Monday, December 29, 2008

من حيلي لي قبيري

قبل جم يوم دار نقاش بيني و بين البنات صديقاتي
.
أنا طرحت سؤال
.
شنو تفضلون..هل تفضلين موضوع الخراف
.
و لا تستمرضين بس عقلج معاج؟
.
أنا وجهة نظري..كانت أني أبي أخرف
.
مابي أحس باللي قاعد يصير دار مداري
.
بس البنات كلهم خالفوني الراي
.
و بمعنى أصح أستهجنوا الفكره
.
أول وحده قالت..ما تبي تخرف.. تخاف أن جناينها
.
يضحكون و يتطنزون عليها
.
الثانيه.. و أهيه مو متزوجه..ما تبي..تخاف
.
الخدم يلعبون بحسبتها
.
الثالثه..خافت..زوجها يتزوج عليها
.
و تييها شريجه..تحسر فيها
.
تقريبا كلهم أجمعوا على موضوع من حيلي لي قبيري
.
و أنا الصج كنت أفضل أني أخرف..لأن تروالي أريح
.
و خل زوجي و بنات خواتي يعابلون فيني
.
بس لما سمعت أسبابهم..الصج اقتنعت بوجهة نظرهم
.
فانضميت للشله
كلنا أتفقنا على أن نشتري لنا عماره بالجبل
.
بلبنان ..حق البراد..و عقب كلنا نسكن مع بعض
.
و ممرضاتنا معانا
.
و العيال متى ما أشتهوا يمرون علينا
.
أحنا موجودين قاعدين بالبلكونه
.
اللي دربها يمها..و اللي جهازها التنفسي وراها
. 
و النيرسات اللي تدز هذي بالكرسي
.
و اللي تساعد الثانيه على صعدة الدرج
.
و لأن بلبنان ما راح نخلي..نييب الحلاقين لنا بالشقه
.
يعابلون  و ينفشون بقايا شعورنا..و تضيع الصقله
.
المهم أن نكون كلنا مع بعض نونس بعض
.
 وما ناكل قلب عيالنا علينا..مريتوا و لا ما مريتوا
.
و أذا وحده زاد عليها المرض..كلنا راح نكون
.
موجودين حواليها..عشان نفتي
و كل وحده تييب من راسها صوت
.
فاللي يبي ينضم لنا من المدونات
.
بادروا من الحين بحجز أماكنكم معانا
.
لأن الأماكن محدوده

55 comments:

Miznah said...

انتوا اب هالحاله ما فيكم حيل! يعني ما ينطبق عليكم المثل

انا اتمنى ما العوز احد معاي ولا اتأذى
لذلك
احبذ اموت بكامل قواي العقليه.. والجسديه

!و يالله حسن الخاتمه

enter-q8 said...

ههههههه
نانو
ابشرك
هذا بداية عوارض
التخريـــف

Gee™ said...

اي والله يا ريت تسوولي مكان معاكم
:p

اهو الزين بالمرض ان اجر
يعني نكون كبار ومافينا حيل
تلقين الي تصلي واهي قاعده والي ما تعبر تصوم

فا المرض يعوض شوي
;p

يالله حسن الخاتمه

Q8Sky said...

والريال مسكين ان خرّف ومرته لعبت ابحلاله ولعبت اب حسبته؟

مسكين الريال مسكين مسكين مسكين

TReSTeN said...

حتى وانتم مخرفين تبي تعجئووون لبناان

بس اتوقع اذا النييرس لبنانيات

رااح تردوون من خرفكم

وازواجكم وعيالكم مجاابليينكم طووول السنة

ولاّدة سابقاً ... رانيا السعد ...رانية المنيفي حسب الأوراق الرسمية said...

فكرة ممتازة
بأحجز وأدفع مقدم بس أبي غرفة شرحة ودرايشها كبيرة
السؤال: تسمحون بالشياب..علشان أجيب الشويّب مالي...أونس لنا
على الأقل نلاقي منو يصالحنا إذا تزاعلنا
:)

Zaydoun said...

