Tuesday, October 07, 2008

الطيحه

أمس رجعت من بيروت..طبعا بالنسبه لي أنا بيروت ما عليها خلاف
.
أحبها بكل أوضاعها..صيف..شتا..حر..رطوبه..بيروت غير
.
لما أروح أعرف شنو برنامجي..فكالعاده أستانست..الحمدالله
.
بس أهم حدث في رحلتي هذي..كانت الطيحه..واي..شاخبار
.
الواحد اللي يطيح..أنا آخر مرّه طحت من 25 سنه
.
ذاك اليوم قاعده من الصبح..أول يوم عقب ما كمّلت 37 سنه
.
نازله اللوبي..و طبعا البنت اللي باللوبي..تصبح علي
.
بونجور مادام..بونجور..و أنا طالعه من الأوتيل..عند الباب
.
شفت..يالله من فضلك النائب مصباح الأحدب..و بما أني
.
أعرفه من قبل..سلّم علي..ذاك السلام الحار..يعني..أنا كنت
.
أمسكني لا اطير من الفرحه..ركبت السياره و طلبت من السايق
.
يوديني محل يم الأوتيل..زوجي كان ينطرني بالسياره
.
رحنا المحل..و توني نازله من السياره..و رايحه صوب المحل
.
حطّيت ريلي و لا ما حطّيت ريلي على الرصيف..جان
.
أييبني حفّاظ الودايع على قولة يدّتي..و ألم الرصيف
.
زوجي نزل من السياره على صرخة السايق..الحين
.
أنا ماني عارفه شنو اسوي..أبكي..و لا أضحك..و لا
.
أضف جنطتي اللي طشّت على كبر الرصيف
.
شعور و لا أبّيزه..البرستيج لوعه..و التزلّق ماله والي
.
كانت طيحه ما بعدها طيحه..لي الحين فشلانه

45 comments:

ملاحـظـة said...
This comment has been removed by the author.
ملاحـظـة said...

عسى بس ما شافج مصباح الاحدب وانتي تطيحين؟

سلامتج
:)

Enter-Q8 said...

ما تشوفين شر
بس صج و الله شخباري الطيحه
المشكله انها بعمرنا صج صج لويه و تخصبق
يعني اذا ريال لا و اذا لابس غترة و عقال بعد هم فيلم ثاني

و اذا وحده ترى بعد هم فيلم

صار لي موقف محرج مره باحد المجمعات
و اكرر و الله عن حسن نية مع اني احب الشماته بس والله عن حسن نية
وحده تمشي جدامي المهم شك بوم طرباااااخ
لحقت على راسها والا حجابهاطالع بايدي وهم راسها طق بالقاع
لا شعوريا يعني بغطيها كان اقط الحجاب على ويها و اقولها اسم الله عليك
طالعت الناس تطالعني
فووووق حدر
للخلف درررررررر

3ashga::O::Mfalsa said...

أولاً: الحمد لله على سلامتج.. نورت الديرة :)
ثانياً: سلامات يالغالي سلامات! خيرتج بتنسين لا فشلة ولا شي أهم شي عسى ما تعورتي؟

Shurouq said...

سلامتج نانو.. آنا طحت أول يوم العيد بس اشوه محد شافني.. ولي الحين ظهري يعورني

الكبر شين

Mok said...

ترى انا طايح قبل يومين على ارتفاع متر ما ادري ان تحت نزله

وتخيلي شكلي وقتها
:)

وسلامتج

ولاّدة said...

سلامات
عين ما صلت على النبي
آنا شاكة بالأحدب..حرقي اسمه واسم أمه ومريني يوم أصب عليك رصاص
;)

Ghadoor said...

la la .. salamaaat
el mohem ma 9ar e9abat

Fahad Al Askr said...

سلامات

لو رايحة مصر جان ما طحتي يا أميرة

abu eldestor said...

وليه
الحين ماندري انقولج سلامات
ولا الحمدلله على سلامتج
ولا عيدج مبارك
:)

Eng_Q8 said...

خطاج السو

عين عين ما صلت على النبي

EXzombie said...

سلامات و الحمدلله على السلامة و كل عام و انتي بخير

على سالفة الطيحة تخيلي بالشتا و ثلج و كان عندنا تصوير بالشارع، و للاسف كان منحدر بشكل حاد، انا ماسك الكاميرا و مندمج اعدل و اضبط الفوكس على الممثل، و شك بوم احس الممثل يروح يسار، و انا اقول له محمد رد مكانك، و محمد يطالعني منصدم، فقاعد ازفه انه خل يرد مكانه ما عندنا وقت و لعب يهال، بعدين استوعبت انه فيه شبة دشت بالموضوع و هم اهي اتحرك، و انا يعني للحين ملتزم و مندمج بالكاميرا، اخر شي استوعبت اني كنت قاعد اتزحلق على الجليد، و الشارع متجلد من الثلج

طبعا اذا كنتي تحاتين ما وقفتني غير سيارة كانت صافطة بالشارع

عاجــل said...

سلامات

الا طيحة البنات تفشل وما تنسي لو بعد مليون سنة

ManalQ8 said...

