Sunday, March 15, 2009

سياسه جديده

.
.
قررت أتبنى سياسه جديده في حياتي
.
ما راح أسكت
.
أذا شفت شي ما ياز لي..راح أُبدي
.
أمتعاضي و أستهجاني من التصرف
.
لأن التمادي صار مو عادي
.
محّد يحترم و لا أحد يحشم!!!؟
.
أدري أني باقزّرها متناجره مع خلق الله
.
و يمكن ما راح أقدر أغير شي
.
بس على الأقل راح أبرّد قلبي
.
.
أمس أنا بالشارع الخلفي..اللي ورا
.
مركز سلطان السالميه..أهوه شارع رايح راد
.
الاّ الشارع واقف..ليش؟
.
واحد بوانيت..موقّف سيارته يم وحده
.
يغازلها..هذا الساعه  ١٢ الظهر
.
من له خلق؟؟؟!!!؟..حر.. موت
.
المهم..و أحنا كلنا واقفين..ننطر..المسعده
.
تتعطّف عليه و تعطيه الرقم
.
التفت على السياره اللي يمّي
.
الاّ شاب كويتي..يأشر لي بأيده
.
يعني شنو أسوّي
.
مــــــــاشي..ما تقدر تسوي شي
.
أنا أسوي..لأن خلاص..ملّيت
.
صايرين في ديرة..كل من حارة أيده أله
.
جان أسوقهم ذاك الهرن
.
اللي أنا أنزعجت منّه
.
على بالكم..أستحوا..أبدا..حقرونا
.
عقب ٣ دقايق تقريبا
.
قرر الأخ..أن يمشي..و يفتح لنا الطريج
.
الحين أنا مشيت..جان أمر يم سيارة البنت
.
التفت عليها..لما شفت شكلها..استفزتني
.
زياده..الا الأخت سادحه الكرسي..يدوبك يبيّن راسها
.
و كاسره الحمره..جنها عاضّه ياهل
.
يعني غصب الله يخليكم..تعالوا غازلوني
.
نزّلت جامة السياره
.
جان أقول لها عيب اللي قاعدين تسوونه
.
طبعا..ما حاولت أنطر أشوف ردّة فعلها
.
لأني الصج خفت..و كمّلت..لحقت صاحب
.
الوانيت..و هم نزّلت الجامه..و وبّخته
.
المشكله..شيفه قيفه..و شعره موقفه جنّه ينّي
.
و أبتسامته عبيطه
.
و اللون محوحي..أكثر من وانيته الأسود
.
مال قل تسبّح
.
عقب ما وبّخت الولد
.
برد قلبي..فقرّرت..من أشوف شي..ما أيوز لي
.
راح أوبّخ..أدري..أن ردود الفعل ما راح تكون زينه
.
بس ما راح أخليهم 
.
يعيثون بالأرض فسادا
.
و أحنا قاعدين متكترين


62 comments:

الدســتور said...

ياخوفي يوبخونج
مثل ما انتي توبخينهم
:)

Someday said...

وبخي و لا يهميج بس اهم شي تاكدي السياره مقفوله و تلفونج معاج
:P

حسافتج يا كويت said...

نانو

باجر الصبح الساعة 9 خذيتلج موعد مع ناصر المجمد

والساعة 10 ونص مع جاسم الخرافي
والساعة 11 مع هايف عيزت ادق محد يشيلة

والساعة 12 مع بو رمية

وعلى الوحدة إجتماع مع باقر


والساعة 3 ناطرين تقريرج في بوست جديد

enter-q8 said...

عاشت نانو هايف
و اللهمالوم هايف شفتم بعينكم
بهالحالات كل اللي اسويه
اني اقط غترتي و عقالي و اجفس
و ادور الليور و طبعا استخدام المصطلحات اللي تليق فيه مع تفله
نانو و الله ارشحك لمجلس الامة بس على شرط تمسكين لجنة الظواهر السلبية

الزين said...

شروط التوبيخ بالشارع


ان يكون الشارع فاضي لزوك القبه

ان يكون موبايلج شغال والنت وورك فل لزوم طلب النجدة

ان يكون معاج سلاح او عجرة تحت الكشن لزوم الدفاع عن النفس

واللي احسن من هذا كله انج ما توبخين خير شر

لأن في ناس ما تستحي والتوبيخ ممكن يرد عليج عايدي


:)

ومسا الخير

أبو جيج يدور نعاله said...

