Tuesday, September 23, 2008

لا تعقدونهم

أنا وايد كاسرين خاطري اليهّال و الأمهات..اليهّال عشان الدراسه
.
و الأمهات عشان التدريس..طبعا مشكلة غالبية الأمهات اللي عندهم
.
يهال صف ثانيه أبتدائي..سورة العاديات..المشكله أن ماله علاقه
.
بالطفل شاطر و لا كسلان..سورة العاديات مفرداتها صعبة النطق
.
على طفل عمره 8 سنين..فكل سنه لازم نسمع قصة أم مع تحفيظ
.
السوره..آخر وحده سمعتها أمس..قررت صديقتي أن بنتها تسقط ولا
.
تضغط عليها أكثر للحفظ..تقول لي شلون بنتها قامت تبجي من الخوف
.
من كثر ما أهيه عصبت
.
أنا باعرف شي واحد..أحنا الحين المفروض اللي بجيلنا وصلوا مراكز قياديه
.
بوزارات الدوله..ما يشوفون أن أسلوب التحفيظ اللي مورس علينا ما
.
فادنا..بس كرّهنا بمدرسين العربي و الدين..و عقّدونا من هالمادتين..و لا أحد
.
أعرفه دخل يوم الأمتحان أو يوم التسميع حافظ..فليش الأصرار على هالأسلوب
.
المنفّر في التعليم مع أن الحين بأمكانهم أضافة أساليب تحبب اليهّال بالدين و العربي
.
بدال ما يتعقّدون مثل ما تعقّدنا

22 comments:

عاجـل said...

لو ييبون بارني يقرى لهم انا متاكد راح يحفظونها منه زين

Mok said...

عادي حذرنا من قبل

لكن الجماعة راح يزيدون وخاصه اذا ا االجهلة مسيطرين على التعليم واعني الدينين


وانا واحد من الناس عانيت من اللي تذكرينهم يغربلون الويكند واكون دائما في قلق


( ما تشوفين ليش اداحر العزيزة ولادة من حبها للادب العربي
:)

كويــتي لايــعه كبــده said...

الترديد عمره ما كان تعليم

بس وين..ء

nanonano said...

عاجــل :

ماكو بارني بالعربي
:(

أحنا شنو ذابحنه أن اليهال ماكو شي يجذبهم غير البرامج الأنجليزيه..لأن العربي ثقيل طينه يمللهم

nanonano said...

Mok :

وااااي تذكر الأطلاعات؟؟

nanonano said...

كويــتي لايــعه كبــده :

أي والله وين

طاح من لسانه وصله

3bady said...

همم عدل كلامج :)

انا احس احسن اسلوب مثلاً

جر

اذا حطينا حقها شين في البداية شنو اتصير؟

شجر

فاهمتني :)

يعني ناخذها على لعب و ضحك جذي

بس القرآن يبيله تكتيك اشوي يبيله الياهل يسمع اشلون يقرونه علشان يقدر يحفظها :)

ZooZ "3grbgr" said...

التعليم بالكويت حشو كوسا
بس آنا أؤيد حفظ القرآن
بس عاد اختيار الآية المناسبة لكل مرحلة للطفل لأنه مثل ما قلتي مخارج الألفاظ تقول صعبة على طفل بالعمر هذا

انا اللي أذكره من الحفظ

lady bird lady bird
fly away home

your house is on fire
and your children has gone

مأساوية القصة حطمت مشاعري
مع إني ما أحب الحشرات

ملاحـظـة said...

نانو
تدرين و ين المشكله
انه الابلة لما ياخذون الدرس ما تشرح الايه
بس تطلب من الاطفال الحفظ

انا عندي لو يشرحون لهم افضل وايد من انهم يحفظونهم كلام اهم مو فاهمينه

nanonano said...

3bady :

أهم شي القرآن الكريم يبيله الطفل يتعلم على سماعه

موضوع الحفظ المفروض ينلغي حق هالعمر يبتدون معاهم من رابعه أبتدائي...مثل ما كنا أول يعطونه
جزء عمّه قراءه

nanonano said...

ZooZ "3grbgr:

هذي مو ماره علي من قبل..الظاهر وايد غيروا المناهج

nanonano said...

ملاحـظـة :

يا ريت يبتدون معاهم بقصص الرسول صلى الله عليه وسلم..قصص الصحابه..قصص الأنبياء..شوي شوي..عشان يبتدون يستوعبون الفكره

مــعـــارض said...