سلامات وما تشوفين شر

والحمد لله على السلامة

وان شاء الله رحلة تليها رحلات

ووناسة بعدها وناسة

دوم يا رب
:)


سعدت بتواجدي بين صفحات مدونتك

جميلة
مثل صاحبتها
:)

bo 7ami said...

سلامات ما تشوفين شر و الحمدالله على السلامه :)

Fashionista said...

عاد يا شين البرستيج لي انعفس بلبنان

سلامات حبيبتي

3ajeeeb said...

سلامات ماتشوفين شر إنشاءالله عسى بس ما ياج المايكرين؟؟ ترى هل طيحات مع الفشلة تييب المايكرين على طول و آنا أدري المايكرين عندج غوش بوش على خبري

Diver said...

سلامات

تبين الصج احسنلج ان انا ما شفتج لاني جان لين الحين اضحك
على فكرة اذا طحت او طاح جدامي احد ما اقدر امسك نفسي اموت من الضحك

ضحكي تضحكلج الدنيا و خيرها بغيرها

nanonano said...

ملاحـظـة :

الله يسلمج..لأ ما شافني..جان مت

nanonano said...

Enter-Q8:

الشر ما أييك

أنا لو صار جدّامي الموقف مالك مال المجمع..جان ضحكت بعد..لأنك ما تتخيل شلون تضحكني الطيحه

nanonano said...

3ashga::O::Mfalsa :

الله يسلمج عزيزتي

تزلّقت ركبي و كوعي و قدمي..هاهاها
كل شي صوب اليمين تزلّق

nanonano said...

Shurouq:

شوشو الله يسلمج..من ناحية الكبر شين..فحده شين..شلون ظهرج الحين؟

هم أنتي خطاج السو

nanonano said...

Mok :

أشفينا؟؟!!؟ توازنا مو مضبوط

حتى أنت سلامتك

nanonano said...

ولاّدة :

الله يسلمج

لا حرام مو مصباح..بذمتج مصباح مال يعطي عين
لأ أنا شاكه بوحده لبنانيه هناك شاغبتني مشاغب..اللي آخر شي قلت لهم سكتوها لا أقتلها

nanonano said...

Ghadoor :

التزلّق ماله والي..و أمس أكتشفت رضّه بعد بكتفي..هاها..حد أم الأصابات

nanonano said...

Fahad Al Askr:

أسكت انا بموت على القاهره..بس مو حاصل لي..زوجي ما يحبها..و البنات كل ما راحو مع عيالهم..و أنا مالي خلق يهال

nanonano said...

abu eldestor:

ولييهن
;)
الله يسلمك
و
الله يسلمك
و
أيامك سعيده

عاد كل شي و لا أبونا

nanonano said...

Eng_Q8 :

الله يسلمك
والله عين لبنانيه حتحتتني

nanonano said...

EXzombie:

هو أكيد باحاتيك..بس ما يمنع أني باضحك

أنا لو أبلش موضوع طيحة الثلج ما أسكت من كثر ما ضحكت العام على الأوادم

nanonano said...

عاجــل :

الله يسلمك

أنا ضايق خلقي على برستيجي اللي ضاع جدام السوّاق..هاهاها
:((

nanonano said...

ManalQ8 :

أهلا و سهلا فيج
و
الله يسلمج
و
أنتي أجمل
بس
عقب هفّة السوق هذي ما أظن اكو سفرات يديده

nanonano said...

bo 7ami :

أهلا و سهلا
و
الله يسلمك

nanonano said...

Fashionista :

بالضبـــــــط
تعرفين شعوري

الله يسلمج
;)

nanonano said...

3ajeeeb:

؟؟؟؟؟؟؟؟؟؟

صداع نصفي؟؟!!؟
أمبله ياني..لأني تركيت على كتفي اليمين..فشدّت العضله

nanonano said...

Diver:

أنا شنو اللي مخسبقني غير الضحك على الناس اللي يطيحون..خو خواتي لي الحين يضحكون

mosan mosan said...

Salamat Salamat ....

يعقووبوو said...

عادي... كلها طيحة
بس السؤال. ليش انا ما أطيح؟

ZooZ "3grbgr" said...

الحمدلله على سلامتج
نورتينا

فريج سعود said...

الحمد لله على السلامة

على الرجوع والطيحة

حمدي ربج طايحة ببيروت لو طايحة بالكويت جان طيحتج تلقينها باليوتيوب

Bo Jaij said...

ما إتشوفين شر و طيحتج هذى أهم من طيحة السوق

و آسف على تأخرى بالتعليق لأنى كنت معتكف

nanonano said...

mosan mosan :

allah eysalmik my dear

nanonano said...

ZooZ "3grbgr":

أهلا و سهلا

i missed u my dear
:)

nanonano said...

يعقووبوو :

يمكن ما أتطيح لأنك ما تضحك على الناس نفسي لما يطيحون

nanonano said...

فريج سعود :

أهلا و سهلا

الله يسلمك

أي والله جان صج السكبه طارت

nanonano said...

Bo Jaij :

عاد أنت بالذات لو مهما يصير ما أتشرّه عليك

اللي ماله أول ماله تالي يا ابا الجيجاء

;)

 
template by Purplecious