Wednesday, April 08, 2009

آخر مرّه




.
.
تدرون شنو هالصور؟
.
صور لحشرات في العنايه المركزه
.
بأحدى مستشفياتنا الحكوميه
.
.
والله العظيم قايله ما راح أتحلطم
.
و والله العظيم قايله بشوف الدنيا بنظره ورديه
.
و هم والله العظيم قايله بصير أيجابيه
.
.

مصدر هالصور..صديقتي..اللي بنتها بالعنايه المركزه
.
يعني أنا متأكده من مصدر الصور
.
أذا صار لها بالعنايه المركزه ..اليوم ثالث
.
و اليومين اللي فاتوا بمعدل حشره باليوم
.
و أذا بالعنايه المركزه..هذا الوضع
.
بقية المستشفى شلون وضعه؟؟؟
.
.
ودّي أقول أن هذي آخر مره باتحلطم
.
بس عارفه روحي..ما أقدر أسكت على الغلط
.
فرجاء استحملوني

50 comments:

حسافتج يا كويت said...

نانو


الله يشافيها بنت رفيجتج وشافي مرضانا كلهم


مو شي يديد على مستشفياتنا اللي
وغذا تبين الصج العيب إدارة المستشفيات

ماغير الكازو والفستق والحي الشمسي وجاي رايح وقهوة رادة


ولا يبلغون عن المشاكل اللي تصير


أخذوا تحليل دم من أحد أقاربي (الله يرحمة طبعا لأنة خريج مستشفى الصباح)
وقالوا لعامل النظافة روح ودة المختبر

قلت: هوب هوب هذا ينظف زبايل يمسح ممرات بس مايودي تحاليل؟؟
قالت السستر... منو يوديية أنا؟؟؟؟
وهي مستغربة جنة مو شغلها يعني

قال لا أنا اودية

ردت علي برد لم ولن اسمع اقبح منة

قالت سوري إيدك مو امعقمة وممنوع!!
قلت الحين بو الزبايل والممرات انظف مني؟؟؟


وصارت لوية

وليش إني احارش اينوبي لا صرت في شي حكومي وديت التحاليل بالغصب ورحت للمدير ابو الكازو والفستق




وأول ما دخلت الريال طلع كريم وشهم وقالي (تفظل )واشر على الفستق
قلتله القصة كيت وكيت

قالي ايييية روح اشتك عليهم اتصدق الصحة اذونا..عيزنا وحنا نقول لهم!!


الحبيب يبي ياكل فستق وانا اروح ادابج اعدل مستشفاه

وتاليها يترقى على افاي انا وصير مدير منطقة صحية و مو بعيدة وزير

Enter-Q8 said...

نانو
اصلا اذا شفتي الدنيا بلون وردي
تنسحب جنسيتك او انك تكوني من ذوي الدماء الزرقاء

صادف مره اني كنت مع واحد من الربع بالرازي و كان منوم هناك و انا انام عنده بالليل
لقيت اللي يصرخ
المسكين اصابه بالعامود الفقري و ريوله و حالته حاله
اشفيك
تكفى
شيل الزهيوي اللي قاعد يسرح و يمرح علي

خلاص شوفي الدنيا ورديه و الحشرات ورديه و مثل دكتور بلو جواز السفر وردي و الكويتية وردية و الانتخابات وردية
و الا اقولك خليها بمبي بمبي

KQ8 said...

انا لله وانا اليه راجعون

اللهم اشفها وعافها ومرضى المسلمين
=====

شنو نوع الحشره؟؟

وشغله ثانيه ترى النظافه بالعموم بالمستشفيات او غيرها

لج عليها...


انا مره طالعلي كرسبي بريعصي مع بطاط كنتاكي

Joonna said...