مع حمد قلم


أنا آكل وأشرب، لأعيش وأكبر


مع "هايف" خيزرانه

beezo said...

نانو
تبين مايحفظونهم سورة العاديات؟؟
ولاتبينهم يغيرون الطريقه مالت التحفيظ؟؟
ولا شنو تبين بالضبط بابا؟؟ بفهم انا
بعدين سمله عليه بو 8 سنوات خل يحفظ قرآن انا تروالي وايد احسن له من الفراره بالسكيك والهياته ورا البنات باليرموك يرشرش عليهم فوم ويأخرون الناس عن مشاويرهم
;)
بعدين بارني هالبغل هذا ماتقوليلي شنو بيبلنا غير الشباب التروفه؟
ترى احتا جيلنا كان فيه قابليه اكبر للترف من هالجيل بس احنا ماطلعنا مثلهم لعدم وجود بارني وشلته

nanonano said...

مــعـــارض:

أنا لحقت على مع حمد قلم بس

ما أدري عنّك لحقت على منو
أنا آكل
و لا
أنا عبير
;)

nanonano said...

beezo:

الله بالخير..شوي..شوي..ليش هالهجوم كلّه

أبيهم يغيرون طريقة التحفيظ
عمره التحفيظ ما ياب نتيجه
و أنت تعتقد أن بو 8 سنين يقدر يحفظ..كيفك..أنا ما أتفق معاك

وبعدين من سوا مقارنه بين طرق التعليم و الفراره بالسكيك..محد ياب هالطاري..و اذا قصدك موضوعي اللي قبل..أنا كنت منتقدته

و لا نخلي بارني و ربعه شمّاعه نعلق عليها أخطاء التربيه...الجيل الجديد الأهل تخلّوا عن مسئوليتهم في التربيه

و شكرا..و حيّاك الله

Unknown said...

صباح الخير انا يا اما كبرت والذاكرة ما تسعفني
يا اما مخي متلخبط
بلوقج مثبته ومار عليه يوم شفته اول مرة؟

المهم موضوعج حلو وانا اتفق مع تعليق ملاحظة
لو يقولون لهم القصة اول شى وشنو معاني الايات
يعني مثلا لما يعرفون ان العاديات اهيا الخيل
وضبحا صوتها
يعني احس ان في اسلوب افضل مع تأييدي بأن الطفل احسن قوة بالحفظ بس بدون الطريقة اللى تخليه حافظ من غير ما يفهم

nanonano said...

Mishari :

لأ ما كبرت و لا خرّفت
هاهاها

وقّفت مدة سنتين و رجعت الحين

شكرا أنك فهمت وجهة نظري

beezo said...

صباح الخير
السوق شكله سيئ الحين
المهم
انا متابعج من 2005 بس بصمت ولاحظت ماتحبين اللي يعارضون ولاتنكرين

احب اضيف شغله صغيرونه ترى مو كل شي قلتو عنه شماعه مايصير جذي ؟؟
شلون الواحد بيربي بدون منع وفرض؟؟

nanonano said...

beezo:

صح السوق مو زين..بس ما يمنع أن الواحد يتابعه..فيه خوش فرص

متابعني من2005 و تعتقد أني ما أحب اللي يعارضني

على هواك

و ما فهمت النقطه الأخيره..شنو المنع و الفرض؟؟؟!!؟

خل أوضّح لك شي واحد بس..ترا أنا ضد سياسة التيقيق اللي الحين صايره مع اليهال..و لو كان عندي عيال جان شفتني وايد صارمه معاهم..كل شي بحدود..الدلع اللي صاير الحين اللي يعتقدون أنه راح يعوض العيال أنا ضدّه..لأن ماكو شي يعوض العيال وجود الأهل

Mok said...

اعزائي نانو وبيزو


السوق امس واليوم متوقع نزوله

لانه عنده فجوة لازم يسكرها

عند


12647

وسكرها اليوم واتوقع الانطلاقه الاسبوع القادم مالم يحدث اي تطورات سياسية او اقتصادية

بس الله يفكنا من تصريحات اللي يتكلم في امور ما تعنية واعني احمد باقري


اي نانو اذكر اطلاعات

راحت الايام

بس ما كنت استمتع بالويكند وعقلي الباطن متروس يا مدرس العربي او الدين

واسف على مداخلتي اللي خارج الموضوع

nanonano said...

Mok :

شكرا على معلومة السوق..مع أني اشك أن راح يصلّح

و الله يخليك ترا المدونه مدونتك تقدر تقول فيها اللي تبي..

 
template by Purplecious