Tuesday, August 25, 2009

ليش تصومون؟

ودّي أعرف شي واحد
.
هاللي صايمين و على بالهم أنهم 
.
متفضلين على العالم بصيامهم
.
منو طقكم على أيدكم و قال لكم صوموا؟؟!!؟
.
أذا إنتوا جبناء و قررتوا أنكم تصومون عشان
.
الناس..مو لأن الصام فريضه..أقول لكم
.
راجعوا حساباتكم
.
لأن مفهموم الصيام فاهمينه غلط
.
الصيام مو بس ما تاكل و لا تشرب
.
اللهم يا كافي..الواحد أذا طلع بالسياره
.
لازم يتشهّد..لأن في ناس على بو أنهم صايمين
.
يفلخون من العصبيه..و يتصرفون تصرفات
.
بالطريج..تدل على جنون
.
وحده أعرفها..أندعمت بالشارع
.
و اللي داعمها..نزل و قام يطق عليها الجامه
.
و يصارخ لو ما أولاد الحلال تدخلوا
.
و وقفوه عند حده..مسكينه البنت زاغ قلبها من الخرعه
.
وحده ثانيه..بالطريق السريع
.
واحد قرر أن طافته اللفه
.
قرر يرجع عكس السير
.
و بالطقاق بالسيارات اللي يايه بويهه
.
و أذا حاجيتهم
.
قالوا لك صيّام
.
أذا أنت من هالموديل..أقعد في بيتك..و فكنا


32 comments:

Anonymous said...

اللهم اني صايم
ولا جان عرفت ارد

enter-q8 said...

اشوه اني مو من هالنوع بس هم قاعد ببيتنا
الا عالطاري تقولي اندعمت و هذاك معب
تبي تفهميني او تقنعيني انها مو غلطانه لالا معليش حاكي عقالي

Nikon 8 said...

أعرف واحد من هالنوعية
طول شهر رمضان ياخذ إجازة
وما يطلع من البيت إلا بعد الفطور
تصدقين حتى الكلام يخاف يتكلم ويجوع
لوووووووووووول

Eng_Q8 said...

الحين انتي صايمه ومعصبه !! ما يصييير :p

nanonano said...

maqhor:

بالفطر أنت ما تنتحاجى

الحين و أنت صايم

لا يحوشك

nanonano said...

Enter-Q8:

والله العظيم أنها مو غلطانه

و أشوه أنك قاعد بالبيت..لأن جان عصاتك..ملبلبه وايد ناس

nanonano said...

Nikon 8:

شوفي هذا أنسان حاشم روحه و عارف قدراته

بس المشكله باللي متمننين علينا بصيامهم

nanonano said...

Eng_Q8:

أبشرك لما كتبت الموضوع ما كنت صايمه

يعني وضعي الحين كبريت

بس ما أعيل على أحد

أسكت و أقعد

Blog 3amty said...

يمكن محصور مو صايم !

Purplecious said...

اي و الله عدل كلامج

وللأسف المسلمين عبالهم الاسلام بس بالعبادات و نسوا الأخلاق .. برمضان و غير رمضان

الدين المعاملة


هذه الحالة لازم نسميها
DWF = Driving While Fasting
و يتعاقبون عليها

nanonano said...

Blog 3amty :

هاهاهاها
هاهاهاها
هاهاهاها

هذا عذر يديد

عيل أشوه بس قام يطق على الجامه ما سوا شي ثاني

nanonano said...

Purplecious :

Bonjour

حلوه
DWF

الصج أبتلشنا بهالنوعيات

المشكله يعيلون

bent el deera said...

عدل كلامج .. وايد اكو ناس من هالاشكال
كلنا صايمين بس محد يسوي ينونهم شوي ويتهاوشون مع ذبان ويهم

المهم

مبارك عليج الشهر وتقبل الله طاعتج وكل عام وانتي بخير :>

SHOOSH said...

ألحين اهو اللي داعمها و إلي يصارخ عليها

لوووول

انا والله اتنح و آنا أسوق

بس شسوي مووو بيدي

قومة الصبح عسره

ما أدعم

بس أطق هرنات بالغلط

nanonano said...

bent el deera :

أهلا و سهــــــــــلا

علينا و عليج عزيزتي
====

الأذيه لو على نفسهم بس..جان كيفهم

المشكله أذيتهم توصل حق الآخرين

nanonano said...

SHOOSH:

تصدقين عيل أنا مو قومة الصبح

أنا عسارتي تطلع بطلعتي من الدوام

من كثر ما أكون دايخه أسوق ٢٠ أغمض عين و أبطل عين

حسافتج يا كويت said...