نانو
الله يشافيها ان شاء الله
شي ايبط الجبد و يعور القلب
صديقتي المقربه كانت في المستشفى في العنايه بعد اللي شفته بلاوي شي ما ينذكر اصلا في مريضه حالتها صعبه يمنا اتصرخ تبي نيرس و حاقرينها اشوفهم متيمعين و يسولفون و اهيا اتناديهم...
لما رحت و زفيتهم علشان وحده تتكرم و تشوف هالمسكينه اشفيها ... و صديقتي تقول انها من الالم ما كانت اتنام و بالزور ينومونها تخيلي ايدش عامل النظافه عليها الساعه 4 الفير و يقعدها ... اهمـــــــــــال و اللي يعور القلب ان عندنا كفاءات و دكاتره زينه بس الاهمال و البوق و الدثاره ذابحنا

Eng_Q8 said...

الله يشافيها ويعافيها

---

والله متفائله هل كيف اتصير الحياة وردية بالكويت

وتحضرني كلمات المطربه الصاعده الواعده القديره لطيفه يا ابيض يا اسود ولكن مش رمادي

nanonano said...

حسافتج:

مشكور عزيزي

صديقتي هذي لو تكتب مذكراتها مع المستشفيات

والله أن يعطونها جائزة نوبل للسلام لأنها لي الحين ما ذبحت واحد من الدكاتره

مسكينه لو يوميا أقول شنو يصير معاها محد يصدق

بس شنو تسوي..الضنا غالي
====

سالفة الفراشين هذي..شي يعور القلب

و اللي يعور القلب مدراء المستشفيات

اللي ما عندهم ما عند راشدي

nanonano said...

Enter-Q8:

بو وليد..كل شي صار بمبي و حياتك بس من الحره و القهر

nanonano said...

KQ8:

بو طارق ندري أن النظافه لك عليها بالمستشفيات

بس الأستهتار لغرفة الأنعاش؟؟؟!!!؟

شنو فرق دول عالم الثالث عنا

nanonano said...

Joonna :

تهقين شنو سر الشلليه و العصابات اللي بالصحه

اللي لي الحين محد قدر عليها؟؟؟

nanonano said...

Eng_Q8:

مهندسنا عندنا كل مقومات الحياة الورديه

ليش ما نطمح أن نصير مونت كارلو مثلا؟؟

ليش هالضيم؟

100 fils said...

مساء الخير

اللهم اشفها وعافيها وجميع مرضى المسلمين
°°°°°°°°°°°°°°°°°°°°°°°°°
مشروع استجوااااااب لوزير الصحه القادم

الله يستر

;P

Eng_Q8 said...

متأكده عندنا كل المقومات ؟

nanonano said...

100 fils :

مساء الورد

شكرا جزيلا عزيزي
====


وزير الصحه أذا بيصير من طقة الوزير السابق

الروضان

محد بأيي صوبه

nanonano said...

Eng_Q8 :

دوله نفطيه

و عدد سكانها قليل

ليش شغل دول العالم الثالث؟

ترا المفروض نظريا..أن بس جونا اللي مو زين

Eng_Q8 said...

عدد سكانها قليل صح بس المشكله مو بالعدد المشكله بمخهم والانتخابات خير دليل

اعجبتني خير دليل

Diver said...

تحلطمي على راحتج
بس ترى ماكو شي بتغير


عشان جذي السؤال شالفايدة من التحلطم او اي شي ما من وراه فايدة ؟؟؟؟؟؟؟؟؟؟؟

esTeKaNa said...

والله دمعت عيني
!!
شنو ذنب رفيجتج تحاتي بنيتها ومرضها وفوق هذا تشوف هالحشرات بمكان يفترض يكون اكثر الاماكن تعقيما ونظافه
:(
لا حول ولا قوة الا بلله
أسال الله العظيم رب العرش الكريم ان يشافي بنيتها ويطمنها عليها يارب

وتحلطمي ونا اخيتج
فضفضي
بعد شتسوين
اذا ما تكلمنا بيصير فينا شي

كويــتي لايــعه كبــده said...

