كل عام و أنتو بخير

كل عام و أنتو بخير يا جماعه...و ان شاء الله تكون 2006 أحسن من 2005 حق الجميع...أدري بتقولون ليش مستعيله...بس لأني الأيام الأربعه الجايه ما راح يكون بامكاني اني أكتب شي...ف HaPpY NeW YeAr أمس قعدت مع نفسي و ياليتني ما قعدت معاها...لأني اكتشفت أني ما قدرت أحقق و لا هدف من الأهداف اللي حاطتها حق روحي حق سنة 2005 بل بالعكس سنة 2005 ما كانت سنه وايد زينه بالنسبه لي....بدت نوعا ما زينه بس تيّست مع مرور السنه و بعدين ما أدري شلون مرّت السنه...شك ..بم...الا احنا في نهايتها فان شاء الله سنة 2006 تكون سنة خير على الجميع

وصلني مسج من صديقه قديمه لفت أنتباهها تعليق السيد KwtiArchitect على موضوع ستار أكاديمي تقول لي مافي أنسان جاد بالمطلق أو تافه بالمطلق كلنا فينا خليط من الأثنين بس بنسب متفاوته مثل الخير و الشر بصراحه عجبني تعليقها

شكرا بو مريوم خـــــــــــــوش نقصه

صباح الخير....شاخباركم مع ستار أكاديمي البارحه....شفتوا هاني المصري؟ يا زينه أمس الكل أجمع عليه...بالنسبه لي أول شي كونه مصري هذي أول ايجابيه بالنسبه لي...... و بعدين ملح الدنيا... و مؤدب ...و خنة حيلي يتيم....و يغني بالعربي و الأنجليزي و الفرنسي بطلاقه...و رسّام...تقريبا...تقريبا كامل و الكامل الله....بس خوفي من شي واحد بس لا يصير ثقيل طينه...لأن من استثقل طينته هاللمميزات اللي قلتها كلها بتطير واقلب ضدّه...فان شاء الله يصير دمه خفيف و حليو....مو زغل

Life Is Too Short To Hold a Grudge

اليوم الأربعاء

منو يقول لي هالمقطع من الأغنيه من أي مسرحيه جمالش و دلالك...حيّرني أي حيرني و رمشك الأكحل كشمشني و أنا قلبي تعذّب و ذبحه الهم يكفيني...أشوفش..أشوفش و أشمك شم have a nice weekend

لحقوا يا الأيواد....بو راكان راح يوقّف

ولو أني قايله أني ما راح أييب طاري بوراكان....لأني أخاف منّه...بس الفقره الأخيره في مقاله اليوم ضيقة خلقي...اللي تقول لحظة.. قانون المطبوعات القديم او الذي هلل له السيد وزير الاعلام والسيدة القاطي مسلط علي.. لذا فسوف اتوقف.. مجبرا.. كما يتوقف ربع مليون شيعي كويتي.. وفوقهم ربما بضعة آلاف ليبرالي كويتي ايضا عن الكتابة. http://www.alqabas.com.kw/writersarticlesdetails.php?aid=9208

عندي صديق يمتاز بخفافة الطينه....دمّه شربات....صار لي كم يوم ما أدري عنّه....اليوم دقيت عليه عشان أتطمن عليه...قلت ها يابو فلان وينك عسى ما شر.....شان يقول لي أي ما شر أنتي ما تشوفين السوق؟ السوق نازل ضغطي نازل سكري نازل أنا بس أبيك تروحين الساعه 12.30 و توقفين سيارتك عند بنك الخليج و قهوة سكوند كب و شوفي وجه الرياييل لمّا يطلعون من البورصه....كل واحد وجهه اشطوله كأنه مطّاعه و طايره بوهتهم....متخدين و قاعدين...خليها على الله....الله كريم

بمناسبة كسر السوق حاجز 11,200 نقطه لاحظوا مقطع زغروطه يا أم صلاح...هذا اللي ودّي أسويه الحين http://song5.6arab.com/tamer-7osny_kol-marra2.ram

have a nice weekend

خل نتسلى نهاية هالأسبوع و نشوف منو يقدر يعطينا أحسن ترجمه حق هالأغنيه غزاله بزاله تحقرص تمقرص ضب ضباب الليله بلاغه بلغت در http://gulf.salmiya.net/songs/tv-band/ram/tv-band22.ram

From a3sab

This Is My Life, Rated Life: 6.1 Mind: 5.7 Body: 5.2 Spirit: 6 Friends/Family: 6.6 Love: 5.5 Finance: 5.5 Take the Rate My Life Quiz

يا جماعه أنتو مو ملاحظين حالة التسيب و اللامبالاة بين الشباب الصغار...أنا أقصد اللي تتراوح أعمارهم بين 14 و 18 سنه...أول أمس كنت قاعده مع أخوي المراهق...اللي ينتمي حق نفس الفئه السنيه هذي...ما تتخيلون شلون طارت بوهتي....مو معقولين المصبنه...و مساكين مدرسينهم...مع الأخذ بالاعتبار أن أخوي عنده نوع من الخوف حق أمي و أبوي....هذا و اهو يخاف جذي!...أنا اقترح الغاء النظام الثانوي للبنين و تحويلها جميعا الى مدارس عسكريه...عشان على الأقل يتعلمون الأنضباط و الجديه في الحياة...مو مثل الحين هوي هوي يا ناقتي

زود بالنعمه.... ما راح أقدر أروح ندوة د.الخطيب و لازم أروح العشاء

الجينز

الله يسامح اللي اكتشف الجينز...واللي رد مودة الجينز....حدي معصبه على روحي....دقت علي قريبة أمي تطلب مني حضور عشاء في بيتها على شرف عروسهم الجديده..... و طبعا لأن أمي و خالتي ما يقدرون يحضرون لظروف خاصة...صارت الصكّه فيني...ما أقدر أعبر عن مدى كرهي للمناسبات الاجتماعيه....ما أحبها...بس هالمره أنا مضطره أني أروح...قعدت أفكر شنو راح ألبس....اكتشفت أني ما شريت شي هالسنه يصلح حق شي رسمي مثل جذي...كل هدومي يا حق دوام أو جينزات...يعني ببساطه شديده ما عندي شي مرتب...واليوم لازم أروح السوق شود الله يوفقني و ألاقي شي يناسب العشاء.....وااااي مالي خلق

