Sunday, December 21, 2008

شالله حادكم؟!؟

يوم الجمعه اللي فات رحنا أنا و صديقاتي
.
مجمع الأفنيوز نتغدى هناك..و رحنا مبجّر
.
مالنا خلق الزحمه و الأشكال البايخه اللي
.
تضيق الخلق..المهم في ظاهره بالكويت
.
المفروض أنها أيجابيه
.
خروج الأزواج مع زوجاتهم و أطفالهم
.
للتمشي..قلنا أنا و البنات خل نلاحظ مدى
.
أستمتاع الزوج و الزوجه بالطلعه
.
..مو معقول
.
كمية التبوّز اللي بالموضوع..ليش؟!؟
.
شالله حادكم؟
.
..يعني حتى مو باذلين مجهود أنهم
.
يكلمون بعض
.
و علامات العبوس.. و ضيقة الخلق
.
كلها على ويهم
.
اللي كسروا خاطري بالموضوع
.
اليهال
.
مساكين طالعين و فيهم وناسه..و فيهم حماس
.
بس أكيد أندقروا
.
لما شافوا علامات الوجوم على أهلهم
.
تلاقي الأبو قاعد يحاتي يمعة ربعه بالمخيم
.
والأم متشاغبه على يمعة بيت أهلها..خايفه تطوفها السوالف
.
و أكيد متناجرين بالسياره
.
كان ودي اقوم من مكاني و اقول لهم
.
ترا ربعك ما راح يفيدونك..و أنتي أهلج مو طايرين
.
بس الأستمتاع بوناسة عيالكم معاكم
.
أهيه اللي ما تنتطوف

65 comments:

Bloggerista said...

يعني الريل دعلة و المرة مليقة تخيلي شنو موديل عيالهم؟

في طلعات عائلية بلاها أحسن

Zaydoun said...

يمكن الزوج متكدر على فلوسه اللي طارت

أو يمكن الزوجة بخاطرها ساعة ولا جنطة والزوج مفلس


أو يمكن أصلاً ماكو شيء مشترك بينهم غير العيال

Q8EL5AIR said...

الظاهر عبالهم الابتسامة بفلوس !!


حتى لو بفلوس .. والله تنشرى :)



وتحياتي :)

enter-q8 said...

لما يكبر ولدي و يصير عمره خمس سنين يعني بعد ثلاث سنوات
بوديه الافنيوز
مالي خلق خساير طبع حب الاستكشاف مال هالعمر
اخرتها عكاز شايب فصل عليه و يبي ياخذه عباله نفس اللي عندي
حوش البيت و الحديقة وايد زينه حق اليهال

@alhaidar said...

والله اختي معاج حق .. طلعة جذي بلاها احسن !!

ياليت ولو من باب المجاملة يخلون هالساعتين يعدون على خير ..

الله يسهل على الجميع ..

nanonano said...

Fashionista :

صاجهززمساكين عيالهم ما يشوقون..بس هم مو ذنبهم..أن أهلهم أنانيين

nanonano said...

Zaydoun:

بالضبط..ماكو أصلا شي مشترك..و عندهم 3 يهال..أراهمك تييهم بعد 3 سنين عندهم ياهلين زياده

nanonano said...

Q8EL5AIR:

تهقى ما يتحسفون عقب؟

nanonano said...

Enter-Q8:

حوش البيت على قولتك..بس أنت قاعد معاه و يشوف ضحكتك و ضحكة أمه..هذا أهوه المهم..مو مهم المكان..المهم الشعور بالأمان

nanonano said...

أحمد الحيدر:

المشكله أن كلا الطرفين قاعدين يسوون هالمشوار كتأدية واجب..و ما يدرون أنهم بطريقتهم هذي..قاعدين يعكسون تعاستهم على الأطفال..مو قاعدين يونسونهم

Kaadi said...

لا ياجماعة موشرط
انا اشوف عوايل مشالله حدهم مستانسين ويشوقون

فمووو مقيااااس اللي شفتوهم :)

Anonymous said...

