Tuesday, December 30, 2008

مسكين

أنا فيني طبع
.
لما أداوم من الصبح..لازم أصبّح و أسلّم على الكل
.
من الحراس اللي واقفين بالمواقف..لين أوصل مكتبي
.
أشوفها مو حلوه أني ما أصبّح
.
عاد ساعات يصادف أن معاي بالأصنصير ناس
.
هم أصبّح عليهم..أنا و حظي
.
شي يرد بابتسامه..و شي يرد منفّس..و بعضهم يحقر
.
كل هذا و أنا ما عندي مشكله
.
وين يت مشكلتي؟
.
قبل فتره يابوا حارس يديد بالمواقف
.
و طبعا كالعاده بلّشت أصبّح عليه
.
المسكين أستانس
.
فبدا ياخذ و يعطي معاي
.
أول مره كانت بأجازة العيد
.
و أنا طالعه..ياني و سألني
.
أنت وين يروه في أجازه؟؟؟
.
طالعته..و قلت له مايروه..أنا يقعد
.
طوّفت السالفه
.
ذاك اليوم من الصبح..هم ياني و قال لي
.
جم فلوس حق سياره مال أنتي؟
.
الحين أنحرجت..اي شي باقوله بيصير وايد
.
جان استعبط
.
قلت له مو أنا يشتري..هذا زوجي يشتري
.
أنا ما يدري
.
عقبها استاحشت منّه
.
و قررت بيني و بين نفسي أني اشيّن النفس عليه
.
عقب..قلت..مسكين ليش أظلمه؟
.
بالنهايه أهوه أنسان..ليش أبدّي سوء النيه؟
.
يمكن مسكين أستانس أن في أحد أحترم أنسانيته
.
و سلّم عليه..عشان جذي..مسكين قرر أن يسولف شويه
.
تعوّذت من أبليس..و رديت أصبّح عليه

54 comments:

enter-q8 said...

صباح الخير مدام اشلون انتي زين
كم مقاس مال جوتي مال انتي
باكر بيسألك هالسؤال
ترى ما اساله استعباط
خصوصا الجواتي عزك الله هالايام موضه

Unknown said...
This comment has been removed by the author.
Unknown said...

run my dear friend run its a fatal attraction from the glenn close kind ........looooooool hehehe

Unknown said...
This comment has been removed by the author.
Anonymous said...

أخلاق يا نانو أخلاق


فعلا في ناس ماينعطون وية وناس مساكين

الزمن كفيل تعرفين إن هالناس مساكين ولا ملاعين


ولازم لازم سورة الفلق تقرينها يوميا

a7ibich yl KWT said...

الصراحة ودي اقولج ديري بالج
هذول ماينعطون ويه
حرام الواحد يسلم بس في ناس تفهم غلط
يعني عشان تكونين بالسيف سايد سلمي و امشي سوي روحج مستعيلة او سوي روحج تتحجين بالموبايل عشان لايمصخها زوود

انا في واحد راعي بقالة اسلم عليه كل يوم تالي دزلي رقمه مع ال
Tea boy
يعني انتي نيتج طيبه بس في ناس نيتها شينه

honey said...

مساء الخير

والله أنا بالجامعة مثل حالتج أسلم على الشغالات بس اكو وحدة قامت تقضيبني 5 10 دقايق تسولف
و انا ما افهمها و ما عرغ أفول انا متاخرة

قمت أسلم من بعيد و أشخط بسرعة

Bloggerista said...

صج مشكل

قوية ترى يسأل السيارة بجم

انا لو مكانج ارد اسلم بس من غير ما ابتسم

Q8EL5AIR said...

على راسي والله يا مثال الاخلاق ..

خوش عادة .. انا اسويها بس طقه

وطقه !!



بالعكس هذا مسكين قاعد بغربه وبعيد عن اهله .. وتلقينه قايليله ربعه ان الكويتيين منفسين وكله يشوفون روحهم .. وخصوصا على الهنادوه والبنغال ..


فالمسكين ماصدق احد يسلم عليه كل يوم .. لا وكويتيه بعد !!


واذا تعده حدوده بالاسئلة فوقفيه عند حده .. وانتي حطي الخط الفاصل !!


مو تقطعين السلام .. مسكين !!



وياليت الناس يقتدون فيج .. نادر الي يسلم هالايام على الكويتي .. فما بالج بغيره :)


وتحياتي ..


ويسلموااااااااااااااا :)

عثماني said...

عدل شغلج نانو

الغريب ان اكو ناس يترفعون عن باجي الناس

والكويتيين الله خير فيهم هالخصلة الوصخة

الا ذاك اليوم معاي واحد طقته البوهه ليش صافحت الفراش .. شكو

nanonano said...

Enter-Q8:

هاهاهاهاهاها
هاهاهاهاهاها
هاهاهاهاهاها

أبا الوليد جنّك أنت اللي بداك الخراف..قبلي

nanonano said...

mosan mosan:

hi darling

miss u

لو لي الحين قاعد معاي..جان ما خفت

nanonano said...