أكره شي بالدنيا....لما الواحد يبتدي يكتشف ان أعراض العمر بدت تطلع عليه...أبوي معطيني روايه قبل 3 أيام...واشتطيت لأني قاعده أدور شي حلو ينقرا....المهم....فتحت الروايه...حاولت أقرا....و بديت أندمج...بس في شي مو مخليني وايد أندمج...شالسالفه؟....ماني قادره أقرا الأحرف عدل...لازم وايد أركز....وليّن...الحين أنا ألبس نظاره لأني ما أشوف من بعيد...بس مابي أضطر أني ألبس نظاره ثانيه حق القراءه...و أصير حالي حال العيايز اللي يبدلون نظاراتهم حسب الغرض...و لا تقولون لي ليزك هو الحل...لأني أخاف ألعب في عيوني....يا كره هالشعور

لتغيير الأجواء

http://moroccan.salmiya.net/songs/warda/ram/warda47.ram

ما ينداس له على طرف

وخزياه...وخزياه..وخزياه...الله يا الفشله...ما توقعت بوراكان بيرد علي...قلت كلش...كلش بيعلق على مدونتي...بس أن يغسلني شذي جدام الله و خلقه...هذا اللي ما حسبت حسابه...لا يحوشك...ما ينداس له على طرف ;-)

a movie i would love to watch

بو راكان....أبيض

عادة لما أقوم من الصبح أول شي أسويه أشرب شاي حليبي و أقرا القبس....و يوم الخميس بالذات...الشي الوحيد اللي أقراه مقالة عبداللطيف دعيج...المهم أول أمس فتحت الجريده...و دورت المقاله...الاّ بوراكان كاتب...ألا أني أكلت يوم أكل الثور الأسود..هاااااو..شان آخذ التليفون و أكلم أبوي..صبحت على أبوي و سألته يبا ألا أني أكلت يوم أكل الثور الأبيض و لا الأسود..قال لي لا يبا الأبيض...تشكرت منه و سديته...دقيت على صديق خبير بقصص التراث العربي...سألته قلت له ألا أني أكلت يوم أكل الثور الأ....شان يضحك ضحكته الجهوريه...و قال لي عبد اللطيف دعيج...لأ أبيض...أبيض...أنا مو قصدي أني أصلح حق بو راكان...بس حبيت أعرف أذا كان يقصد شي ثاني

شكرا بو عمر

http://www.aljasem.org/Index.asp?opt=2&art_id=97

السلام عليكم...أشلونكم....لا تواخذوني...بس أنا كنت في أجازه قصيره مع بعلي...رحنا بيروت...أدري بتقولون يا حبك حق بيروت...بس من صجي من أوصل هناك...أستفل...مو عن شي...بس كنا أنا و زوجي محتاجين تغيير الجو هذا...المهم رحنا و استمتعنا و أحلى ما كان بالرحله المجموعه...كانت خوش مجموعه...أنا أول مره أروح بيروت شهر نوفمبر...وايد يازت لي...وايد رايقه...ما فيها ضبّة خليجيين...و اللبنانيين الموجودين نفسهم أهل بيروت...لأنهم عادة في الصيف يكونون مسافرين ... تدرون شنو اللي لفت نظري في السوليدير...كان العموم أم و أب و أطفالهم...و الأطفال تتراوح أعمارهم من سنه الى 8 سنين...يعني عز اللويه ما كان معاهم شغّالات..مو مثلنا الشغالات أكثر من اليهال في مرينا كرسنت...عموما خوش سفره...و ولهت عليكم

بو مريوم يوز عني

بو مريوم الله يهداه أعلن الحرب علي و السبه اليقط....يا جماعه طول عمرنا نعرفه يقط مو أقط...و تبون الصج أهوه شي ما يسوي النجره عليه....الله يزيد النعمه...حليب غنم مجفف...و على قولة ماد م كأنه حجر جيري....و فيه ريحه تشمها لو أنت على بعد كيلو...هذا غير الوصخ اللي يطلع منه أذا حطيته بحلجك....بصراحه شديده ما أعبّر عليه...فيا جماعه...أنتوا تعرفونه باليقط و لا الأقط؟ http://grafika.blogspot.com/

عمركم شفتوا باص يقحص....أنا شفت اليوم....ماني عارفه شلون ينقون سوّاق الباصات...كأن في مسابقه لأردى سواقين...و يختارون الأسوأ

have anice a weekend

http://www.kubbar-media.com/Video/darb_alzalaq-alne3el.ram

أنا الحين قاعده أستمتع بالشاي حليب و الدرابيل.....لا يطوفكم هذي حزّته....و بعد شوي...لما يبرد الجو شوي....رهش و خبز أيراني....الله وناسه

For You

http://songs.6arab.com/fairooz..3endi-seqa-feek.ram

يا بختنا

http://music.6arab.com/fairooz..a5er-eyam-el-sayfeyee.ram اليوم شي غريب كل ما أفتح مدونه..... الاّ طبعا مدونه العزيز بو مريوم...الكل يتحلطم على الجو و أن غيم...أشفيكم!....استمتعوا...احنا بخير و نعمه...أشوفكم محّد تحلا على الجو بعطلة نهاية الأسبوع...الجو كان خيالي...جو نظيف اللي يعطيك شعور كأنه بيتقرمش معاك...بس اليوم صار غيم كلكم تحلطمتوا...و انقمتّوا...أنا اعتقد أنكم تبون الشاره يتقرمش=crispy