الله يشافي بنت صديقتك

اذا عندك من الاهل دكاتره اسأليهم عن احتمال الـ
cross contamination
بالذات من داخل غرفة العمليات

هذا ليش الدكاتره المحترمين يوزنون الحاجة للجراحة مع مخاطر غرفة العمليات!

طبعا هذا الشيء مو موجود بالجناح الخاص بالأميري لأن الناس طبقات ولارواحهم أهميات متفاوته

مركبنا said...

حناين ...

تحملي قرارج ترى احتمال جنسيتج تنسحب !!!

ماراح تحلطمين قوية وماتصير اذا انتي كويتية !

الله يشافي بنت صديقتج ويعافيها


امر ماساة فوق الهم وصخ !!

الله يعينهم

Joonna said...

الــــســـر يا نانو ان هيبتنا راحت
اول كانت كل جنسيه مو كويتيه تحترم و تعطيج الاولويه في كل شي.. الحين السايق الهندي اتشوفينه بالشارع ايخزج و يحط عينه بعينج و يقولج اشتبين

nanonano said...

Eng_Q8 :

هاهاهاها

حتى أنا يازت لي

خير دليل

المخـــــــــــوخ..آه من المخوخ

nanonano said...

Diver :

أهوه تنفيس أكثر من أي شي ثاني

و تشود الله و رحمته أن يوصل تحلطمنا حق أحد مسئول

nanonano said...

esTeKaNa:

تصدقين بهالظروف الله يعطي على الضعف قوّه

صديقتي شافت لين شبعت

بس الله يعطيها العافيه..مستحمله
===

و شكرا عزيزتي

أنج مستحملتني

nanonano said...

كويــتي لايــعه كبــده:

شكرا جزيلا عزيزي

و راح أوصل هالمعلومه حق صديقتي

nanonano said...

مركبنا:

أبشرج اليوم لاقين حشرتين يدّد

nanonano said...

Joonna:

و بعد تبين زياده

كويتيين الحين مو نفس كويتيين أول

تغيرت نفسياتهم و شخصياتهم وأطباعهم

صاروا موديل ما نعرفه

Blog 3amty said...

الله يشافيها ويعافيها



والله ما أدري أضحك ما أدري أبجي !

nanonano said...

Blog 3amty:

مشكور عزيزي

صدّقني هذا شي من لا شيء من اللي شافته

ANGEL HEART said...

متاكده آخر مره!!
:)

nanonano said...

ANGEL HEART:

راح أحـــــــــــــاول

الراشد2009 said...

يستضيف برنامج مجلس الأمة 2009 على قناة الراي اليوم الاربعاء الساعة العاشرة والنصف مساءا النائب السابق ومرشح الدائرة الثانية علي الراشد
البرنامج من تقديم عبدلله بوفتين

{~المباركية~} said...

اقلق مستشفيات بالكويت

abu eldestor said...

عادي
شفت اشياء ثانية بالغرف
ماني قايلها
احتراما للذوق العام

jibla said...

معاشة 20 دينار بالشهر
يشتغل 12 ساعة
و يلوث بالشوارع و يسلم على الناس 8 ساعات
ويخمد 4 ساعات
يسبح في السنة حسنة
يمشي و يتفل و يمش خشمة بايده
تبينة بعد كل هللي قلتة ينظف مستشفياتنا و تلوع جبدة من الحشرات
الحشرات بالنسبة له زينة ,جنة شايف بوكيه ورد
انا ما اشره عليه ليش انه الله يلوم اللي يلومة
اشره على من يابهم و قطهم و حطهم في غير مجالهم
فقط لأنهم ارخص الموجود

nanonano said...

الراشد2009:

حيّاه الله

نشوفه أن شاء الله

nanonano said...