حسافتج يا كويت:

أكيـــد المعوذات ثلاثتهم من الصبح

هذي المشكله..قمنا نبدي الشينه قبل الزينه

Purgatory said...

Maybe you say it in a friendly way

nanonano said...

a7ibich YL KWT:

عاد ما تتخيلين مدى جدية ويهي لما اسلم..يعني كلش ما أندقل..بس هذا الظاهر حده تملل و قال خل أسولف شويه

mantovani said...

لا

خل بولي ترى هذول ملاقيف و ينقلون كلام

انا ما اقول لج تكبري عليه و لا تسلمين

لان السلام لله

لكن لا تخلينه يتجرأ يسألج اسئلة خاصة

===

بالمناسبة

شنو سيارتج ؟؟؟



مانتوفاني

nanonano said...

shahad:

أي أيام الجامعه..في وحده كانت تحازيني عن عيالها

و عقب تطلع تبي فلوس

عاد جان أحقرها

ما أحب أصير مقصه

ناصر الكويت said...

مافكرتي تعطينه فلوس

حياتي هدف مو عبث said...

قوليله بابا كم معاش مال انتا

why me said...

عادي

انا بالدوام مره اخوي وصلني الدوام


دق على واحد من المحاسبه قالي منو اللي وصلج؟؟



جيكي ان اللي داق علي واحد مو وحده


هذا وانا ما اسلم !!

nanonano said...

Fashionista:

تصدقين كسر خاطري

و فشلت بعد

nanonano said...

Q8EL5AIR:

لا..اللي سويته..بالطلعه أطلع مع الشباب اللي معاي بالأداره..مره مرتين..مسكين قام يسلم من بعيد

nanonano said...

عثماني:

تدري شنو اللي يحرني صج

أنهم أنتقائيين في ترفعهم

يعني ممكن هالناس اللي ما يتنزلون يسلمون على فراش..نفسهم تلاقيهم يغلغسون حق واحد ثاني عنده فلوس أو أسم مشهور

nanonano said...

Purgatory:

nop it has nothing to do with the way i say it

nanonano said...

mantovani:

لأ..ما اقدر..ما اصبح..فشله

=====

هاهاهاهاها

سيارتي عاديه مو شي مهم

nanonano said...

ناصر الكويت:

لأ..و عموما..أنا أعايد فيهم كلهم بالعيدين

nanonano said...

حياتي هدف مو عبث:

لأ..ما تطلع مني..عاد ليش آخذ و أعطي معاه..كلمه و رد غطاها

ZooZ "3grbgr" said...

ههههههههههههه

ذكرتيني بواحد

لحقني للمواقف

جان يقولي أبي أصور سيارتج

قلتله صور تفضل

جان يقولي لأه عاوزك تكوني فيها

أبعتها لأمي بمصر

يالهوي شهالعبوووو

لوووووووووول

وماكو فايده ليلحين اسلم مثلج عالأولي والتالي

لا تشوفين لي مريت يم شباب بنفس البرج اللي فيه دوامي وسلمت " السلام عليكم" وآنا اللي ماشيه

تلقينهم بققوا عيونهم منصدمين

وماراح أوقف

:")

nanonano said...

why me:

هاهاهاهاهاهاها

شـــــــكو؟؟؟!!؟

قوي الحبيب

nanonano said...

ZooZ "3grbgr":

هاهاهاهاهاها
هاهاهاهاهاها
هاهاهاهاهاها

قويــــه قصتج

و برافو عليج..الواحد يسوي بأصله..مو مهم أهمه شلون يفسرونها

why me said...

لووووول


اي والله حده قوي


انا اصلا انا حزتها


انصدمت + انصعقت


شكـــو !!

الدســتور said...

يدل من طيب أصلج

شقران said...

العزيزة نانونانو

قلبك كبير يالغالية


تحدث معي نفس المواقف...لأنني أحرص كثيرا على السلام على العمال في العمل لأن السلام والكلمة الطيبة تخفف عنهم مايعانونه من مر الكفلاء وشركاتهم

ولكن لكل شيء ضريبة...فمكتبي تحول إلى مركز لحل المشاكل
:)

يعني تقريبا كل اسبوع لازم صايرة مشكلتين ومايعرفون غيري

من المشكلات الغريبة كانت منذ اسابيع قليلة ،،دخل علي أحدهم ليخبرني أن العامل الفلاني قبضت عليه الشرطة لأنه يبيع خضار بعد الظهر!؟

حاولت أن افهمه أن هذا الأمر ليس بيدي

فرد علي:بابا سوي واسطة ، كلم نفرات

حاولت أن أساعده عبر أحد الاصدقاء لوجه الله ولكن سبق السيف العذل وتم تسفيره


ختاما
صدقيني (وأعرف أن قلبك كبير وأكبر من قلوبنا) هؤلاء يعانون من مشاكل كثيرة وكبيرة والقاء السلام والتحية عليهم لها في قلوبهم الشيء الكبير

واصلي هذا الطبع الجميل والذي يدل على حسن سرائركم وصفائها




مع وافر الأماني الطيبة

nanonano said...

abu eldestor :

شكرا جزيلا

بس تصدق أن ماله شغل

يعتمد على الشخص نفسه

مثلا أختي هذا من أسباب هوشاتي معاها

لأن أهيه تعتقد أن ماله سالفه أني أمشي و أصبّح

تقول لي ليش تصيرين حليوه..و أنت الصج كلش مو حليوه؟؟!؟

هاهاهاها

و هذا الصج أنا كلش..كلش مو حليوه

nanonano said...

