غلطة منو

في حاله من الكآبه و ضيقة خلق عامه في الأجواء

.

قعدت أفكّر..غلطة منو الوضع الأقتصادي اللي وصلنا له؟

.

غلطة حكومه ضعيفه؟

.

لما يحطّون وزير ماليه أعتقد أن سعيد بمنصبه

.

و ما يملك القدره أن يوجّه او يواجه محافظ البنك المركزي

.

و لمّا يحطّون وزير تجاره محسوب على جماعه

.

معينه و غير محايد نهائيا..و ما عنده خلفيه في

.

التجاره..على قولة واحد من الشيّاب

.

يمكن عمره (أحمد باقر) ما دخل سوق التجار

.

غلطة محافظ البنك المركزي؟

.

لمّا قلل نسبة الأقراض خلال فتره زمنيه قصيره جدا

.

ما عطت مجال للسوق و المؤسسات الماليه لاستيعابها

.

غلطة ادارة البورصه؟

.

اللي عقب كل أزمه و انخفاض في السوق تعلقّه على

.

شمّاعة الآجل و مع هذا يزيدون و يعطون موافقات

.

لصنّاع سوق أكثر

.

غلطة شركات الاستثمار؟

.

اللي غرها الربح المضمون من تمويل الآجل

.

فتم تمويل جميع الشركات المدرجه بغض

.

النظر عن ملائتها الماليه

.

غلطة المتداولين؟

.

اللي راودهم حلم الثروه..و أنهم راح يصيرون

.

مليونيريه باقل جهد ممكن

.

غلطة محيط عام؟

.

يتم فيه تبادل المعلومات الداخليه للشركات

.

و أعطاء توصيات بالشراء..جنهم بارّينك

.

من غير أن يسائل الشخص المسرب للمعلومه

.

و كأن شي عادي..مع أن بكل أنحاء العالم

.

يتم تجريم هالنوع من الفعل

.

غلطة منو؟؟؟

.

.ما قدرت أعرف منو ابلش هالمره

الطيحه

أمس رجعت من بيروت..طبعا بالنسبه لي أنا بيروت ما عليها خلاف

.

أحبها بكل أوضاعها..صيف..شتا..حر..رطوبه..بيروت غير

.

لما أروح أعرف شنو برنامجي..فكالعاده أستانست..الحمدالله

.

بس أهم حدث في رحلتي هذي..كانت الطيحه..واي..شاخبار

.

الواحد اللي يطيح..أنا آخر مرّه طحت من 25 سنه

.

ذاك اليوم قاعده من الصبح..أول يوم عقب ما كمّلت 37 سنه

.

نازله اللوبي..و طبعا البنت اللي باللوبي..تصبح علي

.

بونجور مادام..بونجور..و أنا طالعه من الأوتيل..عند الباب

.

شفت..يالله من فضلك النائب مصباح الأحدب..و بما أني

.

أعرفه من قبل..سلّم علي..ذاك السلام الحار..يعني..أنا كنت

.

أمسكني لا اطير من الفرحه..ركبت السياره و طلبت من السايق

.

يوديني محل يم الأوتيل..زوجي كان ينطرني بالسياره

.

رحنا المحل..و توني نازله من السياره..و رايحه صوب المحل

.

حطّيت ريلي و لا ما حطّيت ريلي على الرصيف..جان

.

أييبني حفّاظ الودايع على قولة يدّتي..و ألم الرصيف

.

زوجي نزل من السياره على صرخة السايق..الحين

.

أنا ماني عارفه شنو اسوي..أبكي..و لا أضحك..و لا

.

أضف جنطتي اللي طشّت على كبر الرصيف
.

شعور و لا أبّيزه..البرستيج لوعه..و التزلّق ماله والي

.

كانت طيحه ما بعدها طيحه..لي الحين فشلانه

خل نحاول

مر علينا شهر رمضان..و كان شهر حافل

.

عند المدونين..وايـــد لويه..بس الحلو بالموضوع أن

.

خلّه الوقت يركض..ما حسينا..المهم..عندي طلب واحد

.

مهما كانت أختلافاتنا

.

خل نترفّع عن صغائر الأمور

.

خل نحترم وجهات النظر المختلفه

.

خل نتحاسن مع بعض

.

خل نحب بعض

.

خل نصير أيجابيين

.

لأن أحنا.. أظن.. الفرصه الأخيره لهالبلد

.