{~المباركية~} :

السؤال

ليـــــــــــــــــش؟

ما المفروض يصير الوضع جذي

nanonano said...

abu eldestor :

أشكر أحترامك للشعور العام

صـــــــح

ما ودنا نعرف

nanonano said...

jibla:

صح كلامك

و حرام ما أشره على هالنوع من العماله الوافده

شرهتي على مدراء المستشفيات الكويتيين..اللي ما على جبدهم خبر

طرق المعاش آخر الشهر.. وما جنهم مسئولين و لا يعلمون شي عن المسئوليه

مركبنا said...

ويه ويه ويه

اقول يمعوهم وحطوهم بقرشة
ووديهم خق افتتاح مقر الروضان (=

kuwaitawy said...

والله يا نانو مو واقفه على هالحشرات



الديره كلها يبيلها تنظيف

أبو جيج مع الورقة البيضاء said...

ماتشوف شر بنت رفيجتج


هذى ديرتج




نتحملها بحشراتها

nanonano said...

مركبنا:

وااااااي

والله خــــــــــوش فكره

يبيله

nanonano said...

kuwaitawy:

أنا معاك

بس ما يمنع أن الواحد بعد لازم ينبهه

تشود الله و رحمته

nanonano said...

أبو جيج مع الورقة البيضاء:

الشر ما أييك صاحب المعالي



عاد أنت بالذات تدري أني مستعده أني أتحملها بكل شي

بس بعد الواحد لازم يقول لازم يحجي

لازم صوتنا يــــــــــوصل

بس يوصل صح

مو مثل بو عيده

شـقـــــران said...

الغالية نانونانو

صباح النرجس الفواح

بنجورنو سنيورا نانو
:)

.
.
.


الله يشافي بنت صديقتك الكريمة..وربي يقومها بالسلامة لترجع أحسن من أول


وصدقيني..لام الله من لامك...عناية مركزة وحشرات...على قول أخوانا في الامارات...مايستوي!؟

يعني غرف العناية المركزة والعمليات المفروض تكون من أنظف وأطهر غرف المستشفيات!؟


الله يعين



تقبلي مني أجمل تحايا الصباح الرائع

سليمان القصار said...

سلام اختي ..

اهي مو راده على الحشرات والذبان إهي راده على الدكاتره اللي جنهم ذبان بس من النوع اللي يلبس روب أبيض .. والله وانا اخوج انا كنت اخذ علاج لمده 7 سنوات تالي اكتشف انه علاج بالغلط ..

ربي يحفظ ديرتي ويحفظكم

بأمان الله

nanonano said...

شـقـــــران:

معلّمي العزيز

بونجورنو سنيور

;)

=====

الصج الله يعطي الأم و الأب ألف عافيه مساكين

اللي فوق معاناتهم العاطفيه مع بنتهم

مضطرين بعد يدخلون في مواجهات

مع الدكاتره و الأداريين اللي بالمستشفى

الله يعينهم
====

من ناحية ما يستوي

كلش ما يستوي

بس ما أقول الاّ

ان شاء الله ما نحتاج لخدماتهم في يوم من الأيام
=====

و بعدين...معلمي الصعلوك

ما علي منّك

لا تقول لي مو أنت

أنا أقول أنت

لا تطوّل لو سمحت ببقية المغامره

تعلّقنا




تشـــــــــــــاو

nanonano said...

سليمان القصار:

و عليكم السلام و الرحمه

لأ فاصل الدكاتره هذا شي ثاني

نخليه أن شاء الله لما تقوم البنت بالسلامه

أن شاء الله

lawyer said...

الله يشاااااااافي مرضى المسلمين



ولازززززززززززززززم وايد تتحلطمين
عشااااااان اتنبهيييييين


وعشااااااااان بسنا سكووووووووووت عن الغلطط

nanonano said...

lawyer :

آميــــــــــــن يا محاميتنا

بس كثر الدق يفج اللحام

أخاف من كثر ما أتحلطم

يملون الناس مني

و بعدين بيني و بينج التحلطم

مال عيايز

فأنا حاز في نفسي أني وصلت هالمرحله

 
template by Purplecious