شـقـــــران:

معلمي الكبير

أصلا من كتاباتك..ما كنت أتوقع منك غير هذا السلوك

لأنك تمتاز بأنسانيه عاليه

و تحياتي لك

Unknown said...

أموت أنا في الإنسانية اللي كده

لووووووووووول


المهم مديرك يصبح عليج بالإسم ؟ هذا المهم

:)

Someday said...

mashallah 3alich walla

allah eyfare7 galbich
he is probably shocked, ehny ppl 7ata among themselves ma ey3arfon el salam!

nanonano said...

قطة مقطقطة:

ما يجرؤ مدير مديري بعد ما يصبح علي بالأسم

nikon 8 said...

بعد لو حاصل حارس مصري جان سلامات وتعظيمات والقاب تشرح الصدر من صباح الله خير ... عموما التواضع جميل والسلام شي أجمل ... ولكن هناك جنسيات آسيوية لا تعرف حدودها وهنا المشكلة

nanonano said...

Someday:

تصدقين صح..من أبتسامته يبين أن أستانس

مساكين والله تخيلي..أن أحد يسلم عليهم يستانسون

nanonano said...

nikon 8 :

هاهاهاهاها

مال الأستقبال من الحراس المصريين

يعني كشخه

هذا قصته قصه

لقافته مو معقوله

اللي ساعات أضحك بويهه من لقافته

مره دخلت البنايه و أنا منتشله حدي..و عيوني وارمه

بالضبط جني باكيه و داخله

الله..في حاجه يا فندم..بتعيطي ليه

العن خيرك..أنا زوجي مو ملاحظني كثرك

nanonano said...

nikon 8 :

بس هم أصبح عليه

أنا أموووووووووووت على المصريين

Kaadi said...

اي والله احسن شي انج نسوين روحج مشغوولة حدج و تمشين !!

لانهم مساكين موشايفين خير و شياطين !

Snow White said...

والله أنا من المواقف اللي صادفتها وسمعتها قمت ما أسلم إلا على الناس اللي أعرفهم

لأن في ناس فيهم بلاغة شف وتبي تعرف معلومات شخصية عنج وعن أهلج وانتي على نياتج وممكن تستغلج وديري بالج من العمالة الآسيوية خاصه البنغال مشاكلهم وايده

:)

LiL ALiEN said...

يالله كلها شهرين وتحصلين هدية فالنتاين منه

:P

bo_sale7 said...

شوفي مع اني واحد اجتماعي واغلب الوقت متواضع بس دايما حطي ببالج انه الناس تختلف باختلاف البيئة
واحد ما ندري شنو خلفيته الاجتماعية اتيي وحدة تسلم عليه كل يوم فاحتمالات تفسيرها بالنسبة له ما تكون دايما طيبة
يمكن يشوفج عبيطة علشان جذيه بدا يتمادى او يمكن يشوفج خفيفة علشان جذيه بدى ياخذ ويه بالسوالف بس الاكيد انه مو شايف انج طيبة
فالحذر مطلوب
لانه في بعضهم يسولفون حق بعض وينتشر الخبر بينهم وتلقين جماعات جماعات تطلب المعاملة بالمثل عاد حليها حزتها :)

Mok said...

هالامورتصير فيني

هي مجرد يحاول يتقرب لمصلحته

باجر راح يقولج يبي 50 دينار او كرت زيارة لرفيجه والخ

nanonano said...

bo_sale7:

شكرا جزيلا على النصيحه

عاد تصدق أني كلش مو أجتماعيه

بس سالفة السلام لازم أسلم ما أقدر

بس راح أحط بالي

nanonano said...

Mok:

شفت شلون قمنا نبدي سوء النيه..بدال لا نفترض أن مسكين

أكيد يبي منا شي

و هذا غلط

nanonano said...

Kaadi:

أن بهالنقطه أختلف معاج..ليش أبدي سوء النيه..أنا معاج بعضهم حدهم شياطين..بس مسكين هذا ما بدر منه أي شي يخرعني منه

nanonano said...

Snow White:

أنا معاج..بخصوص الناس اللي أعرفهم و بيني و بينهم علاقه..بس مسكين هالحارس الآسيوي..ليش أخاف منه؟ و أنا أصلا لما أطلع عادة أكون محاطه بزملائي بالشغل

nanonano said...

LiL ALiEN:

تهقى؟؟؟!!؟

أنا الحين حتى زوجي ماني ضامنه هدية فالنتاين منه

Fankooshy said...

صباح الانسانية نانو

nanonano said...

Fankooshy:

صباح الخير والحب فنكوشي

 
template by Purplecious