انا عن نفسي ودي اتقاعد في بيروت.. فاذا
اشتهيتوا تنزلون تغيرون جو حياكم الله عندي انتو والممرضات... وانا بعد اطلع ازوركم من وقت الى وقت وخاصة لما ترتفع الرطوبة والخيسة في الصيف وتصير بيروت ما تنبغى

أتيت متاخرة said...

سجلوووووووووووووني معاكم
أبي أعيش حياتي بعد التقاعد وتزويج العيال
وخوش مكان
لبنان

nanonano said...

Miznah:

الله يهداج مزنه..تموتين بكامل قواج الجسديه..يعني الحين

مزنه عزيزتي..لازم نعترف..المرأه بعد ٤٠ كل شي فيها يبتدي يتحتحت..طبعا هذا يعتمد على نوعية المرأه و نوعية حياتها..
life style
مالها

بس بالنهايه يا عقلج يا ركبج يا صمام القلب..يا هشاشة عظام..لازم يكون في شي..فأحنا أخترنا نحتفظ بالعقل..على الأقل ما نقعد نخمبق جدام الله و خلقه

nanonano said...

Enter-Q8 :

هاهاهاها

لا تقــــــــــــــــــول

لا أشدعوه

أحنا بس ناس منظمين

نبي نرتب أمور حياتنا و أحنا عقولنا براسنا و نعرف نوزن الأمور

أحسن من لا عقب عيالنا يعورون فينا

nanonano said...

Gee :

والله شكلج ياغ غدور بتصفين مع شلة الدينات اللي بالشله

عندنا جم وحده دينه

هذا بيكون ركن بروحكم

البقيه و حياتج سباق بالويل تشير على البلكونه..لما تهف وحده بالوادي..يمكن نيوز

nanonano said...

Q8Sky :

الريال أن خرف؟؟؟؟

الرياييل أسم الله عليهم ما يخرفون كثر الحريم

الحريم مساكين اللي يخرفون بسرعه من كثر ما رياييلهم ماكلين قلبهم فيقررون أنهم يخرفون أريح لهم

أحنا اللي مساكين

ماكلين قلوبنا

nanonano said...

TReSTeN:

هاهاهاهاهاهاها

أي والله حتى و أحنا بهالعمر نبي نعفسهم

بس لا تخاف..الممرضات لبنانيات

دارسين الموضوع زين

مو بس عشان رياييلنا و عيالنا أيونا

عشان يعابلون فينا

و خبرك اللبنانيات مرتبات و شغلهم كله نظيف

يلبسونا ألوان متناسقه

يصبغون أظافرنا

يروحون يحوسون و ييبون لنا الحلاق الزين

nanonano said...

ولاّدة:

آآآآآآآآآه منكم يا الكويتيات..حتى و أنتو بأرذل العمر التشرطون

و بعدين ما عندنا رياييل بالعماره

ما لنا خلق كلام الناس

هاهاهاهاهاهاهاها

خبرج راح يكون لي الحين على بالنا أن الناس بيحجون فينا

nanonano said...

Zaydoun:

أنا بعد في راح يكون عندي شقة في بيرت

عارفني ما أعبر على الجبل

أموت على الهيله

وي..حياك الله

خو أنت عارف الشله كلها

و خابرها زين

nanonano said...

أتيت متاخرة:

حياج الله

شكله العماره راح تقلب مشروع مجمع

بس هم زين

Blog 3amty said...

ياالله أخذني بصحتي ولا تعوزني حق أحد

Mok said...

الخرف احسن بس بشرط ما تحسين في

mantovani said...

افا , بس حريم ؟؟



مانتوفاني

nanonano said...

Blog 3amty:

هذي النقطه.. أن الله لا يحوجنا حق أحد..عندنا رواتبنا التقاعديه..و نعيش معززين مكرمين بتقاعدنا

nanonano said...

Mok:

لأ..أحنا هونا عن موضوع الخراف

الحين تشوقنا حق موضوع العماره و نعيش مع بعض

nanonano said...

mantovani:

والله شكله الموضوع بيقلب و يصير مجمع للمتقاعدين..عاد ذاك الوقت تصير بناية حق النساء و بنايه للرجال

عشان بعد هم اللي مشتهي الحموضه

يقدر ينزل الحديقه

تصدق جنه خوش مشروع

مركبنا said...

