Sunday, May 22, 2005

أمس من الأيام البايخه..اللي قعدت من النوم مو مقرره شنو ألبس و قعدت مدّه على ما قررت و النتيجه كانت و صولي للدوام متأخره 6 دقايق...معناته خصم من الراتب..الله يقطعهم...و بعدين دخلت بكذا نقاش مع كذا صديق و صديقه ...تعسّرت عقبها...و بعدين مديرنا اجتمع فينا أنا و زملائي و وبّخنا...و أنا مالي شغل بس حاشني طشّار....و كان مفروض أني بروح السنما مع البنات فيلم زكي شان...فعلى ما رجعت البيت و ريّحت اشويه...بدت التليفونات أترانع....طلعتي؟
يلاّ...وين وصلتي؟
وين ننطرك؟
مساكين أهمه البنات من زود الحرص...بس تدودهت....و صلنا الفيلم...و صدقوني الفيلم كان يسوى العنوه...ساعتين من القهقه المتواصله..أحنا رحنا ثلاثه...أنا و أم صفنه و زليخه...أنا و أم صفنه نستمتع بروح الفكاهه المصريه زليخه...ما تلقط شئ...فأول خمس دقايق أنا و أم صفنه كنّا غشيانين من الضحك و زليخه راحت تصلي فلمّا أقبلت علينا قلنا ويه...هذي الحين شلون راح تفهم...و من قوّة الفيلم أهيه قامت تقهقه...يا جماعه لا يطوفكم و أشوه أني رحت و غسلت كبدي عقب يومي البايخ....و ختمناها الشلّه كلها في ماكي...يالـــــــــــــــــــــــــــــــــــــــــــــــــــــذّه

17 comments:

Bo-tariQ said...

تصدقين هاذي مشكله مستعصية عند الحريم

اناملاحظها مسألة اختيار الملابس لليوم الثاني من الدوام..وما اعتقد انه لها حل الا اذا صرتي من هذول اللي يبلسون هالعباية السوده ماتدري شنو تحتها دراعه ولا صروال مكسر...

الله يعينكم

Graffitti Lloyd said...

من زمان ودي اشوف فيلم مصري بس المشكلة هني ماكو امرنا لله انقزرها على الافلام الي تنزل كل اسبوع

بومريوم said...

مشكلة التوبيخ من الصبح...

Kuwaiti_Man said...

نانو
أفلام ألحين ماصخة مثل الفيديوكليبات, يعني بذمتج إتقارنين هذا الفيلم مع

أذكياء لكن اغبياء
المتسول
شعبان تحت الصفر

أخر مرة دخلت فيها السينما (أيام العزوبية) كانت قبل الغزو بسنين, فيلم: حكمت المحكمة لفريد شوقي وليلى طاهر, اللي عمرها ما تكبر

kuwaity_ra7al said...

مشكلة اللبس مشكلة أزلية عند حواء
أما عن نفسي فما أعرف أنام إلا وأنا أدري شنو راح البس باجر وهذا افضل حل
على فكرة ترى زليخة عجيبة ضحكتني واايد

nanonano said...

Kuwaiti_Man:
صدقني هذا الفيلم غير....يعني أنا عندي المسكت أذكياء لكن أغبياء بس و الله هالفيلم يضحك...لمّا طلعت من الفيلم دقيت على أمي أقولها اللي أهيه رايحه و مكيفه عليه مع أن أهيه وايد دقيقه بالأفلام

Kuwaiti_Man said...

نانو
خلاص أبي اعتمد على ذوقج, واحاول أقنع المرة تدش معاي الفيلم ليلة الخميس, بعد مانطشر اليهال عند إخواني وخواتي

Kuwaiti_Man said...

على طاري الهدوم, أنا متعود من زمان إني أزهب هدومي من الليل قبل لا أنام, وإذا تكيسلت, المدام ماتقصر, لاني أعتمد عليها بالذوق, لأني ماعندي ذوق بتناسق الألوان, خصوصا لون الكرفتة

يعقووبوو said...

يالله ترى مشكله حتى انا لما كنت اروح المعهد

اول أيام المعهد كنت اكشخ بس اخر ايام ادور لي اي تي-شيرت وبنطرون خام اي شي وانتوا بكرامه نعال بو اصبع (:


وشكراً للمساحه
ودمتم سالمين .. (:

Purgatory said...

why do you write in different colors of the rainbow? does each color mean a certain thing?

And, laish you choose qahqaha instead of the7ek, intentional?

So you did go to maki, bel3afya :)

The Don ® said...

Purg, very valid questions !!

nanonano said...

Purgatory72 & The Don:
ما شاءالله عليكم ما تخلون الواحد على راحته...ماكو سبب معين بس أحب هالألوان

Purgatory said...

Yeah but still, odd way of doing posts :)

Eagle's_Wings said...
This comment has been removed by a blog administrator.
Eagle's_Wings said...

الله يعينج على فرقى المحبين ...ز المهم انا ادعوكم حق البلوق مالي
متواضع جدا بس انشاء الله تعجبكم المواضيع

http://eagle-wings-q8.blogspot.com/

Eagle's_Wings said...

الله يعينج على فرقى المحبين ...ز المهم انا ادعوكم حق البلوق مالي
متواضع جدا بس انشاء الله تعجبكم المواضيع

http://eagle-wings-q8.blogspot.com/

zaleikha said...

My Dear Nano,
i might be a "chicken nugget" to you, bs NEVER UNDER ESTIMATE MY INTELLIGENCE !!!!!

 
template by Purplecious