.
.
دخلت بنقاشات طويله عريضه
.
بأهمية الدماء الشابه بالمجلس
.
و أهمية الوجوه الجديده
.
كل هذا على عيني و على راسي
.
بس بالنسبه لي..أحنا داخلين على مرحله صعبه
.
مرحله يبيلها حنكه
.
مرحله يبيلها قوه
.
مرحله يبيلها مواقف
.
مرحله يبيلها خبره
.
و كل هالصفات ما تتوفر الا بشخص
.
.
أحمد عبدالعزيز السعدون
79 comments:
يستاهل بو عبدالعزيز
بل تستاهل الكويت وجود شخص مثله في المجلس
عثماني:
أخوي عثماني..أنت عارف معزتك عندي
بعد الحين مع العم بوعبدالعزيز
أسهمك زادت عندي
والنعم
بس لا تحرقين على صوت واحد
تدرين شنو يبيله ؟
يبيله نستنسخ خمسين من بوعبدالعزيز ونرزهم بالمجلس :)
شحلاتهم يصيرون كلهم بشوت :)
وتحياتي ..
ويسلمواااااااااااااااااااا :)
نانو
مع احترامي..لكن في تقرير طلع ل ال بي بي سي.. والعم سام ما يبوّش..يقول فيه ان أحمد السعدون نائب حكومي.. و مع احترامي هو نائب متقلب، وين مصلحته هو وراها و الدليل ان ما كان مع حقوق المرأه سابقا و وقف امام قوانين مصيريه لمصلحته.. و شاهدت له فيديو أيام الثمانينات يتكلم فيه عن سراق المال العام حتى يومنا هذا و هو يعيد نفس الكلام..طيب ناس دخلت و طلعت و هو لا زال موجود..شسوى بهالخصوص؟ .. النفاق غير مطلوب بهالمرحله الحرجه
المجلس يصكر بيبانه اذا ما فاز (=
يستاهل بو عبد العزيز
ولكن يا نانو
بو عبد العزيز مو دايم للكويت
نبي صف ثاني منة
نبي منة ثلاثة لازم
لا استطيع تخيل المجلس بدونه
الله يطول بعمره انشاءلله
الله يطول بعمرك يا بو عبدالعزيز
امممممممممة 2009
أتفق معك بكل كلمة قلتيها
تسلم ايدك يا نانو
هذا الكلام والا بلاش!1
نعم المرحلة الجاية سيئة ونحتاجه لها
صباح الخير
مجلس امه بدون بو عبدالعزيز ماله اي طعم..الله يوفقه و يسهله امره و يعطيه الصحه والعافيه
صـــــــح لســــانج نانـــــــــــو
هو الرئيس بحول الله،،
اصلا المجلس بدون رئاسته ماله طعــم..
الصوت الأول له ان شاء الله!!
الغالية نانو نانو
صباحات العنبر والمسك
.
.
.
.
لو كنت ناخب في الدائرة الثالثة
والله مالك أمل أشوف اسم أحمد السعدون وما أصوتله
بوعبدالعزيز له الصوت الاول عن قناعة تامة
تقبلي مني أجمل تحايا المساء
مع الاسف عمري ما انتخبه لأني مو بدائرته !
ما أقدر أتخيل ناخب بالدائرة الثالثة يشوف اسمه وما يتنخبه
ما شاء الله خبرة وجرأة بالحق والمام كامل بالدستور والقوانين
الله يبارك له بعمره ويعطيه الصحة والعافية
and Aseel?
