Tuesday, June 13, 2006

ياجماعة الخير....صبّحكم الله بالخير....أعتقد آن الأوان أن كل واحد يقعد قعدة رواق مع نفسه و يسأل نفسه...شنو أبدا؟
الكويت و مصلحة الكويت ولاّ العلاقات الأجتماعيه و العائليه
ما نبي عقب اللي صار كلّه نستمر في مسلسل المجامله و الخزعبلات الأجتماعيه اللي كنا فيه....بس عاد....مصخت....كل واحد أو وحده طول بعرض يقعدون ينظرون بالكلام و لما الواحد يواجههم...يقعدون يدورون مبرّرات و يتلعثمون...و تلاقي التليفونات تشتغل أن لا تييبون طاري جدّام الأشخاص المعنيين....فشله...أي ليش فشله...عبّر أو عبري عن قناعاتك الشخصيه بدون تردد....خو المرشحين مو قاضبين عصاة و مهددينكم فيها...مثل ما أنتو عندكم تحفظات من حق المرشح أو المرشحه أنهم يعرفونها....لي متى بتغلبون المجامله الأجتماعيه على الكويت....هذي سالفه و القصّه الثانيه اللي الحين هابين فيها بعد....لا والله أمّه و مرته حليوين...ذاك الأستقبال...و ذاك الحط...اللي ما عندك بأحلى منّه...انتوا من صجكم و لا أتقشمرون أنتوا ما راح تناسبونهم...أنتوا راح تختارون الأنسان اللي عنده مصلحة الكويت فوق كل أعتبار....أشفيكم؟

17 comments:

Alia said...

اشفيهم؟
في ناس مو هامهم الموضوع أساسا
مثل وحده تقول: لا آنا مو عادتي أصوت

أي عادة هذي .. تونا اول سنة وحضرتها عادتها ما تصوت .. الظاهر توها قاعدة من النوم

nanonano said...

هاهاهاهاهاهاها
عاليه عجبتني هذي....مسكينه حدها مضيعه

gahwah said...

شنسوي بعد هذيله أهل الكويت مجاملات اجتماعية ,عاد كل شيء يستحمل المجاملات الا الانتخابات للأسف مو راضين يفهمون ... زي ماتكوني بتنفخي بقربة مقطوعة على قولة المصريين

neelaah said...

نانو

صراحه كلامج صح الف بالميه

اعرف وحدة راحت حق ندوة مرزق الغانم ، و طلعت منها تقول انها تبي تصوت له
قلت لها يا فلانه ليش شنو اللي شفتيه او سمعتيه شجعج على القرار..

تهقين ششنو الرد؟؟

والله لما خلص الندوة نزل و حب راس امه
و عجبتني الحركه علشان جذي بصوت له

لا تعليق

لمياء الحالمة said...

alia

يمكن كان قصدها إنتخابات الجمعيات التعاونية

:)

nanonano said...

neelaah:
على هالنقطه بالذات شوفي تعليقي عند زيدون

Bo Jaij said...

موضوع حساس جدا

و حاشتنى منه حساسية و حكة و طفح جلدى (( إن شاء الله منه و مو من شى ثانى ))....جاملوا و جاملوا ليه إتروح الديرة إذا ما راحت أولريدى


يا ناس يا كويتيين لا تحكمون على أى مرشح من خلال عائلته ...الكل يعلم بأن عوائلنا ما شاء الله فيها مآسى من التناقضات...فأكبر رجل دين قد يكون أخ لأكبر سرسرى راعى قعدات...و أذرب و أفضل الرجال أخلاقا قد يكونون أولاده تالفين و مدمنين ...إلخ


فرجاءا و بليز للتشكن نجتز....لا تقيسون مدى إستحقاق المرشح أو المرشحة لأصواتكم الثمينة من خلال معرفتكم الشخصية بأحد أفراد عائلة هذا المرشح أو من خلال إعجابكم بتاريخ أسرته فى أى مجال كان....جده من القرن الثانى عشر قد يكون قائد فى جيش المسلمين و قام بتحرير القدس من قبضة الصليبيين....جدته العودة قد تكون أفضل من صنعت الهريس و خبزت الرقاق بالديرة....كل هذا ما له أى أهمية و لا أى إعتبار عند تحديد صلاحية المرشح....فقوموا بالبحث و التقصى عن المرشح نفسه ...سئلوا عن مواقفه ...شاوروا أصحابه و تقصوا الحقائق و لا تعتمدوا على الكتالوجات الدعائية التى توزع عليكم بالندوات و لا على كلام الناس و أقربائه اللى يبتسمون لكم إبتسامات مصطنعة عند أبواب المقار

لمياء الحالمة said...