اللي نحبها..و ما نقدر نعيش من غيرها

.

و لأن الكويت ما تستاهل اللي قاعد يصير فيها

.

خل نحاول

.

و دمتم

.

.

عيدكم مبارك..و عساكم تعودونه كل سنه و تصومونه

Movie legend Paul Newman dies, 83

الأيام الأخيره

وصلنا الأيام الأخيره من شهر رمضان الكريم..والوضع مثل

.

ما أنا اشوفه: ز

.

.

الكل قام يتحلّم بوجبة الريوق..حتى اللي

.

ما يحبون الريوق من طقتي..قام يحلم بالريوق

.

.

العساره بين الكويتيين وصلت قمّتها..جنهم مسوين

.

فضل على البشريه أنهم صايمين

.

.

الترتيبات حق أجازة العيد على قدم و ساق.. اللي

.

رايح يلقّط بقية أغراض هدوم العيد

.

واللي رايح أييب تذاكر السفر

.

واللي رايح يشتري أغراض الشاليه أو المزرعه

.

فالكل طاش بالشوارع

.

.

مع الهبوط الحاد في البورصه..راح يكون

.

أكو هبوط حاد في قيمة العيادي

.

.

طيرة الوقت هالسنه برمضان شي مو عادي..فتّح..غمّض

.

الاّ داخلين أسبوع و مخلصين أسبوع

.

.

عطله سعيده للجميع

لا تعقدونهم

أنا وايد كاسرين خاطري اليهّال و الأمهات..اليهّال عشان الدراسه

.

و الأمهات عشان التدريس..طبعا مشكلة غالبية الأمهات اللي عندهم

.

يهال صف ثانيه أبتدائي..سورة العاديات..المشكله أن ماله علاقه

.

بالطفل شاطر و لا كسلان..سورة العاديات مفرداتها صعبة النطق

.

على طفل عمره 8 سنين..فكل سنه لازم نسمع قصة أم مع تحفيظ

.

السوره..آخر وحده سمعتها أمس..قررت صديقتي أن بنتها تسقط ولا

.

تضغط عليها أكثر للحفظ..تقول لي شلون بنتها قامت تبجي من الخوف

.

من كثر ما أهيه عصبت

.

أنا باعرف شي واحد..أحنا الحين المفروض اللي بجيلنا وصلوا مراكز قياديه

.

بوزارات الدوله..ما يشوفون أن أسلوب التحفيظ اللي مورس علينا ما

.

فادنا..بس كرّهنا بمدرسين العربي و الدين..و عقّدونا من هالمادتين..و لا أحد

.

أعرفه دخل يوم الأمتحان أو يوم التسميع حافظ..فليش الأصرار على هالأسلوب

.

المنفّر في التعليم مع أن الحين بأمكانهم أضافة أساليب تحبب اليهّال بالدين و العربي

.

بدال ما يتعقّدون مثل ما تعقّدنا

المعاياة

أعتقد أن أكثر شعب بالدنيا يحب المعاياة هم الكويتيون..ما يمديك تبدي سالفه

.

أو تناقش سالفه..تلاقي واحد و لاّ وحده ناطين يقول أو تقول لأ..هو نطروا..وأصلا

.

ما كنتو معاي لا بالموقف و لا السالفه..بس يموتون على المعاياة من أجل المعاياة..واللي

.

يحر بالموضوع بعد أذا قاعدين نتناقش و يعايونك و يداحرونك و ينشفون ريجك

..

و بالأخير تكتشف أنهم نفس وجهة النظر.

.

في ناس من حبهم حق المعاياة ما يوهلون عشان يسمعونك أهم شي أنهم يدلون بدلوهم

.

و بما ان دخلنا العشر الأواخر..و البطاريات بدت تخنّس..فقررت أني ألتزم الصمت أو

.

ما أدخل في نقاشات أنا في غنى عنها..لأن أنا كبرت و ما قمت أستحمل المعاياة

.

لأني يمكن أحارب

الحمدالله على السلامه

الحمدالله على السلامه..ما بغينا نوصل حق نهاية الأسبوع

.

أصلا فيني فروح لأن بلشنا العطله..من كثر أحداث هالأسبوع

.

المشكله أن من كل صوب..في شي..ما كان أكو مكان الواحد

.

يقدر يصد فيه و يريّح شويه

.

التعب بالموضوع أن من كل النواحي

.