يوم الجمعه رحنا أنا و زوجي و صديقتي أم صفنه و زوجها فيلم السفاره في العماره....رحنا سينما الكوت...و قعدنا في آخر 4 كراسي....من صجي كانت آخر أربع كراسي...و احنا داخلين الفيلم سألني زوجي تبين شي؟ ما أدري ليش قلت له أبي فشّار حلو و مالح...مع أني مو زود مع الفشّار...المهم قعدنا و ما أدري شنو ياني...شان أقرر أني أخض الفشّار عشان يختلط المالح و الحلو...فاستجمعت كل قواي ......و خضيت....اللي أقدر أقولكم أياه أن اللي جدامنا تسبحوا...بالفشّار...طبعا أنا بهاللحظه...ما عرفت شنو أسوي.....وكالعاده غشيت من الضحك.....اللي معاي كلهم قاموا يتأسفون حق اللي جدّامنا... و أنا ماني قادره أتكلم من الضحك...بس لمحت نظرة الغضب من زوجي...و صديقتي أم صفنه لاحظتها أهيه بعد...شان تقول لي زوجك عصّب عليك...قلت ما عليه...أركب السياره معاه و يزفني...و هذا فعلا اللي حصل...ركبت السياره و انغسلت غسله...بس صدقوني الضحك اللي ضحكته كان يسوى الزفه الفشّار=popcorn

ألا أني أكلت يوم أكل الثور الأبيض

200 من أبناء القبيلة اقتحموا مبنى القناة ودمروا ثلاثة أدوار من أدوارها الخمسة أبناء «صلبه» هاجموا «الراي» http://www.alwatan.com.kw/Default.aspx?MgDid=376003&pageId=26

Hi Bloggers i was checking out Mohammed A.qader Aljasem web site and i found this

طلع الداس عليك!!

هذا المقال ما كتب بقلم الجاسم ولكن كتب من احد القراء تحية لكم جميعا. اولا ننوه انه تم اختراق الموقع و انها فرصة لي كي اكتب للجاسم ما يحول في نفسي

مقالاتك يا الجاسم في الفترة الاخيرة حقيقة تعكس الواقع و لكن لماذا لم تتكلم حتى الآن؟ الم تكن في الوطن رئيسا لها. يبدو ان زمالة اللصوص التي حتى القضاء الكويتي لم يستطع على محاكمتهم (و لم اقل ادانتهم) تحكمك.

ارجو ان تكمل كتابة المقالات الجيدة اللتي تعكس الواقع بعيدا عن التعصب و التسلط و في ما هو خير لبلادنا.

ارجو ان تتيح للقراء مكان للتعليق على المقال و في ذلك مزيد من الدموقراطية اللتي تؤمن بها و التفاعل مع الناس

مرسي لا إلك

papairoo: no harm done, simply rename your index page your site should run fine.

I found it funny........

لا يكون احنا تعدادنا مليار

http://www.alqabas.com.kw/news_details.php?cat=1&id=131453&brdate=2005-10-25 وتوقع تقــرير خاص للجنة اعداد خطة طوارئ للوقاية من دخول وانتشار مرض انفلونزا الطيور في البلاد ان يكون حجم الاصابات في الكويت في اسوأ الاحتمالات ما يقارب 900 الف اصابة في خلال 8 اسابيع مع بدء تسجيل اول اصابة وذلك حسب التحليل الوبائي المبني على المعطيات الوبائية العالمية والصادرة من مركز مكافحة الامراض في الولايات المتحدة. يعني نصنا

يالله من فضلك

أهداء الى NYchick

يا بختها...مو؟

يايني خداي هالرمضانيه مو طبيعي...ماني عارفه ليش...تحليلي الشخصي عوينه....أو من عيابي على صديقتي أم صفنه....بس صايره وايد أسرح....و من ما تعجبني السالفه أعطيها سرحه...أنا ما كنت شذي...و أمس صار فيني موقف...بايخ...وحده قاعده تسولف لي عن بيتها و مسكينه مشتطه...و أنا كنت معاها ..في لحظه من اللحظات...فقدت كل حواس التركيز...و ما أدري شنو صار اللي أشوفه حلج يتكلم بس شنو قاعد يقول ما أدري...أنزين هذي سهله...قمت أخوره بالكوت...هني حسيت نفسي أنا بمشكله بس ما أدري شنو حلها...أذا عندكم حل...أفيدوني أفادكم الله

بموت من الجــــــــــــــــــــــــــــــــــــــــــــــــــــــــــــــوع

الآّ باسأل....أبن زيدون كويتي؟ لأن عقب الفاصل اللي سواه بولاّده البارحه وايد ذكّرني بشباب الكويت

Holiday

Holiday Celebrate
Holiday Celebrate

If we took a holiday
Took some time to celebrate
Just one day out of life
It would be, it would be so nice
Everybody spread the word
We're gonna have a celebration
All across the world
In every nation
It's time for the good times
Forget about the bad times, oh yeah
One day to come together
To release the pressure
We need a holiday

What do you think of 1 night stand?

أنا تقريبا يوم و ترك أروح بيت خالتي....مشكلتي هناك...أن الشغالين عندها في البيت مربين قطاوه الشارع....فحوش البيت القطاوه فيه خرّي مرّي....فكل ما أبي أطلع من بيتها لازم أمي و خالتي يطلعون معاي لي الحوش عشان يأمنون سلامتي...أول أمس طلعنا و كان معانا مجموعة من النساء صديقات أمي و خالتي...ألا قطوتين....لو تشوفون شلون متقمطين على الزرع...و الراحه اللي قاعدين فيها...فعلقت وحده من صديقات أمي...يا ريت فيني شده عشان أقدر أتمقط مثل هالقطوه...شان ترد عليها الثانيه....أنتي شوفيهم شلون يارعين...خو القطاوه الحين لو تقعدين تكشين فيهم من اليوم لي باكر يدوبك يلتفتون عليك..و تعطيك القطوه و لا العتوي نظره و يكمل مشواره....بس أحنا بهالديره بقى أحد ما يرع علينا....حتى القطاوه يرعت....خلف الله علينا...و الله صاجه

أنتوا أي نوع؟

http://www.alqabas.com.kw/writersarticlesdetails.php?aid=7819 محمد مساعد الصالح آخر العمود تعليقا على ما كتبت امس عن والدتي، اتصل بي الصديق خالد البدر قائلا ان والدته، رحمها الله، كانت تقول له ان السنوات العشر الاولى من الزواج يكون فيها الزوج مثل الاسد يزأر، وفي السنوات العشر الثانية يكون الزوج مثل الحمار ينهق، وفي السنوات العشر الثالثة والاخيرة يكون الزوج كالقرد (شاذي) يجلس في زاوية ليتفرج عليه ابناؤه وأحفاده.. وهو، اي خالد. يعيش المرحلة الثانية (الحمورية)، اما انا فقد تعديت مرحلة القرودية!