لو كان شخصى الكريم متواجد لترجلت من سيارتى المصفحة و طلعت الموبايل و قمت بتصوير المشهد بالكامل و من عدة زوايا....لأزين فيه اليوتيوب و مدونتى اليوم



ما يخالف التكاثر مهم...بس مو على حساب بقية الناس و بتعطيل مصالحهم و إزعاجهم...إللى منثول من تدفق الهرمونات و يتصرف بطيش و قلة ذوق....تسقط كل حقوقه...حاله حال قرد البابون بموسم التكاثر....إنصوره و نضحك على مكوته دون أى قيود



كلنا كنا مراهقين و كلنا تتدفق الهرمونات فى عروقنا بس حتى بالمغازل هناك أعراف و تقاليد..أهمها الذرابة و المحافظة على سرية وقائع اللقاء ما أمكن و عدم إيذاء الغير حتى لا تخترب السالفة كلبوها


و على ما يبدو المراهقين حاسين إنه الديرة رايحة...و خايرينها عدل الحين

و هذا يتطلب منا تدخل سريع قبل لا يصورونا العنجليز لبرامج تعرض على قناة....ديسكوفرى

chandal/danchal!! said...

هذي علامات شيخوخة ... صارلي فترة معتمدتها قول و ساعات فعل!!!


بس انتي وايد اذرب!!!


ليش مو ذاك اليوم ناطرة الاصنصير والا بطلعة واحد وباييده زقارة!!!

عطيته ما عطاه زمانه و بدون لا اطالعة بس بنفس الوقت كان الكلام موجه حقه


ومرةوانا اسوق سيارتي حذفت واحد بقوطي الكلينكس!!!!

من كثر ما احتريت!!! لاني بغيت اروح انا وعيالي من جيس اهلنا


الحمد الله.... في الحالتين ما كان في ردة فعل من الطرف الثاني!!!

Blog 3amty said...

يا الغيارة !


عشان ما طل بويهج بخيتي !

nanonano said...

abu eldestor:

تصدق..لأ..لأنهم خوافين و جبناء

أحنا أول كله أنتوبّا منهم

ما نبي يحوشنا شي منهم

بس المشكله أنهم قاعدين يتمادون

فالحين صرت متزهبه..حق توبيخاتهم

nanonano said...

Someday:

أفا عليج...تأكدت أنا قبل

جان أحط أيدي على الهرن

nanonano said...
This comment has been removed by the author.
nanonano said...

حسافتج:

همممممم

يالله دبر لي المواعيد كلها باجر

و شوف منو اللي ما يكتب لك التقرير

nanonano said...

Enter-Q8:

بو وليد أنا وصلت مرحله معاهم

أذا شفتك بالشارع..و قاعد تغسل شراع واحد منهم

والله العظيم..راح أوقف..و أساعدك..من كثر ما لاعت جبدي
=====

بو وليد طرا على بالي سؤال

تهقى أذا وصلنا في يوم من الأيام المجلس

منو أول واحد راح نتهاوش معاه؟

nanonano said...

الزين:

مساء الورد

أهم شي السياره مقفوله

و بيني و بينج

عندي خيزرانه بالسياره

مالها سالفه

بس تعطيني شعور بالأمان

ANGEL HEART said...

سمحيلي عيل ماسويتي خير في اعصابج وقلبج

الموقف باايخ وايحر بس صدقيني يتكرر الاف المرات بكل بحظه وبكل شارع اذا اخلاقهم وسلوكهم ماردعهم ماراح يردعهم توبيخ واحس هالنوعيات مايحشمون احد ولايستحون يعني ممكن تصير النتيجه عكسيه عليج وفيها احراج

صدقيني لا تعورين قلبج بتتعبين

شرايج تهاجرين معاي :)

enter-q8 said...

نانو انتي يمكن انا ما انفع
الشحومي بيطلع بنت عذراء خجوله امام ادائي بمجلس الامة الله لا يقوله
خو كلمة لا تجذب علينا او لاقينا مقصه ترى اهي اخف شي راح اقوله

nanonano said...

الوزير الإصلاحى الشاب الدكتور أبو جـيـج:

صاحب المعالي..الرعيّه صاروا هيلق مرّه وحده

أنت لو شايف البنت..توحّش من قواة عينها

و الولد..لأ يمكن أنت تدوس أبطنه من ثقالة طينته

و كل هذا ما يبون أحد يحاجيهم و لا يقول لهم ردّوا لي ورا

و بعدين ليش المغازل و الأسفاف هذا صار بكل حزّه؟؟

مش انا said...