الصعيد الشخصي: أحتكاكي الأول و الأخير مع المقاولين

.

الصعيد الأجتماعي: القرقيعان..و وصلكم القرقيعان و لا لأ

.

دراريع اليهال..استانسوا اليهال لما راحو؟

.

و طبعا فوق هذا محاتاة اليهال على ما يوصلون البيت

.

الصعيد المهني: أنهيار السوق..و محاتاتي لنتيجة هالأنهيار

.

الصعيد المدوني: الصيحه اللي صارت على مذكرات الدكتور

.

و فوق هذا كلّه كانت غبقتي يوم الأثنين

.

يوم أنهيار السوق و يوم بداية لوية المذكرات

.

فكنت يوم الأثنين ما أدري منو أكلم

.

الطباخه و لا الدلاّل و لا الناس اللي مو عاجبها تعليقي

.

فقررت بهاليومين..أريّح مخي

.

و لا أدخل في نقاشات لا عن السوق

.

و لا عن سهمي الصفاة و الصفوه

.

و لا عن المذّكرات

.

عطله سعيده للجميع

مراهقات و مراهقين

أنا ما أدري عيال هالوقت شنو صاير فيهم

.

و لما اقول عيال قصدي المراهقين و المراهقات

.

مو معقولين..فيهم يراعه و قواة باس مو عاديه

.

أحنا مرّينا بهالمرحله و استانسنا فيها بس كان

.

كل شي نسويه في حدود.. وكنّا نحترم الآخرين

.

بحيث مهما كانت وناستنا..كانت توقف عند حدود

.

أزعاج الآخرين..و هذي كانت طريقة تربية أهالينا لنا

.

الحين فنّك تحاجي مراهقه أو مراهق..ما تدري شنو ممكن يكون الرد

.

قبل كم يوم..كانت ايام القرقيعان..رايحه منطقة اليرموك

.

دخلت الفريج اللي يوصلني لي بيت الجماعه اللي رايحتلهم

.

هالشارع ما ياخذ مني 3 دقايق عادة..هالمره 10 دقايق

.

بسبب مسيرات بمناسبة القرقيعان داخل هالشارع الفرعي

.

تهوّلت من اللي شفته

.

سياره جيب فيها 4 مراهقات طالعين لي نصهم من السياره

.

و متلثمين و قاعدين يرشون سياره الشباب بالفوم

.

وانيت ثاني هم فيه وايد بنات مبرقعات و لابسين دراريع فاقعه

.

و قاعدين يصارخون على علو حسهم بالفريج

.

طبعا كلهم فالّين شعورهم..و لا وحده ضافه شعرها

.

سياره ثالثه فيها شباب مو عارفين شنو يبدّون عليه

.

هذا غير مجاميع البنات و الشباب اللي قاعدين يمشون على ريولهم

.

تبون تستانسون

.

تبون تغازلون

.

تبون تغنون

.

تبون تضحكون

.

كيفكم عليكم بالعافيه..بس ليش هالتصرفات الغير حضاريه

.

ليش تزعجون و بوقاحه المستخدم للشارع

.

و الله العظيم مسكين ما يبقى شغّال أو شغّاله و لا سياره ما

.

تسبّحوا ذاك اليوم

.

ليش ما توقفون عند حدود الآخرين؟

.

المشكله أن الواحد ما يقدر يشره عليهم

.

يشره على الأهل اللي ما حاولوا يبذلون أي مجهود بالتربيه

البنيان و ما أدراك ما البنيان

أذا تبي تدعي على أحد

.

أدعي عليه يصير عنده بنيان

.

واي يا البنيان

.

مو معقـــــول

.

هذا اللي صج يبيله قلب ما يتعب

.

أنا أول كلّه أقول أشدعوه و متشيحطه بزوجي المعماري

.

يعني اللي يمرون فيه غيري ما أمر انا فيه

.

و يقول الله بقوله

.

كل نوع بهذله في البنيان مرت علي

.

لا فادني لا زوجي المعماري و لا خبرته

.

مو معقولين

.

المقاول يسوي روحه فاهم كل شي..و لما يصير التنفيذ

.

يطلع اللي أهوه فاهمه و متليقف فيه..ما له علاقه باللي أحنا نبيه

.

الصحّي..ما صدّقت أيون ملوت تركيب البورسلان..وين البورسلان؟

.

ما يبناه من المخزن..عيل ليش ياييّن؟؟؟

.