عشان تعرفون لي أي مرحله وصلنا...أمس قاعدين يسولفون...عن مسئول رياضي كبير...دخل على فريق كرة القدم و معاه قريبه المليونير...شان يقولهم...شفتوا هذا...هذا فلان الفلاني....ترا عطاني وعد أن أذا فزتوا بالمباراة الفلانيه...راح أييب لكم................هيفاء وهبي الله و كبرها عند ربي....هذا معناته أن المسئول ما يعرف شئ عن أخلاق المفروضه بالرياضيين....و يوم الله قدّرك بتعطيهم دافع...تييب لهم هيفاء وهبي و يقولون ليش وصلنا هالمستوى المتدني بالرياضه أذا كان رب البيت بالدف قارع فشيمة أهل البيت كلهم.....الرقص

قاعده أكلّم صديقتي الوسواسيه....هذي الأنسانه...اللي لا تتييبين طاري الموت جدّامها...تقعد تنفخ و ما أدري شنو تسوي..بطريقه أهيه من صجها و أحنا نغشي من الضحك عليها...لأن ببساطه الموت حق علينا كلنا...فما له داعي هالخوف كلّه منّه...بس أهيه البنت تضحك...و أحنا الزغول نعرف نقطة ضعفها هذي و نقعد نطفرها على هالموضوع لما تطلع من طورها...و بعدين نستسلم و نغير الموضوع...المهم قاعده أكلمها ما أدري شنو قالت لي شان أرد عليها...الحمدالله على كل حال....ما وعيت الاّ واهيه صارخه...لا تقولين هالحشوه...كلام العيايز هذا ما أحبّه...ذبحتونا...كبّرتونا...اللي تشتكي من ركبها...و اللي تشتكي من معدتها...واللي فيها بداية الزهايمر...و الحين قمتوا اتكلمون مثل العيايز....فكّونا من الهالموديل...تونا صغار...كل هذا أهيه قاعده تهذر... وأنا غشيانه من الضحك...لأن كل كلامها صح...فقررنا أن راح نرد نتشبب مرّه ثانيه...و نستمتع

أسوأ شي بالدنيا...لمّا الأنسان يفقد الأمل في الحياة...و يقعد ينتظر لحظة.... موته

http://music.6arab.com/aseel..galby-gena3.ram

أمس كنت قاعده أشوف فيلم أجنبي....صار فيه مقطع...ما أدري ليش بس وايد ركّزت عليه...أنا الحين بقولكم الحوار بين الزوج و الزوجه بس باللهجه العاميه الزوجه: تأخّرت...قعدت أحاتيك الزوج: آسف حبيبتي ما كان قصدي أني أخليش تحاتين تعالوا خل نتخيل لو زوج كويتي قالت له زوجته هالجمله البسيطه شنو ممكن الرد يكون الزوج: شنو أنا ياهل عشان تحاتيني أو الزوج: و أنتي مالش سالفه الاّ تحاتين أو الزوج: كاني....أشتبين وفي حالات الزوج يكون مخمبق....و خايف ينكشف فردود أفعاله ممكن تكون أقوى فقعدت بيني و بين نفسي أضحك على الفرق

يوم الأربعاء اللي فات دلق سهيل...و ما أدري.. من الله...من يدلق سهيل...أستفل...يمكن لأنه مؤشر على نهاية موسم الأجازات الصيفيه...و لأني من عشاق القعده بالهواء الطلق...فلما يدلق سهيل...يصير تغير ملحوظ بالجو و خاصة من تغيب الشمس...المهم أمس الجمعه...كنا بالبحر...البحر كان خيالي من حلاته..بس الغريب فيه كان درجة حرارة البحر....كان غايه و نهايه...أحنا متعودين ان البحر من يصير شهر أغسطس ما ينطب...لأن الواحد يصير كأنه طاب بجدر....بس عموما هالصيفيه...البحر ما كان بالحراره اللي متعودين عليها...و لما صار المغرب...لو مهما أوصف لكم جمال المنظر...البحر دهنه...و هدوء...و الشمس قاعده تغيب...و أهم شئ نسيته...كنّا دابينه وجبتي المفضله...ميد مشوي و مشخول...كانت نهاية أسبوع حلوه...و طبعا الفضل يرجع حق منو؟ زيدون

حدّي منرفزه...حدّي معصبه...زوجي في البيت تعبان...و ماني قادره أروح البيت عشان أقعد معاه...ماكو أحد يمسك مكاني....ودي أقوم و أخلى القرعه ترعى...بس ضميري يأنبني...أنا الحين بين نارين...نار أني أرجع البيت حق زوجي...اللي أهوه رافض أني أقعد معاه...بس أنا أدري أن قاعد يتألم...و نار الدوام اللي معتمدين أعتماد كلّي في أدارتي...و ماكو و لا قطو يمسك مكاني :(

أكره شئ بالدنيا لما الواحد يكتشف أن أعراض التقدم بالسن بدت تطلع عليه....أمس كنت لابسه تنوره...و العصر بدا يقلب الجو رطوبه....شوي..شوي...بدت سيقاني تعورني...لأ..الألم بدا يزيد...و بعدين ركبي...ويييييييييه غميضه علي....ما صار بالليل...الاّ ريولي تشخص و مثلها من يشخص...آلام مبرحه....ما خفت الآلام الاّ لما دفيت ريولي....عقبها شان أطخ...تبون الصج وايد ضاق خلقي على نفسي..لأني حسيت نفسي حالي حال العيايز اللي يلبسون ضبابات على ريولهم عن البروده