وبالنهاية فاليخسأ الخاسئون
اذا تبون دعم ترى عندنا قوات النينجا ( ماشفتوهم في العرض العسكري )

حسافتج يا كويت said...

نانو


زهبي عباتج عيل...

يقولون في حجز عام على الشرطة اليوم

nanonano said...

chandal/danchal!!:

يا أم الجنادل

لا والله مو من علامات الشيخوخه

إلا فاض بيّه و ملّيت

nanonano said...

Blog 3amty :

ويـــــــــــــــي

حاصل له..بعد ما بقى

Ra-1 said...

LOOOL
وصفج عجيب
وأهم شي المسعده
هاهها :)

والله زين تسوين
تعجبيني :)

آنا طبعي أستحي بس لما أشوف شي غلط ماقدر أسكت
وايد يستغربون مني لأن ما يركب على شخصيتي لووول

صج في ناس محتاجين الواحد يأدبهم بكلمة أو على الأقل خزة!

nanonano said...

ANGEL HEART:

موضوع الهجره مع الحاله الأقتصاديه الكسيفه في العالم حطيت عليه

pause

وايد صعب..فقلت ماكو الاّ أبرد قلبي

nanonano said...

Enter-Q8:

بو وليد أنا أنفع؟؟؟؟!!؟

توني..توني متهاوشه مع مدير لبناني بشركتنا بس بأداره ثانيه

لأن بدا يخنبق..و يستعبطنا

nanonano said...

المجهوول:

واااااااااي

يشوقون ملوت العرض

ودّي آخذهم معاي السوق

و أهدهم على هالأشكال

لأنهم راح يبردون قلبي فيهم

nanonano said...

حسافتج:

يا هـــــــــــــــلا

بلّش الفيلم؟

nanonano said...

Ra-1 :

والله..مو راضين يحشمون نفسهم

بس و حياتج..كلمه و خزّه

وحده بوحده

عثماني said...

زين سويتي

بردي جبدج

بس ترى اكو شغلة

هالنوعية من البهايم .. ماكو احساس

يعني لو يسمعون زفات من هني الي باجر .. ماكو فايدة

تربية شوارع بعيد عنج

Miznah said...

,نانو

تكفين علميني
عندي ثنتين بالبيت يبيلهم شخااااال من اللي قلبج يحبه

Diver said...

تذكري شي واحد قالوه الاولين

واحد تحشمة و و احد تحشم نفسك عنه

nanonano said...

عثماني:

أدري فيهم..بس زهّدوني

لأن مو معقول على كل حزّه و كل وقت

اللي خابرته أول..مع المغرب يبتدون القزّيزه

بس الحين..ما تتخيّل أمس شلون مو وقته

nanonano said...

Miznah :

ال
trick

أنج توبخين بأدب و احترام..بحيث ما يقدرون يردون عليج

الزبده


تسحنين و تداوين

nanonano said...

Diver :

والله ملّيت و أنا أحشم روحي عنهم..لما صرت طوفه هبيطه

خل نجرّب السياسه الجديده و نشوف

ما يضر

nikon 8 said...

اللي سويتيه عين الصواب
الطريق له آداب ... وحنا حراس عليه
تعجبيني ... خوش تصرف

مركبنا said...

زززززززوغه
عفيه عليك
ناس ماعندها هم الا نفسها
توقف الشارع توقف الناس عشان تغازل
\
\\
\\\
ناس بلا اخلاق تحتاج الناس المتربية مثلج تعدلها

ANGEL HEART said...
This comment has been removed by the author.
ANGEL HEART said...

ويييي نانووو عفيه لاتحبطيني

الهجره اهي الامل الوحيد اللي عايشه عشانه :(

واذا عالازمه الاقتصاديه فانا مو فارقه معاي لانها بدت مبجر

واذا شايفه هالشي يريحج مانقدر نقول الا جو هيد :)

بس ديري بالج على اعصابج وعطينا نتايج هالسياسه اليديده

واتمنى لج مساء طيب :)

100 fils said...

مساء الخير

والله يانانو محد يستاهل تحرقين اعصابك عليهم لان احنا للاسف عايشين بوسط غالبيه من البشر الفوضويين و ناس عديمي الاحترام..لكن اذا هذا الشي يريحج فتوكلي على الله بس ديري بالك

أنا عن نفسي ماخذ سياسه الطناش و التطنيش مع هل بشر....وكما قال المطنش الاكبر:طنش تعش لكي تنتعش

:)

Fahad Al Askr said...