افتقدناه كرئيس كثيراً
صح لساااااااااااااانج يا نانو
مادري شلون الواحد يكون بالدائره الثالثه ومايعطي العم بو عبدالعزيز
لو كان ربع المجلس ماقول كله او نصه نواب قلبها عالكويت مثل السعدون جان الكويت بالف خير
وشكرا لج
Mok :
اللي يعرف العم أحمد مضبوط يدري أن أهوه ضد موضوع الصوت المقطوع
Q8EL5AIR:
٥٠ عاد؟؟
راح نصير طمّاعين وايد
٢٠ شخص مثل العم أحمد
كــــــــافي
يستاهل العم بو عبدالعزيز
Mother Courage:
سمحي لي أختلف معاج
تقولين نائب متقلّب؟
شنو المواقف اللي تقلّب فيها
أذا على موضوع حقوق المرأه السياسيه
فالعم أحمد من أنتخابات ٢٠٠٥ و أهوه بيّن وجهة نظره بهالموضوع
العم أحمد مو ضد أعطاء المرأه حقها
كان ضد طريقة أجرائات صدور المرسوم
========
سراق المال العام..هالصفه بدت بالتسعينات
بعد سرقة الناقلات
=======
أذا العم أحمد السعدون يعتبرونه ال بي بي سي نائب حكومي
عيل سعدون حماد و خلف دميثير و عبدالواحد العوضي
شنو موديلهم؟؟!!؟
و في شغله صغيرونه سمحي لي أود لفت نظرج حقها
العم سام مصطلح يطلق على الأشياء الأمريكيه..مو البريطانيه
حسافتج:
أنا معاك نبي صف ثاني و ثالث بعد
بس هالصف شلون راح يطلع
لازم يحتك و يعرف و ينحك و يدرس من خبرات
النواب القدامى و بعدين يصيرون مؤهلين
بس للأسف اللي قاعد يصير
أن موضوع هاك يا رمضان رزقك
الكل قاعد ينزل..و على باله أن زين..و يقدر يفوز
خطأ
المشكله الشباب و الشابات ناسين شنو مجلس الأمه
أهوه السلطه التشريعيه بالبلد
مو ستار أكاديمي
فهمتني؟
kuwaitawy:
أنا جذي
ما أقدر
zeya :
آميـــــــــــن
و يخليه ذخر حق الديمقراطيه
كويــتي لايــعه كبــده:
طبعا أنا ما أقدر أعبّر و أحلل مثلك
بس أعتقد أنك أبدعت بآخر ٣ بوستات
و ياريت أخوانا المدونين و خواتنا المدونات يقرونهم
عشان يعرفون أهمية وجود شخص مثل العم أحمد السعدون
بمجلس ٢٠٠٩
100 fils :
صباح الورد
أفتقدتك
===
أهم شي الله يعطيه الصحه و العافيه
لأن محتاجينه
مادري ليش تذكرت صوته
:))
الله يطول بعمره ويسخره لخدمه هالبلد ويوفقه
وصباح الخير
:)
q8mirror:
لو كان العم أحمد السعدون رئيسا بالمجالس السابقه
كان بأمكاننا تجنب كثير من التراهات اللي كانت قاعده تصير بالمجلس
بس أن شاء الله كل شي يتعوض
شـقـــــران:
صباح العسل و القشطه
أهلا و سهلا
مشتاقين
.
.
.