مال المطابخ..يصير عنده أختلاف وجهة نظر مع المقاول

.

و أنا اللي أتعطّل

.

كل هذا صار خلال فترة العشر أيام اللي فاتت لأن زوجي كان مسافر

.

و أنا صرت المسئوله عن البنيان

.

أنا متأكده أن المقاول بيقط وراي سبع حيرات اليوم

.

لأن بيفتك مني و من حنّتي

حشّه على الماشي بالرياييل

في حوار لطيف بين منيره و حمود الطواش بمسلسل الأقدار تقول له

.

منيره: خليفه أيموت على الحريمات..ماله جبد عليهم

.

حمود: هذا مو عيب شرعي

.

بالفعل..عموما الرياييل عندهم عادي أنهم يكونون متزوجين أو مرتبطين و أذا طلعوا

.

سواء بروحهم أو حتى مع زوجاتهم تلاقيهم يخزون من غير ويع قلب..بس خل الزوجه

.

تلتفت..و ساعات المسكينه تسرح..يعني مو قصدها تخز أو أطّالع..ما تدري شنو ممكن

.

أييها من تنزّر و أتهامات أنها قويّة عين..المشكله أن هالطّبع ماله شغل بالخلفيه

.

الأجتماعيه أو الثقافيه أو التعليميه للريّال..شي موجود بجيناتهم..و بعدين كلّه تروالهم أن

.

اللي مو عندهم أحسن من اللي عندهم..و أن زوجاتهم أو صديقاتهم طايحين

.

بجبدهم..يعني أنا ما اذكر آخر مرّه سمعت فيها زوج يتحلّى على زوجته ..او على الأقل

.

يلتزم الصمت لما أحد يمدح زوجته و ما يبتدي يعذرب..و الله الدّاد لنا..يعني لا من خيرهم

.

ولا كفاية شرهم..الصج الرجل شر لابد منه

.

.

.

ملاحظه: الموضوع هذا ماله شغل بحياتي الشخصيه..بس قلت للتغيير عن الحديث الممل عن الوضع السياسي و الأقتصادي للكويت

.

عطلة نهاية أسبوع سعيده.

فيروز

الحين مع الزحمه المروريه الخانقه

.

أي مشوار ما راح ياخذ مني أقل من نص ساعه بالسياره

.

و عشان ما أفقد أعصابي و أحتر من الزحمه

.

أسمع فيروز

.

ماكو أحد مثل فيروز تونسني في مثل هالظروف

.

لأنها تبرّد القلب

.

تسولف معاك

.

أتحلطم

.

أتشرّه

.

أتطنّز

.

أغانيها دمها خفيف ... طبعا بعكس شخصيتها الحقيقيه لأنها ودره و ما تنتحاجى

.

و اذا غنّت عن الحب..تعيش في عالم ثاني

.

عالم مريح

.

براد

.

و لمّا أسمعها أكثر شي يطري على بالي جملة المدوّن القديم

.

الاّ نبيذي

.

فيروز غنّت لحب ينمو بجانب نهر و صنوبره و قرميد و ثلج و شمس

.

فأنصحكم بفيروز هاليومين عشان توسّع صدوركم

.

تحيّاتي

برقيات لنوابنا الشباب الأعزاء...صباح الخير

محمد العبدالجادر: ترا الأمل مال شعاركم شاركونا الأمل ما بقى منّه الاّ أغنية الأمل مالت عوض الدوخي

علي الراشد: وصلنا رمضان..قرّرت أتجمّد و لا ما أتجمّد

مرزوق الغانم: أياك و اليأس من وطنك..ترا اليأس طلع من خشومنا

صالح الملاّ: ما شفنا شي من رؤيتك الجميله.. و لا صار الوطن أجمل

.

.

.