امسك أعصابك وأوعه تتهور

على فكرة ترى السلاح منتشر بالكويت، وأخبار جرايم القتل عن غير قصد تارسة الجرايد، فديري بالج على روحج، تالي يطلع اللي جدامج عنده كرت بالطب النفسي وانت تروحين من جيس أهلج، وبعدين ما ألقى أحد أناجره بالنت وأروح انا الطب النفسي وتمر علي فطيم معصبة وتوبخني وأذبحها، وبعدين يزعلون المدونين، ويحوشهم احباط، وتالي يقوم انتر كويت ويحط إعلان إنه بيصير مع التحالف، وولادة تحتجب، ويصير مطقوق مع السلف، واستكانة تقدم استقالتها، وتقرر سمدي إنها تدرس شريعة بالجامعة، ومبيوق يحول مدونته حق موقع اخباري يقوم يغار سعد بن طفلة ويسوي الآن جريدة، فيعصبون عليه الجريدة، ويصيرون تلفزيون فتعصب الوطن، ويخلون ليالي فبراير في أبريل، بعدين ينحل المجلس والناس تلهى عن الانتخابات لأنهم سهرانين مع هيفاء وهبي، وعقب كل هذا ما يصعد الشيخ ناصر المحمد المنصة، وتخسر الكويت جدام استراليا، ومحد يستفيد أي شي، إلا النواب اللي قال عنهم فيصل المسلم

لذلك أمسك أعصابك وأوعه تتهور

nanonano said...

nikon 8:

المشكله أن الحراس كلمن تكتر على بو أن مالنا خلق يحوشنا طشارهم..لما تفرعنوا

nanonano said...

مركبنا:

شكرا..والله مو مسألة تربيه و لا لأ

أستهتار ماله أول و لا نالي

nanonano said...

ANGEL HEART:

أذا المسأله فيها هجره

لأ باحبطج و جنه الورد

لأ..راح تقعدين هني حالج من حالنا

و تعابلين مثلنا

محد راح يهاجر و يهد الديره..و نخليها حق هالأشكال

الكويت ما تستاهل

nanonano said...

100 fils:

مساء الورد

تصدق أنا التطنيش قام يعسرني

الحين..مع السياسه اليديده

قاعد يبرد فلبي شويه

شخصيا..مت من السكته

nanonano said...

Fahad Al Askr:

هاهاهاهاها

Toooo
lattttte

صج أن خيالك مملوح
..بس حريمتهم النواب اللي قال عنهم
فيصل المسلم..أخليهم يستفيدون..بروحهم قليلين أدب و
cheap

ماشي راح أحاول أطخ..عشانك بس

bof-10 said...

مشكله يوم اعرفو شي اسمه حريه ....اغتصبوها

honey said...

لووووووووووووول أنا صايرة مصرقعة و بس أتناجر مع الاوادم ما سوى عليهم اسنين غقولون هادية وا شاءالله و ما تعصب
هذي سنة الانفجار لوادم طلعوني من طوري

أأيد إتزفينه أنا جان دعمته

lawyer said...

اشووووووووووووووه انج وبختاي و بردااااااااتي قلبي انا بعد

واي لو ساشيفه و ساكته و بس كاتبه بوووووووووست

جاااااااااان اناااااااا رحت السالميه و مسسسسكت الزنوووووووبه و اي وانيييييت يمر صفقته


جد جد جد جد يحرووووووووووووووووووووون

و بعدين طالع جيل كويتي غريب
نااااااااااس تخرع مدري من وين طالعه

مدري من والله

حتى الصوت غير
النبره غير
الملامح غير

كل شي فيهم غير


انا بعد مثلج
ابسط شي قمت اسويه اني انقد عليهم شسوووووووووي مو طبيعي بنعيش بديرتنا غرب من هالخمه !!


انا هذاك اليوم كنت في حمام المارينا عزج الله

شله بنات يخرعون 2 امهاااااات قواطي روب
و 2 امهااااااات الشعر الاشقر و الرقبه كحليه

4 بنات ينادون بعض بمسباااااااات قليله ادب من تحت السر و نازل
بحمااااااام مكان عام لاحظاااااي

جان التفت عليهم و بكل هدوء قلتهلهم والله عيب عليكم شالمستوا شالحجي
شالالفاااظ اذا انتو ما تحترمون بعض احترموا الناس الي عمرها ما سمعت هالحجي لو ياهل تمر شتقوووووول

و طلعت





جييييييييييييييييييييل مال حراق












فهد
هاهاهاهاهاهاهاهاهاهاها

لوووووووووووووووووووووول


انت هالايااااااااااااااااام مودك عالي حيل و خيالك شكله لي الحين في باريس لانه مرووووووووووق

Joonna said...