تجربه

صباح الخير....أمس حطيت نفسي في موقف كالعاده...خواره...بس ما أدري ليش صار شذي...و لا أدري أشلون مخي وقف عند حقبه معينه....أمس كنت قاعده أكلم زميل قديم من أيام الجامعه واللي لي الحين تربطني فيه علاقة قويه...و كنا قاعدين نتكلم عن الشغل...فسألني عن وحده...هذي الوحده كانت تعتبر أعز صديقه حق حب حياته....و أنا كان عندي كل تفاصيل قصة حبه و حبيبته...بس الأمور ما ضبطت معاهم و كل واحد راح في حال سبيله...المهم أهوه الحين سألني عن صديقة حبيبته السابقه...و طبعا لأني أنا ما أدري شنو كان في مخي أمس...شان أقوله....ويييييييييييييييييه صار كيت و كيت و كيت....حتى مرتك كانت ردة فعلها.....شان يصير لحظة سكوت...صخه...شان يقول لي اشقلتي؟ مرتي؟و غير الموضوع على طول....أنا ما كان قصدي أني أذكره بالموضوع القديم...أهيه حتى مو مرته كانت حبيبته...بس ما أدري شنو اللي ياني و خلاني أقول هالكلمه....والله العظيم عقب ما سكرت التليفون تمنيت أن يكون عندي رقم حبيبته القديمه عشان أقولها ترا أهوه لي الحين ما نساك he didn't get over you....please come back

اليوم و أنا بالطريق حق الشغل...أنا عادة أسمع 88.8 اذاعة مرينا...فمن الصبح المذيعه و المذيع يجرون اتصالات هاتفيه مع المستمعين...و أقزّر فيهم الطريق...المهم اليوم في مستمعه اتصلت و كلمتها المذيعه...و دار حوار بينهم...كلش مو مهم...شان تقولها المذيعه أنتي رايحه الشغل؟ حطي بالك لا تدوسين........أول مره قالت لا تدوسين استغربت و قلت حق نفسي عادي ....بس المذيعه بعدين اسهبت في ذكر مخاطر الدوسه...والمستمعين لا تدوسون...وما أدري شنو هم لا تدوسون...قعدت أفكر لو واحد غير كويتي قاعد يسمع ما ممكن يفهم شنو معناة لا تدوسون...أنا اعتقد المذيع أو المذيعه لازم يلتزمون باستخدام المفردات الصحيحه...يعني كلش ما فيها شى لو قالت حطي بالك لا تسوقين بسرعه...مو صح؟

K & Z

http://1.6arab.com/aseel..elli-kaan(jalsa).ram

http://song4.6arab.com/3abdul-majeed_ma-athker-meta.smil

أمس كان عندي مخطط شيطاني...فقمت و دقيت على صديقتي أم صفنه...و قلت لها عندي مخطط شيطاني...و استنيت عليها....كيت و كيت وكيت...ها اشرايك؟ ردت علي لأ.... انشعمي....هوْ...ليش؟ يا ربــــــــــــــي فيني طاقه...و ماني لاقيه اللي يوجهني...عندكم اقتراحات

يالله يا جماعه...عندي حالة خياليه...أبي أعرف شنو ردود الأفعال...لمّا تصيرون في موقف مشابه...أنزين...شاب و شابه يحبون بعض...و تدور الأيام و ينفصلون عن بعض....و كل واحد راح في حال سبيله...بس أهمه لما افترقوا عن بعض كانوا لي الحين يحبون بعض...بس شاءت الأقدار...المهم ...تمر السنين...و يشوفون بعض صدفه...و أثنيناتهم ما تزوجوا...شنو تهقون ممكن يصير؟

اللي كان أمسي و ماضيي و مستقبل زماني اللي كان أغلى أمل يضوي على دروب الأماني شاءت الأقدار ينسى كل ماضي و الزمن غدّار غير كل شئ فيه في ثواني...اللي كان أمسي أيه يا دنيا علامك؟

أحبابي اللي لهم داخل فؤادي محل يعجبني الكبرياء و الذل في المحبوب ;-)

مغـــــــــــــــــــــــــــــرور

هالأغنيه....من أجمل الأغاني اللي سمعتها في حياتي....ما أدري ليش بس كل ما أسمعها....ترجع ذكريات وايده من أيام الشباب الجميله http://egyptian.salmiya.net/songs/abelhalim/ram/abdelhaleem53

في مدونين (بلوغرز) كل في حالة حب و هيام..من طقة ولاّده...و انضمت لها أمرأه مؤجله...أموت و أعرف منين لهم هالرواق كلّه

طبيعة عملي...تخلي عندي أحتكاك دائم مع عملائي...و الوسطاء في البورصه...و طبعا ما أقدر أعدد الألقاب اللي يعطوني أياها...اللي يسميني أم راشد..واللي يسميني أم شكري...طبعا لي الحين ما أدري ليشو اللي يسميني مديره و طبعا أنا مو مديره و لا قالها الله..لأني ما أواطن أكون مسئوله عن موظفين...المهم..اليوم واحد من عملائي المتحضرين جدا...من صجي ما قاعده أتقشمر...أتصل فيني و أطلق علي لقب حجيه...ما أدري ليش بس و قع هذا اللقب علي كان وايد حلو...لأني تخيلت نفسي بالمكتب...و يمي قوري شاي...واستكانات بو نقيطه و الصبنيه مالت أول الصين....شان يقول لي على بالي بتطفرين لمّا أقولك حجيه..شان أقوله ليش أطفر بالعكس...وايد عجبتني...فمن اليوم صار لقبي مع هالعميل حجيه not bad

الأسبوع اللي فات...أتفقنا أنا و صديقتي أن نبي ندلل نفسنا...احنا سامعين عن صالون نسائي توّه فاتح في الجهراء...صالون المفروض أن على مستوى وايد عالي من الرفاهيه...فأنا ويّاها ما صدّقنا خبر...و رحنا...طبعا تفاجأنا بالصالون...لأن ماشاءالله شي مسكّت...مساحته 750 متر و يتلالا من النظافه و الترتيب...حتى أول ما وصلت...سويت حركه ذكرت فيها الله يذكره بالخير أبو حفص...رحت شيكت الحمّام...لأن هذا راح يكون مقياسي ولاّ عجيب...احنا مادحين لنا الحمام المغربي اللي هناك...لبسنا مايوهاتنا و تزهبنا...حق جلسة التملّخ...أول مرّه في حياتي أحس بالدجاجه لمّا يطبخونها على البخار...و بعدين لما بدت تفرّك ياني احساس الجزره لمّا اتقشر....و آخر لمّا خلاص صرت خرجه...ياني احساس العجينه اللي اترخوط....عقب ما خلّصنا شان يغسلونا بماي ورد...شعور مسكّت...ما أدري شلون بدّلنا أنا و صديقتي و رجعنا الديره...بس كانت خوش رحله تدلل