وهذا العشم فيك يا المعلّم
bo bader:
تصدق أنا لما أشوف العم أحمد و صلابة مواقفه
و حبّه للكويت و الديمقراطيه
و لي الحين الله يعطيه العافيه على نفس السنّه
أستحي من نفسي
و أقول العم أحمد على كل اللي قاعدين يسوون له و يحاربونه ما فقد الأمل
أحنا يا الشباب من أدناة الدون نتحلطم و نعصب
بالنسبه لي أهوه قدوه
Shopa:
كيفج
ولاّدة:
و أنا أعتقد أن الرئاسه أفتقدته كثيرا..بعد
اي والله لا تخلون بو عبدالعزيز ما نتصور المجلس بدونه وهالمرة الطموح مو الفوز بالانتخابات الطموح ان شاء الله برئاسة المجلس
Hashemy :
أنت عطيتني الزبده
بالضبـــــــط
قلبها عالكويت مثل السعدون جان الكويت بالف خير
سليمان القصار:
شكـــــــرا
أي والله يستـــــــــــــــاهل
esTeKaNa :
صباحج ورد
:)))
ما شاء الله عليه
أهوه صوته ما ينسي
مَـــــعْــــمَــــعَـــــه:
من قال لك أن راح نخلي بوعبدالعزيز
عاد كل شي و لا العم أحمد
أحنا خل نركز على الأنتخابات الحين
و عقب لين صار وقت الرئاسه يصير خير
لأن هذي حسبتها غير
اذا انتي تحاتين حل المجلس الدائم اللي ممكن يصير في المستقبل..يمكن معاج حق
بس انا شخصيا ضد انتخابه
أبسلوتلي يستاهل
:P
KQ8 :
بو طارق أنت رايك وايد مهم بالنسبه لي
ليش؟
Blog 3amty :
يــــــــــــا هلا
يــــــــــــا هلا
ثانك يو..ثانك يو
ما نستغناش عن عن خدمات العمه
;))
يقع على عاتق بوعبدالعزيز تدرييييب صف ثاني يعرف يوقف
لي متى احنا بس محملينه مسؤليه الي يصير
انزين ندري ان اهو مو صغير
يمكن المجلس القادم ما تسعفه صحته
جاوبيني منووووو عندناا بقوته؟
عزيزتي نانو
John bull ولا تزعلين
بعدين إحنا قاعدين نتكلم عن أحمد السعدون اذا بتقارنينه في اعضاء آخرين ليش ماتقارنينه في د.أحمد الخطيب أو حمد الجوعان مثلا؟ والا يوسف النصف؟ واذا كان قصدك عشان اللي ذكرتيهم حكوميين بحت فأهو النسخه القديمه منها
و بالنسبه لفيديو أحمد السعدون يتكلم فيه عن سراق المال العام دورته على اليوتيوب و مالقيته.. كنت شايفته بقناة نبيها تحالف و بالأبيض و الأسود كان صغيرونو شحليله..واهم ربعكم وتمونون عليهم، قوليلهم يعطونك نسخه
بالمختصر المفيد..منافق..و سنين و بنين وهو في المجلس، و ماتغير شي
=)
lawyer:
أتفق معاج أن يقع على عاتق العم أحمد تدريب الصف الثاني
بس هم أظن أن أكو صف ثاني و ثالث بعد..بس التدريب و الصقل قاعد يصير على سنع
و أنا متأكده أن العم بوعبدالعزيز محاط بمجموعه من الشباب اللي قاعدين يتعلمون و يفهمون كل شي من غير بهرجه أعلاميه
نانو
اول شي علشان احق الحق
بوعبدالعزيز كرئيس مجلس مكانه واضح مو مثل الخرافي يعني السعدون اذا كان له راي بخصوص قضيه معينه قام وحط صالح الفضاله مكانه كنائب رئيس ونزل لي مقاعد النواب وابدى رأيه..هاذي من النقاط اللي تحسب له
لكن في الناحيه الاخرى بوعبدالعزيز مايتدخل الا في القضايا اللي يحس انه له فيها منفعه ظاهرها الحق وباطنها باطل لكن غير ذلك بالعاده يكون صامت..ولا جنه له حس
