Saturday, March 18, 2006

ذاك اليوم رايحه البورصه عندنا اجتماع....طلعنا من الاجتماع أنا و كم واحد و ركبنا الأصنصير....و كانت حزة انتهاء التداول...و الأصنصير متروس أوادم....المهم....اهمه الله يهادهم أدارة البورصه حاطين ملطف للجو داخل الأصنصير و الظاهر أن مبرمج أن كل عشر ثواني يبخ....الأصنصير متروس ما وعيت الا صوت.....بسسسسسسسسسس...صوت البخه...طبعا أنا نزيت و طالعت فوقي على طول....الا أنا حضرتي واقفه تحته على طول....يعلّه برفعة راسي....تدخل الماده هذي كلها بعيني....طبعا أنا الحين ماني عارفه شنو أسوي...أضحك...أتألم...تدودهت و في ريّال واقف يمي...ما استحى ضحك علي....اهوه ضحك...أنا باسكت ماني قادره...يالله ولبي أوصل الطابق بس عشان أطلع و أغسل عيني و نخاشيشي اللي انترسوا من هالمعطّر

12 comments:

Jandeef said...

ً
تعابيرك مثل "يالله ولبي" هو ما نشتاق إليه هنا

ولكم باك

esetch said...

تصدقين عاد

عندي من هالجهاز بمكتبي ومأذي فيه الربع من الصوت والعطر إللي يرشه ويدخل حلوجهم كل ربع ساعه


بردتك البورصة إنتعشت
لا تعيدينها

8-)

esetch said...

عشان لا ينفهم كلامي غلط

لا تعيدين الغيبة

8-))

جنة الحواس said...

و أخيرا ..ما بغيتي

EEE al7een el wa7ed yegdar ydawem wehwa metshaggeg after reading ur posts ..

;)

Anonymous said...

سلامات يالغاليه ،،

لمياء الحالمة said...

nano

إنتي سالفتج هينة, شوية أوبتريكس وعيونج ترجع مثل الأول

مرة واحد دخل معانا الأسانسير, تقولين مو متسبح صار له أشهر, طلع بعد ما دخنا من ريحته

المشكله إنه ريحته ظلت بالاسانسير طول اليوم, وبخشومنا

nice said...

دامنج بقرب البورصة شنو نصايحج بالاسهم ووين صويحبتج شيبا كله غاطة
وعودة حميدة

nanonano said...

Jandeef:
Thanx dear

esetch:
أن شاء الله ما راح أعيدها
;)
حسيت نفسي و أنا اعتذر جنّي ياهل

Broke:
عشان أفتك من حنّتج

لمياء الحالمة:
روائح الأصنصيرات هذي قصيص أنا اعتقد أن حاسّة الشم انعدمت عندي من قبل 8 شهور لما ركب معانا واحد....لو مهما أوصف الريحه ما أقدر أعطيها حقها من الخياس

Anonymous:
الله يسلمج أو الله يسلمك

nice:
لا تشترون شي فكوا روحكم خل نشوف سالفة أيران و عقب يصير خير
و صويحبتي شيبه هاليومين غاطّه شويه مشغوله بتغيير وظائف شويه و تطخ

بومريوم said...

حمد الله على السلامه!
لا تعودينها

بومريوم said...

شرايج بالدوليه للدهن العدانى؟
سعرها مغرى للشراء

nanonano said...

بومريوم:
أنت خابرني كلش مو زينه مع أصحاب الدوليه للدهن العداني أذا تبي توصيه أوصيك بالدوليه للفقع الزبيدي

Zaydoun said...

انا أنصح بالدولية لصب القفشة

 
template by Purplecious