من زمان ما شفت فيلم حب خفيف طينه...و بنهاية سعيده...يعني لمّا تطلع من السينما تطلع مستشرح...ذبحونا شركة السينما...كلّه أفلام كوارث و قتل....و مغامرات و مؤامرات....ملّيت من هالنوعيه....مع كميّة العنف المنتشره بالعالم الحين...الواحد ودّه يغير جو مو صح؟

عفوا...لقد تعثّر

أنا أعتقد أن هناك مؤامره بين شركتا الأتصالات المتنقله و الوطنيه مع وزارة المواصلات...لأن من أسبوع تقريبا..صار من المستحيل أن اذا استعملت التليفون العادي يلقط....لازم يرد عليك تسجيل صوتي و يقولك عفوا لقد تعثّر مرور مكالمتك...فالحين قمت استعمل التليفون النقال أسهل لي....و زيادة مصاريف حقي

أمس سمعت أغنية أنا ناطر حق نبيل شعيل....وايد عجبتني...بس حسافه... مو لايقه على صوته

ّ

من كم يوم دقت صديقتي علي من الصبح...وبعد تبادل تحية الصباح...قالت لي...فلانه أمس طب علينا في البيت حرامي...هوْ شلون؟ و متى؟...ما يدري الحرامي أن الصيفيه اللي فاتت الحراميه زخّوا تجوريش بكبره؟....يعني ما أمدى يكون عندك شئ حق هالبوقه...ردت علي أنا بحط لافته على بيتنا....لقد تمت سرقة بيتنا فدوروا لكم بيت ثاني الغريب بالموضوع أن بيت صديقتي يقع في اليرموك على الشارع العام...يعني شارع فيه حركه على طول...و الحرامي لمّا طب عليها كانت الساعه 12.15 بالتوقيت الصيفي وايد مبكر لأن لي الحين يكون في خرشه بالشارع....أنا لي الحين مبتهره من يراعة الحراميه اللي ما خافوا...و الحرامي لمّا انحاش كان أكو جيب ينطره بالشارع و نط السور و ركب السياره شلون هاليراعه ما أدري

THANK YOU

This thanks comes from my friend the sweetest smile in Q8 and her sister who I consider her my sister too to everyone who was there to support them....

THANK YOU ALL

العالم قاعد يطبخ....الله يكافينا الشر

توّه واصلتني مسج....تنغصتها حقكم اليوم التجمع على شارع الخليج للأحتفال بذكرى البوزليقه

اليوم فتحت الباب بروح الدوام...و لا...الله كأني داخله جدر....رطوبـــــــــــــــــــــــه طبعا كنت حاسه أن اليوم رطوبه من قمت الصبح وراسي كان منسنس علي....أنا ما أحب الرطوبه....عندي أي نوع من الطقس و لا الرطوبه....لأن أول شي بالنسبه لي...تسبب لي صداع...بالنسبه حق بنات حواء...الشعر يصير قفّه..ماله أشباه...و بعدين بقدرة قادر تسيح الأشابيه على بعض...و اللي يحطون فاونديشن...أقصد كريم أساس...يزيد تلزق وجوهم...و بعدين يا المكيف يصير وايد بارد و أثلج...يا يصيرحر و وقره...و أبق...و بعدين ريحة الجو كلّه مو حلوه...زنشه....و ما راح أتطرق حق شنو تسوي الرطوبه بالرياييل...راح أتركها حق بو جيج لأني أدري أن راح يتفنّن فيها

أنا رحت بيروت في أجازه قصيره مع زوجي هالأجازه كانت مدّتها أسبوع...واما تتخيلون شلون كنت متشيحطه على المجموعه اللي معاي أني بقعد لي يوم الجمعه...و أهمه بيرجعون الأحد و الأثنين..المهم صارت ظروف و اضطريت أني أرجع الكويت..بعد 43 ساعه..بس لو مهما أوصف لكم شلون استمتعت في ال43 ساعه ما أعطيها حقها...يا جماعه بيروت غير....الجو اينّن...المطاعم عجيبه...ال beach clubs تزوغ القلب...و هذا كله رحنا له بهالمده....يعني تقريبا الساعات اللي نمناها 7 ساعات..باليومين بس منتهى النشاط و الحيويه.....هني بالكويت ما تصير القايله الاّ كأنه أحد راشك فليت...مو طبيعي وضعنا و قل خلقنا في الكويت...و هناك خاصة بيروت أنا ما أتكلم عن الجبل حر.....بس بيروت تعطي السائح طاقه ايجابيه مو عاديه...بالضبط مثل الكويت

أسم الله عليك لا يغشى عليك

في مشكله أن المرأه عندنا بالكويت وايد عصبيه...الرياييل خلوه تخلي منهم..كل ما زوجاتهم كلموهم...قالوا بل..بل..بل ما تتنحاشين شراره؟ اي شراره...من شنو؟ منكم اللي تدرس....الأم اللي تودي المستوصف...الأم اللي تروح الجمعيه...الأم اللي تجابل الشغالين في البيت سواء من خدم أو عمال...الأم و فوق كل هذا تداوم الصبح...و تأدي واجباتها الأجتماعيه و الزوجيه والرجال في الكويت يطالعون وجهه مطالع أسم الله عليك لا يغشى عليك

Sorry for the ellegible hand writing.....but i love this song

http://www.zeryab.com/read/samri-fenon/sallemoly_3ala_elly_sam_7aly_fraqah.gif


http://www.salmiya.net/songs/tv-band/ram/tv-band10.ram

This is from Me to All Bloggers

http://song4.6arab.com/rwaished-nawal_e3thereeny(uae4mp3.com).smil

Enjoy....Bye

يا بختكم بتفتكون مني و من حنّتي لمدّة عشر أيام خل أشوف منو اللي بياكل قلبكم الله يخليكم حطّوا بالكم على بعض و عن النجره الزايده TAKE CARE