فقوموا بالبحث و التقصى عن المرشح نفسه ...سئلوا عن مواقفه ...شاوروا أصحابه

بوجيج

هل من الممكن توضيح هذه النقطة, اقصد بها نقطة المواقف, انا لا أقصد بها من سيحاولون الدخول لأول مرة, هؤلاء امرهم سهل

أنا أقصد باللذين كانوا أعضاء بالمجالس السابقة

شكراً

لمياء الحالمة said...

وسلامتك من الحساسية

:)

Zaydoun said...

على طاري المجاملات، هل تتوقعون راح يصير زعل وحروب بين سيدات وبنات المجتمع اذا وحدة ما صوتت حق زوج جارتها، ولا وحدة ما صوتت حق اخو رفيجتها؟؟

الله يستر، ترى حريمنا زاهبين حق المحارب

----

ويا جماعة شوفولي صرفة مع حماة ولادة اللي بتصوت حق بدر شيخان الله يهداها

Anonymous said...

الظاهر مديركم غايب وكتبي خريبيطاتج

بومريوم said...

همتكم انتم لتثقيف المجتمع و تنويره من ظلام الجهل السياسى و أصول اللعبة البرلمانيه

الشباب الطليعى المثقف على عاتقة مهمه كبيره
خصوصا اللجان النسائيه

Soud said...

بصراحة انا مستبشر خير ومتفائل الناس زاد عندها الوعى السياسى


الناس ترى ملت وتحلطمت من نتائج الانتخابات فى السابق على اساس قبلى او طائفى او حتى دينى والمجاملات الاجتماعية

وان شاء الله التغير قادم


لا تحاتون راح تشوفون مجلس قوى

Anonymous said...

انا وياك بوجيج .. فعلا مالي شغل باهله اصابع ايدك مو سوا لذلك اللي يقولون فلان خاله فعلته و تركته و ابوه كذا الخ.... مو ذنب الولد ان اهله جذي ولا تزر وازره وزر اخرى ...
ياما ناس من اهلنا افشلينا بس مو ضروري ننشر غسيلنا و نشهر فيهم و نتبرى منهم ..و اصلا الي يطلع خمال اهله و يحي فيهم ما فيه خير لا حقهم ولا حق ديرته باجر يلعلع بره عن ديرتنا .. اذا بليتم فاستتروا .. صح ...
اسمع كلامه و منطقه و سيرته الذاتيه و مواقفه اذا كان نائب سابق طبعا و هذا الميدان يا حميدان .. والشبعان طبعا ابرك من الطمعان اللي بيركب فوق ظهورنا علشان يوصل و يشفط احتياطي
اعيالنا.. واهم شي ما اسمع الاشاعات ولا راي الناس لين اشوف بعيني .... تى اسهل شي اني اطعن اب شخص و الحساد وايد ... والله يحفظ الكويت ..

يارا

الكوت said...

if it were up to us (as young people) we wouldn't give a damn about mujamalat and we wouldnt care what others think because we know that social relations are irrelevant to political views, but its the older generation that wants to keep the peace as much as possible. At this age they don't want to create frictions or make enemies...therefore this attitude is imposed on the young generation making everyone put on a fake smile.

الكوت said...

another important point is that when someone voices his/her opinion people see that person as representing the whole family and not him/herself.
so any word you say will be perceived as not just your stance but the stance of the entire family!

nagnag said...

انا متفاءلة هالمرة و حاسة إن الشخص لما اتصير وقت الصجية( قصدي قطة الورقه) راح ايحكم عقله و يحط مخه في راسه و ايعرف خلاصة و ايطلع المرشح الادمي إللي فيه طعم .

 
template by Purplecious