ليــــــش لأ نانو انتي المفروض تترفعين عن هالناس لا تنزلين نفسج لهم خلج ارفع لان اكيد بتوصلن لي مرحله يا ماراح تقدرين تنزلين اكثر يا بالانعاش!!!

Joonna said...
This comment has been removed by the author.
Sn3a said...

اهو لو نافع التوبيخ جان ماشفتيهم بالقايله مجابلين بعض ومعطلين العالم

كويتي شعبي said...

خير ما فعلتي


لوووول

كويــتي لايــعه كبــده said...

ديري بالج ترا هذول وصاخة

عن نفسي احاول ما احط نفسي بهامواقف من اساس لأن مدقر السيارة والدعاميات تعبوا وهم يوصلون الرسالة

مرة واحد حك سيارة المدام في مصافط احد المجمعات وهي بالسيارة واليهال وياها وكان غير محترم ومتفرعن. وقف سيارته ونزل. كلمتني وقلت لها توقفين وراه لين أجي ولو وزير الداخلية يقول لك توخرين ما توخرين. وصلت خلال دقايق. ماكو رصيف ما ضربته وانا معاها على التلفون علشان ما تكلمه وهو يحوس عند دريشتها. يوم وصلت والنية الاجرامية طالعة مع شرار عيوني فهمها المتعنتر وصار فار مسكين. دفع القيمة اللي انا حطيتها وهي استفزازية بصراحة وحنا واقفين (مكينة البنك قريبة) لعلمة بالخطة البديلة. وخذا المقسوم طبعا

غير اللي طايف الاشارة الحمره ووقف جدامي عرض ويطالعني باستهزاء كأني انا الغلطان... ما توقع المسكين اني اطشر دبة سيارته وانا حاط عيني بعينه. تهقين نزل والا سوى شيء؟ ولا شيء. وقت الصجية ما هم الا تفرعن على اللي يشوفونه اضعف منهم ولي شافوا العكس عرفوا مستواهم

ما ينفع مع الحوش الا الدز
وما ينفع مع الطيبين الا الطيب

لا تسألين اللي في بالك
:)

enter-q8 said...

فهد العسكر
لا يوبا هونت اصير عضو بمجلس الامة احسن لي
نانو تبين تعرفين منو اول واحد بتهاوش معاه
اهو وزير مو عضو
بقوله ترى انت ساس البلا و كله ساكت
عرفتيه
فيصل بو خضور

nanonano said...

bof-10 :

لأن محّد بذل مجهود عشان يفهمهم الحريه الصحيحه

nanonano said...

shahad:

خل نسوي جمعيه

للدفاع عن حقوقنا

لأن اللي قاعد يصير الحين

لو أنتي أهدئ هاديه بالعالم

يصير لج موقف يخليج

تقلبين بركان

nanonano said...

lawyer:

ما عليج من فهد..خلّيه..على باله أنجلينا بتفيده

هاهاهاهاها
====

تصدقين عاد

أنتي قمّه بالشجاعه

لو أنا في مكانج..جان قلت لهم الحجوه اللي في قلبي

و قبيـــــــــــــــت

لأن هذولا عادي يدبغونج بالحمام

nanonano said...

Joonna:

صار لنا فتره و أحنا نترفّع

و نصد..و اللي قاعد يصير تمادي من صوبهم

لي متى

الشطاره شلون الواحد يقدر يوصل لهم

الرساله بدون ما ينزل لهم

بل بالعكس مع الوقت يحاول يرفعهم

nanonano said...

Sn3a :

شنو نسوي؟

شي أهون من شي

nanonano said...

كويتي شعبي:

شكرا

;)))

nanonano said...

كويــتي لايــعه كبــده:

شكرا

حاطه بالي

لأن الواحد ما يدري شنو ممكن يسوون

بس مثل ما قلت

جبناء..من تحمّر عليهم العين..يصيرون زقيد

nanonano said...

Enter-Q8:

بو وليد..راح فيها عيل بو هيثم

بس ما أظن راح يكون موجود على ما تيي

لأن بوهيثم وجوده مرتبط بوجود رئيس الحكومه الحالي

مو؟؟؟

lawyer said...

لااااااا عادي انا ما اخاف من الدبقه

خبرج الحمدلله طوووووول و عرض


هههههههههههههههههههه

 
template by Purplecious