انا جداتي وحدة كانت تهتم وايد بصحتها
والثانية دايم تدعي هل الدعاء

تصدقين الي دايم تدعي من حيلي لي قبيري ماتت وهي بقوتها وعزتها
الله يرحمها كانت حبيبه ويرحم جميع موتنا

والثانية جددتي الله يطول بعمرها ويخليها لنا بركه
خرفت بس صحتها معاها
تعور القلب شلون هذيك الشخصية القوية الانسانه العاقله المدبرة هذا

حالها اللهم لا اعتراض

عوتي قلبي بهل موضوع

Miznah said...

حرام عليج! 40؟

صح اللايف ستايل يلعب دور و الجينات اكيد
و ابر تنشيط الخلايا هم تلعب دور اكبر
:)

الدســتور said...

الله يعطيج طول العمر

و تظلين ذخر للمدونات

Bloggerista said...

موضوعج يخرع :/

المفروض يعني انه مضبطين أموركم بالجبل بس حتى هالفكرة خرعتني

ZooZ "3grbgr" said...

مابي اخرف
يمه
حسيت بفاشونيستا
يخرع الموضوع
يارب الصحة والعافيه
واخذنا واحنا صاحيين
اصلا نعمه الانسان يعرف انه كبر
ولا يموت واهو ما يدري اهو عايش من فتره

نانو لبنان ما زرتها
بس حجزولي معاكم خل اشوف
اهي اونس ولا نابولي
هههههههههه

Anonymous said...

نانو

يااللة حسن الخاتمة

مخرف ولى مخي معاي مو مهم المهم إي اموت وربي راضي علي


الدنيا ممر من العدم إلى الجنة والحور العين

او النــــــــــــــــا

فعشان جذي كلش مايهمني مخرف ولا من حيلي لي قبيري

وبعدين لا خرفت خل يداروني
ياما دارينا اهلنا

بس المهم شي واحد عند الشيخوخة
ان لا ابحث والهث وراء الاموال او اخوره اخر عمري

العبرة بالخواتم
ويبعث المرء على آخر فعل فعلة بالدنيا

ومثل ما قلتلج الدنيا ممر

وموعدنا يا رب مثل ما وعدتنا بالجنة والنهر المملوء بالخمر إنشاء اللة بتلاقوني مطيح بالنهر ادردب
ويمي الحور

100 fils said...

hehehehehe :)

الله يبعد عنكم المرض و ماتشوفون الا الصحه و العافيه طول عمركم..بس الصراحه عجبني وصفج الوضع بالعماره حده ضحكني لانه قعدت اتخيل المنظر حده فيلم

من احلى البوستس الي قريتهم
:)

Unknown said...

يهمني أموت و أنا فاهمه صح لأنه حاجة تكسف قدام ربنا أبقى ميته على حموريتي لوووول

أما لبنان فما يخبرني عنها الأهل إنها كانت شئ غير معقول في زمن الستينيات و السبعينيات ومهما حاولو يرجعوها ما بيئدرو خلااااص و بس أنا ما حبيت لبنان صراحه و اشوف أهلها مليقين و يبيعون الهوااا لووول

والبلد العربي اللي ممكن أقضي فيه وقت طويل
هو تونس بلد مريح ومحايد وشاري دماغه و مدلع نفسه ! وخاصة إنهم يقولون يعني إن فيني من شكلهم لأن يقولون عاد* إن جمالي إحمم فيه من تونسي مخلط بإيطالي على شوي إصباني وحتة برازيلي لوووووووووووووول عجيب هالجمال

:b

@alhaidar said...

هههههههه الأماكن بس حق المدونات ولا يصير مدونين ؟

بس اختيار لبنان والجبل فعلا موفق ..

حتى عيالكم راح يستانسون كليومين على ابو بيطمنون عليكم رايحين لبنان ;P

وبيدعون لكم بعد شتبون :))

بعيد الشر عن الجميع انشالله

honey said...