و لا تعطوني عذر الأيد الوحده ما تصّفق..أنتو مو أيد وحده..أذا قرّرتوا أتنعزون خلافاتكم الشخصيه على كتر و تركزون على الكويت…بس عاد..ملّلتونا بصخّتكم

الكبر شين

مظاهر التقدم بالسن

الحديث بصوت عالي...الظاهر مع التقدم بالعمر نبرة الصوت تزيد بعد

الصّمخ الأنتقائي...أذا أشتهوا أسمعوك و أذا ما أشتهوا قالوا لك..هــــــا..خيـــــر

آلام المفاصل

اللقافه...عسى ما أحد تكلّم..يدلون بدلوهم..يعني ما طافهم شي

الشعور الدائم بالبرد...تدخل بيوتهم تقول داخل تنّور

التذّمر الدائم...لو تشب أصابعك شمع ما أيوز لهم كلّه شغلهم مال أول أحسن

المبالغه في تجميل الماضي...و ما شاء الله نسبة الجمال أول وايد أعلى من الحين..كلّه وي ما شفتوها أول

تخشّش الأكياس و البطول الفاضيه

و اللي عنده أضافه يتفضّل...مابي أحد يقول لي هذولا الكبار...هذولا الخير و البركه...ترا أدري...الموضوع كلّه قشمره...للترفيه و الترويح عن النفس

بسنا تحلطم

خارج الموضوع: اليوم ياني تليفون..طبعا عقب ما رجعت للتدوين..هذا أول تليفون تحذيري..قالوا لي يا نانو حطّي بالج لا أتطرقين لنائب معيّن..لأن مريدينه راح ينتفونج...الصج..ما ياز لي الكلام..ترا أنا بقول اللي باقوله..و هم باسوّي اللي بسويه..واللي أيوز له حيّاه الله...و اللي ما أيوز له...هم حيّاه الله..بس أنا بظل على اللي أنا عليه

******************

هم خارج الموضوع: بمذكرات الكتور الخطيب اليوم يقول

لقد شرب حليب السباع

منو يقصد؟

أنا ما فهمت أي من الشيوخ يقصد

******************

أمس بالذات عرفت شعور الدجاجه لمّا ايفوحونها بالجدر حق المجبوس....أمس الرطوبه عقب المغرب ما كانت عاديه...لأ و لازم تفترين و تباركين بالشهر...أنا خذيت كل أحتياطياتي...أنا أصلا مو من الناس اللي يحطون مكياج...فما عندي مشكلة مكياج سايح...ضفّيت شعري..عشان لا أيقفقف مع الرطوبه..و دراعتي قطن مصري...يعني ماكو أبرد..و أنتو بكرامه قندرتي واطيه..عشان الكعب مع الرطوبه أحتمالات الزلقه وارده جدا..وبديت المشوار...وااااااي...موت حر...على ما تنزل من السياره لين توصل ألا شعور الدجاجه المفيوحه...خلصنا... عقب ما شربت 10 فاجين قهوه عربيه...الرقعه وصلت مليون.. تروح حق ناس ما لهم سالفه ألا التحلطم و الذم و الشكوى من الأوضاع...يعني ما يعطونك الا طاقه سلبيه...و أنا أصلا كنت متخذه قرار بيني و بين نفسي بمقاطعة هالنوعيه من البشر...فقلت أنا ليش قاعده أسوي جذي في نفسي..و بالنهايه الشرهان أكثر من الراضي...قرّرت ما أكمّل الزيارات الرمضانيه..وأجابل حلقاتي مع صديقاتي أحسن

د.أحمد الخطيب...أخجلتنا

http://www.aljarida.com/aljarida/Article.aspx?id=75980

إهداء

إلى شابات وشبّان الكويت الذين يعملون على إعادة الكويت إلى دورها الريادي في المنطقة.
إلى أولئك الذين يسعون إلى بناء مجتمع ينعم فيه المواطن بالحرية والمساواة تحت سقف قانون واحد يسري على الجميع، ويكون هدفه إطلاق إبداعات أبنائه وليس تقييدها باسم المحافظة على عادات وتقاليد هي جاهلية في طبيعتها ولا تمتّ بصلة إلى الدين ولا إلى ما جبلت عليه الكويت منذ نشأتها من تعلّق بالمشاركة في السلطة، ثم الالتزام بدستور 62 الذي قنن هذه الطبيعة الكويتية.
إلى الشابات والشبّان الذين يحلمون بمستقبل مشرق للكويت يعيد دورها الرائد في محيطها، كي تنضم إلى عالم العلم والمعرفة الذي أخذ ينطلق بسرعة هائلة لا مكان فيه للمتخلّفين.

