Monday, June 13, 2005

أمس جمعتنا بيت جدتي.

و نظرا لعدم تواجد أمي و خالتي داخل الكويت
كنا بس الأحفاد البنات عند جدتي
لأن كالعاده الشباب طاشين
المهم
جدتي كبرت بالسن و الله يعطيها طولة العمر
بس قامت تخوره بالأسماء
فما ناخذ منها السالفه الاّ وروحنا طالعه
و طبعا ما أقولكم اللي تسهى بوسط السالفه و تسأل سؤاال غبي لازم تنخز لأن راح تخلينا نسمع السالفه من أول و يديد
المهم...جدتي فطنت فينا و احنا نضحك
شان تقول
ويييييييييه...هذا و أنا أحسن وحده بالتثبت من شلتها مالت شاي الضحى بالفريج
و لاّ الباقي ما تقبضون منهم سالفه...على عين عيايز مضيعين
الله يخليهم لنا

12 comments:

EsTeKaNa said...

وي عسى ربي لا يخليكم
احلى شي لما اليدة تنادي
نورة
منيرة
فاطمة
وبدرية
واخر شي اسمج حنان:)
وفيج خير قولي لها ترا هذا ما يصير ولا غلط...اشعرفج انتي؟؟
وتقولج اسلالفة مليون مرة ولا تعيد سالفة انتي قايلتها وتقول مادري منو قايلي!!...يا حلو سوالف اليدات

lawyer said...

الله يخليها لج و يطول في عمرهاا .. اليداات محد يقرب صوبهم كلا اهم الصح و انتي الغلط لا و ازيدج من الشعر بيت كل شي و الا خدمهااا ...و سايقهاا و سياارتها هههههه يدتي الله يطول في عمرهاا كلا عندها محد لبس و سافر كثرها و اذا وديتها مكان يديد تقوولج وييي يايته من قبل !! تقدرين تفجين حلجج و تقولين شي !

بومريوم said...

الله يطول بعمرها
و يعطيها الصحه و العافيه..
و الله انتى بنعمه
مايحس فيها الال اللى فقد اليد او اليده:(

nanonano said...

lawyer:
oh my god...I think we r talking about the same grandmother....r we cousins

يعقووبوو said...

الل يخليها لكم (:

انا يدتي عندهاا هواية التلفون
كل يوم من الفراغه تمسك التلفون
وتدق على الناس
واتسولف معاهم شنو مسوين شنو ماكلين وجذي سوالف فاضيه
صج الملل وما يسوي (:


ماتشوف شر بو مريوم
وأنا عندك إعتبرني مثل يدك ~d:

شكراً للمساحه
ودمتم سالمين ... (:

Eagle's_Wings said...

عسى يعطينا ويعطيها طولت العمر

ويخليكم حق بعض

مع تحياتي

lawyer said...

هههههه اي الظاهر والله ذكرتيني في اليده ورحت دقيت عليها قلتلها وين بتسافرين
قالت والله قاعده ماني مسافره بس شبعنا سفرات لي امتى !!
وأسألتني انتو بتساافروون !! طبعا لازم تسمك التلفون الصبح و تدقق على بيووت خوالي و خالاتي لما يروحون الدوام عشان تاخذ التقرير من الخدم !
بابا وين راح ماما متى يجي !!
اكوو سافر في الصيف ؟؟
و مثلهااا الدايم انا ما احب اتدخل في احد بعيدين و سعيدين !!!
والله انا ارشح يدتي للانضمام الي المخابرات السريه

Zaydoun said...

عندنا وعندكم خير... وعسى الله يطول بعمر أم جاسم

مدى said...

احلى شي بالدنيا
الاجداد

الله يخليها لج انشاالله

Shurouq said...

إذا شفتوا عجوز تبتون بالشارع هذي جدتي

أمس ماسكتني بالمستشفى وتقول لي: يمه صلي.. ترى الصلاة تنهى عن الفحشاء والمنكر.. والمنكر هو المرض

أمي تقول لها: شلون يعني، اللي يصلي ما يمرض؟
ترد عليها جدتي: ليش تربطين الصلاة بالمرض؟

ما بتحطش منطق خالص
:)

الله يخلي لك جدتك نانو

Ms.Baker said...

Allah yikhalee your granny :)

we;oiru;tigjdg said...

lesh wen omech o 5altech? lykoon fe london ;p

 
template by Purplecious