موضوع جميل وجريء في مفس الوقت

بس اعتقد اعتقد انا قلت اعتقد ان السبب في هذا هي الزوجة

لان اللي دائما يطلب يوم لة وللاولاد هي الزوجة
وماكو وقت إلا اليمعة واليمعة هياتة وكلمن يدور وناستة والوقت ضيج

عشان جذي يطلعها ريلها وفكرة مو معاة وهي كذلك تقوا إن قلت إزوارة هلى اليوم ماراح يطلعني

خل يطلع معاي وصير خير

بالنسبة لي انا اطلع مع زوجتي في اي وقت نبي نطلع فية ونتجنب ساعات الذروة الخاصة بالمينن والمطافيق والهيلق

ويظل وما عندي مشكلة اطلع اليمعه او السبت او الاثنين عشان ما احط يوم التزم فية ويمكن واحد فينا يكون مشغول

والطلعة إما ان تكون بمزاج او قعدة بالبيت




وبالنهاية يطلعون وهم امبوزين يا نانو افضل من لا شيء جود الله يهديهم ويبتسمون


بوست رائع وموضوع اروع

honey said...

لووووووول عاد إحنا طلعة العايلة مقدسة ببيتنا كل اسبوع
family day

ابوي اقول ما جنكم عتاوية المفروض طالعين من البيت و متزوجين " الكلام عن البنات و البنبن" فا ستغرب اللي يطلعون و مقلديمين المفروض الطلعة وناسة !

صج بالبيت اتكون هوشة ناس خلصوا و ناس لأ بس هم مع هذا الواحد دام طلع يستانس

بس أكو ناس مو كفوا اكون هم عايلة

100 fils said...

هذه ظاهره ملاحظها من زمان وللاسف لها انعكاسات سلبيه على المدى القصير و الطويل..ولهذا اسباب عديده و منها التربيه و انعدام الحب و عدم الاحترام و للاسف قله الماده والله يهديهم و يعين هل عيال

;p

LiL ALiEN said...

انا بتكلم عن نفسي

انا ماحب ان اتمشى بمكان بدون هدف .. اي بمعني .. تروحين السينما علشان تشوفين فيلم .. تروحين المطعم علشان تاكلين .. بس ليمن تقولي زوجتي امش خل نتمشى مع الياهال بمجمع بدون هدف بس نتطمش على الناس اعتقد بوزي بصير بحجم مؤخرة جينفر لوبز والسبب ان الياهال مايحبون يتمشون كثر مايحبون يلعبون .. وغالبا العابهم مو متوفره بالمجمعات

وأخيرا .. انتي كنتي طالعه مع صديقاتج علشان جذي ماكنتي مبوزه

حياتي هدف مو عبث said...

كآبه أستغفر الله

أكره شي عندي أطلع مع شخص عاقد النونه ولا امبوز
بالله اشتبي ياي
!

وهالنوع من الحريم لا تشوف وحده منغثه منها اتشق الحلج شق

KQ8 said...

ماعنده سالفة هاللي امبوز واهي المبوزه ماعندها سالفه

الواحد المفروض يطلع وهو مرتاح البال مصحصح مو مقلدم

اخاف عيالهم اباليس

Organic Kuwait said...

ee wallah! o plz soolfay 3an lamma eykoon el wife and husband 3ala 6awla ga3deen maddeen el booz o eykhezoonkum wa7ed wa7ed min foog lay ta7at o walad-hum elli 3umra ma ssar one year old maskeen 3ala el 6awla el thania ma3a khaddama ham embawza o mebtalsha ma3a yaahil she is not enjoying his company.. ya rabi laish ye6l3oon etha mo wanasa? laish ma yeg3doon ma3a 3yalhum? ma yetshawwegoon eyshoofon 3yalhum mestanseeen o eysoolfoon o eytemaile7oon o they hold the menu o order mathalan? lazem lazem kel ma ne6la3 lazem rayyal o murta o baby o khaddama chenhum both mo gadreen 3ala this little tiny person! uncapable of love and uncapable of being happy... bas ham on the bright side ashwa bedaina enshoof wayed ashya 7ilwa..

nanonano said...

