في البدايه رفضت أني أكون من المتابعين لمسلسل نور...بس على ما صار شهر يوليو (أمقت هذا الشهر أهوه و أغسطس) رضخت و بديت أتابعه...المشكله الحين صرت مدمنه حق المسلسل..مو عن شي بس صار المسلسل الشي الوحيد اللي أتطلع له في نهاية يومي...فقعدت بيني و بين نفسي أفكر شنو فوائد متابعة مسلسل نور..اللي طلع معاي الآتي
* يخليك تصد عن ترّاهات نوابنا الأفاضل
* موضوع جيد للنقاش بين المتبقين من الصديقات و زملاء العمل اللي لي الحين صامدين بالصيف
* معاملتهم حق بعض (نور و مهند) حيثيه وايد مهمه للمعاير بين الأزواج
* بطء المسلسل يقزّر عليك بطء مرور شهر سبعه و ثمانيه
* تقوية مفرادتنا باللهجه السوريه
مثل ما قلت من قبل...هذا اللي طلع معاي...اللي عنده شي يبي يضيفه...حياه الله
14 comments:
ما حاشنا الفيروس مالكم و لا نبيه يحوشنا، الله يخلي التورنت و الافلام
انا شفت مسلسل مدبلج واحد و اهو المستبد، و بعدها قطعت، ما فيني حيل اصبر 600 حلقة علشان يخلص المسلسل
حمدالله على السلامة
نورت البلوجات والبلوكات :)
hmmm, you are back!!
منوره دائما
ولو الكبير كبير :))
بالنسبه حق مسلسل نور انا مثلج تابعته من الثلث الاخير
من اهم فوائده على المتزوجين
ان الرياييل قامو يدشون حق حريمهم في بوكيه ورد
وان واخيرا صار في ريال بالدنيا يغار منه الرجل الكويتي
و الي ضحكي في الموضوع
و اهني بكون حياديه
ان انا رفيجاتي وايد باطين جبدي من ناحيه اذا يبت طاري ريال يشرب
او فلان يشرب
يسسسسسسفلون فيني و اشلون تسلمين عليه و بلا بلا
اشووووووووووف مهندووو عسل على قلوبهم
من صبااااح الله خير يدردع
و هذولا زايقين عليه !!!!
و الفائده الاخيره
ان نوابنا ماعترضو عليه
لان الدينيييييين يتابعونه
اكثر
و ذلك لان تركيا بلد اسلامي
لووووووووووووول
EXzombie:
أفتكّيت ما طافك شي...أنا كان عندي مسلسل اسمه
The Tudors
المسلسل مسكّت بس خلّصت من الجزئين الأول و الثاني...جان أضطر أني أشوف مهنّد و نور...فلك أن تتخيل شلون نزل المستوى عندي
bo_sale7 :
والله هذي الساعه المباركه اللي أشوف تعليقك عندي
Purgatory:
أي...رجعت
الله يخليك لا تدحر فيني...ما فيني شدّه...كبرت
lawyer:
أهلا و سهلا...أحرجتيني بكلمة الكبير كبير...صايره عندي حساسيه من كلمة الكبر....المهم ما عليج من حجي البنات...واستمتعي بغزل مهند حق نور....يا بختها طاير فيها...بس أقولج شي...الظاهر الرياييل ما أيون الا بالعين الحمرا...من بينت له أنها ملّت منه صار زقيد
الله يعافي نور اللى خلاك تردين تكتبين
بس انا اللى باط جبدى ليش الكل ينتقد مسلسل نور؟
يعنى المسلسلات الامريكية اللى مسكتة؟
بومريوم :
تبي الصج مو نور اللي ردّتني...ولهت عليكم..هذا اللي ردني
;)
و بعدين ما تعرف ربعنا...عقدة الغرب...يعني المفروض اللي بجيلنا محد ينسى مسلسل فالكون كريست و الجميله و الوحش
مو؟
نانو
حدي كيفت يوم دريت إنج رديتي
صج مكانج محد يقدر يمليه غيرج
Thanks for ur return ;)
::
بالنسبة لـ نور ..ما أتابعه لأكثر من سبب
بس أكثر شي مكرهني فيه هوس الناس بمتابعته و الهوشات اللي قاعد تصير بسبته
أول الأيام ما كنت أصدق اللي ينكتب بالجرايد
إلى أن صارت الصكة في بيتنا
خواتي .. ينوا ! وحدة عضّت الثانية و السبة إنهم يتابعون مسلسلين مختلفين بنفس الوقت و نجرة على اللي يحل الريموت قبل !
Broke:
وي سكتي..احنا الحين وصلنا مرحلة
و لا نفس
واللي يتنفّس بصوت عالي...ينزف...ماكو حشيمه
و أنا بعد كيّفت لما شفت تعليقج عندي
;)
welcome back !!
إستانست بقرار عودتك
:)
المسلسل آنا مقاومة متابعته لأني بسرعة أدمن
ومالي خلق يرجعلي إدمان المسلسلات المكسيكية
بس لما دريت أكو حادث وحريجة وبيرجعون حق بعض
شفت الحلقة كاملة والظاهر إن خلاص إنهارت دفاعاتي من بعد ما سمعت مهند يقول ماعيش بدونك نموت مع بعض
بصراحة مشاهدة المسلسل
very relaxing
bora bora:
وااااااااااااااااي
سمعتيه؟!!!!!؟ لما قال لها...بذمتج في ريال كويتي يقول جذي...جان تلاقينه قاب عنها و يقول لها نطريني خل أشوف أحد يفتح الباب...و يخلي و يها فاهي
Post a Comment