 
template by Purplecious