اتفق معاج ان بوعبدالعزيز هالسنه بالذات قاعد اسمع وايد حجي انه بيعطونه وبيكون نجم ٢٠٠٩
لكن ياجماعه مو تبون تغيير قصوا الحق من نفسكم وغيروا..ماشي تبون تعطونه عطوه لكن مو اتسنغلونله ..نوعوا حتى لو تشكيله من كل الاطياف المهم ان تحطون مصلحة الكويت اول شي
وتبين الصج اذا مصلحة الكويت بتكون مع انتخاب احمد السعدون اهلا وسهلا... ضميرج اذا تحسين انه راح يكون مرتاح فتوكلي على الله..واذا حاسه انه في تذبذب لا...نطري وتثبتي وشوفي وقارني
لانه بالنهايه احمد السعدون ولا غيره المهم الكويت تكون في .....ضميرنا
Mother Courage :
على راحتج عزيزتي
ودي افهم شنو العمل الي مسويه و خلاكم تموتون في دباديبه
مع احترامي للجميع بس ردودكم عاطفية و كلها تغزل بالسعدون على ماميش
شنو انجازاته
يا ريت تقولون شنو انجازاته باخر مجلسين؟
مو حاله حال الكرسي
شلون اختار واحد لأنه ما صار رئيس مجلس الخمة يزعل و يمد البوز شبر و بعدين يشتغل على التأزيم و تخريب الجلسات، نسيتوا انه مشى مع الدوائر الخمس دون اقتناع بس ركوبا مع الموجة لايصاله و بعدين طالب بالدائرة الواحدة
الازمة الاسكانية الي بح صوته و اهو يحن علينا فيها شسوى فيها هل حل مشكلة الاسكان، هل كل واحد فينا عنده بيت و لا كلنا ماكلين تبن بالشقق و هم اجاراتها عالية
مو اسطوانته المال العام، شفيه بلع لسانه و شلون سكت لما طلع الخليفة براءة و شلون سارق للمال العام يطلع بريء
هل انتو ما تشوفون الا حدايق و خضاب مغطاة بالورود و الثلوج و الدنيا رومانسية لما يطلع السعدون بالتلفزيون؟
و الله حسستوني انه مهند
اهم قضيتين كان ساكت فيهم و سقط في امتحاناتهم
لا مال عام و لا اسكان
ماتفقدين عزيز يانانو
بس مثل ما تفظلتي بل بوست الي فات الوقت يطير مع اني دقيق ووايد منظم نفسي بس تطلعلي شغلات تعفس الجدول كله
Wish you a lovely weekend dear with you family
;)
KQ8 :
بو طارق أنا ودي يكون أكو تغيير بس تغيير الى الأحسن
تغيير ما يلغي دور الكبار
يكون في شباب..بس بالنهايه هذي السلطه التشريعيه..و هالسلطه بالذات يبيلها خبره
و على فكره بوطارق أنا من بديت أشتغل مع العم أحمد سنة ٢٠٠٥ و أنا أدري أن العم أحمد يرفض رفض قاطع فكرة المقطوع
و يمكن أنت فهمت عنواني أن أهوه طلب تسنغل..بس أنا قصدي..كان أن خل يكون العم أحمد السعدون واحد من أصواتكم الأربعه
و أنت تدري شنو الكويت بالنسبه لي
;)
EXzombie:
أنا وياك دخلنا بنقاشات طويله عريضه على نفس الموضوع
لا أنت راح تقدر تقنعني..و أنا ماني قادره أقنعك
بس أنا أعتقد أنك قاعد تبخس حق العم أحمد بهالكلام
معلش بس هذا مو وقت إندافع عن أو إنهاجم العم السعدون
قاعدين نلعب بالوقت الضايع...و على حسب تقدير الحكم..بأى لحظة راح يصفّر
جدامنا إنتخابات مستنسخة من إللى قبلها
يمكن الأخيرة بتاريخ البلد
تبون نطلع منها بشى ...يتوثّق على الأقل تاريخيا و تستفيد من دروسه الأجيال القادمة