على الجو اللي برّه لو أحنا أيام المدرسه....شان هدّونا

أول أمس كان عيد زاجنا الثامن...سوّيت احتفال صغير و مفاجئ حق زوجي...طبعا بمساعدة شيخ المدونين زيدون...كان الأحتفال لطيف جدا...و أهم شئ زوجي تفاجئ بالموضوع كله...و كان كافي بالنسبه حقّي أن أصدقائنا تعنّوا و شاركوا بالمناسبه...بس في مجموعه منهم زادوا الشيله أشويه و يابوا لنا هداياأتينّن...ما قصّروا...المهم أمس و صلتني هديه من صديقه وايد عزيزه لي...ما قدرت تحضر المناسبه...نطرت لمّا وصل زوجي البيت...و فتحت الهديه...كانت عباره عن برواز وفيه صورتنا أنا و يا زوجي...و فوق البرواز الأحرف الأولى من أسمائنا.....ما تتخيلون سعادتي بالهديه...قمت أطامر...لأنها عنت لي وايد أشياء...تعرفون في أشياء صغيره ..بس تترك أثر وايد كبير على العلاقه شكرا أم بدر

أستفتاء

منو عجبته أغنية نانسي عجرم الجديده...اللي تافخه براطمها توها فيها...و قصتها أن زوجها لعوبي و بصباص و يحب البنات و منو عجبته أغنية أليسا الجديده...واللي صايره أم فيها...و شايله بيبي يشوّق و ليش؟

يا جماعه حبيت أوضح شئ واحد....أنا مو قاعده أحن و لا قاعده أصارخ...أنا أول أمس كنت متملّله..و ضايق خلقي..لأن البنات مسافرين...و صلت لدرجة أني أكلم نفسي....و نسيت أقولكم أن صديقاتي بيردون باكر...فمشكلتي راح تنتهي..بس أنا اللي مو فاهمته ليش كلكم فهمتوا أني أبي أسافر,,,واللي كنت أقصده أني ولهانه على البنات...لا أكثر و لا أقل

مابي أسافر.....أبي البنات يردّون

بس خلاص ما فيني...حاسّه نفسي بصير مينونه...البنات صديقاتي و عيالهم مسافرين صار لهم أسبوع.....و ماكو الاّ زليخه و صاحبة أجمل ابتسامه في الكويت....و خلّصت كل السوالف معاهم...و خلّصت كل السوالف مع زوجي...ها... و فوق البيعه...أختي عندها امتحانات يعني كلّش مو حولي...و أنا و زوجي و زيدون و شلّتنا قاعدين نشوف بعض كل يوم من يوم الأربعاء...فماكو سوالف...و الله يهداه بو راكان ما كتب شئ مثير للجدل ال 5 أيام اللي طافوا....و محمد عبدالقادر الجاسم كتب مقالته اوّل الأسبوع اللي فات..فتناقشنا و خلّصنا....و صلت مرحله...زوجي يلتفت علي يقولي تحاشيني؟؟؟ فاكتشف أني كنت قاعده أكلم روحي بصوت عالي....لحقوا علي يا الأجواد

شكووووو

أنا وايد مستغربه أن محّد منكم زملائي المدونين تطرّق حق هالموضوع اليوم http://www.alraialaam.com/26-06-2005/ie5/frontpage.htm#01

777

أمس و أنا رادّه من الدوام و على طريق المغرب السريع بين النزهه و القادسيه الساعه 4.10 مساء الاّ سياره توها منقلبه...و الناس قاعدين يحاولون يطلعون الناس اللي فيها وتوها باديه تشب بالسياره نار أنا شنو سويت قمت و دقيت على 777 ردت علي الموظفه شان أقولها أختي في سياره منقلبه و حددت لها الموقع و ذكرت أن السياره باديه تحترق شان ترد بحولك على المطافئ قلت لها ليش تحوليني..أنا قاعده أقولك كيت و كيت و كيت درجة الحراره برّه مليون...و قايله و سياره قاعده تحترق...تصرّفوا بسرعه شان تقول لي لأ...لازم أحولك و حوّلتني شان يرد علي واحد نابغه بالمناطق الكويتيه و الله العظيم أعيد عليه 3 مرات السياره المنقلبه على طريق المغرب السريع بين النزهه و القادسيه تحت جسر المشاة و يرد علي أشلون؟؟؟ القادسيه قبالها حولي و أقول له القادسيه تفصلها عن حولي بالدائري الثالث بس عن النزهه طريق المغرب و مو قادر يفهمني آخر شئ قلت له بين الدائري الثاني و الثالث على طريق المغرب روحوا أعتقد السياره تفحمت الحين قبضوا هذولا 777

جاءنا ما يلي

burakan said... الشيخ راشد الحمودهو سكرتير العائلة الحاكمة ولا تسألني عن صلاحياته لانه هذه خصوصة للعائلة ومحد يدري شنهي لكن الظاهر انه المعني بترتيب شؤون العائلة مبوجيج ظاهرة انه يسجل من منتصف الملعب صحيحة بس طبعا 4من 10في نفس الوقت كان في عبد الله السنعوسي اخو محمد السنعوسي كان يسوي " سلام دنك" بس من عند الدئرة الصغيرة في ملعب السلة ما اعرف شنهو تسميتها الرياضية بس ايضا كان 4 من عشرة 3:21 AM

