Monday, September 25, 2006

مبارك عليكم الشهر جميعا....طبعا بدا رمضان و بدت الزحمه الخياليه اللي صارت معْلم من المعالم المصاحبه لهذا الشهر....و الكل يشتكي من المرور و الأختناقات المروريه....بس أنا أعتقد أن جزء من هالمشكله يرجع لسوء أخلاق السواق...صايرين مو معقولين...كل واحد على باله أن الشارع ملكه...الحين الشارع زحمه والعموم قاعدين يسوقون هدا هدا عشان يتفادون أي اصطدام...أييك واحد طاير تقول وراه تجربة الذره...و يترّك و يبتون يخلي باقي السيارت اتدوده...أي ليش؟ أشواراكم؟ و راك دوام تعال على روحك شويه و قوم قبل موعدك بربع ساعه...صدقوني هالربع ساعه تفرق...ليش كل شي برمضان خصوصا تخلونه وقت الحزه و اللزه...أي تعلموا تدرسون أوقاتكم...مثلا الحين ماكو و لا مشوار ياخذ أقل من ثلث ساعه بالطريق...حسبوا حساب أن بياخذ خمسه و عشرين دقيقه...تيي طاير...و تدوده الأوادم عشان حضرتك متأخر على موعد...مشكلتنا أن أحنا شعب فوضوي...كل شي نبي نمشيه بطريقتنا...ماكو أي التزام تجاه أي شي

16 comments:

neelaah said...

مبارك عليج الشهر

انتي الصاجه
للاسف الناس برمضان
تحملج جميله صيامها

جنه صايميين علشان خاطرنا
مو حق الله

أبو جيج يدور نعاله said...

هراء


كلامج عن الفوضى و الإزدحام الشديد بالشوارع لا أساس له من الصحة يعنى ببساطة خرابيط من تأثير الصيام

اليوم فقط شاهدت الحب و التفانى يتفجر فى الشارع

الكل يقود سيارته بمنتهى الحرص على سلامة غيره

الكل يفسح الطريق لغيره لدرجة أن السير توقف فإضطر أحد أفراد الشرطة الشجعان للتدخل حتى يحرك السير


و هذا بعد أن ألح على شخص كويتى ملتحى بأن يتوكل على الله و يتجاوز الإشارة الحمراء حتى لا يتأخر عن بيته و عجينة القيمات ..اللى راح يعملها بأنامله الرقيقة

Fuzzy said...

انا ناوي اسوق السيارة وانا لابس خوذة !
الاشارة حمرا والناس تدوس بنزين بدال البريك اي وين بتروحون آخرتكم بتوقفون عند الاشارة هاهاها والله حالة
وعلى قولة أحمد عدوية

زحمة يا دنيا زحمة
زحمة ولا عدش رحمة
مولد وصاحبه غايب
زحمة وتاهو الحبايب

وين الداخلية من هالمولد اللي بالشوارع هاهاها

صباح الخير يا داخلية

واخيرا مقتطفات من ادارة التوعية المرورية


لا تسرع فالموت أسرع

القيادة .. فن .. وذوق .. و أخلاق

الاولوية للقادم من اليسار

افسح الطريق لرجال الامن والمطافي والاسعاف

esetch said...

كل عام وأنت بخير

Zaydoun said...

أمس الليل طالع من بيتنا رايح قرطبة، الزحمة على الدائري الرابع مو طبيعية... قلت خل أدخل العديلية وأرجع من شارع دمشق، وإلا دوار العديلية أزحم من دوار الشيراتون! حسبالي اكو مباراة في نادي كاظمة بس الموقف كان فاضي

الواحد يقعد بالبيت أحسن له

Hanan said...

It's day 4 of Ramadan and so far I haven't stepped out after Futoor. Soon I woud have to venture out and join those crowds :(

And Happy Ramadan luv :*

LiL ALiEN said...

مبارك عليج الشهر


تقدرون تزيدون على الموضوع الحوادث .. اليوم وانا رايح الدوام بطريقي شفت الحوادث التاليه:

سيارة نقل فاكهه صغيره مقلوبه ومطشره البرتقال بالشارع

شفر داعم شاحنه كبيره من نوع "سكس وييل" وقالبها بالشارع + ان الشفر متعلج

3 سيارات متداعمين من الخلف والسياره الاخيره .. احد حبايب "بوجيج" .. شخص ملتحي داش فيهم كلهم مطشرهم

وانا ماشي حاط ايدي على قلبي .. يعني الواحد لازم يفتتح يومه بهالمناظر

iDip said...

تذكرين مقابلة الشيخ صباح بالطيارة مع يوسف الجاسم

قال فيها:
حتى الدوبـي عندي سيارة

وزيدي عليهم البنجرجي والمقاول ووووو

الحل انه يسوون الديرة
طبقات

ومبارك عليج الشهر
:)

Fuzzy said...

zaydoun

انت في عقر الزحمة عقب الساعة 8 الطلعة من البيت انتحار

Alia said...

نانو ما تعرفين مقالة
أولوية المرور للكويتي
بس في رمضان تصير

أولوية المرور حقي

ومبارك عليج الشهر

Mohammad Al-Yousifi said...

مبارك عليك الشهر

bo9ali7 said...

امشي 100 كم وقضبي حارة النص..والله كريم..مبارك عليكم الشهر

White Wings said...

أنا معاج فعلا
وعجبتني "حزة الحزة واللزة" حلوة :)
كل عام وأنت بخير

Dakhtour said...

Walaw eny too late

Bs Ramadan kareem ;)

bo9ali7 said...

ترى طولتي

Baskin™ said...

مبارك عليك الشهر
وعساك من عواده

 
template by Purplecious