قطوها بيضاء
غير جذيه...فمن الأفضل تجاهل الإنتخابات و المشاركين فيها ...و مجابل الكرة و المسلسلات قراءة الروايات....ضمانا لصحتنا البدنية و النفسية
100 fils:
هاهاها
هاهاها
على طاري الوقت..اليوم واحد من الشباب ألتفت علي جان يقول لي
ليش ماكو وقت؟؟؟
الظاهر في أزمه كويتيه بالوقت
أو أن أحنا شعب لويه
same to u my dear..it's a lovely weather for the weekend..enjoy it
أبو جيج مع الورقة البيضاء:
صاحب المعالي أبا الجيجاء
أنت قلتها يمكن تكون الأنتخابات الأخيره
تعتقد صح أن نقطها بيضاء عشان نثبت موقف
مو الأصح أن نشتغل مضبوط عشان يطلع مجلس قوي
عشان أذا صار حل غير دستوري..الا عندنا نواب نقدر نستند عليهم؟؟
بوجيج..أنت تعرف أهمية رايك بالنسبه لي
الله يخليك..البيضاء بهالوقت راح تردنا لي ورا وايد
خل نحاول أن نرتب أفكارنا
لأن أعتقد هالأنتخابات هي فرصتنا الأخيره
nanonano
على أى اساس راح يطلع مجلس قوى؟؟؟؟؟؟
نفسها الأسماء إللى إنزلت آخر مرة...نازلة الحين
راح يطلع لهم قرون و يستقوون فجأة؟؟
مابى أكسر مياديفج..بس دشى مدونتى و إقرى الأسماء
شلون بالله من هالأسماء..راح يطلع لنا مجلس قوى؟
إختارى كل مرشحينج ...جم واحد هم؟
أربعة؟؟ ستة؟؟؟
و بقية الأربعين؟؟
تستندين عليهم بوقت الحل الغير دستورى؟
لما صار كلام عن الحل غير دستورى...ما سمعنا غير أصوات حدس يدافعون عن الدستور
ربعنا خقوا و أولهم على الراشد
معلش بس ما عندنا فرصة ثانية علشان إنطوفها
ورقة بيضاء ...لتسجيل موقف تاريخى
tealam el-eed eli ekibat kalamich sa7 100% hathi a7san mar7ala 3ashan taghyeer el-balad lila7san o yabeelha bo3abd el-3aziz
كل الدعم والتأييد لكم عالاقل اختيار ناضج وقوي ويشرف
الله يوفقكم
انا تفق معك فى ان بلادنا فى المرحله القادمه تحتاج رجال ذو حنكه وخبره وتاريخ سياسى ولكن فى المقام الاول تحتاج الى وجوه شابه جديده ودماء سياسيه جديده وايضا تحتاج الى تطور وتقدم وعقول شابه غير متأخره عندها حماس ونشاط وغيره لخدمه البلاد ومصالح العباد
اذا رد الخرافي راح اروح اشمع المجلس بالشمع الاحمر
فهمتج
ووايد اعجبتني سالفة ستار اكادمي
عدل شغلج
شكرا على سرعة ردح نانو ويعطيج العافيه مره ثانيه على بوستج الحلو
كثري منهم :)
أبو جيج مع الورقة البيضاء:
صديقي العزيز جدا أبا الجيجاء
أنا فاهمه وجهة نظرك وايد زين
و لك مني وعد..أذا صارت في أنتخابات بعد سنه مره ثانيه
راح أكون أول وحده بتقط ورقتها بيضاء
بس أنا لي الحين عندي أمل
لا تسألني من وين يايبه الأمل
أنا ما أدري
بس عندي ثقه أن هالمجلس أذا أشتغلنا صح..راح نقدر نغير شي
و أذا سقطنا
ما راح أتحسف
لأني بذلت كل اللي أقدر عليه
ZwaiZ :
شكرا جزيلا
بس ترا الأيد الوحده ما تصفق
محتاجين جهود كل الشباب و الشابات
عشان نقدر نسوي شي
ANGEL HEART:
شكرا جزيلا
على فكره ترا أحنا محتاجين كل الدعم
و راح نصير أكثر من سعداء بتلقي دعمكم لنا