Kaadi :

المحزن بالموضوع أن عموما جذي تكون أشكالهم..أكيد في أزواج سعيدين و مستانسين..بس صاير نادر تشوفينهم..أو بمعنى أصح العموم يستثقل طلعة العايله..كل من يبي يطش بروحه

nanonano said...

حسافتج يا كويت:

شفت أنت قلتها..الزوجه أهيه اللي تبي أن زوجها يخصص شوية وقت حق عياله ويقضي معاهم كعايله وقت لطيف..طبعا أهيه غلطانه..لأن أذا الأبو ما صار عنده رغبه حقيقيه و صادقه بتمضية هالوقت معاهم الحنه ما راح تخليه سعيد بالطلعه..وهني نيي حق مربط الفرس..الزوجه مو فاهمه طبيعة زوجها..و الزوج يبي أي شي يسوي عشان يفتك من حنة الزوجه من غير فهم حقيقي لسبب مطالبها..فمع مرور الوقت مثل ما قال زيدون يصير الشي المشترك الوحيد بينهم أهمه العيال

الله يهدي الجميع يا حسافتج..بس أحب أركز على نقطه و أن شاء الله راح أكتب عنها بعدين..عمره الغصب ما ولّد سعاده..أذا الشي ما صار نابع من القلب و بدافع الحب ما راح يكون له داعي

nanonano said...

shahad:


شكـــــــــــــــــــرا يا شهد يا عسل

:***

في ناس مو كفو يكون عندهم عايله

nanonano said...

100 fils:

أهلا و سهلا..أفتقدتك

تصدق أنا أعتقد أن قلة الماده أقل تأثير

الشيين الرئيسيين

قلة الحب و قلة الأحترام المتبادل..و يمكن قلة الحب أكثر

لأن أذا كان فيه حب بين الأزواج..كل تصرفاتهم تجاه بعض و تجاه المحيطين فيهم و تجاه الآخرين راح تكون فيها نوع من المحبه

اللي صاير الحين الأزواج كله في حالة تحدي حق بعض..و تطلع أنعكاساتها على اليهال يكبرون متأزمين

nanonano said...

LiL ALiEN:

أنا أتفق معاك طلعة اليهال لازم تكون حق اليهال..مخصصه لوناسة اليهال..يعني ما أحكرهم بمجمع على بو أن الأم تبي تسوق وتبي الأبو ينق فيصير على حساب اليهال

و صح أنا ما كنت مبوزه لأني كنت مع صديقاتي..بس أقول لك شي..أذا كنا متناجرين أنا و زوجي ما نطلع مع بعض..لأن ماكو سالفه أسوي تمثيلية المرأه السعيده جدام الناس..أقعد في بيتي و أحل أشكالييتي وعقبها نطلع..هالتمثيليات اللي ذابحين روحهم فيها كلش ما لها سالفه

nanonano said...

حياتي هدف مو عبث:

أنا عندي أذا في حالة ضيقة خلق أو منغثه من شي أقعد في بيتي و أسكت..ماله داعي التمثيليات اللي يسوونها جدام الناس

nanonano said...

KQ8 :

ممكن عيالهم أباليس بس ليش أعصب..تعاملوا مع نزاقتهم بطرق صحيحه..يمكن أصلا متناجرين على اليهال كل واحد يحط المسئوليه على الثاني..و هذا الغلط..اليهال مسئولية الأم و الأبو مع بعض

nanonano said...

Organic Kuwait:

ما طلبتي شي..أصلا هذا موضوعي الياي..بس من طوله ما أدري من وين أبدي و من وين أنتهي..المربيات و العايله السعيده..هذولا قصص..راح يكون لهم موضوع كامل عشانج

Anonymous said...