هذا دعاد يدتي الله يرحمها ما يطيح من إلسانها
و فعلا على نياتكم ترزقون ، ماتت بفراشها و عمرها ما اعتازت أحد!

أما في وحدة كبيرة بالعايلة الخراف و النسيان كلى راسها
اتعور القلب قام اييها اكتتئاب ، تنسى إن أحد كان عندها ن تنسى إن عندها فلوس معنها غنية ، تقعد مع الأوادم و يضيق خلقها فجأة ناسيه منو هم ، و عشر مرات باليوم اقولون لها فلان و إلا فلانه توفت و تصيح ما جنة ماتوا من دهر

ليش أروح لبنان ؟ بصير مثل الأجانب أخشلي همجة فلوس و خلي شاب حلو صغير يطمع فيني حتى لو لبناني و يونيني بآخر ايامي
;p

nikon 8 said...

نييب الحلاقين لنا بالشقه
.
يعابلون و ينفشون بقايا شعورنا
لوووول ... صج ضحكتوني
تبون تنافسون صباح بعقر دارها
:)

Reflections said...

أنا

معـــــــــــــــــاكم
معـــــــــــــــــاكم
معـــــــــــــــــاكم



(هذي حجوة امي (من حيلي لقبيري
@@ !لا يكون أمي بلوقر

nanonano said...

مركبنا:

أنا آسفه مو قصدي أعور قلبج..و لا يضيق خلقج

بالعكس..أنا قاعده أبين لج أن لنا مستقبل وايد أحسن من يداتنا

chandal/danchal!! said...

هالموضوع مسببلي قلق!! سالفة تكدر ولا مفر منها!ما نبي خراف! في نوع عنيف!! يعض وكلا منحاش بالفرجان يحوس!! يصير فيهم قوة!!محد يقدر عليهم!

لا لا لا مابي لبنان! نقعد نلوث بسكيكهم و فرجانهم والا اللي صحتها مساعدتها توصل لين الأشرفية لول--- انتضايع وتقعد وحدة تدور الثانية-- مير شاغبتيني بروحي كله متشاغبة و متعومسة عاد هذي حالة بالله

الكويت و بس هالحزة! من فات داره قل مقداره!و ما يحك ظهيرك الا ظفيرك! لبنان والا دويرتج وبين الأهل والأصدقاء! الله يرحم خالتي! اعايدها بأول يوم العيد تقولي اليوم لي خامس بالصوم:(

الشكوى لله! مقياس الصحة بالنسبة للكبار بالعمر بقوة الذاكرة عندهم
وان يكون عقلهم وياهم--- ما ابي اطوف شي حتى وانا عيوز مقرقمة-- كل سالفة و تالفة اكون عارفتها

و كل سنة و الكل بخير و بصحة و "عقل" و عساك سالمة
:)

nanonano said...

Miznah:

لأ طبعا..صيغة المبالغه لما أقول 40..لأن الأربعينات الحين
IS THE NEW THIRTIES
بس حق بعض الحريم اللي مو مهتمين بصحتهم ترا قاموا يتهدرقون بسرعه

nanonano said...

abu eldestor:

:))))))

أحنا الحين و محنا مبطلين تحلطم..تخيلنا بعد 35 سنه يعني 70 و كسور وين ممكن نوصل بالتحلطم

nanonano said...

Fashionista:

ليش تخافين و لا تخترعين..ترا الموضوع أول شي كله قشمره..ثاني شي..لازم الواحد يرتب أموره حق المستقبل..خو السنين قامت تركض الحين

nanonano said...

ZooZ "3grbgr":

ما عندكم سالفه مخترعين أنتي و
Fashionista

الواحد لازم يكون عنده نظره مستقبليه..ما راح نقعد طول عمرنا بمرحة الثلاثينات لازم بنكبر

هــو أكيد لبنان أحسن..من صجك نابولي..خو عيايز أكسر..مافينا شده..و هم بعد ننباق..حق ملعة الجتف

السالفه شكلها بتقلب مجمع و حياتج
حياج الله

nanonano said...