المتابع:
أنا مو قاعده ألغي دور الشباب أبدا
بس هم النغمه السائده بالمطالبه بألغاء دور أصحاب الخبره مزعجه
عشان جذي أنا قاعده أؤكد على أهمية دور رجال الخبره
Gee:
عزيزتي راح يرد
خشي روحتج..حق أشياء راح تيينا أقوى من ردة الخرافي
حسافتج يا كويت:
ما أخاف عليك
تفهمني على الطاير
Hashemy :
كل الشكر لك
لمتابعتك لمدونتي
Hashemy :
كل الشكر لك
لمتابعتك لمدونتي
ولو نونو انتي بس امري وتلاقين كل الدعم انشاله باللي نقدر عليه
تستاهلين :)
انا واحد ما عطيت بو عبدالعزيز العام
و هالكلام بلغته فيه وجها لوجه
لكن المرحلة القادمة تتطلب وجوده ليس كعضو وانما كارئيس
يعني مفهوم النجاح ليس بالعضوية وانما للرئاسة
أول شي غيري لون التعليقات
ما تبين بسبة الصورة :)
ما علي... أخيج وطلب منج ...أمون والا لأ؟
ثاني شي
مع احترامي الكامل لرأيج
وتقديري الكبير لتاريخ هذا الرجل ومواقفه (مو أنا من يتكلم عنها)
بس ممكن نسأل نفسنا سؤال:
ليش احنا نتعلق بأسماءالاشخاص أكثر من المبدأ؟
في شباب وشابات وايد عندهم نفس الطرح والافكار الممتازة... اللي هم مستعدين يشيلون لواء المعركة الديموقراطية... محتاجين فقط من يؤمن بهم ويدعمهم...
بوعبدالعزيز كفا و وفا
وحقه علينا أن احنا نريحه ونكمل المشوار...
مشوار الوطن... مستقبلنا
ديموقراطيات العالم مستمرة بتجدد الدماء فيها مع حفظ احترامهم للديموقراطية ... أساس الموضوع
أنا أحترم بوعبدالعزيز بس أتمنى صعود الخط الثاني من شباب الوطن ...مثل ما احنا ننادي الأسرة الحاكمة بوجوب وجود خط ثاني لقيادة البلد
أنشاءالله رئيس
الكويت تحتاجه
بس صوت مقطوع صعبه
ANGEL HEART:
ما تقصريــــــــــــن
و صدقيني راح تكونين في أول اللسته عشان وقت الصجيه
Enter-Q8:
بو وليد أدري أنك ما عطيته العام
و هم أدري شلون عقلك يوزن بلد
ما شاء الله عليك
عشان جذي مهم بالنسبه لي أنك تعطيه الحين
دروازة:
تمـــــــــــون و ستّه بعد
بس على بالك أعرف؟؟!!؟
خل أقول حق بيربليشوس عشان تسنّع لي أياه
====
في شباب و شابات أكيــــــــــــد
بس هذا مو معناته أن نلغي دور الكبار بسبب سنهم
أنا مو قاعده أقول لا تعطون الشباب و الشابات
اللي قاعده أقوله و أؤكد عليه
ما يصــيــــــــــــــــــــــــــر
نلغي دور أصحاب الخبره
Haneen:
أن شاء الله
بس حنين ترا أنتي فهمتي عنواني خطأ
و هذي غلطتي
أنا اللي أبي أقول له أن في يوم التصويت
العم أحمد السعدون يكون من ضمن أختياراتكم حق مرشحينكم الأربعه
و سلامتج
اختي الكريمة نانو
الحقيقة ما ودرنا وضيعنا الا تأليه الاشخاص وتنزيههم
احمد السعدون هل هو مرشح عضو مجلس الامة ولا مرشح رئيس مجلس الامة ؟؟
اللي صاير ان الاخ اذا ماصار رئيس قعد ولم بشته وقام يعد الايام للانتخابات الياية !!
هذا شخص يستحق اني انتخبه؟
بعدين وين الخبرة ؟؟
عطيني شي فادنا بخبرته فيه
الله يخليج بسنا اندفاع ووجهي الناس الى اختيار حقيقي واقعي افضل
تحياتي
Post a Comment