Bosh Bin 3aqooL

والله ما ودّي أرد لك طلب بس....جنديف سبقني jandeef.blogspot.com

Please read it...I loved it

شــيخ راشــد.. اقـعـد في بيـتكم

عبد اللطيف الدعيج
رد الشيخ راشد حمود الجابر الصباح لم يكن ليستحق ان يسمى ردا لولا الفقرة الاخيرة منه التي لها علاقة بالسياسة اكثر منها بالرياضة. ردود الشيخ راشد «الرياضية» مردود عليها مسبقا، ونفخه في انجازات المرحوم الشيخ فهد الاحمد، رحمه الله، مثل من ينفخ في انجازات عبد الناصر في مصر الخمسينات... لأنه بعده ما خربها. قلناها لمن سماه الشيخ راشد بـ «الصحافي المرموق فيصل القناعي» ـ قبل ما نقول للشيخ راشد ـ ان الفوز بكأس آسيا واولمبياد موسكو الذي يحاول البعض تجييره لحكمة وتفاني الشيخ فهد الاحمد، هو انجاز لفريق المنتخب الذي اعده بروشيتس ـ اذا كنت اذكر اسمه جيدا ـ وتعهده زاغالو، هو فوز فريق جاسم يعقوب وفاروق ابراهيم وسعد الحوطي وعبدالله معيوف واحمد الطرابلسي وابراهيم الدريهم وحمد بوحمد وغيرهم كثيرون ممن كانوا عمالقة، وتم تقزيمهم في عهد الشيخ فهد الاحمد. وبعد استقالاتهم لم تقم للمنتخب قائمة حتى حقق الفوز عبد العزيز المخلد في الاتحاد المعين 85 ـ 87 اما بعد ذلك فنتائج منتخب كرة القدم صفر في صفر.ليس لدينا شك - مثل ما ذكر الشيخ راشد - من ان الشيخ فهد الاحمد صرف الكثير على الرياضة؟ ولكن لدينا الف شك في ان يكون هذا الصرف لصالح الرياضة والرياضيين..!! بل نحن على يقين بان كل ما صرف كان لصالح تجيير الاعوان وشراء المطبلين والمنافقين، وبالذات «المقلقسجية» في شارع الصحافة. اما الحديث عن الدور العالمي للرياضة ومضايقة اسرائيل، فالشيخ راشد مثل غيره ينسب انجازات احمد السعدون إلى الشيخ فهد الاحمد. فاحمد السعدون هو اول من وضع اسم الكويت على الخريطة العالمية، والسعدون، وليس فهد الاحمد كما ذكر الشيخ راشد، من طرد اسرائيل من منتخب آسيا.للمرة الثانية لسنا بصدد مناقشة تاريخ المرحوم الشيخ فهد الاحمد، ونرجو ألا نجبر على ذلك، فالرجل رحل بما له وبما عليه وليس في وسعنا الا الدعوة له بالرحمة، والمطروح للنقاش وضع الرياضة وليس الانجازات «الوهمية» للشيخ فهد الاحمد. فالرجاء عدم الاحراج.الآن نعود الى «ما يسوى» في رد الشيخ راشد وهي الفقرة الاخيرة الخاصة بالتطاول على الاسرة، والتي تضمنت مع الاسف تهديدا اكثر مما تضمنت توضيحا. من المفروض ان اتناول هذا الامر بلباقة وبلين، ان اشيد بدور الاسرة وان استعرض محبتي ووفائي مثل باقي الكويتيين لها. لكن..لا.. للشيخ راشد وامثاله بالذات، ردّي سيكون مناسبا ومباشرا،.. اقعد في بيتكم.. نعم اقعد في بيتكم وإيش لك بالطلايب كلها!.. اذا ماتبي احد يتطاول عليك سهلة جدا جدا جدا.. اقعد في بيتكم.. لا تحكم ولا تقرر، غير المادة الرابعة، وما احد في الكويت راح يكون له درب عليك. اما ان تحكمنا وتحدد مصيرنا ومصير ابنائنا فلا بد ان يكون لنا رأي فيك وفي ما يصدر عنك.. وهذا الرأي شئنا ام ابينا، سيكون متناسبا وانجازاتك..وفي الفترة التي سيطرت فيها الاسرة منفردة على الحكم بعد حل مجلس الامة، وفي الفترة التي ترأس فيها كل ناد وكل هيئة وكل لجنة رياضية شيخ.. في هذه الفترة بالذات سارت امورنا من السيئ الى الاسوأ.. ووصلت الكويت الى الحضيض سياسيا وثقافيا ورياضيا، وما زلنا الى الان نعاني من السنوات العشرين التي سبقت التحرير. سنوات التراجع الاقتصادي والاجتماعي هي السنوات التي عدلت فيها الاسرة منفردة قانون الانتخاب، والسنوات التي حددت فيها الاسرة وحيدة مهام المجلس الوطني، والسنوات التي قادت الاسرة فيها دون شريك او رقيب البلد. سنوات الردة الدينية وسنوات المناخ وسنوات الغزو.هل يمكن للشيخ راشد الحمود ان يفسر لي كيف ان الرياضة كانت في السابق «عادية» فيها شيوخ اداريون وشيوخ لواعيب ايضا ـ «لمن لا يعلم.. فالشيخ راشد نفسه كان لاعب سلة مرموقا وأنا شخصيا كنت استمتع بمشاهدته يسجل من نصف الملعب وهي حركة كان مختصا بها الشيخ راشد» ـ ولم يكن في الامر غرابة او استهجان.. الغريب والمستهجن حدث بعد حل مجلس الامة، حيث صدرت اوامر من «...» باحتلال الاندية والسيطرة على الرياضة. ومن يومها لم تبق لجنة او ناد او لعبة إلا وترأسها شيخ.يهمني مرة ثانية ان اردد للشيخ راشد.. اذا قعدت في بيتكم راح اقعد في بيتنا.. ومتى ما كسرت سيفك راح اكسر قلمي. اما اذا أصررت على ان تحكم وان تحدد مسار الاحداث، فأنا مثلك مصرّ على ان اتناول ما حكمت وما قررت.. سمّهِ نقدا.. سمّه تجريحا.. سمّه تطاولا.. سمّه ما شئت، فما هو عندي الا حرية رأي وما هو في الواقع الا حق تعبير.. وامامك المحاكم.اخيراً، لست معنياً بالتهديد الذي وجهه الشيخ راشد للتجمعات السياسية ولا الاتهام بالخيانة الذي رمى به بعض الناس فلا شأن مباشراً لي في ذلك، ولكن لا يمكن الا القول انه اذا كان هذا تفكير الصف الثاني في الاسرة.. فالله يستر

and this is the link

.
http://www.alqabas.com.kw/writersarticlesdetails.php?aid=6761