شوفي يا بنت الناس


وأخذيها عن تجربة مريرة

النفس لازم تروضينها على امور ولا تتركينها على هواها


وفي بعض الريايل لازم يمشون (مع الاسف )على روتين معين حتى لو بالغصب
لعل وعسى أن ياتي يوم وتسنعون وماتصير الطلعة صعبة
والحريم كذلك



مرة في خطبة اليمعة سمعت الإمام يقول يالة واحد يقول يا شيخ أنا اشرب خمر وودي اصلي عادي اصلي وانا أنسان اشرب خمر
؟

قالة الإمام يجوز وفرض إنك إتصلي ولكن مو وانت سكران او ريحتك فايحة(ريحتك فايحة هذي من عندي مو مالت الإمام( عموما

قال الإمام لازم يصلي لعل وعسى ربي يهدية ويترك الخمر وساعتها تكون النفس مروضة على إقامة الصلاة ولا تكون صعبة


هذا قصدي يعني خل يطلعون بنف ولكن يجب ان يلتزم كلاهما بالايام لعل اللة يألف بين قلوبهم




شرايج وانا اصير إمام خطبة الجمعة؟؟

ZooZ "3grbgr" said...

والله يا نانو يا حبيبتي اللي قلتيه يغث موجود وايد .. أصلا ماله داعي قعده بمجمع تعرفينهم من السيارة .. اذا ويوههم بويوه بعض ويبتسمون ويبربشون بعويناتهم يعني يحبون بعض يا بوي فرند جيرل فرنده أو معاريس .. واذا كل واحد يكتشف الدنيا من دريشته وما تجمعهم الا سياره فهذول متزوجين اصليين

للاسف صايره قاعده

على فكره
ما يحر بالافنيوز لما تروحين تشوفينهم ماشيين مالهم شغل بالقطيع اللي وراهم؟؟

تلقين كل ياهل يرعى بروح والخدامة لامه أصغرهم
:\

nanonano said...

حسافتج يا كويت:

ممكن فيه رياييل أو حريم مع الوقت يبتدون يرضخون..بس عقب شنو؟؟!؟

عقب ما يكونون اليهال شافوا وايد أشياء

و لا تقول لي الياهل ما يفهم..الياهل يفهم و يخزن

فتطلع عليه عقب ما يكبر

و في رياييل لو مهما تسوي الزوجه ما يتغير

و ينتهي فيهم الموضوع بالأنفصال

و هم تطلع نتيجةالأنفصال على اليهال

أذا ما صار الشي طالع عن قناعه بأهميته

ما يفيد

nanonano said...

ZooZ ZaibG :

هاهاهاهاهاها
خلي موضوع السياره

لأن اللي يشوفني بالسياره مع زوجي يقول راح نتذابح الحين
ببساطه سواقته تنرفزني
و تعليقاتي تنرفزه
فقررنا الحين أنا وياه حتى لو بنروح نفس المشوار كل واحد و سيارته
للحفاظ على سعادتنا الزوجيه

موضوع المربيات مثل ما قلت حق

Organic Kuwait

بسوي له بوست كامل
لأن بــــــــــــــــاط جبدي

الدســتور said...

شدراج
يمكن متهاوشين على منو العزيمة
:)

Anonymous said...

قليل محد يقنعني
وكلامج مقنع

بس انا قصدت الهون والوصل بين الأزواج والوناسة

وما فكرت باللي قلتية


اشكرج نانو

nanonano said...

abu eldestor :

اللي متهاوش على منو العزيمه..يحقر زوجته و عياله و يقعد يخز في بنات الناس و يخلي الزوجه مسكينه تعابل بنزاقة عيالها؟!؟

nanonano said...

حسافتج يا كويت:

يا بختي

هذي شهاده أعتز فيها

أهلا وسهلا

بس الصج يا حسافتج..يمكن فرق السن بيني و بينك ٤ سنين يعني مو وايد..بس ترا الدنيا خلتني أشوف قصص و سوالف..الغبي اللي ما يتعظ منها

Anonymous said...

اله يجعل ايامج كلها سعادة يا رب

ومو بعيدة على رب العالمين


الله يقول كن فيكون يا الغالية وإن شاء اللة ماتشوفين الكدر ولا تعرفين لة طريج لا انتي ولا اللي يعز عليج


وينولج اللي في بالج يا رب

Anonymous said...

منورة جريدة الجريدة :)

فريج سعود said...

الاخت طالعة مع رفيجاتها بالبراد وقاعدين بريحاتهم وتنتقد التبوز العائلي

بابا هذي عاداتنا وتقاليدنا رجاء لا تنتقدينها

Gee™ said...