إلى هؤلاء جميعاً أهدي هذا الكتاب

و أنا أرد و أقول

شكرا جزيلا دكتور وان شاء الله نكون قد مسئولية الأهداء

نهايه سعيده

أمس كانت الحلقه الأخيره من نور...الحمدالله ما قصّروا الأتراك قزّروا علينا هالصيفيه...فبورصة المسلسل أمس كانت مراهنه على موتة مهند أو نور...ما أدري ليش الكويتيين قاموا يحبون الكدر...نسوا شي أسمه نهايات سعيده... أثناء المسلسل البارحه هاتفني صديق بيستفسر عن شغله...قلت له أنا مشغوله اليوم الحلقه الأخيره...فسألني اشقاعد يصير الحين ؟...قلت له اسكت نور مريضه...و يمكن أهيه اللي تموت...ردة فعله صدمتني...قال لي فكّه...هو ليش ؟!..أشفيك على نور...أنا اللي أعرفه أن الشباب ميتين عليها... و كلهم أمنية حياتهم تييهم مره أتدللهم مثل ما نور مدلله مهند...قال لي نسيتي ال 87 حلقه اللي علّتنا فيها؟ الحين آخر 5 حلقات تسنّعت...خلاص طاح الحطب؟؟ قلت له اشدعوه عليك...شالتحامل...الله يا قلبك الأسود...المهم صارت النجره بيني و بينه جنّه نور و مهند أهلنا أنا وياه...خلّصت منّه...وقعدت أكمل الحلقه الماروثونيه..وحده من صديقاتي اللي قاعده أتابع معانا..أمس كانت أول حلقه تشوفها....يمكن 15 مره سألتنا منو فجر؟
مو قادره تستوعب أن فجر أسم ولد عند الأتراك مو مثلنا

بس أحلى شي بالمسلسل كلّه كانت تسريحة شريفه خانم آخر الحلقه...ما أدري ليش هوّل فيها المخرج باللحظات الأخيره...و شنب مهند

بس اللي حاز في نفسي دعاية زين...قطّوره صارت مطره...راح أفقدها

عموما كل عام و أنتو بخير...أنا من الحين أني راح أتابع بس حلقتين برمضان...بعد الفراق و أسمهان و وحده تاريخيه أبو جعفر المنصوري....فقط لا غير

مو منّا...من

أنا بس كنت أحب أوضح شي واحد

في موضوعي السابق أنا بس سؤالي الأول كان موجّه للرجل الكويتي

أما بقية الأسئله كانت عن الحريم و الرياييل

الكل ما قام يثبّت

الكل متدوده

الكل ينسى

في حاله من الشدهان ضاربه الجنسين

و أنا ما ألومهم

بهالفتره بالذات

خلصنا الأجازه الصيفيه

رجعنا

و في بعضنا ما سافر فما رجع

تحمل الحروره و الغبار..و آخر الفيلم الرطوبه

دخلنا في لوية ما لها أول من تالي

أيران

السوق نازل

مدارس

رمضان

تصريحات النواب الأمه و البلدي

رطوبه مره ثانيه

زحمه الشوارع

غلاء الأسعار

و الوقت اللي يطير من غير ما نحس

فشي طبيعي الخيار يكون يا كبريت يا تفهّي

لام الله من يلومنا

تساؤلات

ليش الريّال الكويتي لعبته اللف و الدوران ما عنده شي سيده؟

ليش لمّا نقعد في أجتماع محد يسمع الثاني؟

ليش كل واحد يفهم السالفه على كيفه مو مثل ما سمعها؟

ليش الكل صاير يا الله نفسي؟

ليش أذا استخدمنا الأسلوب المهذب بالكلام يستضعفونك؟

ليش الكل صاير ينسى..محد قام يثبّت؟

ليش الكل صاير كبريت...بمن فيهم أنا؟

نجم السهيل

أنا ما أدري ليش...بس دلقة سهيل وايد مهمه حقي...اليوم أول يوم دوام بعد الأجازه...و طبعا أول ما أوصل المكتب أول شي أسويه ..أطالع تقويم العجيري...و أنا قاعده أقلب الأوراق...الاّ اليوم يوم طلوع نجم سهيل...اليوم يدلق سهيل....بالنسبه لي دلقة سهيل دليل على انتهاء فصل الصيف الحار القاسي...طبعا أهوه ما خلّص بس نفسيا أحس أنا غدا الشر...و شي ثاني...ومثل ما هو واضح جدا....دلقة سهيل هالسنه على رطوبه....فهذا معناته أن شتانا ما راح يكون بارد...فما أشتط بالهدوم الشتويه عشان لا اتطيح بجبدي....فأحب أقول كل دلقة سهيل

و أنتو بخير