Tuesday, July 25, 2006

الفلفل

أمس يمعتنا الأسبوعيه....واي...نشوّق...اللي فيها أنفلونزا و داخله بجيسها أشكبره علينا...واللي دازه السايق عشان أييب لها زرتك من الصيدليه حق الحساسيه...واللي معدتها ما أدري أشفيها و ما يبقى تحليل مو مسويته...واللي...واللي...واللي...شي ما يونّس كلش...على قولة وحده من البنات ليش قاعدين متجابلين...خل كل وحده تعطي ظهرها حق الثانيه أحسن لنا...المهم و تكمل الحسبه و ينحط العشا....أحنا عادة أول ما نبتدي نتعشا...نبتدي بالسلطه...دارت السلطه علينا و كلمن نجب له...بدينا ناكل.. الاّ السلطه...عباره عن جرّاغي..(ألعاب ناريه)..أثاري الحبيب الطباخ متبلتع و حاط فلفل و خالطه بصلصة السلطه....بغينا نموت من الفلفل...أي خلاص هدوها لا تاكلونها...محنا قادرين نوقف...اللي و أحنا ناكل بقّينا من الحر..بس ما كان عندي فكره البقّه اللي كنا فيها من الفلفل و لاّ من بوادر المونوبوز..المشكله أنها كانت سلطه صح...الخضره و الصوص مالها وايد لذيذين...بس المشكله بالفلفل...المهم ما خلصنا من العشا..الاّ الغالبيه حايشهم حارج...فكملت حسناتنا

14 comments:

Shurouq said...

نانو، وينك ووين المونوبوز؟
بعدك بعز الشباب


وانا صغيرة كنت أدور الفلفل، بس الحين لا يحوشك.. ما أتحمله




اشتهيت سلطة!

Zaydoun said...

انتو وين والمينوبوز وين؟؟ عن العيارة

Bo Jaij said...

أعتقد حالتج هذى يسمونها المونوبوز النفسى

و هى حالة تصيب الإناث و الذكور و أشباههم بعد تخطى سن الثلاثين....

أعراضها


قته و لوعة جبد و غثيان مصحوب بتكشيرة و تجاعيد على الجبهة

إستعمال كلمات جديدة غير مألوفة عند الشتم

تبعبص غير إرادى و لأسباب مجهولة و حتى فى
أوقات الخلوة

عض اللسان أو البرطم عند تبادل الحديث مع أى صديق لمنع عملية التتفيل قبل حدوثها

شعور عارم بالحسرة و الندم على المجهود المبذول لترقيع أخطاء الأصدقاء و حل مشاكلهم فى العشرين سنة الماضية


العلاج؟


الإنتحار

أو الهروب من البلد و مقاطعة الأشكال المسببة لهذه الحالة...و للأبد

nanonano said...

بوجيج: هاهاهاهاهاهاهاهاها
أنت لاحظت السعبوله اللي على دبره و غير دبره قامت تطلع...شي مو عادي

nanonano said...

Zaydoun:
بوالزيد المونوبوز يبلّش حق المقاريد من سن ال 35 و أنت خابر صاحبتك شلون الحظ مسكّت معاها

Bo Jaij said...

أكيد لاحظتها...و هذى بس المرحلة الأولى


المرحلة الثانية هى إزدياد غير طبيعى بالتنثر وقت الأكل

مو بس عيش..أى شى...حتى البيتزا و الرقى

و المشكلة هى عدم الإهتمام بحل هذه الحالة...يعنى الواحد يتعايش معاها بدل ما يشوف شنو أسبابها...و تدريجيا إتصير جزء من شخصيته

شخصيا أكثر شى أخاف منه هو أن أبدأ أطلع أصوات غاضبة و كلمات سب و لعن و آنا قاعد آكل و أمضغ


يعنى

همممم...عيال الــ...ممممم ملاعين الوالدين...ممممممم كلب بن ستعش...هممممم
.........

طبعا إللى قاعدين يمى راح يلاحظون هذى الأعراض و ما يقولون شى...بس يتحمدون و يشكرون ربهم...و ما راح ألاحظ شى آنا إلا بعد إستفحال المشكلة.....يوم ما أعطيها بعبوص أثناء متابعتى لنشرة أخبار الساعة تسع...و الأهل و الأقارب كلهم بالصالة

Fuzzy said...

هاهاهاهاهاه
اهاهاهاها
جان كليتي بيض مفيوح تروح الاعراض

Chai-7aleeb said...

أحسن علاج للمنوبوز هو بذرة الكتان

نقعيها بالماى وشربيها

واحده بوحده

هذا دواك و على الله شفاك

me said...
This comment has been removed by a blog administrator.
White Wings said...

يحليل قعدتكم، متجمعين في المستوصف؟
سلامات لكم جميعاً وبالعافية السلطة :)

iDip said...

لا تحاتين... الحكومة راح تتكفل بمصاريف الادوية... وين نطلع من جزاهم
;p

وسلامات :)

kila ma6goog said...

أطلع غبي اذا سألت شنو مونوبوز؟

lawyer said...

ههههههههههههههههههه

واي موتيني من الضحك
كلا اعيار رفيجاتي الي اكبر مني

اي مو منكم من المينوبوز!!!

هاهاهاهاهاا
بس الي انا اعرفه و اقرا عنه ان المينيبوز تبدي اعراضه من سن 38 لي سن 51
يعني تو الناس

شوفي سايت اوبرااااااا عن هالموضوع

بس اتصدقين ياختج احنا ماكو مناعه سكاريب

شغل بلاستيك مافينا حيل

Alia said...

أموت في الفلفل
أبي من سلطتكم .. فجأة يعت

 
template by Purplecious