امبيه صح صح
ما ادري ليش حذي يصير فيهم لما يطلعون مع بعض

سبحان الله .. جنهه مقعدينهم من النوم ومطورقينهم ومركبينهم السياره

ليش جذي سمالله عليكم ؟

استانسو يعلكم العافيه
;@

Cr8ivia said...

المشهد هذا صار الطبيعي الان
بين كل ٥٠ ريال و مرته طالعين ويا عيالهم تلقين واحد منهم طالع مستانس و يسولفون و يضحكون

Fankooshy said...

اي والله الكل عابس
حتى الاطفال
الله يعين الجميع
الوضع العام مايشجع على البسمة
ننطر كاس الخليج يمكن يعطيني شوية فرحة
شكرا :)

nanonano said...

حسافتج يا كويت:

شكرا جزيلا على هالدعوه الحلوه من الصبح

وايد قاعد أتدللني..ما أعرف حق جذي

nanonano said...

فريج سعود:

هاهاهاهاها

أنت هذا اللي حارك؟!؟

أني طالعه مع البنات

أن كنت ناسي أفكرك

أحنا العادي البنت تطلع مع صديقاتها و الريال مع ربعه بالديوانيه..أبو التفكك العائلي..و الظاهره اليديده الحين طلعتهم مع بعض..بس للأسف حدهم قاعدين يمارسون هالظاهره و أهمه مغصوبين و للأسباب الخطأ..عشان الناس مو عشان نفسهم

nanonano said...

Gee:

في ناس الله باليهم..ما يعرفون يستانسون مع أهلهم..جنّه الوناسه ما تيي الا مع الربع

nanonano said...

Cr8ivia:

صـــــــــح

أعتقد نسبتج صحيحه

nanonano said...

Fankooshy :

ويـــــه أذا بننطر كاس الخليج..كلش مو بشاره

الله يساعدنا على حرة كاس الخليج

Alia said...

I second Zaydoun

العامل المشترك العيال
انتي متخيلة لو طالعين بدون العيال شلون أشكالهم
العيال اهمه اللي يسوون لهم شوي جو

وايد اعرف ناس شذي ما يطلعون من غير عيالهم .. لأن مافي مواضيع يتكلمون فيها

kuwaitawy said...

اي والله


شالله حادهم


مغصوبين مثلاً



بيكون منو اللي غاصبهم

`~MnO YeNSa! ~` said...

وااااي اكيد عوركم راسكم
بس
و الله في
couples
يشوقووون
و بس
ما قمنا
نشوفم :(
يكافينا الشر

:)

100 fils said...

الله يسلمك..ماتفقدين عزيز ان شاء الله

ان اتفق معاكي ان الماده هي اقل تأثير لذلك كتبت كلمه الاسف قبلها لانها ان كانت السبب فهي فعلا للاسف والله ان شاءالله يكتب للجميع الخير


اي اي اي على مؤشر السوق اليوم و امس و الي قبله..الخ حدي شطيت عن الموضوع

;p

عاجـل said...

يعتمد منو طالع مع منو

nanonano said...

Alia:

و أنا أتفق معاكم أنتي و بوالزيد

مساكين اليهال

White Wings said...

كان لي تجربة في الأفينيوز في العيد خلتني أكره الطلعة للأماكن العامة، خصوصاً في العطل والأعياد

تبدو الخروجة هاليومين تأدية واجب أو مظهر اجتماعي

لكن على كل المحاولة، ولو ببوز، مشكورة
:)

nanonano said...

kuwaitawy:

مغصوبين عشان المظاهر..في ناس من صجهم يعيشون عشان المظاهر..و ما يحاولون يفكرون في أصلاح الجوهر..الزوج و الزوجه مهم عندهم أن ينقال عنهم أنهم متفقين و سمن على عسل و يوديها و يشتريلها..بس من داخل أثنيناتهم مو سعيدين باللي قاعد يسوونه..لأن من داخل عارف الموضوع كله مظاهر..تلاقيهم ما كان مهم عندهم يقعدون مع بعض و يتكلمون و يناقشون أختلافاتهم

nanonano said...