انا صايم بالظهر

وقاطع زقاير بالليل


يعني لحد يجرب يمي هاليومين

راسي اب ينفجر

قاطع زقاير وقهوة

فحتى بعد الفطور احس فيني حرة
وهم صاير ابلعها

وساكت وابتسم

يعني قاضب عمري وصاير مشروع ارهابي رابط حزام ناسف

وياويلة اللي بنفجر اب ويهة

الله يستر واكمل لين افتك من هالزقاير

ANGEL HEART said...

اي والله معاج حق يعني انت صايم الناس شكو ليش تحط حرتك فيهم

انا وحده اتجنب كل شي حتى طلعاتي مع السايق من الخوف ههههه

جبريت said...

انا من ربع البيت حى لو كنت فاطر طبعي الهواش فخلوني على البيت كافي خيري شري برمضان

عاجـل said...

وهذولي نفسهم هم اللي ما يدرون ان في عيد جاي
ولازم يشترون اغراضه من الحين مو قبل العيد بيوم

وهذولي نفسهم اللي يرفعون نسبة الحوادث قبل الفطور بربع ساعة لانه دايما يتفاجا ان الآذان ما بقى عليه شي

يا ستي ارمي ورا ظهرك
واحتجبي بالبيت قدر الإمكان
اريح للقلب

كويــتي لايــعه كبــده said...

عندي سيارة مخصصة لمثل هذه النماين

لكن هم لي طلعت فيها ما اتبلى على خلق الله... لكن اللي بيجرب حظه حياه الله
:)

راي عاجل هو الصح
يا زين البيت برمضان والعيد وبالمناسبات بشكل عام
وفي حال الطلعه طلعي قبل وقت الفطور بفتره وتفادي أوقات طلعة الناس الجماعية

اذا تبين سيارتي
آمري عليها وهي تحت أمرك
(محد يقرب)
:)

أندلسي said...

تصدقين انا اتنرفز بسرعه بس اذا صمت اصير هادي جدا :)
واليوم كنت في مكتب مديرنا ووقفتني السكرتيره وقالت ان في شخص تهجم عليها بالكلام قتلها وينه اشرت على شخص رحت وكلمته وقتله لازم تنطر دورك وفي ناس يايين قبلك
رد علي بانه صايم فقتله كل الموجودين الحمدلله صيام جان يقول لاا من يقول ؟
قتله انت صايم عن الاكل بس ؟
خل لسانك يصوم وياك يا الحبيب
بعد فترة اتصلت الزميلة تشكرني على تهدئة هالصايم وقالت شي ياكد الكلام الي قليته
تقول ان هالشخص كان يقولها انا الحين بقابل الله ولا المدير انتي ليش تبيني اكفر ؟؟!!


شي عجب

nanonano said...

حسافتج:

أذا أنتو مو قد قطعة السجاير ليش تقطعونها؟؟؟!!؟

و تبلشون حريمكم مساكين فيكم

أنتو و أنتو صيام الواحد يالله يحملكم

nanonano said...

ANGEL HEART:

هاهاهاها
هاهاهاها

على طاري السايق

أنا حتى سايقي منفّس علي..شكو؟؟
خو ما تصوم

nanonano said...

عنيف:

الحلو فيك أنك عارف قدراتك و حاشم روحك

nanonano said...

عاجــل:

أهلا و سهلا

على بالك أنا ما ودي أحتجب وافتك

بس أحنا بالكويت..ما يخلونك تهيع

nanonano said...

كويــتي لايــعه كبــده:

مشكــــــــــور

على عرض السياره

بس هم أرد و أقول لك مثل ما قلت حق عاجل

أذا باقعد و أهيع بالبيت
تطلع لك الوالده..و تسأل مريتي على عمتج؟ مريتي على عمج؟مريتي على خالي؟
و تعال حوس بالشوارع

nanonano said...

أندلسي:

والله زيـــــــــن

أخيرا لقينا أنسان عاقل و أهوه صايم

خبرك أنا جميع المدونين و المدونات اللي معلقين..تقدر تقول كباريت

صوت الكويت said...

شوفي هالنوعية عدل إذا صار رمضان بنص شهر 7

الدســتور said...

على هالاساس
انا ماخذ اجازة وطول النهار بالبيت

مابي ارد على عصبية احد

يا زين القعده

حسافتج يا كويت said...

نانو

عيل نموت من الزقاير ونرمل حريمنا واعيالنا؟؟



لازم نقطع

elq87obi said...

نانو

من صجج هذا و لا شيء

الاعصاب عند الناس شيء مو طبيعي

عاد ليش المفروض الواحد يكون هادي و ماله خلق و ما عنده طاقة للهواش و الاعصاب لأنه صايم بس العالم ماشين بالعكس

عالعموم مبارك عليج الشهر

و تقبل الله منا و منج صالح الاعمال

سلامي لج :)

 
template by Purplecious