حسافتج يا كويت:

وااااااااااي

تموت على سالفة الموت

ذابحينك حور العين

النقطه أنت على ما تموت..و مرحلة الكبر هذي..هم تبيها تكون زينه

و بعدين ليش تبي تصير عبء على عيالك..ترا الدوب يقطع..و مردهم بيتعبون..فأنت بكامل قواك العقليه..و عندك خيرك..و حاط لك ذيج الممرضه الزوغه..صدقني أحسن لك

nanonano said...

100 fils:

صباحك ورد

ترا بنسوي بناية يمنا حق الرجال

أذا ياز لك الوضع

أحجز من الحين

nanonano said...

قطة مقطقطة:

شالتواضع..كل مواصفات الجمال هذي و هم تبين تعيشين و يانا؟

nanonano said...

أحمد الحيدر:

لأ أفا عليك..شكله المشروع بيقلب مجمع سكني..و راح تصير أكو بنايه حق الرياييل

شفت شلون لبنان خوش أختيار..براد..و نظافه..و العيال مثل ما قلت بيكيفون

nanonano said...

shahad:

مو أحنا عشان ما نوصل هالمرحله..نبي نصد..و نقعد مع بعض..أحسن لنا

وااااااي

من صجّك؟؟!!؟ الحين أنتي عيوز..و لي الحين لج خلق تحبين؟؟ وينقص عليج؟

فراغه..أنا الحين و مالي خلق أحب

nanonano said...

nikon 8:

أكيــــــد

الكويتيات يموتون على المنافسه

بس أنا شخصيا مابي صباح
LOOK

الحمدالله و الشكر جنّي محنطه..بحط الملفع..و أكسر الحمره..و ألبس تايووور

nanonano said...

Reflections:

حيـــــــاج الله

حيــــــاج الله

حيـــــــاج الله

لأ أنا أمي صغيره..لي الحين ما وصلت هالمرحله..أو ما تبي تواجه الواقع
هاهاهاها

nanonano said...

chandal/danchal!! :

من صجّك من يعوف التلوث بالسكيك

لعبتي سكيك الأشرفيه

تعوذي من أبليس و أمشي معانا

نحوس مع بعض

SKY said...

هيهيهييه خوش موضوع بس يالله حسن الخاتمة

انا وحدة ابي اموت وانا بكامل قواي العقلية (بالاصح بقايا قواي العقلية خو مابقى منها الا جم حبه بس)
والجسدية بعد ما ابي ألعوز احد وياي
بس اذا كلش كلش حسيت عمري بصير عيوز دعلة بيي لكم باخذ لي شقة عندكم فحطيني على ال Waiting List ;p

SKY said...
This comment has been removed by the author.
KQ8 said...

انا قايل اذا الله سهل وعطاني الصحه والعافيه لي بلغت من العمر عتيا والعيال تزوجوا وشالوا روحهم باخذ فليساتي وبشتري بيت بسويسرا بمكان صخه وبقعد فيه طول السنه بس ارد الكويت برمضان والعيال اذا يبون ايون يشوفوني حياهم الله...ام العيال معارضه هالفكره قتلها ركي على عيالج ومتى مابقيتي العين لج اوسع من المكان

nanonano said...

SKY:

غالي و الطلب رخيص

و عشان جذي لما نصير كلنا مع بعض..نصير كلنا بهالوا سوا

nanonano said...

KQ8:

وااااااي أشعندي؟؟!!؟

أنا امــــوت على سويسرا

بس محد مطاوعني

ما أدري أخون بالبنات

و متجابل أنا وياك هناك

و نمارس هوايتنا التدوينيه

من جبال الألب

Anonymous said...

هذي انتي قلتيها

ممرضة زوغة وانا شايب

تيبين القاز يم الجبريت!! مايصير
وتالي افنقش وتصير خاتمتي خنابيج

لا يبا خليني صامد وفالي الحور

nanonano said...

حسافتج يا كويت:

هاهاهاهاها
هاهاهاهاها

تضحكني بخوفك على خاتمتك

والله برافو عليك

 
template by Purplecious