`~MnO YeNSa! ~` :

أكيد في أزواج زينين..يا حافظ أشدعوه..و الله يتمم عليهم و يكثرهم..بس المشكله أنهم أقليه مقارنة باللي تشوفينهم

nanonano said...

100 fils:

هاهاهاها

قبل لا تشط كتبت لك بوست

. . . ساخر كويتي said...

لاحول ولاقوة الا بالله
مداحرة الناس على شكلهم بعد
==> ودي اضغط احد وصارت فيج اليوم :)

العملية فيها استراتيجية لبعض الناس
وهي خوفا من الحسد يسوون بنفسهم جذي
والله يسعد كل حزين امين

تحياتي

nanonano said...

عاجــل:

يعتمد منو يبي يطلع مع منو

nanonano said...

White Wings:

لا موضوع الطلعه بالأعياد الرسميه للأماكن العامه هذا شلته من أجندتي..ما أقدر عليه كلش..لأن الغثا اللي بييني منه أكثر من وناسته للأسف

المظهر الأجتماعي ذابحهم مساكين

Q8iya said...

مشكلتنا الازليه في الكويت كلام الناس...و التمثيليات حدث ولا حرج اعتقد عبالهم روحهم سلبرتييز :) حمدالله و الشكر مايعرفون يستانسون مثل العالم

nanonano said...

. . . ساخر كويتي:

تمون..اضغط على كيفك

أشورانا هاليومين أو بمعنى أصح أش بأيدنا غير الضغاط

مداحره الناس على تصرفاتهم مو أشكالهم..لأني لو بتكلم عن موضوع الأشكال اللي صارت الحين بالمجمعات ما أخلص

تصدق..صح كلامك..في ناس يخافون من العين لها الدرجه..ممكن يتسببون على روحهم من كثر خوفهم من العين

nanonano said...

Q8iya:

سالفة شلون يستانسون بروحهم من غير أي مظهر كاذب ما يعرفونها..كل شي يسوونه حق الناس مو حق نفسهم

شقران said...

العزيزة نانو نانو
مساك الله بالخير

كيف الحال وماهي أخبار حوستكم مع البيت الجديد
:)

------------

بالنسبة (لبعض) التبويزات من المتزوجين فإنني أحيانا لا ألومهم،،،لأن بعض المناظر في الأسواق تجعل الانسان في حالة مد بوز ومعارك طاحنة مع ذباب أنفه!؟


على المستوى الشخصي وحينما أخرج مع الحبيبة أم راكان فإنني أختار الوقت المناسب حتى لاتطل علينا تلك المناظر التي تجعل من التبوّز أضعف الإيمان


مع العلم أنني كثير الأريحيّـة ناحية أن الناس أحرار في أفعالهم أو ناحية اختيار مايلبسون

ولكن أحيانا حتى الكلام القليل أدب تسمعينه رغماً عنك من بعض الغير محترمين والذين لايقيمون وزنا للناس...والحشيمة والأدب آخر اهتماماتهم للأسف



تقبلي مني وافر الإحترام والتقدير

nanonano said...

شـقـــــران:

أهلا و سهلا
بالعزيز جدا المعلم شقران

شكرا على سؤالك عن حوستي..حوستي لي الحين حوسه..بس الحمدالله بديت أسيطر على الموضوع
======


صح..و أنا ما ألومهم اللي يكونون شايفين أو سامعين أشياء منرفزتهم..لأن المناظر اللي قاعدين نشوفها و نسمعها تضيق الخلق و تستفز..بس ليش أخلي هالأشياء تأثر على مزاجي و تعكننه و تحرم بنتي أو ولدي من لحظات سعاده معاي..نقطتي يا بوراكان أن لحظات وناسة اليهال ما تنتعوض..فحرام تمر هاللحظات من غير لا نستمتع فيها

و دمتم

Unknown said...

من راقب الناس مات هما
;p~

nanonano said...

ga6oo6a:

من راقب الناس ماتت أمه عزيزتي

 
template by Purplecious